NHLOKOMHAKA YA XIFUNENGETO—I YINI LESWI BIBELE YI SWI VULAKA HI TINTSUMI?
Ndlela Leyi Tintsumi Ti Nga Ku Pfunaka Ha Yona
Tintsumi to tshembeka ta khumbeka hi vutomi bya vanhu naswona ti hisekela ku hetisisa ku rhandza ka Yehovha. Loko Xikwembu xi vumba misava, tintsumi ‘ti huwelele hi ntsako, ni vana va Xikwembu hinkwavo va huwelele va dzunisa.’ (Yobo 38:4, 7) Ematin’wini hinkwawo tintsumi ti navele ku “nyangisisa” marito ya vuprofeta malunghana ni vumundzuku bya misava.—1 Petro 1:11, 12.
Bibele yi kombisa leswaku mikarhi yin’wana tintsumi ti sirhelele vagandzeri va ntiyiso hi ndlela yo karhi, leswaku ku hetiseka ku rhandza ka Xikwembu. (Pisalema 34:7) Hi xikombiso:
Loko Yehovha a lovisa miti yo biha ya Sodoma na Gomora, tintsumi ti pfune Lota ni ndyangu wa yena leswaku va baleka.—Genesa 19:1, 15-26.
EBabilona wa khale, loko majaha manharhu ya Vaheveru ma gweveriwe ku hoxiwa ekheleni ra ndzilo, Xikwembu xi ‘rhume ntsumi ya xona kutani xi ponisa malandza ya xona.’—Daniyele 3:19-28.
Endzhaku ka loko wanuna wo lulama Daniyele a hete vusiku hinkwabyo ekheleni ra tinghala, u hlamusele leswaku u pone hikwalaho ka leswi ‘Xikwembu xi rhumeke ntsumi ya xona, yi pfala nomu wa tinghala.’—Daniyele 6:16, 22.
I khale tintsumi ti pfuna vanhu vo tshembeka
TINTSUMI TI SEKETELE VANDLHA RO SUNGULA RA VUKRESTE
Mikarhi yin’wana tintsumi ta Xikwembu ti nghenelerile eka mitirho ya vandlha ra Vukreste loko swi boha leswaku ti hetisisa xikongomelo xa Yehovha. Hi xikombiso:
Ntsumi yi pfule minyangwa ya khotso kutani yi humesa vaapostola lava a va khotsiwile leswaku va ya emahlweni va chumayela etempeleni.—Mintirho 5:17-21.
Ntsumi yi lerise Filipi loyi a ri muchumayeri leswaku a famba hi gondzo leri nga kwandzasi leri a ri suka eYerusalema ri ya eGaza nileswaku a chumayela Muetopiya loyi a ye eYerusalema leswaku a ya gandzela.—Mintirho 8:26-33.
Loko ku fike nkarhi wa Xikwembu wa leswaku vanhu lava nga riki Vayuda va va Vakreste, ntsumi yi humelele eka Korneliyo wa Murhoma loyi a a ri ndhuna ya vuthu enorhweni yi n’wi byela leswaku a vitana muapostola Petro ekaya kakwe.—Mintirho 10:3-5.
Loko muapostola Petro a khotsiwile, ntsumi yi humelele eka yena kutani yi n’wi humesa ekhotsweni.—Mintirho 12:1-11.
NDLELA LEYI TINTSUMI TI NGA KU PFUNAKA HA YONA
A ku na vumbhoni bya leswaku Xikwembu xi tirhisa tintsumi namuntlha leswaku ti pfuna vanhu hi singita hilaha swi hlamuseriweke hakona eBibeleni. Hambiswiritano, loko Yesu a vulavula hi mikarhi ya hina, u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Xana a wu swi tiva leswaku valandzeri va Yesu va endla ntirho lowu ehansi ka nkongomiso wa tintsumi?
Tinsumi ta pfuneta eku chumayeleni ka mahungu lamanene emisaveni hinkwayo
Buku ya Nhlavutelo yi vula leswaku tintsumi a ti ta tirha hi matimba leswaku ti pfuna vanhu va misava hinkwayo ku dyondza hi Yehovha Xikwembu ni hi xikongomelo xakwe hi vanhu. Muapostola Yohane u tsale a ku: “Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo, yi vula hi rito lerikulu yi ku: ‘Chavani Xikwembu mi xi vangamisa, hikuva nkarhi wa ku avanyisiwa hi xona wu fikile, gandzelani Loyi a endleke tilo ni misava ni lwandle ni minseledyana ya mati.’” (Nhlavutelo 14:6, 7) Ku ni vumbhoni byo tala lebyi kombisaka leswaku tintsumi ti le ku seketeleni ka ntirho wo chumayela hi Mfumo emisaveni hinkwayo. Entiyisweni, loko mudyohi un’we a hundzuka kutani a tlhelela eka Yehovha, “tintsumi ta Xikwembu ta tsaka.”—Luka 15:10.
Xana ku ta humelela yini loko ntirho wo chumayela wu fike emakumu? Tintsumi ta ‘mavuthu lama nga etilweni’ ti ta seketela Yesu Kreste Hosi ya tihosi, ku lwa “nyimpi ya siku lerikulu ra Xikwembu xa Matimba Hinkwawo” hi Armagedoni. (Nhlavutelo 16:14-16; 19:14-16) Tintsumi ta matimba ti ta tirha ku dlaya loko Hosi Yesu a “tisa ndzihiselo eka lava va nga . . . ma yingisiki mahungu lamanene malunghana ni Hosi ya hina Yesu.”—2 Vatesalonika 1:7, 8.
Tiyiseka leswaku tintsumi ta khathala ha wena. Ta khathala hi lava va tsakelaka ku tirhela Xikwembu naswona Yehovha u tshama a ri karhi a ti tirhisa leswaku ti tiyisa ni ku sirhelela malandza yakwe lama tshembekaka ya laha misaveni.—Vaheveru 1:14.
Hikwalaho hinkwerhu ka hina hi ni xiboho xa nkoka xo xi endla. Xana hi ta ma yingisa mahungu lamanene lama chumayeriwaka emisaveni hinkwayo? Timbhoni ta Yehovha ta le mugangeni wa wena ti nga tsakela ku ku pfuna leswaku u vuyeriwa eka mpfuno wa tintsumi ta Xikwembu xa matimba hinkwayo.