Ku Dzunisa Xikwembu Xa Ntshembo

“Yehova o v̌urisa, a ku: . . . Hikuv̌a nḍi ta ḍunisa la’v̌a nḍi ḍunisaka, kambe la’v̌a ta ṭongahatiwa.”—1 SAMUEL 2:30.

1. I xivangelo xihi lexi hi nga na xona xo lava ku dzunisa Yehova? (1 Timotiya 1:17; Nhlavutelo 4:11)

HIKWALAHO ka malangutelo lawa hi nga vaka na wona, lama seketeriweke eBibeleni, swa fanela ni ku twala eka hina hi laha ku heleleke ku dzunisa “Xikwembu xa ntshembo,” “Xikwembu lexi nyikaka ntshembo.” (Varhoma 15:13, King James Version; New World Translation) Ha yini swi ri tano? Xana hina, lava hi nga vanhu lava nga nyawuriki, lava nga hetisekangiki, hi nga dzunisa Muvumbi Lonene wa misava hinkwayo hi ndlela yihi? Xana na yena u ta hi dzunisa?

2. Yesu u titwise ku yini ehenhleni ka ku dzunisa loku nyikiweke Xikwembu?

² Hi nga dyondza eka leswi swi humeleleke eka Yesu. Ku hava ni un’we wa hina loyi a a ta landzula leswaku Yesu minkarhi hinkwayo u lave leswaku Tata wakwe a dzunisiwa, a kwetsimisiwa. (Yohane 5:23; 12:28; 15:8) Entiyisweni, Yesu u sole Vafarisi ni vatsari lava ‘chaveke Xikwembu hi milomu ya vona kambe lava timbilu ta vona a ti ri kule na xona.’ Xiya, ku ka va nga dzunisi Xikwembu ku katse minsusumeto na swiendlo leswi nga fanelangiki. (Matewu 15:7-9) Hambi swi ri tano, xana hi nga vula leswaku eku dzuniseni ka Kriste ka Xikwembu, ntshembo wakwe a wu katseka? Naswona Yehova u swi amukerise ku yini ku va la dzunisiwaka hi ndlela yoleyo?

3. Hi swi tivisa ku yini leswaku Yesu a a tshemba Yehova?

³ Yesu u nghenise marito ya Davhida embilwini lama nga eka Psalma 16:10 leyi nge: “Hikuv̌a u nga ka u nga ṭhiki moya wa nga e šiv̌andleni ša v̌afi; u nga ka u nga pfumeri leŝaku muhlawuriwa wa wena a v̌ona ku bola.” Hikwalaho ka leswi a a ri na ntshembo lowu wa ku pfuxiwa eku feni, Yesu Kriste u swi kotile ku vula marito lama tiyisaka nhlana eka mudyohi la vambiweke etlhelo kakwe: “Ndzi tiyisile ndzi ri ka wena namuntlha, u ta va na mina eParadeyisini.” (Luka 23:39-43, NW) Mudyohi yoloye ku nga ri khale u file, kutani a nga swi kotanga endzhaku ka masiku manharhu ku vona xitiyisekiso xa ntshembo wa Yesu wa ku pfuxiwa. Kambe mbhoni leyi voneke hi mahlo yi vikile yi ku: “Hi yena Yesu loyi Xikwembu xi nga n’wi pfuxa eku feni, kutani hinkwerhu hi timbhoni ta mhaka leyi.” (Mintirho 2:31, 32) A wu ri ntiyiso.

4. I ku dzuneka kwihi loku a ku fanela Yesu ni loku a ku amukeleke? (Nhlavutelo 5:12)

⁴ Vunyingi bya vanhu lava tolovelekeke lava Yesu a va chumayeleke byi swi tivile leswaku a a faneriwa hi ku xiximiwa, kumbe ku dzunisiwa. (Luka 4:15; 19:36-38; 2 Petro 1:17, 18) Endzhaku u fe ku fana ni xigevenga. Xana sweswo swi hundzule swilo? Doo, hikuva Yesu a a amukeriwa hi Xikwembu lexi a a xi tshemba. Xisweswo, Yehova u n’wi tlherisele evuton’wini. Ntiyiso wa leswaku “Xikwembu xa ntshembo” xi pfuxele N’wana wa xona evuton’wini ivi xi n’wi ambexa ku ka a nga fi exivandleni xa moya wu komba leswaku Tatana a a hambeta a dzunisa N’wana wakwe. Pawulo u ri: “Hi vona Yesu . . . [a] nyikiwa ku kwetsima ni ku twala swi va harhi ya vuhosi enhlokweni ya yena, hi mhaka ya ku twisiwa ku vaviseka ka rifu; a swi ri leswaku, hi tintswalo ta Xikwembu, a twa nhlomulo wa rifu hikwalaho ka munhu un’wana ni un’wana.”—Vaheveru 2:7, 9; Vafilipiya 2:9-11.

5. Hi yihi ndlela yo hlawuleka leyi Yesu a dzunisiweke ha yona, yi vanga ku dzuneka kwihi loku engetelekeke eka Xikwembu?

⁵ Yesu, loyi a dzuniseke Yehova, u boxe ndlela yin’we yo hlawuleka leyi Tatana a n’wi dzuniseke ha yona. Loko a humelela eka vaapostola vakwe lava tshembekaka, u te: “Ndzi nyikiwile vuhosi hinkwabyo etilweni ne misaveni; yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo K wetsima . . . Vonani, ndzi na n’wina masiku hinkwawo, ku ko ku hela misava.” (Matewu 28:18-20) Kutani Tatana u tlhele a dzunisa N’wana hi ku n’wi nyika vuhosi lebyi hlawulekeke. Byona a byi fanele ku tirhiseriwa vanhu lava a va ta endla ntirho lowu tisaka ku dzuneka eka Loyi Yesu a tikarhatelaka ku n’wi dzunisa. Manuku ke, xana leswi swi vula leswaku hina vanhu lava hi nga hetisekangiki hi ndlela yo karhi hi nga xixima Tatana ivi hi tlhela hi dzunisiwa hi yena?

Vanhu Va Dzunisa Xikwembu

6. Xana swa fanela ku navela ku dzunisiwa, kambe i khombo rihi leri nga kona eka leswi? (Luka 14:10)

⁶ Vanhu vo tala a va ehleketi hi ku dzunisa Xikwembu ku sungula, hikuva va tsakela ngopfu ku kuma ku dzunisiwa ka vona vini. Van’wana va nga ha vula leswaku i ntumbuluko eka hina ku lava ku dzunisiwa. Ku na ntiyiso wo karhi eka leswi, tanihi leswi swi tolovelekeke ku navela ndhuma leyinene, ni ku dzunisiwa ko karhi eka leswi. (1 Timotiya 3:2, 13; 5:17; Mintirho 28:10) Kambe ke, ku navela ku dzunisiwa loku humaka eka vanhu ku nga hundzeletiwa hi ku olova. Leswi swa vonaka eka vanhu lava hlongorisaka ndhuma hi mpimo wihi na wihi kumbe lava nga endlaka xin’wana ni xin’wana leswaku va hlayisa vito lerinene.

7. Ha yini ku dzunisiwa hi vanhu ku ri na ntikelo lowu hikiweke?

⁷ Loko u anakanya ha swona, hambi ku ri ku dzunisiwa lokukulu loku humaka eka vanhu ka nyamalala, hikuva hinkwerhu ha fa hi ku hatlisa. Oho, mianakanyo ya tinhenha ti nga ri tingani yi nga ha xiximiwa swa xinkarhana, kambe vo tala lava feke va rivariwa. I vanhu vangani lava tivaka mavito ya vakokwana-nkulu va vona kumbe lava tivaka leswaku varhangeri va tiko ra vona a va ri vamani malembe ya dzana lama hundzeke? Kahle-kahle, hambi munhu a hanyile kumbe a nga hanyanga a swi hundzuli timhaka. I mfungho wa xinkarhana wa ntshuri eku fambeni ka nkarhi, thonsinyana eku fambeni ka vutomi. Naswona hambi loko a xiximiwanyana endzhaku ka rifu, a nga swi voni. (Yobo 14:21; 2 Tikronika 32:33; Eklesiasta 9:5; Psalma 49:12, 20) Nchumu lowu nga endlaka ku hambana i ku va ni ntshembo lowu Xikwembu xi wu nyikaka, ku xi dzunisa ni ku va la dzunisiwaka. Hi nga vona leswi evuton’wini bya vatirhi-kulobye vambirhi eIsrayele wa khale.

8. Heli u wele eka xirimbana xihi lexi katsaka ku nyika ku dzunisa?

⁸ Heli a a ri un’wana. U tirhele Xikwembu exikhundleni lexi hlawulekeke xa muprista lonkulu hi malembe ya 40 naswona u tlhele a va ni lunghelo ro avanyisa Israyele. (1 Samuel 1:3, 9; 4:18) Hambi swi ri tano, hi ku famba ka nkarhi u kombise ku tsana malunghana ni vana vakwe Hofni na Fineas. Hambi leswi a va ri vaprista, va tirhise xikhundla xa vona hi ndlela yo biha hi ku yiva swiyenge swa magandze-10 na hi ku nghenela vunghwavava. Loko tata wa vona a nga endlanga nchumu ku va sola, Xikwembu xi vule leswaku Heli ‘u hambetile a dzunisa vana vakwe ku tlula xona.’ Yehova a a tshembise ku hambeta ni vuprista bya Aroni, kambe a a ta susa yindlu ya Heli exikhundleni xa muprista lonkulu. Ha yini? Xikwembu xi hlamuserile xi ku: “Hikuv̌a nḍi ta ḍunisa la’v̌a nḍi ḍunisaka, kambe la’v̌a nḍi sanḍaka v̌a ta ṭongahatiwa.”—1 Samuel 2:12-17, 29-36; 3:12-14.

9. Samuyele u nyikiwe nkarhi wo dzunisa Yehova hi ndlela yihi?

⁹ Hi laha ku hambaneke a ku ri na Samuyele. Kumbexana wa swi tiva leswaku vatswari vakwe va n’wi tise a ha ri ntsongo leswaku a ta tirha etabernakeleni eShilo. Hi vusiku byin’wana Yehova u vulavule ni xihlangi lexi. U nga ha tsakela ku hlaya mhaka leyi eka 1 Samuel 3:1-14, u anakanya ku pfuxiwa ka xifanyetana lexi, hayi hi ku pfuma lokukulu, kambe hi rito ro olova leri a ehleketeke leswaku i ra Heli la dyuhaleke. Kutani ehleketa ndlela leyi swi faneleke swi chavise ha yona eka muntshwa Samuyele ku boheka ku byela muprista lonkulu la dyuhaleke hi ta ku tiyimisela ka Xikwembu ku xupula yindlu ya Heli. Hambi swi ri tano Samuyele u swi endlile, u dzunise Xikwembu hi ku tshembeka.—1 Samuel 3:18, 19.

10. Loko xi amukela ku dzunisiwa, Xikwembu xi dzunise Samuyele hi ndlela yihi?

¹⁰ Samuyele u dzunise Yehova hi malembe yo tala tanihi muprofeta, naswona Xikwembu xi n’wi dzunisile. Xiya leswi eka 1 Samuel 7:7-13. Yehova u amukele xikhongelo xa Samuyele hi ku anghwetla xa mpfuno wo hlula Vafilista. Xana a wu nga ta titwa u dzunisiwile ku va ni ku xiyiwa ko tano loko kwetsima? Loko vana va Samuyele va nga byi landzelanga vurhangeri byakwe, Xikwembu a xi n’wi fularhelanga hi laha xi fularheleke Heli ha kona. Leswi entiyisweni a swi ri hikwalaho ka leswi Samuyele a endleke hinkwaswo leswi a nga swi kotaka ku dzunisa Xikwembu. Loko a kombisa leswi ku ya emahlweni, Samuyele u sole xikombelo xa vanhu xa hosi ya munhu. (1 Samuel 8:6, 7) Xikwembu xi tirhise Samuyele ku tota Sawulo na Davhida. Eku feni ka Samuyele, Israyele u n’wi xiximile hi ku rila. Hambi swi ri tano, xa nkoka swinene, Xikwembu xi n’wi dzunisile hi ku n’wi boxa eBibeleni exikarhi ka vavanuna va ripfumelo lava nga ta katekisiwa hi ku pfuxiwa eku feni ni swilo leswinene leswi Xikwembu xi va hlayiseleke swona. (Psalma 99:6; Yeremia 15:1; Vaheveru 11:6, 16, 32, 39, 40) Xana leswi a swi kombi swona leswaku ku dzunisa “Xikwembu xa ntshembo” i swa nkoka lowukulu?

Xana U Ta Dzunisa “Xikwembu Xa Ntshembo”?

11, 12. I yini lexi hi faneleke ku xi xiya malunghana ni ku dzunisa Yehova, naswona hi yihi ndlela yin’wana eka hina yo endla sweswo?

¹¹ Timhaka ta Yesu na Samuyele, ku nyika swikombiso swimbirhi ntsena swa Bibele, ti tiyisa leswaku vanhu va nga veka ku dzunisa ‘Xikwembu xa vona xa ntshembo’ tanihi mhakankulu evuton’wini. Naswona timhaka teto timbirhi ti komba leswaku hi ku endla ka hina tano hi nga lava ni ku amukela ku dzuneka loku humaka eka Xikwembu hi mfanelo. Kambe xana u nga swi endlisa ku yini leswi hi ku tiyiseka lokunene ka leswaku u ta tsakisa Xikwembu, u ta dzunisiwa hi xona, naswona u ta kuma ntshembo wa wena lowu seketeriweke eBibeleni?

¹² Ku va ni ku chava ka xiviri, loku xiximekaka ko hlundzukisa Xikwembu i ndlela yin’wana. (Malakia 1:6) Entiyisweni hi pfumelelana ni nhlamuselo yoleyo handle ko ba mariri. Kambe ke, tsundzuka vana va Heli. Loko a wu lo va vutisa loko va lava ku dzunisa Xikwembu hi ku xi chava hi ndlela yo xixima, entiyisweni a va ta va va te ina. Xiphiqo xi ta eku hundzuluxeleni ka ku navela ka hina ko dzunisa Xikwembu hi ku xi chava eka swiendlo swa xiviri evuton’wini bya siku na siku.

13. Kombisa ndlela leyi ku navela ku dzunisa Xikwembu hi ku xi chava ku nga hi pfunaka ha yona.

¹³ Loko hi kongomane ni xiyimo lexi ringaka lexi eka xona hi nga yivaka kumbe hi nghenela vunghwavava lebyi nga fanelangiki handle ko va swi tiveka, xana ku navela ka hina ko dzunisa Xikwembu ku ta khumba swiendlo swerhu ke? Hi fanele ku hlakulela ku titwa loku, ‘Hambi loko xidyoho xo tshama xi fihlekile, ku amukela ka mina ka xidyoho xo tano i ku delela “Xikwembu xa ntshembo” lexi ndzi byarheke vito ra xona.’ Naswona ntiyiso hi leswaku xidyoho xi nga ka xi nga tshami xi fihlekile hi laha ku nga heriki, hi laha swilo leswi vana va Heli va swi endleke swi veke tano ha kona. Leswi swi tiyisiwa hi marito ya Pawulo malunghana ni “ku avanyisa loku lulameke ka Xikwembu”: “Hikuva xona xi rihisela un’wana ni un’wana hi ku ya hi mintirho ya yena: Lava tiyiselaka ku endla leswinene, va ri karhi va navela ku va lava kwetsimaka ni lava dzunekaka ni lavo ka va nga ha fi, Xikwembu xi ta va nyika vutomi lebyi nga heriki; kambe lava nga ni moya wa ku tirhandza, va alaka ntiyiso, va fambaka hi ku homboloka, xi ta va hlundzukela ni ku va karihela.”—Varhoma 2:5-8.

14. Hi yihi ndlela yin’wana leyi hi nga dzunisaka Xikwembu ha yona, naswona i yini leswi hi nga ha tivutisaka swona?

¹⁴ Hi tlhelo rin’wana, Pawulo u boxa ku hlanganyela eku ‘endleni ka leswinene,’ leswi dzunisaka Xikwembu ni ku vanga ‘ku kwetsima ni ku dzuneka’ leswi humaka eka xona. Ntirho lowukulu wa muxaka lowu namuntlha hi lowu Yesu a wu boxeke eka Matewu 28:19, 20: ‘Endlani vadyondzisiwa hi vanhu va matiko hinkwawo, mi va khuvula ni ku va dyondzisa ku hlayisa swilo hinkwaswo leswi ndzi mi leriseke swona.’ Emisaveni hinkwayo, timiliyoni ta Timbhoni ta Yehova ta gingiriteka entirhweni lowu wo dzunisa Xikwembu wa ku chumayela ni ku dyondzisa. Vo tala va tikarhata leswaku va va vatirheli va nkarhi hinkwawo tanihi maphayona, exisekelweni xa nkarhi hinkwawo kumbe enkarhini wo wisa entirhweni wo tihanyisa kumbe exikolweni. Hi ri karhi hi tsundzuka leswi, un’wana ni un’wana wa hina a nga xiya ndlela leyi a yimaka ha yona malunghana ni ntirho lowu hi laha ku pfunaka. Hi xikombiso, u nga ha vutisa u ku, ‘Xana ndzi dzunisa “Xikwembu xa ntshembo” hi ku hlanganyela hi xitalo entirhweni wo chumayela?’

15. Ku humelele yini eka Vakriste van’wana malunghana ni ku dzunisa Yehova hi vutirheli bya le rivaleni?

¹⁵ Vakriste van’wana lava hi malembe yo tala a va ri vachumayeri lava gingiritekaka va tsanile hakantsongo-ntsongo. Va nghene eka mukhuva wa ku va ni ku hlanganyela lokuntsongo ntsena kumbe ka xiwelo entirhweni wa nkoka wo endla vadyondzisiwa. A hi vuli vona vanhu lava nga ni mindzilakana ya nyama ni lava va endlaka swintsongo hikwalaho ka mimbuyelo ya ku dyuhala. Handle ka volavo, ku tsana ka vonaka exikarhi ka Timbhoni to karhi ta malembe yo hambana-hambana. Lexi tsakisaka, Pawulo a a nga kombeteli eka ntlawa wo karhi wa malembe loko a tsundzuxe Vakriste ehenhleni ka ku ‘hela matimba.’ Kambe, ku nga khathariseki malembe ya munhu, ntiyiso wa mhaka hi leswaku ku hlanganyela nkarhi na nkarhi evutirhelini ku lava matshalatshala. Hi laha swi humeleleke khwatsi ha kona esikwini ra Pawulo, van’wana namuntlha va ri, ‘Ndzi endle xiyenge xa mina hi malembe yo tala, kutani sweswi Vakriste lavantshwa va nga tikarhata.’—Vagalatiya 6:9; Vaheveru 12:3.

16. Ha yini hi nga ha pfunekaka hi ku tikambela hi hexe emhakeni leyi?

¹⁶ Lava va khumbiweke hi ndlela leyi entiyisweni i vantsongo, kambe u nga ha vutisa u ku, ‘Xana ndzi xiya mboyamelo wihi na wihi wo tano eka mina hi xiviri? Ku hlanganyela ka mina evutirhelini ku ringanisa ku yini na lokuya ka khale?’ Hambi loko ku tsana ko karhi ku endlekile kumbe e-e, hinkwerhu hi fanele ku tsundzuka leswaku ‘Xikwembu xa hina xa ntshembo’ xi tshembisa leswaku “ku kwetsima, ni ku dzuneka, ni ku rhula, ku ta nyikiwa hinkwavo lava endlaka leswinene.” (Varhoma 2:10) Pawulo u tirhise rito ra Xigriki leri vulaka “ku tirha xanchumu, ku humesa, ku endla.” I swa nkoka swonghasi leswaku hi papalata leswi weleke Vafarisi ni vatsari, lava va dzuniseke Xikwembu hi xivumbeko xa ntirho wa milomu ntsena! (Marka 7:6; Nhlavutelo 2:10) Entiyisweni, loko hi hlanganyela hi ku gingiriteka swi huma embilwini evutirhelini bya le rivaleni, hi tiyisa eka hina ni le ka van’wana leswaku hi na ntshembo wa xiviri. Hi dzunisa Muvumbi ni Munyiki wa hina wa vutomi. Naswona hi nghena enxaxamelweni wa ku dzunisiwa hi yena, sweswi na hi laha ku nga heriki.—Luka 10:1, 2, 17-20.

Hi Rifuwo Ra Hina

17, 18. Hi yihi ndlela yin’wana leyi hi nga dzunisaka Xikwembu ha yona, naswona ha yini ku ala ku endla tano swi nga tirhi?

¹⁷ Malunghana ni ndlela yin’wana leyi hi nga dzunisaka ‘Xikwembu xa hina xa ntshembo’ ha yona, Swivuriso 3:9 swi ri: “Ḍunisa Yehova hi rifuwo ra wena, ni ŝirangana ŝa hikwaŝo le’ŝi ku taleleke.” Spurrell u hundzuluxela ndzimana leyi hi ndlela leyi: “Kwetsimisa Yehova hi rifuwo ra wena, na hi leswi antswaka swa ku andzeriwa ka wena hinkwako.”—A Translation of the Old Testament Scriptures from the Original Hebrew.

¹⁸ Tanihi leswi vafundhisi vo hambana-hambana va veke lava dumeke hikwalaho ka mahanyelo ya vona ya makwanga ni ya rifuwo leswi nga hava makumu, vanhu vo tala va kanakana ku nyikela etikerekeni ni le ka tinhlengeletano ta vukhongeri leti xikongomelo xa tona xi vonakaka kahle ku ri ku kuma rifuwo ntsena. (Nhlavutelo 18:4-8) Hambi swi ri tano, ku tirhisiwa ko tano loko biha, a ku ku hundzuli ku tirha ka Swivuriso 3:9. Ku pfumelelana ni ndzayo yoleyo yi huhuteriweke, hi nga tirhisa “rifuwo” ra hina ku “ḍunisa Yehova, ‘Xikwembu xa hina xa ntshembo’ hi ndlela yihi?

19. Kombisa ndlela leyi van’wana va tirhiseke Swivuriso 3:9 ha yona.

¹⁹ Timbhoni ta Yehova ti kuma leswaku nhlayo leyi kulaka ya vanhu lava amukelaka rungula ra Mfumo yi lava ku kurisiwa ka Tiholo ta Mfumo kumbe ku akiwa ka letintshwa. Manuku ke, hi leyi ndlela yin’wana yo “kwetsimisa Yehova hi rifuwo ra wena.” Lavantsongo ni lavakulu va hlanganyerile eku endleni ka leswi, ku fana ni ku tiyimisela ku nyikela etimalini to aka hi munhu hi xiyexe. Ku namarhela swiboho swo tano swa xihundla ku nga ha lava ndzayo ya munhu hi xiyexe kumbe ku tikarhata ko karhi, ngopfu-ngopfu loko ku kunguhatiwa ni ku hetiwa ka muako swi teka nkarhi wo leha. (2 Vakorinto 9:6, 7) Hambi swi ri tano, ku tirhisa timali hi ndlela leyi hakunene swi dzunisa Yehova, hikuva Tiholo ta Mfumo i swivandla leswi Vakriste va n’wi gandzelaka eka swona ni laha vona ni vanakulobye va kumaka vutivi bya Xikwembu. Marito ya Yesu eka Matewu 6:3, 4 ya hi nyika xivangelo lexinene xo tshemba leswaku Xikwembu xi ta dzunisa lava va xi dzuniseke hi ndlela yoleyo.

20. (a) Hikwalaho ka yini ku tikambela ku fanela eku tirhiseni ka Swivuriso 3:9? (b) I swivutiso swihi leswi hi nga tivutisaka swona?

²⁰ Hambi swi ri tano, rito ra xitsundzuxo hi leri: Vafarisi ni vatsari, lava Yesu a vuleke leswaku a va nga rhangisi ku dzunisa Xikwembu, va tiyisekile leswaku va va vo sungula ku pfuneka hi rifuwo ra vona. Kutani ndzayo leyi nga eka Matewu 15:4-8 yi bumabumela leswaku hi tikambela malunghana ni ku ‘dzunisa Yehova hi rifuwo ra hina.’ (Yeremia 17:9, 10) Hi xikombiso, Mukriste loyi a veke la fumeke hi ndlela yo karhi hi ku tirhisa bindzu rakwe a nga ha tsongahata ku hambeta kakwe a tirha nkarhi hinkwawo leswaku a kuma leswi engetelekeke. A nga ha ku, ‘Van’wana va nghenela vutirheli bya vuphayona kumbe va rhurhela ku ya tirha laha vachumayeri va lavekaka kona ngopfu, kambe ndlela ya mina leyi hlawulekeke yo tirhela Xikwembu i ku hola mali yo tala ivi kutani ndzi va ni swo tala swo swi nyikela.’ Minyikelo ya yena yi nga ha endla swo tala leswinene. Kambe a nga ha tivutisa kahle a ku, ‘Xana mahanyelo ya mina ya munhu hi xiyexe ya kombisa leswaku ku tirhisa mali ku dzunisa Xikwembu i nsusumeto wa mina lowukulu wo hola mali yo tala ngopfu?’ (Luka 12:16-19; ringanisa Marka 12:41-44.) Naswona, ‘Xana ndzi nga lunghisa timhaka ta mina leswaku ndzi va ni xiyenge lexikulu xa munhu hi xiyexe entirhweni wa nkoka swinene wa siku ra hina—ndzi twarisa mahungu lamanene?’ Entiyisweni, ku nga khathariseki leswi swiyimo swa hina evuton’wini swi nga swona, hi nga kambisisa minsusumeto ni swiendlo swa hina kutani hi vutisa, ‘Xana ndzi nga dzunisa Munyiki wa mina wa vutomi ni “Xikwembu xa ntshembo” hi xitalo hi ndlela yihi?’

21. I langutelo rihi leri hi nga na rona loko hi dzunisa Yehova sweswi?

²¹ Yehova a nge hi khomisi tingana. Mayana langutelo leri tsakisaka swonghasi leswi, sweswi ni ku ya emahlweni eka vumundzuku, a nga ha vulaka eka hina leswi a swi vuleke eka Israyele la tshembekaka a ku: “Hikuv̌a e mahlweni ka mina u ni nkoka, u ni ku ḍuneka, na ŝona nḍa ku ranḍa; nḍi ta ku kuṭula hi v̌anhu, ni v̌utomi bya wena hi matiko.” (Esaya 43:4, Yena Yoloye u tshembisa ‘vutomi lebyi nga heriki eka lava va lavaka ku kwetsima ni ku dzuneka.’ Xitshembiso lexi u xi kongomisa eka lava va tiyiselaka ‘eku endleni ka leswinene.’ Mayana “Xikwembu xa ntshembo“l

A Wu Ta Hlamula Njhani?

◻ Malunghana ni vanhu lava dzunisaka Yehova, i yini lexi hi nga xi dyondzaka eka xikombiso xa Yesu?

◻ Heli na Samuyele va hambanise ku yini malunghana ni ku dzunisa Xikwembu?

◻ Hi tihi tindlela tin’wana leti ha tona u nga andzisaka ku dzunisa ka wena loku u ku tisaka eka Xikwembu, naswona i nhlamulo yihi leyi u nga ha yi amukelaka?

◻ Hi byihi vumundzuku lebyi rindzelaka lava rhangisaka ku dzunisiwa ka ‘Xikwembu xa hina xa ntshembo’?

[Bokisi leri nga eka tluka 20]

MAPAPILA YA MINYIKELO

Hi leswi swikombiso swin’wana leswi humaka eka mapapila lama amukeriweke hi hofisi ya Sosayiti ya Watch Tower, ya le Brooklyn, New York:

‘Vito ra mina ndzi Abijah. Ndzi na malembe ya kaye hi vukhale. Ndzi lava ku mi nyika $4 [R8] ya vamakwerhu lava tirhaka eTiholweni ta Mfumo. Va nga yi tirhisela leswi nga pfuneki nchumu kumbe malekere, a ndzi karhateki.”—Oregon.

‘Mi ta kuma cheke ya mina leyi nghenisiweke. Ndzi hundze malembe ya 96 hi vukhale naswona a ndzi twi kahle, kambe hakunene ndzi tsakela ku yi hlayisela leswi mali ya mina. Ina, ndza swi tiva, ndzi famba hi movha wa khale, naswona vuxika bya mina a ndzi byi heti kona eFlorida kumbe eCalifornia. Ndzi endla swintsongo ngopfu ehenhleni ko endla leswaku mahungu lamanene ya Mfumo ya chumayeriwa hi ku gongondza etimbantini. Kambe hi ku hlayisa mali ya mina ni ku mi rhumela yin’wana, ndzi vona onge ndza ha ri na xiphemu eka wona.’—Ohio.

‘Inkomu eka xin’wana ni xin’wana lexi mi xi endleleke Holo ya Mfumo. Mali leyi [R10] i yo mi pfuna hi tibuku ni Swihondzo swo Rindza leswaku hi ta swi hlaya. Mali leyi yi huma exikoteleni xa mina xa mali (piggybank). Inkomu hikwalaho ka broxara leyi nge Schoolleyi hi byelaka hi ta swidzidzirisi.’

“Amukelani cheke leyi nghenisiweke. Madzana mbirhi ya tidolara [R400] ya yona i ya Mali ya ku Akiwa ka Tiholo ta Mfumo. Leyin’wana yi fanele ku tirhisiwa hi ndlela yihi na yihi leyi mi vonaka yi fanela ku kurisa ntirho wo chumayela.”—Missouri.