Swivutiso Swa Vahlayi

◼ A va ri vamani “lava khume na vambirhi” lava Yesu a humeleleke eka vona, hi laha swi hlamuseriweke ha kona eka 1 Vakorinto 15:5?

Ku humelela loku hlamuseriweke eka 1 Vakorinto 15:5 ku tikomba ku ri loku rhekhodiweke eka Yohane 20:26-29, leyi katseke Tomasi. Hambi swi ri tano, leswi swi kombetela eka vaapostola tanihi ntlawa naswona hi ku fanana swi katse Matiyasi.

Loko a bula hi ku pfuka ka vafi, Pawulo u tsale hi ku humelela ka Yesu eka vanhu endzhaku ka loko A pfuxiwile. Muapostola u vule leswaku Kriste “ú humelele eka Kefasi, endzhaku a humelela eka lava khume na vambirhi. U tlhele a humelela hi nkarhi wun’we eka vamakwavo lava tlulaka 500.”—1 Vakorinto 15:5, 6.

Exikarhi ka lava va n’wi landzeleke tanihi vadyondzisiwa, Yesu u hlawule vaapostola va 12. (Matewu 10:2-5) Yudasi Iskariyota a a ri un’wana wa lava 12, kambe u ve muxengi, u xenge Yesu, ivi endzhaku a tisunga. (Matewu 26:20-25; 27:3-10) Kutani enkarhini wa rifu ni ku pfuxiwa ka Kriste, a ku ri na vaapostola lava tshembekaka va 11 ntsena va lava 12 vo sungula. Yesu u humelele eka vaapostola vo hambana-hambana exikarhi ka ku pfuxiwa ni ku tlhandlukela kakwe etilweni. Endzhaku vaapostola va vone xilaveko xo pfala Yudasi. Hi nkongomiso wa Xikwembu, Matiyasi u hlawuriwile, kutani “a hlayiwa swin’we ni vaapostola lava 11.”—Mintirho 1:6-26.

Xisweswo van’wana va hlamarile leswaku ha yini Pawulo a tsale leswaku Yesu u humelele eka “lava khume na vambirhi,” tanihi leswi enkarhini wolowo Yudasi a a file naswona Matiyasi a a nga si hlawuriwa. Kambe entiyisweni, a ku ri na “vaapostola lava 11” ntsena lava eku sunguleni a va vekiwile ni ku rhumiwa hi Yesu.—Luka 6:13-16.

Swi tolovelekile ku vulavula hi ntlawa hinkwawo hambi loko xirho xin’wana xi nga ri kona. (“Huvo ya vakongomisi yi kunguhatile . . . ” “Huvo ya vakulu yi hlanganile . . . ”) Kutani rito leri nge ‘khume-mbirhi’ ri nga ha va ri tirhisiwe kahle eku hlamuseleni ka ntlawa hinkwawo wa vaapostola, hambi loko un’we kumbe vambirhi va nga ri kona eka xiendlakalo xa kona. (Ringanisa Mintirho 6:1-6.) Loko Yesu a humelele eka vadyondzisiwa ro sungula ekamareni leri lotleriweke, “Tomasi, un’wana wa lava khume na vambirhi, . . . a a nga ri na vona.” Endzhaku ka masiku ya nhungu a a ri kona naswona a a lulamisile ku kanakana kun’wana ni kun’wana. (Yohane 20:19-29) Hambi leswi Matiyasi a a nga si hlawuleriwa ku siva Yudasi enkarhini wolowo, a a ri mudyondzisiwa hi nkarhi wo leha. (Mintirho 1:21, 22) Tanihi leswi a a hlanganyela swinene ni vaapostola vo sungula naswona hi ku anghwetla endzhaku a ‘hlayiweke swin’we’ na vona, nhlamuselo leyi nga laha henhla hi ta ku humelela ka Yesu eka “lava khume na vambirhi” hi ku fanana yi katse Matiyasi.