Yesu Kriste—I Xikwembu, Munhu Kumbe Nthyeketo Ke?

VUYIMBELERI bya Rock lebyi sunguleke eBroadway eNew York City hi 1971 byi tikombe byi ri lebyi kanetanaka, byi vulavula hi laha byi endleke ha kona hi nhloko-mhaka ya vukhongeri. Kambe kumbexana nhloko-mhaka a yi nga ha ri leyi kanetanaka ku fana ni ku tivisiwa ka mfungho wa byona lowukulu.

Rin’wana ra tinsimu leti ti hisaka ta vuyimbeleri ri vutisile ri ku: “Yesu Kriste Mutlangi lonkulu, xana u ehleketa leswaku u leswi va swi vurisaka swona?” Vanhu le ndzhaku eka lembe xidzana ro sungula a va ku Yesu a a ri mani? Yesu hi byakwe u vutise vadyondzisiwa va yena xivutiso xexo ivi a nyikiwa tinhlamulo to talanyana leti hambaneke. (Matewu 16:13, 14) Namuntlha, malembe ya kwalomu ka 2 000 endzhakunyana, ku tiviwa ka Yesu Kriste ka ha ri njhekanjhekisano.

Xana swi na mhaka leswaku Yesu a a ri mani? I vuyelo byihi lebyi ku tivisiwa ka yena ku nga vaka na byona eka hina? Ina, vanhu lava dumeke va masiku lama hundzeke va vumbe matimu ya misava, lawa xisweswo ya hi khumbaka hinkwerhu, hi ku kongoma. Kambe namuntlha va file. Xisweswo, hambi leswi va hi khumbeke hi leswi va swi endleke, va nga ka va nga hi khumbi nikantsongo hi leswi va swi endlaka.

Hambi swi ri tano, emhakeni ya Yesu Kriste xiyimo xi hambane swinene. Timiliyoni ta pfumela naswona ti na vumbhoni lebyi heleleke bya ku pfumela ko tano, leswaku Yesu wa hanya swinene namuntlha, ku nga ri tanihi munhu emisaveni, kambe tanihi moya wa matimba etilweni. Leswi Yesu a a ri karhi a swi endla, ngopfu-ngopfu eka lembe xidzana leri ra vu-20, swi ve ni vuyelo lebyikulu eka vanhu hinkwavo. Ku tlula kwalaho, vuyelo bya Yesu ehenhla ka vutomi bya hina a byi hikeriwanga eka leswi a swi endleke nkarhi lowu hundzeke. Byi fikelela ku katsa ni leswi a swi endlaka sweswi ni leswi, hi ku tsaka, a nga ta swi endla nkarhi lowu taka.

Loko hi tlhelela eka nhloko-mhaka ya hina: Yesu Kriste—I Xikwembu, munhu kumbe nthyeketo ke? Xana u anakanya yini? Yesu Kriste wa nthyeketo a swi ta vula leswaku a a nga ri Xikwembu kumbe munhu, swi endla leswaku ku kambisisa kun’wana ku nga pfuni nchumu. Hi tlhelo rin’wana, hi fanele ku tikarhatela ku dyondza hi ta Yesu loyi a hanyaka ni loyi a nyikiweke matimba hi Xikwembu leswaku a tisa mpfuno lowu nga heriki evanhwini.