‘Kriste, N’wana Wa Xikwembu Lexi Hanyaka’

ENDZHAKU ka loko vadyondzisiwa va yena va vule leswi vanhu a va vula leswaku a a ri swona, Yesu u vutisile: “‘N’wina ke, mi ri ndzi mani xana?’ Kutani Simon Petro a hlamula a ku: ‘U [Kriste], N’wana wa Xikwembu lexi hanyaka.’”—Matewu 16:15, 16.

Xana i Petro ntsena loyi a fikeke eka makumu lawa? E-e! Xiya leswaku i mani un’wana loyi a endleke tano, naswona xiya xisekelo xa vona eku hlamuseleni loku.

VASEKETERI VO SUNGULA: Yohane Mukhuvuri, vadyondzisiwa Nathaniyele na Marta, na Sawulo wa Tarso, exikarhi ka van’wana, hinkwavo a va vitana Yesu leswaku i N’wana wa Xikwembu. (Matewu 14:33; Yohane 1:33, 34, 49; 11:27; Mintirho 9:20) Ntshembo wa vona wu tiyisiwile loko va vona vuprofeta lebyi kombaka Mesiya la tshembisiweke byi hetiseka eka Yesu.

VAKANETI VO SUNGULA: Vayuda lava a va lava ku dlaya Yesu a va n’wi vula N’wana wa Xikwembu, tanihi laha masocha lama a ma ri kona eku vambiweni ka yena ma vuleke ha kona. (Matewu 27:54; Yohane 19:7) Hambi leswi leswi swi nga kombiki ntshembo eka vakaneti vo tano, kambe swi komba leswaku a va swi toloverile leswi van’wana a va vula swona hi Yesu, naswona swiendlakalo leswi nga tolovelekangiki leswi humeleleke eku vambiweni ka yena kahle-kahle swi vangele van’wana va vona ku tlhela va xiya ku kanakanisa ka xikombiso xa yena.

TINTSUMI: Loko yi tivisa ku velekiwa ka Yesu, ntsumi Gabriyele yi n’wi vitane N’wana wa Xikwembu. (Luka 1:32, 35) Hambi va ri vanhu lava nga ni mademona ehansi ka nkucetelo wa tintsumi leto biha va huwelerile va ku: “Mhaka ya wena na hina hi yihi ke, wena N’wana wa Xikwembu?” (Matewu 8:28-32) Hikwalaho ka ku hanya ka Yesu emahlweni ko va munhu etilweni, swi le rivaleni leswaku tintsumi letinene ni leto biha a ti n’wi tiva leswaku a a ri mani.

YESU HI YEXE: Yesu a nga tinyungubyisanga hi leswi a nga N’wana wa Xikwembu hi ku ringeta ku dzunisiwa hi van’wana kumbe ku tlanga hi xikhundla lexi vuxaka lebyi byi xi nyikeleke. Ku hambana na sweswo, hi minkarhi yo tala a a titsongahata a tivula “N’wana-wa-Munhu.” (Matewu 12:40; Luka 9:58) Kambe hi minkarhi yo tala a a amukela leswaku i N’wana wa Xikwembu.—Yohane 5:24, 25; 10:36; 11:4.

YEHOVA XIKWEMBU: I mani loyi a nga hlamuselaka Yesu Kriste hi ku tiyiseka ku tlula Yehova Xikwembu hi yexe? Yehova u tiyisise vumbhoni kambirhi a ri etilweni a ku: “Loyi i N’wananga la rhandzekaka, loyi ndzi n’wi tsakelaka swinene.”—Matewu 3:17; 17:5.

Xikwembu Xi N’wi Amukerile Yesu—Xana Wena Wa N’wi Amukela?

Eka lembe xidzana ro sungula, magidi ya vanhu ya amukele Yesu hi leswi a a ri xiswona: Mesiya la tshembisiweke, kumbe Kriste, loyi a rhumiweke emisaveni ku ta lwela vuhosi bya Yehova ni ku nyikela vutomi bya yena tanihi nkutsulo wa vanhu. (Matewu 20:28; Luka 2:25-32; Yohane 17:25, 26; 18:37) Loko va langutane ni nkaneto lowukulu, vanhu a va nga susumeteleki ku va valandzeri va Yesu loko va nga tiyisekanga hi nhlamuselo yakwe. Hi ku hiseka na hi xivindzi, va amukele ntirho lowu a va nyikeke wona wa ku “hundzula vamatiko hinkwavo leswaku va va vadyondzisiwa.”—Matewu 28:19.

Namuntlha, timiliyoni ta vadyondzisiwa va Vukriste ta swi tiva leswaku Yesu a hi nthyeketo. Va n’wi amukela tanihi Hosi ya le tilweni ya Mfumo wa Xikwembu lowu tlhomiweke, loyi sweswi a yaka emahlweni a fuma misava ni timhaka ta yona. Hulumendhe leyi taka ya Xikwembu i mahungu lamanene hikuva yi tshembisa ntshunxeko eka swiphiqo swa misava. Vakriste lava va ntiyiso va kombisa nseketelo wa vona wa mbilu hinkwayo wa Mufumi wa Xikwembu la hlawuriweke hi ku twarisa “Evangeli leyi ya Mfumo” eka van’wana.—Matewu 24:14.

Lava seketelaka lunghiselelo ra Mfumo ha “[Kriste], N’wana wa Xikwembu lexi hanyaka,” va ta hanya va tsakela minkateko leyi nga heriki. Minkateko leyi na wena yi nga va ya wena!

[Marito lama tshahiweke exihlokweni lama nga eka tluka 8]

Timiliyoni leti a ti nga tiyiseki hi nhlamuselo ya Yesu sweswi ti ni vun’we eku n’wi seketeleni tanihi Mufumi wa Mfumo wa Xikwembu

[Xifaniso lexi nga eka tluka 7]

Petro u hlamusele Yesu tanihi “[Kriste], N’wana wa Xikwembu lexi hanyaka.” Kutani timbhoni ta Yehova leti tlulaka 3 000 000 namuntlha ti endla tano