Hi Ta N’wi Hakerisa Ku Yini Yehova Ke?

LOKO munhu a va ni ku hi tsakela ka xiviri, loku kufumelaka, kumbexana a endla xo karhi ku hi pfuna, hi endlisa ku yini ke? Tintswalo ni ku hanana hi ntolovelo swi tisa nhlamulo, a swi yi tisi xana? Kutani ke, ku titwa ka hina hi kwihi eka Yehova, Xikwembu xa hina, hikwalaho ka tintswalo ta yena ta nkarhi hinkwawo eka hina?

Swi olova ngopfu, tanihi leswi hi hatlisisiwaka hi mintshikilelo ya siku rin’wana ni rin’wana ya vutomi, ku honisa mpfuno wa Yehova, minkarhi yin’wana hambi ku ri ku endla onge a hi nkhensi hi xiviri. Hikwalaho, hi endla kahle ku yimanyana ivi hi anakanyisisa hi xivutiso xa mupisalema lexi nge: “Nḍi ta tlangela Yehova hi ndlela yini? Mikateko hikwayo ya yena yi le henhla ka mina.” (Psalma 116:12) Hi ta hlamula hi tindlela tihi xana?

Mimpfuno Leyi Humaka Eka Yehova

Handle ka nyiko ya Yehova ya Rito ra yena, ku nga Bibele, a hi ta va hi lahlekile swonghasi! Vavanuna ni vavasati va xivindzi eka malembe xidzana lama hundzeke va nghenise vutomi bya vona ekhombyeni leswaku va kuma ni ku hlaya buku leyi, naswona hi kume ku twisisa leswaku ha yini. Vanhu va Xikwembu hi minkarhi hinkwayo va tlangele Matsalwa lama huhuteriweke, hi ku tiva ndlela leyi ma pfunaka ha yona ku “dyondzisa, ni ku laya, ni ku ololoxa, ni ku tolovetisa leswo lulama.”—2 Timotiya 3:16.

Hambi swi ri tano, ha swi tiva leswaku ku va ‘lava tihlomiseleke hi xitalo ku endla ntirho wun’wana ni wun’wana lowunene,’ hi lava leswi tlulaka vutivi bya le nhlokweni ntsena bya Bibele. (2 Timotiya 3:17) Swi huma ematimbeni ya moya lowo kwetsima wa Xikwembu leswi mpfuno wu tisiwaka evuton’wini bya hina, naswona yinhla leyi yi kokeriwa eka nyingiso wa hina hi marito ya Yehova lama tsakisaka hi ku tirhisa muprofeta wa yena Esaya a ku: “Kutani ŝeŝi Yehova Šikwembu o nḍi ruma nḍi ri ni moya wa yena. Ku v̌ula ŝeŝo Yehova Mukuṭuri wa wena, Muhlawuriwa wa Israel a ku: Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona. Mawako! loko ngi u yingisa milawu ya mina! Ku rula ka wena ku ta v̌a tanihi nambu, ku lulama ka wena ku ta fana ni magandlati ya lwandle.” (Esaya 48:16-18) Hi ku tirhisa moya wa yena lowo kwetsima, ku hlanganisa ni Rito ra yena, Yehova wa hi kongomisa leswaku a hi pfuna, naswona vuyelo i ku rhula ni ku lulama.

Nakambe, matimba ya Yehova lama tirhaka ma tirha hi laha ku humelelaka ku hi pfuna hikuva masungulo ma andlariwile, nhlengeletano ya la misaveni, leyi moya lowo kwetsima wu tirhaka ha yona. Eka 1 Vakorinto ndzima 12, Pawulo u fanisa bandlha ra Vukriste ni huvo naswona eka ndzimana 7 u ri: “Munhu un’wana ni un’wana u pfuleteriwa swin’wana hi moya, leswaku swi ta pfuna hinkwavo.” U ya emahlweni a kombisa ndlela leyi hi vuyeriwaka ha yona hi ku va xiphemu xa nhlengeletano ya Xikwembu ya la misaveni.

Malembe ya ntlhanu kumbe ku tlula endzhaku ko tsala marito lawa, u tsale papila ra yena ro ya ebandlheni ra le Efesa laha eka rona a hlamuseleke vuyelo bya ku hlanganisiwa ni lunghiselelo rero ra la misaveni. Hambi loko leswi a swi vuleke swi tirhe eka Vakriste lava totiweke ku sungula, xana lava va “ntshungu lowukulu” namuntlha na vona ‘a va lulamiseleriwi ntirho wa vutirheli,’ va va ‘vavanuna lava vupfeke’ emoyeni, lava tiyeke eripfumelweni, ‘va nga ha vi swihlangi,’ naswona ‘hi rirhandzu va kula eka swilo hinkwaswo eka loyi a nga nhloko, Kriste ke’? (Nhlavutelo 7:9; Vaefesa 4:12-16) Hinkwerhu ka hina hi na xivangelo lexinene xo va lava nkhensaka.

La hlamuseriwaka kun’we ni bandlha ra Vukriste i nandza lowo tshembeka lowa vutlhari, loyi ntirho wa yena, ku hi wundla emoyeni, ka ha riki vumbhoni byin’wana bya leswaku Yehova wa hi pfuna. (Matewu 24:45, 46) Sweswi hi fikile enkarhini lowu vhumbiweke wa vukona bya N’wini. Xana “nandza” wa wu endla ntirho wa yena? Ku nga khathariseki ku dzwihala ka ‘masiku lawa ya makumu,’ xana hi tale hi ntshembo? Xana hi ni xikongomelo lexi nga ni ntikelo evuton’wini? (2 Timotiya 3:1-5; Varhoma 5:5; 1 Timotiya 4:10) Ina! Naswona ripfumelo ra hina a ko va ku kumbetela ntsena kambe i xitiyisekiso lexi tiyeke lexi akiweke ehenhla ka ripfumelo, lexi nakambe xi sekeriweke ehenhla ka vumbhoni lebyi tiyeke.—Vaheveru 11:1.

Manuku ke, hi laha swi xiyekaka ha kona, Yehova, Mupfuni wa hina Lonkulu, u hi nyike swo tala swinene leswi hi nga vaka lava nkhensaka ha swona. Hi laha ku fanelaka xivutiso xa landzela:

Ndzi Ta Hakela Yehova Hi Yini?

Xo sungula, hi fanele ku twisisa leswaku Yehova a nga lavi nchumu eka hina. Hi yena la vulaka leswaku, “Silver i ya mina, ni nsuku i wa mina,” hi laha ku fanaka “ni ŝihari hikwaŝo ŝa tinṭhav̌a ŝa madzana-dzana.” (Hagai 2:8; Psalma 50:10; Yobo 41:11) Leswi swi vula leswaku ku hava ndlela leyi hi nga ‘xavaka’ tintswalo ta Yehova ha yona; kambe hi khutaziwa ku endla minyikelo ya ku tirhandzela eka yena. (Ringanisa 1 Tikronika 29:14.) Hambi swi ri tano, ku ni swiyimo swo karhi eku pfumeleriweni ka hina ku nyikela tinyiko eka Yehova.

“Nḍi ta hlanganisa Yehova ha yini, nḍi v̌a nḍi korama e šiv̌andleni le’ši tlakukeke ša Šikwembu? Šana nḍi ta ṅwi hlanganisa hi maganḍelo la’ma hisiwaka, ni marole ya lembe riṅwe? Šana Yehova o ta ṭakisiwa hi makhuna ya makume ya madzana, ni madzana ya madzana ya milambu ya mafura? Šana nḍi ta humesa ṅwana wa mina wa mativ̌ula e maṭhaṅweni ya ku homboloka ka mina, ni loyi a humeke khurini ra mina hikwalaho ka šidyoho ša moya wa mina? Wena munhu u tiv̌isiwile le’ŝi lulameke, ni leŝi Yehova a ŝi lav̌aka e ka wena; hi leŝaku u endla le’ŝi lulameke, u ranḍa tintŝalo ni ku famba hi ku tiṭongahata e mahlweni ka Šikwembu ša wena.”—Mikea 6:6-8.

Eka leswi hi dyondza leswaku swilaveko swa Yehova minkarhi hinkwayo swa twala, minkarhi hinkwayo swa koteka. Tlhandla-kambirhi, Yesu u kombetele eka mhaka ya nkoka swinene ya leswaku vuxaka bya hina na Yehova kun’we ni vanhu-kulorhi byi fanele byi va lebyinene leswaku minyikelo ya hina yi ta amukeleka. (Matewu 5:23, 24) Loko hi andlale masungulo lamanene, manuku hi nga swi vona leswaku hinkwerhu ka hina hi na xo karhi xo xi nyika Yehova, ku tlangela vunene bya yena eka hina.

Hi Nga Swi Tirhisisa Ku Yini Leswi Hi Nga Na Swona?

Swi lava nkarhi, matshalatshala nkarhi wun’wana ni mali, kambe mawaku lunghelo ronghasi leri ku nga swona ku yimela Yehova entirhweni wo chumayela! Gandzelo leri ra ku dzunisa hi xin’wana lexi hinkwerhu ka hina hi nga xi nyikaka Yehova. Leyi i ndlela leyi nkulu un’wana wa phayona la nga ni vana vanharhu lavantsongo a titwaka ha yona mayelana na wona:

“Ku hlanganyela eka lunghelo ra ntirho wa nkarhi hinkwawo swi tlula ku tinyikela kwihi na kwihi ka munhu hi xiyexe—naswona ku tlula kwalaho—hikuva hi yona ndlela leyi humelelaka swinene ya ku nyikela ku dzuneka eka Tata wa hina wa le matilweni. Nakambe, swi pfumelela mina hi mpimo wo karhi ku n’wi nkhensa hikwalaho ka tintswalo ta yena leti nga fanelangiki leti kombisiweke eka mina hi ku kongoma.”

Nsati wa yena wa engetela a ku: “I lunghelo hakunene ku pfuna nuna wa mina ku phayona. Swi pfuna ndyangu hinkwawo ku va ni xiphemu lexikulunyana evutirhelini, naswona ku vona voko ra Yehova leri nga ni rirhandzu ri hi lunghiselela hi ndlela ya moya ni ya nyama swi hi endla hi lava ku n’wi dzunisa hi laha ku engetelekeke.”

Sosayiti ya Watch Tower yi hangalase Tibibele ni tibuku ta Bibele hi ku tirhandzela ku tlula malembe ya dzana naswona yi ti kandziyisa emichinini ya yona ku sukela hi 1920. Nkarhi ni matshalatshala ya vatirhi va ku tirhandzela lava tirhaka eBethele ku humesa tibuku leti hinkwato hi nga na tona namuntlha, kun’we ni lamaya ya vahuweleri va bandlha ni maphayona yo ti hangalasa, entiyisweni, i munyikelo wun’wana entirhweni wa nkoka wo chumayela.—Matewu 24:14.

Nakambe, Vakriste ematikweni lama yimeke kahle swinene hi swa ikhonomi va tsaka ku tiva leswaku muxaka wa tinyiko ta vona ta mali, lowu rhumeriweke ehofisini ya rhavi ra Sosayiti ya Watch Tower etikweni ra ka vona, wu pfuna vo tala va vamakwavo eswiphen’wini swin’wana swa misava ku tirhisa nkarhi wa vona hinkwawo eku chumayeleni ni le ku endleni ka vadyondzisiwa. Varhumiwa lava humaka eXikolweni xa Bibele xa Gilead xa Watch Tower, valanguteri va xifundza ni va muganga, ni maphayona yo hlawuleka hinkwavo va pfuniwa ku ya emahlweni ni ntirho wa vona wa nkarhi hinkwawo hi minyikelo leyi ya ku tirhandzela.

Kumbexana a swi koteki eka wena ku tirha eBethele kumbe tanihi xirho xa Nongonoko Wa Vatirhi Va Ku Tirhandzela Wa Ku Aka Wa Misava Hinkwayo. Kambe kumbexana u na yona mali leyi nga seketelaka lava va ngheneleke ntirho lowu kambe lava pfumalaka mali leyi “engetelekeke” ya ku tihlayisa eka wona. Hikwalaho nsivo lowu pfunaka wu nga humelela, hi laha swi hlamuseriweke ha kona eka 2 Vakorinto 8:14. Mapapila lama fambaka ni minyikelo yo tano ya katse leswi landzelaka leswi humaka eka makwerhu un’wana wa xisati la kuleke la tsaleke a ku:

“Ndzi nkhensa swinene minkateko hinkwayo leyi Yehova a ndzi nyikaka yona, naswona ndzi khongelela miako leyi akiwaka ni nhlengeletano nkarhi na nkarhi.”

Makwerhu un’wana wa xisati u te: “Ndzi hlawule ku tirhisa swimalana leswi ku endla ntirho lowunene wa le tilweni ematshan’wini yo tshama ebanki leyi nga ta hohloka ku nga ri khale!”

Makwerhu wa xinuna u tiphofula hi marito lawa a ku: “Ku hi tsundzuxa ka Yehova ku tirhisa rifuwo ra hina ku n’wi twarisa i ndlela ya nsirhelelo hakunene eka bindzu ra makwanga, ‘xitirho xa vunharhu’ xa mafambiselo layo biha ya swilo ya Sathana. Ndzi tsakela ku tirhisa nkarhi lowu ku vula ndlela leyi ndzi tsakeke ha yona ku nyikela swo karhi eku hatlisiseni ka ku andza loku Yehova a hi nyikaka kona, naswona ndza n’wi nkhensa hi ku endla swi koteka leswaku ndzi tirhisiwa.”

Tinyiko Leti Humaka Eka Lavakulu Ni Lavantsongo

Swa khutaza ku hlaya hi ku tiyimisela loku tshembekaka ka lava kuleke lava, hambi loko va tshemba ku pona makumu ya mafambiselo lawa ya makumu, va tiyisekaka, hi ku endla xiboho lexi faneleke, leswaku ntirho wa Mfumo wa vuyeriwa exiendlakalweni xa rifu ra vona. Marito man’wana lama amukeriweke ya huma eka vaavanyisi, va vulavula hi langutelo lerinene ra vanhu vo tano lava siyaka mali, ya katsa lama:

“Munhu lonene swinene eka un’wana ni un’wana, vutomi bya yena hinkwabyo . . . a a rhandza Yehova ni swivumbiwa swa yena.”

“Minkarhi hinkwayo, timhaka ta Mfumo a ti ri ku khathalela ka yena ko sungula.”

“U fikelele hakelo ya yena ya le matilweni endzhaku ka malembe ya 70 ya ntirho wo tshembeka . . . minkarhi hinkwayo a a lava ku yisa ntiyiso emahlweni hi rifuwo ra yena.”

Nakambe ha tsaka ku twa hi ta lavantsongo, lava tiyimiseleke ku tirhisa swilo swa vona leswi vonakaka entirhweni wa Yehova. Papila rin’wana leri amukeriweke ehofisini ya Sosayiti eBritain a ri huma eka muhuweleri wa malembe ya xikolo. U hlamusele leswaku u wine sagwadi ro sungula eka mphikizano wa switsalwana. U nghenise sagwadi hinkwaro ra mali. Tibuku ta Sosayiti a ti ri tona ntsena xihlovo xa mhaka ya xitsalwana xa yena ehenhleni ka “Ku Tiboha Ka Mukriste,” kutani u vone mali leyi yi ri ya Yehova hi laha ku faneleke.

Endzhaku ko vutisa leswi a nga ta hakela Yehova ha swona, mutsari wa Psalma 116 u ya emahlweni eka tindzimana 13 na 14 a ku: “Nḍi ta tlakusa nḍeko wa šilamulelo, kutani nḍi ta khongela v̌ito ra Yehova. Nḍi ta tira ku hlambanya ka mina e ka Yehova, e mahlweni ka tiko ra yena hikwaro.” Hi ku tlangela nyiko ya risima ya ku pona leyi humaka eka Yehova hi ku tirhisa N’wana wa yena, hi titwa hi susumetiwa, hi laha mupisalema a endleke ha kona, ku huwelela eka Yena, naswona hi hlayisa switshembiso swa hina eka Yena.

Yehova u hi pfunile swinene, naswona xihi na xihi lexi hi nga xi endlaka ku n’wi hakela xi tikomba xi ri xintsongo loko xi pimanisiwa. Kutani ke, swi fanela swonghasi, leswaku tanihi rito ra ku nkhensa, hi endla hinkwaswo leswi hi nga swi kotaka, hi ndlela yin’wana ni yin’wana! “Nḍi ta ku ganḍela hi timhamba ta minkhenso, nḍi ta v̌itana v̌ito ra Yehova.”—Psalma 116:17.

[Bokisi leri nga eka tluka 26]

NDLELA LEYI VAN’WANA VA SEKETELAKA NTIRHO WA MFUMO HA YONA

◻ TINYIKO: Minyikelo ya ku tirhandzela ya mali yi nga ha rhumeriwa hi ku kongoma eka Watch Tower Bible and Tract Society of Pennsylvania, 25 Columbia Heights, Brooklyn, New York 11201, kumbe eka hofisi ya kwalaho ya rhavi ya Sosayiti. Nhundzu yo tanihi ndhawu ya xiviri, kun’we ni swin’wetsin’wetsi kumbe swim’wana swa nkoka, naswona swi nga ha nyikeriwa. Papila ro koma leri hlamuselaka leswaku sweswo i munyikelo lowu heleleke ri fanele ku fambisana ni minyjkelo leyi.

◻ LUNGHISELELO RA MINYIKELO YA KU YA HI SWIYIMO: Mali yi nga ha nyikiwa Watch Tower Society ku yi hlayisa, ku ri ni lunghiselelo ra leswaku hikwalaho ka xilaveko xa munhu hi xiyexe, yi ta tlheriseriwa eka loyi a yi nyikeleke.

◻ NDZINDZA-KHOMBO: Watch Tower Society yi nga ha tsariwa tanihi leyi nga ta vuyeriwa eka fambiselo ra ndzindza-khombo wa vutomi kumbe eku kunguhateni ka ku wisa/penceni. Sosayiti yi fanele ku tivisiwa hi malunghiselelo wahi na wahi yo tano.

◻ KU KHOMELANA MALI: Tiakhawunti to hlayisa mali ebankini ti nga ha vekiwa hi vito ra Sosayiti. Loko leswi swi endliwile, tivisani Sosayiti. Nhundzu, swiboho ni leswi u nga na swona swi nga nyikeriwa ehansi ka lunghiselelo leri nga ta pfuna la nyikelaka loko a ha hanya. Endlelo leri ri hunguta ku durha ni ku nga tiyiseki ka ku tivisa xiboho, u ri karhi u tiyiseka leswaku Sosayiti yi amukela nhundzu leyi exiendlakalweni xa rifu.

◻ SWIBOHO: Nhundzu kumbe mali swi nga ha hundziseriwa eka Watch Tower Society hi ku tirhisa xiboho xa le nawini lexi humesiweke. Kopi yi fanele ku rhumeriwa eka Sosayiti. (EAfrika Dzonga swiboho swi fanele ku endliwa eka Jehovah’s Witnesses of South Africa.)

Ku kuma rungula ni switsundzuxo leswi engetelekeke malunghana ni timhaka to tano, tsalela Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, kumbe eka hofisi ya ka n’wina ya rhavi ya Sosayiti.