Xana U Ta Pfuneka eMintwananweni Ya Xikwembu?

“‘Tinxaka hinkwato ta misava ti ta katekisiwa hikwalaho ka wena.’ Hikokwalaho, lava nga ni ku pfumela va kuma nkateko wun’we na Abrahama mupfumeri.”—VAGALATIYA 3:8, 9.

1. Xana matimu ya komba yini malunghana ni vuyelo bya mimfumo yo tala?

“VAFUMI va musa [kumbe, lava voningeriweke]” hi leswi vafumi van’wana va le Yuropa va lembe xidzana ra vu-18 va vitanisiwaka xiswona. Va ‘tirhe kahle ku fuma vanhu va vona hi musa wa tatana, kambe makungu ya vona ya ve lama hoxeke naswona mindzhundzunuko ya vona yi hohlokile.’a (The Encyclopedia Americana) Lexi a xi ri xivangelo lexikulu xa mindzhundzunuko leyi hi ku hatlisa yi funengeteke Yuropa.

2, 3. Xana Yehova u hambana njhani ni tihosi ta vanhu?

² Yehova u hambana swonghasi ni tihosi ta vanhu leti nga twisisekiki. Hi nga vona xilaveko xa ku vaviseka ka vanhu hi ku olova xa ku hundzuka loku eku heteleleni ku nga ta humesa mintlhantlho ya xiviri ya vuhomboloki ni ku xaniseka. Kambe a hi fanelanga hi karhateka hi leswaku mintirho ya Xikwembu yo tisa leswi yi tiseketele hi mianakanyo. Ebukwini leyi hangalasiweke swinene ngopfu emisaveni, u tsale xitshembiso xa yena xo tisa minkateko leyi nga heriki eka vanhu lava pfumelaka. Leyi yi ta va kona ku nga khathariseki khale ka tiko, rixaka, dyondzo kumbe xiyimo xa ntirhisano swa vanhu. (Vagalatiya 3:28) Kambe xana u nga tiseketela hi leswi?

³ Muapostola Pawulo u tshahe xiphemu xa xitshembiso lexi Xikwembu xi xi nyikeke Abrahama a ku: “Hakunene ndzi ta ku katekisa.” Pawulo u engetele leswaku tanihi leswi “swi nga endlekiki leswaku Xikwembu xi kumeka xi ri muhembi,” hi ‘nga tiya nhlana swinene hi khoma hi mandla mambirhi ku langutela loku ku vekiweke emahlweni ka hina.’ (Vaheveru 6:13-18) Ntshembo wa hina eka minkateko yoleyo wu nga tiyisiwa ku ya emahlweni hi ku xiya ku hleleka ka ndlela leyi Xikwembu xi andlaleke xisekelo xo swi hetisisa ha yona.

4. Xana Xikwembu xi yi tirhise njhani mintwanano yo hambana-hambana eku hetisiseni ka xikongomelo xa xona?

⁴ Ana se hi swi vonile leswaku Xikwembu xi endle ntwanano na Abrahama lowu katsaka rixaka leri a ri ta va xitirho eku katekiseni ka “matiko hikwawo ya misav̌a.” (Genesa 22:17, 18) Vaisrayele va vile rixaka ra nyama, kambe hi langutelo ra nkoka lowukulu wa moya, Yesu Kriste u tikombe a ri xiphemu-nkulu xa rixaka ra Abrahama. Nakambe Yesu a a ri N’wana kumbe Rixaka, ra Abrahama Lonkulu, Yehova. Vakriste lava nga “va ka Kriste” va vumba xiphemu xa vumbirhi xa rixaka ra Abrahama. (Vagalatiya 3:16, 29) Endzhaku ka ku endla ntwanano wa Abrahama, Xikwembu xi engetele ntwanano wa Nawu nkarhinyana ni tiko ra Israyele. Wu tiyise leswaku Vaisrayele a va ri vadyohi lava a va lava muprista wa nkarhi hinkwawo ni gandzelo leri hetisekeke. Wu hlayise nxaxamelo wa Rixaka naswona wu pfune ku n’wi hlamusela. Ntwanano wa Nawu na wona wu kombe leswaku, hi ndlela yo karhi, Xikwembu a xi ta tisa tiko ra tihosi ni vaprista. Loko Nawu wa ha tirha, Xikwembu xi endle ntwanano na Davhida wa ku va ni nxaxamelo wa tihosi eIsrayele. Ntwanano wa Davhida wa Mfumo nakambe wu kombetele eka un’wana loyi a nga ni vuhosi lebyi nga heriki ehenhla ka misava.

5. I swivutiso kumbe swiphiqo swihi leswi swa ha lavaka ku tlhantlhiwa?

⁵ Kambe, a ku ri na timhaka kumbe swikongomelo swa mintwanano leyi leswi swi tikombeke swi nga helelanga kumbe swi lava ku hlamuseriwa. Hi xikombiso, loko Rixaka leri taka a ri ta va hosi enxaxamelweni wa Davhida, a ri ta va muprista wa hi laha ku nga heriki loyi a a ta endla swo tlula vaprista va nkarhi lowu hundzeke hi ndlela yihi? (Vaheveru 5:1; 7:13, 14) Xana Hosi leyi a yi ta swi kota ku fuma leswi tlulaka xivandla lexi hikiweke xa la misaveni? Xana xiphemu xa vumbirhi xa rixaka xi fanelekisa ku yini ku va endyangwini wa Abrahama Lonkulu? Naswona hambi loko va faneleka, i vulawuri byihi lebyi va nga ta va na byona, tanihi leswi swirho swo tala swi nga humangiki kona eka Davhida? A hi voneni ndlela leyi Xikwembu xi tekeke magoza ya le nawini ha yona hi xivumbeko xa mintwanano leyi engetelekeke leyi a yi ta hlamula swivutiso leswi, yi pfula ndlela ya nkateko wa hina lowu nga heriki.

Ntwanano Wa Muprista Wa Le Tilweni

6, 7. (a) Hi ku ya hi Psalma 110:4, i ntwanano wihi wun’wana lowu Xikwembu xi wu simekeke? (b) I xisekelo xihi lexi hi pfunaka ku twisisa ntwanano lowu wu engeteriweke?

⁶ Tanihi laha hi voneke ha kona, exikarhi ka xikongomelo xa ntwanano wa Nawu, Xikwembu xi endle ntwanano na Davhida wa ntukulu (rixaka) loyi a a ta fuma hi laha ku nga heriki ehenhla ka vulawuri bya la misaveni. Kambe Yehova u tlhele a hlavutela Davhida leswaku muprista wa hi laha ku nga heriki a a ta ta. Davhida u tsarile a ku: “Yehova o hlambanyile a nga ka a nga hunḍuki, o te: ‘U muprista hi laha ku nga heriki, hi mukhuva wa Melkisedek.’” (Psalma 110:4) Xana i yini lexi a xi susumetela rito leri ra Xikwembu ra ku hlambanya lexi vangeke ntwanano wa munhu hi xiyexe exikarhi ka Yehova ni Muprista la taka?

⁷ Melkisedeke u vile hosi ya Salema wa Khale, lexi entiyisweni a xi ri xivandla lexi endzhakunyana muti wa Yerusalema (vito leri katsaka “Salema”) wu akiweke eka xona. Mhaka ya ku tirhisana ka Abrahama na yena yi kandziyise leswaku a a ri hosi leyi gandzelaka “Šikwembu-ša-le-Henhla-henhla.” (Genesa 14:17-20) Kambe, nhlamuselo ya Xikwembu eka Psalma 110:4 yi komba leswaku Melkisedeke na yena a a ri muprista, leswi swi n’wi endleke munhu wo hlawuleka. A a ri hosi ni muprista, naswona u tirhe laha tihosi ta Davhida ni vaprista va Valevhi endzhakunyana ti endleke mintirho ya tona leyi hleriweke hi Xikwembu kona.

8. Ntwanano lowu wa muprista la fanaka na Melkisedeke wu endliwe na mani, naswona hi vuyelo byihi?

⁸ Pawulo u hi nyika vuxokoxoko lebyi engetelekeke ehenhleni ka ntwanano wa muprista la fanaka na Melkisedeke. Hi xikombiso, u vula leswaku a ku ri Yesu Kriste loyi a ‘vitaniweke muprista lonkulu hi Xikwembu hi mukhuva wa Melkisedeke.’ (Vaheveru 5:4-20; 6:10; 7:17, 21, 22) Hambi leswi handle ko kanakana Melkisedeke a a ri na vatswari va vanhu, ku hava rhekhodo ya rixaka ra yena. Kutani ematshan’wini ya ku kuma xikhundla xa vuprista hi ku ya hi rixaka leri rhekhodiweke ku suka eka Melkisedeke, ku vekiwa ka yena ku hume eka Xikwembu hi ku kongoma. Vuprista bya Yesu byi nge hundziseriwi eka un’wana, hikuva i “muprista hi laha ku nga heriki.” Leswi swi tano, hikuva mimpfuno ya ntirho wa yena wa vuprista yi ta va ya hi masiku. Hi nga kateka hakunene hi ku va ni muprista loyi a ‘kotaka ku ponisa lava tshinelelaka Xikwembu ha yena’ ni ku letela ni ku kongomisa vanhu lava tshembekaka hi laha ku nga heriki.—Vaheveru 7:1-3, 15-17, 23-25.

9, 10. Xana vutivi bya ntwanano lowu wa vuntlhanu byi ndlandlamuxa ku twisisa ka hina ka ndlela leyi xikongomelo xa Xikwembu xi nga ta hetiseka ha yona hi ndlela yihi?

⁹ Yinhla yin’wana ya nkoka hi leswaku ntirho wa Yesu tanihi Hosi ni Muprista wu tlula xivandla xa laha misaveni. Eka mongo lowu fanaka laha a boxeke ntwanano lowu wa muprista la fanaka na Melkisedeke, Davhida u tsarile a ku: “Yehova o te ka hosi ya mina: ‘Ṭhamisa e v̌okweni ra mina ra šinene, nḍi ko nḍi endla la’v̌a nga v̌alala e ka wena e v̌unavelo bya mikonḍo ya wena.’” Xisweswo hi nga swi vona leswaku Yesu—Hosi ya Davhida—a a ta kuma ndhawu etilweni na Yehova, leswi swi humeleleke eku tlhandlukeni ka yena. A ri etilweni, Kriste a nga tirhisa vuhosi ni Tata wa yena leswaku va susa valala ni ku tisa ku avanyisa.—Psalma 110:1, 2; Mintirho 2:33-36; Vaheveru 1:3; 8:1; 12:2.

¹⁰ Hikwalaho, hi ku tiva ntwanano lowu wa vuntlhanu, hi na langutelo leri anameke ra ndlela leyi hlelekeke, leyinene leyi Yehova a nga ta hetisisa xikongomelo xa yena ha yona. Wu tiyisa leswaku xiphemu xo sungula xa rixaka nakambe xi ta va muprista etilweni ni leswaku vuhosi bya yena tanihi Hosi ni Muprista byi ta lawula vuako hinkwabyo.—1 Petro 3:22.

Ntwanano Lowuntshwa Ni Xiphemu Xa Vumbirhi Xa Rixaka

11. I mimpfilungano yihi leyi veke kona mayelana ni xiphemu xa vumbirhi xa rixaka?

¹¹ Loko eku sunguleni hi xiye ntwanano wa Abrahama, hi xiye leswaku Yesu u ve xiphemu xo sungula xa rixaka hi mfanelo ya ntumbuluko. U hume eka mupatriarka Abrahama hi ku kongoma, naswona tanihi munhu la hetisekeke, a a ri N’wana la amukeriweke wa Abrahama Lonkulu. Kambe ke, xana ku vuriwa yini hi vanhu lava nga na lunghelo ra ku va xiphemu xa vumbirhi xa rixaka ra Abrahama, “vadyandzhaka hikwalaho ka xitshembiso”? (Vagalatiya 3:29) Hikwalaho ka ku ka va nga hetisekanga, va ri xiphemu xa ndyangu wa mudyohi Adamu, a va ta va lava nga fanelekiki ku va endyangwini wa Yehova, Abrahama Lonkulu. Xana xidyoho xa ku nga hetiseki a xi ta hluriwa njhani? Sweswo a swi nga ta koteka eka vanhu, kambe swa koteka eka Xikwembu.—Matewu 19:25, 26.

12, 13. (a) Xana Xikwembu xi wu vhumbe njhani ntwanano wun’wana? (b) Xana i mhaka yihi leyi hlawulekeke ya ntwanano lowu leyi lavaka nyingiso wa hina?

¹² Loko Nawu wa ha tirha, Xikwembu xi vhumbile hi ku tirhisa muprofeta wa xona xi ku: “Ndzi ta endla ntwanano lowuntshwa ni yindlu ya Israyele ni yindlu ya Yuda; ku nga ri lowu fanaka ni ntwanano lowu ndzi wu endleke na vatata wa vona . . . ‘wu nga ntwanano wa mina lowu va wu tshoveke hi voxe’ . . . ndzi ta veka nawu wa mina exikarhi ka vona, ndzi wu tsala etimbilwini ta vona. Kutani ndzi ta va Xikwembu xa vona, kutani vona va va tiko ra mina. Naswona a va nga ha dyondzisi ku . . . ‘Tiva Yehova!’ hikuva hinkwavo ka vona va ta ndzi tiva . . . Hikuva ndzi ta rivalela ku dyoha ka vona, a ndzi nga ha anakanyi xidyoho xa vona.”—Yeremia 31:31-34, NW.

¹³ Xiya leswaku mhaka ya ntwanano lowu wuntshwa a ku ri ku rivaleriwa ka swidyoho, entiyisweni hi ndlela leyi a yi ‘nga fani’ ni lunghiselelo ra magandzelo ya swiharhi ehansi ka Nawu. Yesu u veke leswi erivaleni hi siku ra ku fa ka yena. Endzhaku ka ku hlanganyela ni vadyondzisiwa va yena eku tlangeleni ka Paseka tanihi laha a swi laviwa hi Nawu ha kona, Kriste u simeke Xilalelo xa Hosi. Nkhuvo lowu wa lembe na lembe a wu ta katsa xinwelo lexi xi hlanganyeriwaka xa vhinya, lexi Yesu a nga te ha xona: “Xinwelo lexi i ntwanano lowuntshwa engatini ya mina leyi halatiwaka hikwalaho ka n’wina.”—Luka 22:14-20.

14. Ha yini ntwanano lowuntshwa wu ri wa nkoka eku humeseni ka xiphemu xa vumbirhi xa rixaka?

¹⁴ Hikwalaho, ntwanano lowuntshwa a wu ta endliwa leswaku wu tirha hi ngati ya Yesu. Exisekelweni xa gandzelo ro tano leri hetisekeke, Xikwembu a xi ta ‘rivalela xihoxo ni xidyoho’ kan’we swi hela kwalaho. Anakanya leswi sweswo a swi vula swona! Hi ku kota ku rivalela swidyoho swa vanhu lava tinyiketeke endyangwini wa Adamu hi laha ku heleleke, Xikwembu a xi ta va languta tanihi lava nga riki na xidyoho, xi va tswala tanihi vana va moya va Abrahama Lonkulu, kutani manuku xi va tota hi moya lowo kwetsima. (Varhoma 8:14-17) Xisweswo, ntwanano lowuntshwa lowu tiyisiweke hi gandzelo ra Yesu wu pfuna vadyondzisiwa va yena leswaku va va xiphemu xa vumbirhi xa rixaka ra Abrahama. Pawulo u tsale a ku: “Hi rifu ra [Yesu] a ta kota ku herisa loyi a nga ni matimba ya rifu, a nga yena Diyavulosi, kutani [a a ta] ntshunxa hinkwavo lava a va ri evuhlongeni vutomi bya vona hinkwabyo, hi mhaka ya ku chava rifu. Hikuva, hakunene, a hi tintsumi leti a tikarhatelaka tona, kambe u tikarhatela vatukulu va Abrahama.”—Vaheveru 2:14-16; 9:14.

15. I vamani swiphemu swa ntwanano lowuntshwa?

¹⁵ Hambi leswi Yesu a a ta va Muhlanganisi ni gandzelo leri tiyisaka ntwanano lowuntshwa, i vamani lava a va ri swiphemu eka ntwanano? Yeremiya u vhumbe leswaku Xikwembu a xi ta endla ntwanano lowu ni “yindlu ya Israel.” Xana i Israyele wihi? Hayi Israyele wa nyama la yimbisiweke ehansi ka Nawu, hikuva ntwanano lowuntshwa wu endle leswaku ntwanano lowo sungula wu nga ha tirhi. (Vaheveru 8:7, 13; vona tluka 31.) Sweswi Xikwembu a xi ta tirhisana ni Vayuda ni Vamatiko lava hi ripfumelo a va ‘yimbisiwile hi ku fanekisela embilwini ya moya.’ Leswi swi twanana ni ku vula ka yena leswaku lava va nga entwananweni lowuntshwa a va endla leswaku ‘milawu ya xona yi tsariwa emianakanyweni ya vona ni le timbilwini ta vona.’ (Varhoma 2:28, 29; Vaheveru 8:10) Pawulo u vitane Vayuda vo tano va moya a ku i “Israyele wa Šikwembu.”—Vagalatiya 6:16; Yakobo 1:1.

16. Ntwanano lowuntshwa wu pfuna njhani eku hetisiseni ka leswi Eksoda 19:6 yi kombeteleke eka swona?

¹⁶ Tanihi leswi Xikwembu se a xi tirhisana ni Israyele wa moya, nyangwa wa lunghelo wu pfulekile. Loko Xikwembu xi simeke Nawu, xi vulavule hi vana va Israyele lava eka xona a va va “tiko ra vaprista, e tiko le’ri hlawuriweke.” (Eksoda 19:6) Entiyisweni, Israyele wa nyama a a nga ta swi kota ku va tiko leri hinkwavo ka vona a va ri tihosi ni vaprista naswona a nga swi kotanga. Kambe Vayuda ni Vamatiko lava amukeriweke tanihi xiphemu xa vumbirhi xa rixaka ra Abrahama a va ta va tihosi ni vaprista.b Muapostola Petro u tiyise leswi, a byela vanhu vo tano a ku: “N’wina, mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu hi xiviri, leswaku mi ta kota ku twarisa mintirho leyo saseka ya loyi a mi vitaneke ku huma emunyameni.” Nakambe u tsale leswaku ‘ndzhaka leyi nga heriki yi vekeriwe vona ematilweni.’—1 Petro 1:4; 2:9, 10.

17. Ha yini ntwanano lowuntshwa wu “antswa” ku tlula ntwanano wa Nawu?

¹⁷ Hikwalaho, ntwanano lowuntshwa wu tirha hi ntwanano wa Abrahama lowu veke kona eku sunguleni leswaku wu humesa xiphemu xa vumbirhi xa rixaka. Ntwanano lowu wuntshwa exikarhi ka Yehova ni Vakriste lava tswariweke hi moya wu pfumelela ku vumbiwa ka tiko ra le tilweni ra tihosi ni vaprista endyangwini wa vuhosi wa Abrahama Lonkulu. Manuku ke, hi nga vona mhaka leyi ha yona Pawulo a vuleke leswaku lowu i ‘ntwanano wo antswa, lowu simekiweke ehenhla ka switshembiso leswi antswaka.’ (Vaheveru 8:6) Switshembiso sweswo swi katsa nkateko wa leswaku nawu wa Xikwembu wu tsariwa etimbilwini ta vanhu lava tinyiketeke lava swidyoho swa vona swi nga tsundzukiwiki, naswona hinkwavo ‘va tiva Yehova, ku sukela eka lontsongo ku fikela eka lonkulu.’—Vaheveru 8:11.

Ntwanano Wa Yesu Wa Mfumo

18. Hi rihi langutelo leri ha rona mintwanano leyi hi yi xiyeke ku fikela sweswi yi nga hetisisangiki xikongomelo xa Xikwembu hi laha ku heleleke?

¹⁸ Loko hi tsundzuka mintwanano ya tsevu leyi hi buleke ha yona, swi nga vonaka onge Yehova u lunghiselele hinkwaswo leswi lavekaka hi nawu ku hetisisa xikongomelo xa yena. Kambe, Bibele yi humesa ntwanano wun’wana lowu hlanganaka ni lowu hi wu xiyeke, ntwanano lowu katsaka timhaka hinkwato leti tlhandlekelaka ta mhaka leyi ya nkoka. Vakriste lava tswariweke hi moya hi laha ku faneleke va langutela leswaku ‘Hosi yi ta va kutsula eku biheni hinkwako naswona yi ta va ponisela mfumo wa yona wa le matilweni.’ (2 Timotiya 4:18) Etilweni, va ta va tiko ra tihosi ni vaprista, kambe xana vulawuri bya vona byi ta va byihi? Loko va pfuxeriwa etilweni, Kriste ana se u kwale tanihi muprista la tlakukeke la hetisekeke. Nakambe u ta va a yimile a ri ni matimba yo fuma vuako. (Psalma 2:6-9; Nhlavutelo 11:15) I yini leswi nga kona leswi tihosi ni vaprista lavan’wana va nga swi endlaka?

19. Ntwanano wa nkoka wa vunkombo wu endliwe rini naswona njhani?

¹⁹ Hi Nisan 14, 33 C.E., hi vusiku lebyi Yesu a simekeke Xilalelo xa Hosi kutani a vulavula hi “ntwanano lowuntshwa engatini ya [yena] leyi halatiwaka,” u vulavule hi ntwanano wun’wana, wa vunkombo lowu ku nga ta buriwa hi wona. U byele vaapostola va yena lava tshembekaka a ku: “Hi n’wina lava mi tiyiseleke na mina emiringweni ya mina. Hi laha Tata wa mina a ndzi nyikeke Mfumo ha kona, na mina ndzi mi nyika wona; mi ta dya ni ku nwa etafuleni ra mina, eMfun’weni wa mina; kutani mi ta tshama eswiluvelweni, mi avanyisa tinxaka leta 12 ta Israyele.” (Luka 22:20, 28-30) Tanihi laha Tatana a endleke ntwanano na Yesu ha kona leswaku a va muprista la fanaka na Melkisedeke, kutani Kriste u endle ntwanano wa munhu hi xiyexe ni valandzeri va yena lava tshembekaka.

20. Ntwanano wa Mfumo wu endliwe na mani, naswona ha yini? (Daniel 7:18; 2 Timotiya 2:11-13)

²⁰ Hakunene vaapostola va 11 va tiyisele na Yesu emiringweni yakwe, naswona ntwanano wu komba leswaku a va ta tshama eswiluvelweni. Nakambe, Nhlavutelo 3:21 yi kombisa leswaku Vakriste lava tswariweke hi moya lava tikombaka va tshembeka va ta tshama eswiluvelweni swa le tilweni. Xisweswo, ntwanano lowu i wa hinkwavo lava 144 000 lava xaviweke hi ngati ya Yesu leswaku va yisiwa etilweni tanihi vaprista ivi “va fuma tanihi tihosi ehenhla ka misava.” (Nhlavutelo 1:4-6; 5:9, 10; 20:6) Ntwanano lowu Yesu a wu endlaka na vona wu va hlanganisa na yena leswaku va hlanganyela eku fumeni ka yena. Hi ndlela yin’wana, swi fana ni loko mutekiwa la humaka endyangwini wa ntlawa wa vanhu va le henhla a hlanganisiwa ni hosi leyi fumaka hi vukati. Xisweswo u ta eka xiyimo xo hlanganyela vulawuri bya yona bya mfumo.—Yohane 3:29; 2 Vakorinto 11:2; Nhlavutelo 19:7, 8.

21, 22. Xana i nkateko wihi lowu wu nga languteriwaka hikwalaho ka leswi mintwanano leyi yi swi hetisisaka?

²¹ Xana i mimpfuno yihi leyi leswi swi yi pfulelaka vanhu lava yingisaka? Yesu kumbe lava 144 000 va nge fani ni vafumi va tihanyi lava navelaka leswinene lava ‘hlulekeke ku tisa mintlhantlho ya xiviri.’ Ematshan’wini ya sweswo, hi tshembisiwa leswaku Yesu i muprista lonkulu “loyi a ringiweke hi matlhelo hinkwawo ku fana na hina, ntsena yena a nga dyohanga.” Hikwalaho hi nga twisisa mhaka leyi ha yona a nga ‘tsetselelaka’ ku tsana ka vanhu ni mhaka leyi ha yona “tinyimpfu tin’wana,” tanihi laha swi veke ntiyiso ha kona eka Vakriste lava totiweke, na tona, ha Kriste, ti nga tshinelelaka xiluvelo xa Xikwembu hi ku ‘vulavula ka ku ntshunxeka.’ Xisweswo, na vona va nga ha ‘tsetseleriwa ni ku kuma tintswalo leti nga fanelangiki leti nga ta va pfuna enkarhini lowu faneleke.’—Vaheveru 4:14-16; Yohane 10:16.

²² Lava va nghenisiweke entwananweni leswaku va hlanganyela na Yesu tanihi tihosi ni vaprista na vona va hlanganyela eku katekiseni ka vanhu. Tanihi leswi vaprista va khale va Valevhi va vuyeriseke tiko hinkwaro ra Israyele, kutani lava tirhaka eswiluvelweni swa le tilweni na Yesu va ta avanyisa hinkwavo lava nge misaveni hi ku lulama. (Luka 22:30) Tihosi ni vaprista volavo va tshame va va vanhu, kutani va ta twela swilaveko swa vanhu vusiwana. Xiphemu lexi xa vumbirhi xa rixaka xi ta tirhisana na Yesu eku voneni leswaku “tinxaka hinkwato ta misava ta katekisiwa.”—Vagalatiya 3:8.

23. Xana vanhu va fanele va endla njhani ku tirhisana ni mintwanano leyi?

²³ Hinkwavo lava navelaka ku hlanganyela eka minkateko yoleyo ehenhla ka vanhu, xisweswo va pfuneka hi mintwanano ya Xikwembu, sweswi va rhamberiwa ku endla tano. (Nhlavutelo 22:17) Goza rin’wana lerinene i ku va kona enkhubyeni wa Xitsundzuxo xa Hosi, lowu nga ta khomiwa endzhaku ka ku pela ka dyambu hi Ravunharhu, March 22, 1989. Endla malunghiselelo leswaku u va kona ni rin’wana ra mabandlha ya Timbhoni ta Yehova. Kwalaho u ta dyondza swo tala ehenhleni ka mintwanano ya Xikwembu naswona u ta ya emahlweni u vona ndlela leyi u nga pfunekaka ha yona eka yona.

[Tinhlamuselo ta le hansi]

Wa Tsundzuka Xana?

◻ Ha yini ntwanano lowu vuriweke eka Psalma 110:4 wu endliwile, naswona wu hetisise yini?

◻ I vamani lava va nga entwananweni lowuntshwa, naswona wu pfune njhani ku tisa tiko ra tihosi ni vaprista?

◻ Ha yini Yesu a endla ntwanano wa munhu hi xiyexe ni valandzeri va yena?

◻ Mintwanano ya nkombo leyi hi yi xiyeke hi yihi?

[Dayagramu leyi nga eka tluka 17]

(Leswaku u vona rungula leri hleriweke hi ku helela, vona nkandziyiso wa kona)

Ntwanano wa le Edeni Genesa 3:15

Ntwanano wa Abrahama

Ntwanano wa Nawu

Ntwanano wa Mfumo wa Davhida

Ntwanano wa muprista la fanaka na Melkisedeke

Rixaka ro sungula

Rixaka ra vumbirhi

Minkateko leyi nga heriki

[Dayagramu leyi nga eka tluka 19]

(Leswaku u vona rungula leri hleriweke hi ku helela, vona nkandziyiso wa kona)

Ntwanano wa le Edeni Genesa 3:15

Ntwanano wa Abrahama

Ntwanano wa Nawu

Ntwanano lowuntshwa

Ntwanano wa Mfumo wa Davhida

Ntwanano wa muprista la fanaka na Melkisedeke

Rixaka ro sungula

Ntwanano wa Mfumo wa le tilweni

Rixaka ra vumbirhi

Minkateko leyi nga heriki