Ma Amukeleka Eka Mintsombano Ya Muganga Ya “Ku Chava Xikwembu”
MAYANA nhloko-mhaka leyinene swonghasi leyi hi nga na yona eka ntsombano wa muganga wa lembe leri leyi nge: “Ku Chava Xikwembu”! Naswona mawaku xikombiso lexinene xa ku chava Xikwembu lexi Yesu a hi vekeleke xona! A swi hlamarisi loko muapostola Pawulo a huhuteriwe ku tsala malunghana na yena a ku: “Hakunene, hi nga tiyisa leswaku xihundla [xo kwetsima] xa vukhongeri bya hina i xikulu: ‘Ú vonakisiwile a ri munhu, ú vuriwile la lulameke emoyeni, ú voniwile hi tintsumi; ú twarisiwile ematikweni, ú pfumeriwile emisaveni, a tekeriwa henhla eku kwetsimeni.’”—1 Timotiya 3:16.
Ntsombano wa hina wa muganga wu ta hi tiyisa leswaku hi va vanhu lava chavaka Xikwembu hakunene, hi laha Yesu a a ri ha kona. Kutani ke, xo sungula, hi lava ku tiyiseka leswaku a hi pfumeleri nchumu xi kavanyeta nkhuvo wa hina wa moya. Hikwalaho, a hi veni eka switshamo swa hina hi mixo wa siku ro sungula hi 9:50 leswaku hi tsakela vuyimbeleri ivi xisweswo hi va eka xiyimo lexinene xa mianakanyo ku vuyeriwa swinene eka nongonoko lowu nga ta landzela. Nhloko-mhaka leyi hlawuleriweke siku ro sungula yi ri “Ku Tirhela Xikwembu Lexi Lavaka Ku Tinyiketela Loku Heleleke,” leyi sekeriweke eka Eksoda 20:5. Nkulumo ya mutshama-xitulu yi fanela swinene: “Ma Amukeleka, N’wina Vanhu Lava Chavaka Xikwembu!” Siku ro sungula, hi ta akiwa hi tinkulumo leti kombisaka mhaka leyi ha yona Yehova a kandziyisaka ku chava Xikwembu ni mhaka leyi ha yona hi faneleke ku dyondza xihundla xa ku chava Xikwembu. Nakambe ku ta va ni rungula leri nyanyulaka mayelana ni ku tiva Xikwembu xa ntiyiso. Nakambe, hikwalaho ka swiphiqo leswi vantshwa va hina va kongomanaka na swona, ku ta va ni rungula ro hlawuleka eka vona.
Nhloko-mhaka ya siku ra vumbirhi yi ri “Ku Chava Xikwembu Swi Vula Rifuwo Lerikulu,” leyi sekeriweke eka 1 Timotiya 6:6. Ni mixo, hi ta amukela swiletelo hi leswi swi lavekaka leswaku u landzelela ku chava Xikwembu. Kavula, ku ta va ni nkulumo ya nkhuvulo eka lava va tiyimiseleke ku nghenela ndlela ya vutomi ya ku chava Xikwembu. Hi ndzhenga wa siku ra vumbirhi hi ta hlamuseriwa xilaveko xa ku tshembeka, eka “nandza lowo tshembeka, lowa vutlhari,” naswona hi ta dyondza ndlela leyi hi nga kombisaka mintirho ya ku chava Xikwembu endyangwini ha yona.
“Tshikani Ku Sandza Xikwembu Kutani Mi Hanya Hi Ku Chava Xikwembu,” leyi tekiweke eka Tito 2:12, i nhloko-mhaka ya siku ra vunharhu. Ni mixo, hi ta amukela swiletelo swa le nkarhini leswi hi tsundzuxaka ehenhleni ka “Munhu wa ku homboloka” ni ku xalamukela ku hambuka etimhakeni ta ku dya ni ku nwa, ku tilunghisa ni ku tirivatisa. (2 Vatesalonika 2:3) Leswi swi ta landzeriwa hi drama ya manguva lawa leyi kandziyisaka nkoka wa ku titsongahatela Xikwembu. Nkulumo ya le rivaleni ni ndzhenga yi ta hi byela mahungu lamanene hi leswaku ku kutsuriwa ku tshinele eka vanhu lava chavaka Xikwembu. Nkhuvo wa hina wa moya wu ta gimeta hi bulo leri kombisaka leswaku “Vuleteri Bya Hina Lebyi Hambetaka Hi Ku Chava Xikwembu Bya Pfuna.”
Kutani tanani mi tilunghiselele ku landzelela eTibibeleni ta n’wina tinhlamuselo ta swivulavuri ni ku tsala tinhla to huma eka tinkulumo ebukwini ya tinotsi. Ku tsala tinotsi i xipfuno lexikulu xa ku yingisa ni ku vuyeriwa swinene eka leswi munhu a swi twaka. Kutani hi nga tshuki hi honisa ntiyiso wa leswaku ntirho wo tala wa laveka leswaku ntsombano wu ya emahlweni hi laha ku humelelaka na hi ku olova ni leswaku mavoko yo tala ma olovisa ntirho. Hi ku tirha hi ku tirhandzela, hi ta xiya ntsako lowukulu wa ku nyika.—Mintirho 20:35.
Kutani onge ku chava ka hina Xikwembu ku nga hi susumetela ku va eka ntsombano lowu naswona ku hi susumetela ku kuma swo tala eka wona. Onge hi nga famba hi tiyisiwile naswona hi tiyimisele ku hanya vutomi bya ku chava Xikwembu hi laha ku engetelekeke.