Landzelelani Ku Chava Xikwembu Tanihi Vakriste Lava Khuvuriweke
“Kambe loko a ri wena, munhu wa Xikwembu, . . . [landzelela] ku lulama, ni [ku chava Xikwembu].”—1 TIMOTIYA 6:11.
1. Xana u nga xi hlamurisa ku yini xivutiso lexi nge, Hi rihi siku leri nga ra nkoka swinene evuton’wini bya wena? Ha yini u hlamula tano?
XANA hi rihi siku ra nkoka swinene evuton’wini bya wena? Loko u ri Mbhoni leyi khuvuriweke ya Yehova, handle ko kanakana u ta hlamula, ‘Ina, i siku leri ndzi nga khuvuriwa ha rona!’ Leswaku u tiyiseka, nkhuvulo i goza ra nkoka swinene evuton’wini bya wena. I xikombiso xa le rivaleni xa leswaku u endle ku tinyiketela loku heleleke ni loku nga hundzukiki eka Yehova ka ku endla ku rhandza ka yena. Nkhuvulo wa wena wu fungha siku ra ku vekiwa ka wena tanihi mutirheli wa Yehova, Xikwembu lexi Tlakukeke.
2. (a) Swi nga ha kombisisiwa ku yini leswaku nkhuvulo a hi goza ro hetelela leri u ri tekaka evuton’wini bya wena bya Vukriste? (b) I magoza wahi yo sungula ya nkoka lama u ma tekeke emahlweni ko khuvuriwa?
2 Hambi swi ri tano, xana nkhuvulo i goza ro hetelela leri u ri tekaka evuton’wini bya wena bya Vukriste? A swi tano! Hi xikombiso: Ematikweni yo tala nkhuvo wa vukati wu fungha ku hela ka nkarhi wo kunguhata ni ku lunghiselala (naswona hakanyingi ni ku gangisana). Hi nkarhi wu ri wun’we, wu fungha masungulo ya vutomi swin’we tanihi mpatswa lowu tekaneke. Hi ku fanana, nkhuvulo wa wena i ku chaputa ka nkarhi wo lunghiselela lowu u tekeke magoza yo tala ya nkoka lowukulu ha wona. U kume vutivi bya Xikwembu na Kriste. (Yohane 17:3) U sungula ku kombisa ripfumelo eka Yehova tanihi Xikwembu xa ntiyiso, eka Kriste tanihi Muponisi wa wena, ni le Bibeleni tanihi Rito ra Xikwembu. (Mintirho 4:12; 1 Vatesalonika 2:13; Vaheveru 11:6) U kombise ripfumelo rero hi ku hundzuka eka xiendlo xa vutomi bya wena bya khale naswona u hundzukela eka vutomi byo lulama. (Mintirho 3:19) Kutani u endle xiboho xo tinyiketela eka Yehova ku endla ku rhandza ka yena. (Matewu 16:24) Eku heteleleni, u khuvuriwile.—Matewu 28:19, 20.
3. (a) Xana hi nga swi kombisisa ku yihi leswaku nkhuvulo wa hina wu fungha masungulo ya vutomi bya ntirho lowu nyikeriweke eka Xikwembu? (b) I swivutiso swihi leswi tlakukaka, naswona ha yini tinhlamulo ti fanela ti va ta nkoka lowukulu eka hina?
3 Hambi swi ri tano, nkhuvulo wa wena a hi makumu kambe i masungulo ya vutomi byo yisa ntirho wo kwetsima eka Xikwembu. Hi laha mudyondzi un’wana wa Bibele a xiyeke ha kona, vutomi bya Mukriste a byi fanelanga byi va ‘masungulo ya magugu lama landzeriwaka hi ku hambeta ka vulolo.’ Kutani, xana u nga swi kombisisa ku yini leswaku emhakeni ya wena, nkhuvulo a wu yimeli ‘masungulo ya magugu ya nkarhinyana’? Hi ku landzelela ku chava Xikwembu ka vutomi hinkwabyo. Xana i yini ku chava loku ka Xikwembu? Ha yini swi ri swa nkoka ku ku landzelela? Xana u nga ku hlakulerisa ku yini hi vutalo evuton’wini bya wena? Tinhlamulo ti fanele ti va ta nkoka lowukulu eka hina, hikuva hi fanele ku va vanhu lava tiviwaka hi ‘swiendlo swo chava Xikwembu’ loko hi ta pona siku leri tshinelaka ra ku avanyisa ka Yehova.—2 Petro 3:11, 12.
Nhlamuselo Ya Ku Chava Xikwembu
4. I yini lexi Pawulo a tsundzuxeke Timotiya ku xi endla, naswona hi xihi lexi a xi ri ntiyiso hi Timotiya enkarhini lowu?
4 Enkarhini wun’wana exikarhi ka 61 na 64 C.E., muapostola Pawulo u tsale papila ra yena ro sungula leri huhuteriweke ri ya eka mudyondzisiwa wa Mukriste Timotiya. Endzhaku ko hlamusela makhombo lawa rirhandzu ra mali ri nga yisaka eka wona, Pawulo u tsarile: “Kambe loko a ri wena, munhu wa Xikwembu, fambela kule ni swilo leswi hinkwaswo. [Kambe landzelela ku chava Xikwembu.]” (1 Timotiya 6:9-11) Lexi tsakisaka, hi nkarhi lowu kumbexana Timotiya a a ri eka malembe ya yena ya vu-30. Ana se a a fambe swinene na muapostola Pawulo naswona a a nyikiwile matimba yo hlawula valanguteri ni malandza ya vutirheli emabandhleni. (Mintirho 16:3; 1 Timotiya 5:22) Hambi swi ri tano, Pawulo u tsundzuxe wanuna loyi wa Mukriste la vupfeke, loyi a tinyiketeleke no khuvuriwa ku landzelela ku chava Xikwembu.
5. Xana hi yihi nhlamuselo ya xiga “[ku chava Xikwembu]”?
5 Xana Pawulo a a vula yini hi nhlamuselo leyi nge “[Ku chava Xikwembu]”? Rito ro sungula ra Xigriki (eu·seʹbei·a) ri nga ha hundzuluxeriwa hi ku kongoma tanihi “xichavo lexinene.” Hi ku ya hi nhlamuselo ya rona, ha hlaya: “Eusebeia ri humelela ko tala hi ndlela leyi ringanyetaka ku tinyikela ka munhu eka vukhongeri eka tinhlamuselo ta nkarhi wun’we . . . Kambe nhlamuselo ya rona leyi tolovelekeke swinene hi Xigriki lexi tolovelekeke xa nkarhi wa Rhoma a ku ri ‘ku tshembeka.’ . . . Eka Vakriste eusebeia i muxaka wa le henhla wa ku chava Xikwembu.” (Christian Words, hi Nigel Turner) Kutani hi laha xi tirhisiweke ha kona eMatsalweni, xiga lexi nge “[ku chava Xikwembu]” xi kombetela eka xichavo kumbe ku tinyiketela ka munhu hi xiyexe hi ku tshembeka eka Yehova Xikwembu.
6. Mukriste u byi nyikerisa ku yini vumbhoni bya ku chava ka yena Xikwembu?
6 Hambi swi ri tano, ku chava loku ka Xikwembu a hi ku titwa ka vugandzeri ntsena. Tanihi leswi ‘ku pfumela loku nga hava mintirho ku feke,’ kutani hi ku fanana, ku chava Xikwembu ku fanele ku vulavula evuton’wini bya un’wana. (Yakobo 2:26) Eka New Testament Words, William Barclay u tsarile: “[Eu·seʹbei·a ni marito lama yelanaka na rona] a ma hlamuseli ku titwa lokuya ka xichavo ni ku titsonghata ntsena, kambe ya katsa ni vugandzeri lebyi fanelaka ku chava koloko, ni vutomi bya ku yingisa loku tiyeke loku fanelaka ku titsongahata koloko.” Eu·seʹbei·a ri hlamuseriwa ku ya emahlweni tanihi “ku xiya loku nga rivaleni ka Xikwembu eka swiendlo hinkwaswo swa vutomi.” (The Second Epistle General of Peter and the General Epistle of Jude, hi Michael Green) Kutani, Mukriste u fanele a nyika vumbhoni bya ku tinamarheta ka yena eka Yehova hi ndlela leyi a hanyaka vutomi bya yena ha yona.—1 Timotiya 2:2; 2 Petro 3:11.
Matshalatshala Yo Chivirika Ya Laveka
7. Xana Pawulo a a vula yini loko a khutaza Timotiya, hambi leswi a a khuvuriwile, ku “landzelela” ku chava Xikwembu?
7 Hambi swi ri tano, i yini lexi katsekaka eku kuriseni ni ku kombisa ku chava Xikwembu? Xana i mhaka yo khuvuriwa ntsena? Tsundzuka leswaku Timotiya, hambi loko a khuvuriwile u khutaziwe leswaku a “ku landzelela [hi ‘ku kongoma, ku landzeleli’]”.a (1 Timotiya 6:11, Kingdom Interlinear) Entiyisweni, Pawulo a a nga ehleketi leswaku mudyondzisiwa Timotiya u kala ku chava Xikwembu. Ematshan’wini ya sweswo, a a n’wi khutazela xilaveko xo hambeta a ku landzelela hi matimba ni ku chivirika. (Ringanisa Vafilipiya 3:14.) Entiyisweni, leswi a swi ta va ku landzelela ka vutomi hinkwabyo. Timotiya, ku fana ni Vakriste lava khuvuriweke hinkwavo, va nga hambeta va endla nhluvuko eku kombiseni ka ku chava Xikwembu.
8. Petro u swi kombisise ku yini leswaku matshalatshala yo chivirika ya laveka eka Mukriste la tinyiketeleke, la khuvuriweke leswaku a landzelela ku chava Xikwembu?
8 Matshalatshala yo chivirika ya laveka eka Mukriste la tinyiketeleke, la khuvuriweke leswaku a landzelela ku chava Xikwembu. Loko a tsalela Vakriste lava khuvuriweke lava a va ri na langutelo ro “[averiwa] vutomi lebyi humaka eka Xikwembu,” Petro u te: “Hikwalaho ka swona sweswo, endlani hi matimba hinkwawo ku seketela ku pfumela ka n’wina hi vunene, vunene byona mi byi seketela hi vutivi, mi seketela vutivi hi ku tikhoma, ni ku tikhoma hi ku tiyisela, ni ku tiyisela hi [ku chava Xikwembu].” (2 Petro 1:4-6) Entiyisweni, mpimo wa ripfumelo wa laveka leswaku hi tinyikela eku khuvuriweni. Hambi swi ri tano, ku landzela nkhuvulo a hi nge swi xavi, hi tikorwisa hi swikombiso leswi nga pfuniki nchumu swa Vukriste. Ku ri na sweswo, loko hi endla nhluvuko eku hanyeni ka Vukriste, hi fanele ku hambeta hi kurisa timfanelo tin’wana letinene, ku katsa ku chava Xikwembu, loku nga nyikeriwaka eripfumelweni ra hina. Petro u te leswi swi lava matshalatshala yo chivirika etlhelweni ra hina.
9. (a) Xana rito ra Xigriki leri vulaka “ku nyika” ri wu kombisa njhani mpimo wa matshalatshala lama lavekaka yo kurisa ku chava Xikwembu? (b) I yini lexi Petro a hi khutazaka ku xi endla?
9 Rito ra Xigriki leri Petro a ri tirhisaka ro vula “ku nyika” (e·pi·kho·re·geʹo) ri na masungulo lama tsakisaka naswona ri kombisa mpimo wa matshalatshala lama lavekaka. Ri huma eka riviti (kho·re·gosʹ) leri hi ku kongoma ri vulaka “murhangeri wa ntlawa wa vuyimbeleri.” A ri kombetela eka un’wana la hakelaka swikweleti hinkwaswo swa ku dyondzisa ni ku hlayisa ntlawa wa vuyimbeleri eku tlangeni ka le xitejini. Vavanuna vo tano va byarhe vutihlamuleri byo tirhandzela hikwalaho ka rirhandzu ra muti wa vona ni ku hakela swikweleti hi timali ta vona. A ku ri vutinyungubyisi bya vavanuna vo tano ku tirhisa swo tala ku nyika hinkwaswo leswi a swi laveka eka xiendlo lexi xiyekaka. Rito ri tlhele ri vula “ku nyika, ku phamela hi vutalo.” (Ringanisa 2 Petro 1:11.) Kutani Petro u hi khutaza ku tiwundla, ku nga ri ntsena hi mpimo wo chava Xikwembu, kambe hi nhlamuselo leyi taleke leyi kotekaka ya mfanelo leyi ya nkoka.
10, 11. (a) Ha yini matshalatshala ma laveka ku hlakulela ni ku kombisa ku chava Xikwembu? (b) Xana hi nga yi winisa ku yini nyimpi?
10 Hambi swi ri tano, ha yini matshalatshala yo tano ya laveka leswaku u hlakulela ni ku kombisa ku chava Xikwembu? Hi xikombiso, ku ni ku lwisana ni nyama leyi tsaneke. Tanihi leswi “makungu ya timbilu ta v̌anhu ma [biheke] ku suka e v̌uhlangini bya v̌ona,” a swi olovi ku landzelela vutomi bya ku yingisa loku tiyeke eka Xikwembu. (Genesa 8:21; Varhoma 7:21-23) “Hinkwavo lava navelaka ku hanya vutomi bya [ku chava Xikwembu] eka Kriste Yesu, va ta xanisiwa,” ku vula muapostola Pawulo. (2 Timotiya 3:12) Ina, Mukriste la tinyiketeleke ku hanya hi ndlela leyi tsakisaka Xikwembu u fanele ku hambana ni misava. U ni xiyimo xo hambana xa mimpimanyeto ni makungu lama hambaneke. Hi laha Yesu a tsundzuxeke ha kona, leswi swi pfuxa rivengo ra misava leyo biha.—Yohane 15:19; 1 Petro 4:4.
11 Hambi swi ri tano, hi nga wina nyimpi, hikuva “[Yehova wa] swi tiva ku ponisa vanhu [lava n’wi chavaka] eku karhatekeni ka vona.” (2 Petro 2:9) Hambi swi ri tano, hi fanele ku endla xiphemu xa hina hi ku hambeta hi landzelela ku chava Xikwembu.
Ku Hlakulela Ku Chava Xikwembu
12. Petro u swi kombisisa ku yini leswi lavekaka ku kurisa ku chava Xikwembu hi mpimo lowu taleke?
12 Kutani, u nga ku hlakulerisa ku yini ku chava loku ka Xikwembu hi mpimo lowu taleke? Muapostola Petro u nyikela vuthala. Eka 2 Petro 1:5, 6, loko a xaxameta timfanelo leti ti faneleke ku nyikeriwa eripfumelweni ra hina, u xaxameta vutivi ehenhla ka ku chava Xikwembu. Eku sunguleni ka ndzima yoleyo, u tsarile: “Hi matimba ya yena ya vukwembu, . . . ú hi nyikile swilo hinkwaswo leswi swi hi pfunaka ku hanya vutomi bya vukhongeri, hi mhaka ya loyi a hi [vitaneke].” (2 Petro 1:3) Xisweswo Petro u hlanganisa ku chava Xikwembu ni vutivi lebyi kongomeke bya Yehova.
13. Ha yini vutivi lebyi kongomeke byi ri bya nkoka eku kuriseni ka ku chava Xikwembu?
13 Entiyisweni, handle ka vutivi lebyi kongomeke swa nononhwa ku hlakulela ku chava Xikwembu. Ha yini? Ina, tsundzuka leswaku ku chava Xikwembu i ku tshinelela Yehova hi wexe naswona swi kombisiwa hi ndlela leyi hi hanyaka vutomi bya hina ha yona. Xisweswo vutivi lebyi kongomeke bya Yehova bya laveka, tanihi leswi byi katsaka ku n’wi tiva kahle, hi xiviri, u titoloveta hi laha ku heleleke na timfanelo ni tindlela ta yena. Ku tlula sweswo, swi katsa ku lwela ku n’wi tekelela. (Vaefesa 5:1) Loko hi ya emahlweni ni ku dyondza hi Yehova ni ku anakanyisisa hi tindlela ni timfanelo ta yena evuton’wini bya hina, hi ta n’wi tiva ku antswa. (2 Vakorinto 3:18; ringanisa 1 Yohane 2:3-6.) Leswi hi ku fanana swi tisa ku tlangela loku ku enteke eka timfanelo ta Yehova ta nkoka, mpimo lowu teleke wa ku chava Xikwembu.
14. Ku kuma vutivi lebyi kongomeke, xana nongonoko wa hina wa dyondzo ya munhu hi xiyexe wu fanele wu katsa yini, naswona ha yini?
14 Xana u nga byi kumisa ku yini vutivi byebyo lebyi kongomeke? A ku na ku tsemakanya. Ku kuma vutivi lebyi kongomeke, hi fanele ku chivirika eku dyondzeni ka Rito ra Xikwembu ni tibuku leti seketeriweke eBibeleni. Dyondzo yo tano ya munhu hi xiyexe yi fanele yi katsa nongonoko wa nkarhi na nkarhi wa ku hlaya ka Bibele, hi laha swi xaxametiweke ha kona hi ku ya hi Xikolo xa Vutirheli bya le Tilweni. (Psalma 1:2) Tanihi leswi Bibele yi nga nyiko yo huma eka Yehova, leswi hi swi endlaka hi tlhelo ra dyondzo ya Bibele ya munhu hi xiyexe i xikombiso xa leswi hi yi tlangerisaka xiswona nyiko yoleyo. Xana mikhuva ya dyondzo ya wena ya munhu hi xiyexe yi paluxa yini mayelana ni vuento bya ku tlangela ka wena ka tinyiko ta Yehova ta moya?—Psalma 119:97.
15, 16. (a) Xana i yini lexi nga hi pfunaka ku kurisa ku navela ka moya ka dyondzo ya Bibele ya munhu hi xiyexe? (b) Loko dyondzo ya Bibele ya munhu hi xiyexe yi ta vanga ku kurisa ka hina ku chava Xikwembu, i yini lexi faneleke ku endliwa loko u hlaya xiphemu xa Rito ra Xikwembu?
15 Entiyisweni, ku hlaya ni ku dyondza a swi olovi eka van’wana. Kambe hi nkarhi ni matshalatshala, u nga ha kurisa ku navela ka moya ka dyondzo ya Bibele ya munhu hi xiyexe. (1 Petro 2:2) Loko u anakanyisisa hi ku tlangela eka hinkwaswo leswi Yehova Xikwembu a swi endleke, na leswi a swi endlaka na leswi a nga ta swi endla hikwalaho ka wena, mbilu ya wena yi ta ku susumetela ku dyondza hinkwaswo leswi u nga swi kotaka ha yena.—Psalma 25:4.
16 Kambe loko dyondzo yo tano ya munhu hi xiyexe yi ta vanga ku kurisa ka wena ka ku chava Xikwembu, xikongomelo xa wena xi nge vi xo heta matluka ya buku kumbe ku tata mianakanyo ya wena hi mahungu. Ematshan’wini ya sweswo, loko u hlaya xiphemu xa Rito ra Xikwembu, u fanele u teka nkarhi wo anakanyisisa hi mhaka, u tivutisa swivutiso swo tanihi leswi: ‘Xana swi ndzi dyondzisa yini hi timfanelo ni tindlela ta rirhandzu ta Yehova? Xana ndzi nga va la fanaka swinene na Yehova eka timhaka leti hi ndlela yihi?’
17. (a) Hi dyondza yini hi tintswalo ta Yehova eka buku ya Hosea? (b) Xana ku anakanyisisa hi tintswalo ta Yehova swi fanele swi hi khumba njhani?
17 Xiya xikombiso. Enkarhini lowu hundzeke xiavelo xa hina xa ku hlaya ka Bibele eka Xikolo xa Vutirheli bya le Tilweni a xi hi yisa eka buku ya Hosea. Endzhaku ko hlaya buku leyi ya Bibele, u nga ha va u tivutisile: ‘Xana ndzi dyondza yini hi Yehova tanihi Munhu—timfanelo ta yena ni tindlela ta yena—ebukwini leyi?’ Ndlela leyi tirhisiweke hi vatsari va le ndzhaku va Bibele yi kombisa leswaku hi dyondza swo tala hi tintswalo ta rirhandzu ta Yehova eka buku ya Hosea. (Ringanisa Matewu 9:13 na Hosea 6:6; Varhoma 9:22-26 na Hosea 1:10 na 2:21-23.) Ku rhandza ka Yehova ko komba tintswalo eka Israyele ku kombisiwe hi ku hanyisana ka Hosea ni nsati wa yena, Gomere. (Hosea 1:2; 3:1-5) Hambi leswi ku halata ngati, ku yiva, vuoswi ni ku phahla swikwembu a swi hangalakile eIsrayele, Yehova ‘u vulavule hi musa na Israyele.’ (Hosea 2:13, 14; 4:2) Yehova a a nga sindzisiwanga ku kombisa tintswalo to tano kambe a a ta endla tano hi ku “ranḍa hi mbilu hikwayo,” loko Vaisrayele va kombisa ku tisola loku heleleke kutani va hundzuka eka xiendlo xa vona xa vudyoho. (Hosea 14:4; ringanisa Hosea 3:3.) Loko u ri karhi u anakanyisisa hi ndlela leyi mayelana ni tintswalo ta Yehova leti tlurisaka mpimo, swi ta tsakisa mbilu ya wena, swi tiyisa rirhandzu ra ka wena eka yena.
18. Endzhaku ko anakanyisisa hi tintswalo ta Yehova hi laha ti kandziyisiweke ha kona eka Hosea, i yini lexi u nga tivutisaka xona?
18 Hambi swi ri tano, ku laveka swo tala. Yesu u te: “Ku katekile lava nga ni tintswalo, hikuva va ta kombiwa tintswalo.” (Matewu 5:7) Hikwalaho, endzhaku ko anakanyisisa hi tintswalo ta Yehova hi laha swi kandziyisiweke ha kona ebukwini ya Hosea, tivutise: ‘Xana ndzi nga landzela tintswalo ta Yehova ku antswa eku tirhisaneni ka mina ni van’wana hi ndlela yihi? Loko makwerhu wa xinuna kumbe wa xisati loyi a ndzi dyoheleke kumbe a ndzi hlundzukiseke a kombela ku rivaleriwa, xana ndza n’wi rivalela hi “mbilu yo basa”?’ (Varhoma 12:8; Vaefesa 4:32) Loko u tirha ebandleni tanihi nkulu la hlawuriweke, u nga ha tivutisa: ‘Loko ndzi khome timhaka to ahlula, xana ndzi nga tekelela Yehova ku antswa hi ndlela yihi, loyi a “riv̌alelaka,” ngopfu-ngopfu loko mudyohi a nyika vumbhoni bya xiviri bya ku hundzuka ka mbilu hinkwayo?’ (Psalma 86:5; Swivuriso 28:13) ‘Xana ndzi fanele ndzi langutela yini tanihi xisekelo xo kurisa tintswalo?’—Ringanisa Hosea 5:4 na 7:14.
19, 20. (a) Ku humelela yini loko dyondzo ya Bibele yi endliwa hi vukheta? (b) Hi xihi xipfuno xin’wana eku hlakuleleni ko chava Xikwembu?
19 Dyondzo ya wena ya munhu hi xiyexe ya Bibele yi nga va leyi vuyerisaka swinene loko yi endliwa hi ndlela yo tano ya rixaladza! Mbilu ya wena yi ta tala hi ku tlangela timfanelo ta nkoka ta Yehova. Kutani hi ku hambeta u lwela ku tekelela timfanelo leti evuton’wini bya wena, u ta tiyisa ku tinamarheta ka wena hi wexe eka yena. Xisweswo u ta va u landzelela ku chava Xikwembu tanihi nandza wa Yehova la tinyiketeleke, la khuvuriweke.—1 Timotiya 6:11.
20 Xipfuno xin’wana eku hlakuleleni ka mfanelo leyi ya nkoka xi nga kumeka eka Yesu Kriste—xikombiso lexi heleleke xa ku chava Xikwembu. Xana ku landzela xikombiso xa Yesu swi ku pfuna njhani eku hlakuleleni ni le ku kombiseni ka ku chava Xikwembu? Xihloko lexi nga eka tluka 18 xi ta hlamusela leswi na swivutiso leswi fambelanaka na xona.
[Nhlamuselo ya le hansi]
a Malunghana ni rito ra Xigriki di·oʹko (“landzelela”), The New International Dictionary of New Testament Theology yi hlamusela leswaku eka matsalele man’wana rito “hi ku ko[ngoma] ri vula ku hlongorisa, landzelela, ku sala endzhaku ka, . . . naswona hi ku fane[kisela] i ku landzelela swin’wana hi ku chivirika, ku ringeta ku fikelela swin’wana, ku ringeta ku kuma swin’wana.”
A Wu Ta Hlamurisa Ku Yini?
◻ Ha yini nkhuvulo ku nga ri goza ro hetelela leri u ri tekaka evuton’wini bya wena bya Vukriste?
◻ Hi yihi nhlamuselo ya “[ku chava Xikwembu],” naswona u byi nyikerisa ku yini vumbhoni bya kona?
◻ Ha yini matshalatshala yo chivirika ya laveka ku kurisa ku chava Xikwembu?
◻ Xana u nga ku hlakulerisa ku yini ku chava Xikwembu hi mpimo lowu taleke?