Xana Vunene Bya Xikwembu Bya Ku Koka?

XANA u na yena munghana lonkulu swinene? Loko swi ri tano, xana u tshama u anakanya hi leswi swi ku kokeleke eka munhu yoloye? Xana i xivumbeko xa yena? Xana i mhaka ya leswaku a mi tsakela swilo leswi fanaka? Kumbe a ku ri timfanelo leti enteke to tanihi tintswalo kumbe vutlhari? Loko mfanelo leyi tiyiseke vuxaka bya n’wina a ku ri vunene, kutani u ni vuxaka lebyi fuweke hakunene. Vunene bya xiviri a byi tali ku kumeka namuntlha loko, hi ntolovelo, vanhu va ri “lava vengaka leswo lulama.”—2 Timotiya 3:3.

Eka Mukriste, leswi nga swa nkoka ngopfu evuton’wini a hi vuxaka ni munhu un’wana kambe ni Xikwembu. Kutani loko u ehleketa hi vuxaka lebyi, xana u tshama u kambisisa leswaku: ‘Hi yihi ya timfanelo ta Xikwembu leyi ndzi kokelaka ngopfu eka Xikwembu?’

Timfanelo Letikulu Ta Xikwembu

Entiyisweni, Bibele yi hlamusela timfanelo ta Xikwembu leti xiyekaka. Hakanyingi ta mune leti kandziyisiwaka i rirhandzu ra xona, vululami bya xona, vutlhari bya xona ni matimba ya xona lamakulu ngopfu. (Deuteronoma 32:4; Yobo 12:13; Psalma 147:5; 1 Yohane 4:8) Loko a hi boheka ku hlawula exikarhi ka timfanelo leti ta mune leti xiyekaka, kumbexana hi nga vula leswaku rirhandzu ra Xikwembu ri hi koke ngopfu. Hambi swi ri tano, lexi yelanaka swinene ni rirhandzu ra xona, i vunene bya xona lebyikulu. Vatsari va Bibele va swi tsale hi rixaladza leswi, naswona vunene lebyo tano byi nga kokela vanhu eka vuxaka lebyi tengeke, lebyi tsakisaka ni Muvumbi wa vona.

Hi xikombiso, eku heleni ka lembe xidzana ra vutsevu B.C.E., muprofeta Zakariya u huwelele hi Yehova a ku: “Vona vukulu bya vunene bya yena, ni ku saseka ka yena lokukulu!” (Zakaria 9:17, NW) Malembe layo tala emahlweni ka Zakariya, Esaya hi ku fanana u dzunise Xikwembu loko a tsarile a ku: “Nḍi ta ḍunisa tintŝalo ta Yehova, . . . ni v̌unene bya yena le’byikulu e ka yindlu ya Israel, lebyi a nga v̌a kombisa byona hi tintŝalo ta yena.”—Esaya 63:7.

Malembe xidzana manharhu emahlweninyana, Hosi Davhida u tsale leswi nyanyulaka ngopfu hi vunene bya Xikwembu. Davhida u tsale hi ntokoto, hi leswi a tsakeleke vunene lebyi evuton’wini bya yena hinkwabyo. Xikwembu a xi ri lexinene ngopfu eka Davhida, ngopfu-ngopfu endzhaku ka swidyoho swa yena leswikulu malunghana na Batšeba ni nuna wakwe Uriya, loko Xikwembu xi n’wi kombise tintswalo. (2 Samuel 12:9, 13) Eka Psalma 31:19, Davhida u vule hi ku tlangela a ku: “Ku kurile ŝonghasi e ku kateka ka wena lo’ku u v̌ekelaka la’v̌a ku tšhav̌aka.”

Xana u tlangela vunene bya Xikwembu hi laha vagandzeri volavo va khale va endleke ha kona? Loko swi ri tano, u ta tokota “ku rhula ka Xikwembu loku tlulaka ku twisisa hinkwako” ka xiviri, swin’we ni ku susumetiwa swinene leswaku u endla ku rhandza ka Xikwembu minkarhi hinkwayo. (Vafilipiya 4:7) Sweswi a hi kambisiseni swa xinkarhana leswi vunene bya Xikwembu byi swi katsaka ni ndlela leyi ku anama ka byona ku hlamarisaka ha yona. Entiyisweni leswi swi ta kurisa ku tlangela ka hina eka Tata wa hina wa rirhandzu wa le tilweni.