Ku Dyondza Xihundla Xo Kwetsima Xa Ku Chava Xikwembu
“Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzelela.”—1 PETRO 2:21.
1. A xi ri xihi xikongomelo xa Yehova malunghana ni ‘xihundla xo kwetsima xa ku chava Xikwembu’?
‘XIHUNDLA xo kwetsima xa ku chava Xikwembu’ a xa ha ri xihundla! (1 Timotiya 3:16) Xi hambane swonghasi ni swihundla swa vukhongeri bya mavunwa, ku fana ni Vunharhu-un’we bya xihundla, lebyi tshamaka byi ri swihundla! Ku hava na un’we loyi a nga byi twisisaka. Ku ri na sweswo, Yehova u kunguhate leswaku xihundla xo kwetsima lexi paluxiweke tanihi Yesu Kriste, xi fanele ku humeseriwa erivaleni hi laha swi nga kotekaka ha kona. Yesu hi byakwe u ve xikombiso lexi xiyekaka xa muhuweleri loyi a chivirikaka wa Mfumo wa Xikwembu. Hi nga dyondza swo tala eka rungula ra yena ni ndlela yo chumayela, hi laha hi nga ta swi vona ha kona sweswi.
2. Ha yini vutirheli bya Yesu byi rhangela nkutsulo? (Matewu 20:28)
2 Kutani ke, a hi yeni emahlweni hi kambisisa mhaka ya ku va Yesu a “vonakisiwile a ri munhu.” (1 Timotiya 3:16) Eka Matewu 20:28 hi hlaya leswaku Yesu ‘u tile, ku nga ri ku ta tirheriwa, kambe ku tirhela, ni ku nyika vutomi bya yena eku kutsula lavo tala.’ Leswi swi tlhela swi veka ku tirhela ka yena emahlweni ka nkutsulo. Ha yini swi ri tano? Wa nga vonanyana, le ndzhaku aEdeni Nyoka leyi hambukisaka yi kanete vuhosi lebyi faneleke bya Yehova ehenhla ka vanhu, yi vula leswaku ntumbuluko wa Xikwembu a wu hoxile ni leswaku ku hava munhu loyi ehansi ka ndzingo a nga hlayisaka vutshembeki eka la Tlakukeke Swinene. (Ringanisa Yobo 1:6-12; 2:1-10.) Vutirheli bya Yesu lebyi nga tsekatsekiki tanihi munhu la hetisekeke, “Adamu lowo hetelela” byi kombise mukaneti Sathana a ri muhembi loyi a hombolokeke. (1 Vakorinto 15:45) Ku tlula kwalaho, Yesu u kombise timfanelo ta yena hi xitalo ta ku tirha tanihi “Murhangeri ni muponisi” wa Xikwembu ni ku “avanyisa misava eku lulameni,” eku lweleni ka vuhosi bya Yehova.—Mintirho 5:31; 17:31.
3. Yesu u lwisane ni ntlhontlho wa Sathana hi laha ku heleleke hi ndlela yihi?
3 Yesu u kanete mphikamakaneta ya Sathana hi laha ku heleleke! Ematin’wini hinkwawo, a ku vanga na munhu emisaveni leyi loyi a tirheleke Xikwembu hi ku tinyiketela ko tano—ku nga khathariseki ku hlekuriwa, ku biwa ni ku xanisiwa ka le mirini ni ka le mianakanyweni. Kriste a a fanele a tiyisela mindzhukano ya tinhlamba tanihi N’wana wa Xikwembu. Eka swona hinkwaswo—hambi ku ri ku yisa eka rifu ra tihanyi ni leri khomisaka tingana—a a tiyile, a nga tsekatseki eku tshembekeni eka Tata wa yena. Eka Vafilipiya 2:8, 9, Pawulo u tsala leswaku hikwalaho ka leswi Yesu a yingiseke ‘ku yisa eku feni, ina, rifu emhandzini ya nxaniso, Xikwembu xi n’wi tlakusile ivi xi n’wi nyika vito leri nga ehenhla ka mavito hinkwawo.’ Yesu u paluxe Sathana tanihi muhembi wa vukari loyi a nga yena!
4. Ha yini Yesu a byele Pilato leswaku u tile emisaveni ku ta nyikela vumbhoni ehenhla ka ntiyiso?
4 Xisweswo, eku heleni ka malembe ma nga ri mangani ya ku chumayela lokukulu, Yesu u kote ku tiyisa hi xivindzi eka Pontiyo Pilato a ku: “Ku vula wena leswaku ndzi hosi. Leswi ndzi velekeriweke swona ni leswi ndzi nga tela swona laha misaveni i ku ta ndzi ta veka vumbhoni ehenhla ka ntiyiso. Un’wana ni un’wana la nga wa ntiyiso, ú yingisa rito ra mina.” (Yohane 18:37) Yesu u kombise ku chava Xikwembu lokukulu eku huweleleni ka ntiyiso wa Mfumo wa Xikwembu ePalestina hinkwako. U dyondzise vadyondzisiwa va yena leswaku na vona va va vachumayeri lava gingiritekaka. Mawaku ndlela leyi xikombiso xa yena xi hi nyanyulaka ha yona ku landzela minkondzo ya yena namuntlha!
Ku Dyondza Eka Xikombiso Xa Hina
5. Hi nga dyondza yini malunghana ni ku chava Xikwembu hi ku langutisa swinene eka Yesu?
5 Hi ku chava ka hina Xikwembu eku endleni ka ku rhandza ka Yehova, na hina hi nga kombisa Diyavulosi a ri muhembi. Ku nga khathariseki miringo leyi hi yi tokotaka, ku hava na wun’we lowu ringanaka ni mahlomulo ni ku khomisiwa tingana ku fana ni leswi swi tokotiweke ha Yesu. Kutani ke, a hi dyondzeni eka Xikombiso xa hina. Hi laha Vaheveru 12:1, 2 yi hi khutazaka ha kona, onge hi nga tsutsuma hi ku tiyisela ‘hi ri karhi hi languta swinene eka Musunguri ni Muhetisisi wa ripfumelo ra hina, Yesu.’ Ku hambana na Adamu, loyi a hlulekeke loko swi ta eka ku chava Xikwembu, Yesu u ve munhu a ri swakwe emisaveni loyi a hlangavetaneke ni mindzingo hinkwayo hi ndlela leyi hetisekeke. Ku fikela eku feni, u tikombise a ri “wo hlawuleka, wo pfumala nandzu, wo kala xivati, wo hambana ni vadyohi.” (Vaheveru 7:26) Eka vutshembeki lebyi nga tsekatsekiki, u swi kotile ku byela valala va yena a ku: “I mani eka n’wina la nga kombaka xidyoho xa mina xana?” Yesu u sivele mphikamakaneta ya Sathana, a ku: “Mufumi wa misava leyi . . . a nga na matimba ehenhla ka mina.” Naswona loko a gimeta nkulumo ya yena yo hetelela eka vadyondzisiwa va yena a nga si xengiwa ni ku khomiwa, u va byerile a ku: “Tiyani timbilu, ndzi hlurile misava.”—Yohane 8:46; 14:30; 16:33.
6. (a) Ha yini Yesu a tiva muxaka wa ku wisa loku laviwaka hi vanhu? (b) Yesu u kombise ku chava Xikwembu ku fikela eka mpimo wihi?
6 Hi tlhelo ra nyama laha misaveni, Yesu u tokote leswi swi vulaka swona ku va munhu, ‘a va ehansinyana ka tintsumi.’ (Vaheveru 2:7) U tolovelanile ni ku tsana ka vanhu naswona hikwalaho u hlome kahle ku tirha tanihi Hosi ni Muavanyisi wa vanhu hi malembe ya gidi. N’wana loyi wa Xikwembu, loyi a nga te, “Tanani ka mina, n’wina hinkwenu lava karhaleke, ni lava tikeriwaka, ndzi ta mi wisisa,” wa wu tiva muxaka wa ku wisisa lowu laviwaka hi vanhu. (Matewu 11:28) Vaheveru 5:7-9 ya hi byela: “Emasikwini ya yena ya ku hanya la misaveni, Yesu ú khongerile ni ku kombela hi ku titsongahata, a huwelela hi matimba ni ku rila hi mihloti, eka Xikwembu lexi a xi ri ni matimba ya ku n’wi ponisa eku feni, kutani ú yingisile hikwalaho ka xichavo xa yena. Hambileswi a a ri N’wana wa Xikwembu, ú dyondzile ku yingisa hi mhaka ya ku xaniseka ka yena. Kutani loko a endliwe la hetisekeke [eku yingiseni], ú hundzukile xihlovo xa ku ponisiwa loku nga heriki eka hinkwavo lava va n’wi yingisaka.” Yesu a nga tsekatsekanga, hambi loko a a boheka ku tiyisela ku fikela eyinhleni yo tokota ndzhombo wa rifu ra munhu hi ku kuma ‘mbanga ya xirhendze’ leyi vangiweke hi Nyoka ya rivengo. (Genesa 3:15) Ku fana na Yesu, onge hi nga kombisa ku chava Xikwembu nkarhi na nkarhi, hambi ku ri ku fika eku feni loko swi endleka, hi tshemba leswaku Yehova Xikwembu u ta twa swikhongelo swa hina kutani a hi ponisa.
‘Ku Hanya Hi Ku Lulama’
7. Hi ku ya hi 1 Petro 2:21-24, i xikombiso xihi lexi Kriste a hi siyeleke xona, naswona mahanyelo ya yena ya fanele ya hi khumba njhani?
7 Hambi loko a kombisiwe enyameni, Yesu hi ku tshembeka u paluxe xihundla xo kwetsima xa ku chava Xikwembu. Eka 1 Petro 2:21-24, ha hlaya: “Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzelela. A nga dyohanga nchumu, a nga vulanga swo kanganyisa van’wana. Loko a rhuketeriwa, a nga tlheriselanga hi ku rhuketela, loko va n’wi twisa ku vava, a nga vulanga leswaku ú ta tirihisela, kambe ú swi tshikile emavokweni ya loyi a avanyisaka hi ku lulama. Yena hi byakwe, ú rhwele swidyoho swa hina emirini wa yena le [mhandzini], leswaku na hina hi fa hi tlhelo ra ku dyoha, hi hanyela ku lulama.” Loko hi ri karhi hi anakanyisisa hi mahanyelo ya Yesu, mawaku ndlela leyi swi hi khutazaka ha yona ku landzelela ku chava Xikwembu, ku hlayisa vutshembeki, ni ku hanya hi ku lulama hi laha a endleke ha kona!
8. Hi nga hanya hi ku lulama hi laha Yesu a endleke ha kona hi ndlela yihi?
8 Yesu u hanye hi vululami hakunene. Psalma 45:7 yi profetile ha yena yi ku: “U ranḍa ku lulama, u v̌enga ŝo biha.” Loko a tirhisa marito wolawo eka Yesu, muapostola Pawulo eka Vaheveru 1:9 u te: “U rhandzile ku lulama, u vengile ku homboloka.” Hi mpfuno wa ku twisisa ka hina xihundla xo kwetsima xa ku chava loku ka Xikwembu, onge ku fana na Yesu hi nga rhandza leswi lulameke ni ku venga leswo biha hi minkarhi hinkwayo. Emahanyelweni ya Vukriste, lama namuntlha ma nga ehansi ka nhlaselo lowukulu wa misava ya Sathana wa tihanyi, ni le ku tirhisaneni ka hina hinkwako ni lava va nga endzeni ni le handle ka nhlengeletano ya Xikwembu, a hi tiyimiseleni ku hanya hi ku lulama, hi tlakusa misinya ya milawu leyi lulameke ya Yehova. Naswona a hi hambeteni hi dyondza Rito ra Xikwembu leswaku hi va ni vutlhari bya Xikwembu lebyi byi nga bya nkoka swinene leswaku hi lwisana na Diyavulosi ni marhengu ya yena!
9. I yini leswi engeteleke ku gingiriteka ka Yesu evutirhelini, naswona leswi swi katse yini malunghana ni varisi va vukhongeri bya mavunwa?
9 Nchumu wun’wana wu susumetele Yesu ku gingiriteka evutirhelini bya yena. A ku ri yini ke? Eka Matewu 9:36 ha hlaya: “Loko a vona mintshungu ya vanhu, a va twela vusiwana, hikuva a va karhele, va tshamile ehansi, va fana ni tinyimpfu leti nga riki na murisi.” Kutani Yesu “a va dyondzisa leswo tala.” (Marka 6:34) Xa nkoka, leswi swi katse ku paluxa vuhomboloki ni vubihi bya varisi va vukhongeri va mavunwa. Hi ku ya hi Matewu 15:7-9, eka van’wana va lava, Yesu u te: “Vakanganyisi, Esaya a a vula n’wina hakunene loko a te: ‘Vanhu lava va ndzi xixima hi nomo, kambe timbilu ta vona ti le kule na mina. Va tikarhata ntsena hi ku ndzi nkhinsamela, tidyondzo leti va ti dyondzisaka i milawu ya vanhu ntsena.’”
Xihundla Lexi Khomisaka Tingana
10. Namuntlha, ‘xihundla xa vuhomboloki lebyi’ xi kombetela eka vamani, naswona va ni nandzu wa yini?
10 Tanihi leswi Yesu a vuleke marito lama lwisanaka ni varhangeri va vukhongeri, kutani na hina namuntlha hi nyenya xihundla lexi hambanaka swinene ni xihundla xo kwetsima xa ku chava Xikwembu. Eka 2 Vatesalonika 2:7, Pawulo u xi vitane “ku homboloka loku tifihlaka.” A xi ri xihundla eka lembe xidzana ro sungula C.E., hikuva a xi nga ta paluxiwa hi nkarhi wo leha ku kondza ku va endzhaku ka rifu ra vaapostola. Namuntlha, xi kombetela eka vafundhisi va Vujagana, lava tsakelaka swinene tipolitiki ku tlula ku twarisa mahungu lamanene ya Mfumo wa Xikwembu lowu lulameke. Vukanganyisi bya andza eswikhundleni swa vona. Vaevhangeli va thelevhixini va mimpambukwa ya Maprotestente ya Vujagana i xikombiso lexi xiyekaka: vakanganyisi lava dyelelaka mintlhambi ya vona, lava akaka mimfumo ya timiliyoni to tala ta tirhandi, lava endlaka vuoswi ni tinghwavava, va rila mihloti ya tingwenya loko vona hi voxe va paluxiwa, naswona va ya emahlweni va kombela mali, mali leyi engetelekeke hi minkarhi hinkwayo. Vatican ya Rhoma Khatoliki yi nyika xifaniso lexi fanaka lexi nga tsakisiki, ni vuxaka bya yona bya politiki lebyi nga riki enawini, minkhuvo ya le handle, ni mikhuva leyi vumbaka vubihi.
11. Ku ta humelela yini eka vafundhisi va Vujagana ni le ka Babilona Lonkulu hinkwawo?
11 A swi hlamarisi leswi ntlawa wa vafundhisi va Vujagana wu nga funghiwaka tanihi “munhu lowo homboloka”! (2 Vatesalonika 2:3) Xiyenge lexi xi fumaka xa Babilona Lonkulu la fanaka ni muoswi xi ta paluxiwa hi laha ku taleke ni ku lovisiwa, kun’we ni vukhongeri lebyin’wana hinkwabyo bya mavunwa. Hi laha hi hlayaka ha kona eka Nhlavutelo 18:9-17, van’watipolitiki ni vamabindzu (ni vavekisi va vona) kutani va ta kolola va ku: “Yo! Yo! Wena muti lowukulu.” Babilona Lonkulu ni swihundla swa yena u ta va a lovisiwile, hi ku hambana lokukulu ni hinkwavo lava voningelaka xihundla xo kwetsima xa ku chava Xikwembu.
12. Ku rhandza ka Yesu vululami ku n’wi susumetele ku endla yini?
12 Rirhandzu ra Yesu ra vululami ni ku venga vuhomboloki ri n’wi susumetele ku tikarhata handle ko tshika hikwalaho ka vugandzeri bya ntiyiso. Eka riendzo rakwe ro sungula ro ya eYerusalema tanihi N’wana wa Xikwembu la totiweke, Kriste u hlongole vamabindzu ni vacinci va timali etempeleni, a ku: “Susani swilo leswi la, mi nga teki yindlu ya Tata wa mina, mi yi endla ya ku bindzulela eka yona.” (Yohane 2:13-17) Eka riendzo ra le ndzhakunyana ro ya etempeleni, Yesu u byele Vayuda lava kanetaka a ku: “N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina. A a ri mudlayi ni le ku sunguleni. A nga yimanga entiyisweni, hikuva ku hava ntiyiso eka yena. Loko a vulavula mavunwa, ú tikomba lexi a nga xona, hikuva i muhembi, ni tata wa mavunwa.” (Yohane 8:44) Mawaku xivindzi lexonghasi lexi Yesu a xi kombiseke eku byeleni vakhongeri volavo a kongomane na vona leswaku a va ri vahembi ni vana va Diyavulosi!
13. (a) Rivengo ra Yesu ra vuhomboloki ngopfu-ngopfu ri kombisiwe kwihi? (b) Ha yini vafundhisi va vuhomboloki va faneriwa hi ku avanyisa loku fanaka ni loku ku vuriweke hi Yesu ehenhla ka vatsari ni Vafarisi?
13 Ku venga ka Yesu vuhomboloki a ku hlamuseriwanga kun’wana hi ndlela leyi antswaka ku tlula eku avanyiseni ka yena loku tlhavaka mbilu ka vatsari ni Vafarisi va vukari, hi laha ku rhekhodiweke ha kona eka Matewu ndzima 23. Kwalaho u tivisa “khombo” leri nga hi matlhelo ya nkombo, a va ringanisa ni ‘masirha lama basisiweke—lama taleke hi tinxaka hinkwato ta thyaka, vukanganyisi ni vuhomboloki.’ Vona ndlela leyi Yesu a naveleke swonghasi ha yona ku ntshunxa vanhu lava tshikileriweke eka vuhomboloki byolebyo! “Yerusalema, Yerusalema,” u huwelerile, “kangani ndzi naverile ku hlengeleta vana va wena, kukotisa huku loko yi hlengeleta swiciwana swa yona ehansi ka timpapa ta yona, kambe a wu swi lavanga. Vonani, muti wa n’wina wu ta sala wu nga ri na munhu.” (Tindzimana 37, 38) Vafundhisi lavo homboloka va siku ra hina va faneriwa hi ku avanyisa loku fanaka, hikuva hi ku ya hi 2 Vatesalonika 2:12, ‘a va pfumeli ntiyiso, kambe va tsakela vuhomboloki.’ Vuhomboloki bya vona byi hambana swinene ni ku chava Xikwembu loku Yesu hi ku tshembeka lokukulu a ku kombiseke loko a ha ri laha misaveni.
Ku Twarisa Ku Avanyisa Ka Xikwembu
14. Ku tlangela xihundla xo kwetsima xa ku chava Xikwembu ku fanele ku hi susumetela ku endla yini?
14 Ku tlangela ka hina xihundla xo kwetsima xa ku chava Xikwembu ku fanele ku hi susumetela ku landzelela mintila ya Yesu swinene minkarhi hinkwayo. Ku fana na yena, hi fanele ku chivirika eku twariseni ka leswi Esaya 61:2 yi swi hlamuselaka tanihi “lembe le’rinene ra Yehova, ni siku ra ku tirihisela ka Šikwembu ša hina.” Naswona onge hi nga endla xiphemu xa hina hi ku chivirika ‘ku chavelela vanhu hinkwavo lava rilaka.’ Ku fana ni loko Yesu a ha ri emisaveni, swi lava xivindzi namuntlha ku twarisa ku avanyisa ka Yehova, ku katsa ni marungula ya matimba lama paluxiweke eswihlokweni swa Xihondzo xo Rindza ni le bukwini leyi nge Nhlavutelo—Ku Chaputa Ka Yona Loku Hlamarisaka Ku Tshinele! Hi fanele ku chumayela hi xivindzi ni vutlhari, marito ya hina ma ri lama ‘lungiweke hi munyu’ leswaku ma ta nandziha eka lava va tiyimiseleke vululami. (Vakolosa 4:6) Leswi se hi dyondzeke eka xikombiso xa Yesu xa ku chava Xikwembu, onge hi nga va lava swi kotaka ku vika hi nkarhi lowu faneleke leswaku hi hetile ntirho lowu Yehova a hi nyikeke wona leswaku hi wu endla.—Matewu 24:14; Yohane 17:4.
15. Malunghana ni xihundla xo kwetsima xa Xikwembu, ku humelele yini ku sukela hi 1914?
15 Loko a kombisiwile enyameni, vona Xikombiso lexinene lexi Yesu a a ri xona! Mawaku ndlela leyi xiyekaka swonghasi leyi xihundla xo kwetsima xa ku chava Xikwembu xi hetisekeke eka yena ha yona! Mawaku ndlela leyi a tlakuseke vito ra Yehova ha yona hi xivindzi swonghasi! Naswona mayana ndlela leyi Tata wa Yesu hi laha ku hlamarisaka a n’wi hakeleke ha yona hikwalaho ka ndlela ya yena yo hlayisa vutshembeki swonghasi! Kambe ka ha ri na leswi engetelekeke eka xihundla xo kwetsima xa Xikwembu. Ku sukela hi 1914, a hi hanya ‘esikwini ra Hosi.’ (Nhlavutelo 1:10) Hi laha Nhlavutelo 10:7 yi vulaka ha kona, i nkarhi wa leswaku ‘xihundla xo kwetsima xa Xikwembu hi ku ya hi mahungu lamanene xi fika emakumu.’ Marito ya le tilweni sweswi ma huwelerile: “Matimba ya ku fuma misava, sweswi ma nyikiwile Hosi ya hina [Yehova] ni Mesiya wa yona, kutani ú ta fuma hilaha ku nga heriki.” (Nhlavutelo 11:15) Yehova u yimise Hosi ya Vumesiya, Yesu Kriste, exiluvelweni xa yena lexi vangamaka leswaku a va mufumi-kulobye na Yena!
16. Xana Yesu Kriste, Hosi leyi ya ha ku vekiwaka exiluvelweni, u hatlise ku kombisa nkhathalelo wa yena wa ku chava Xikwembu etilweni hi ndlela yihi?
16 Tanihi mufumi-kulobye na Xikwembu eMfun’weni lowu wa ha ku simekiwaka, Yesu nakambe u vuriwa Mikayele (leswi vulaka ku, “I Mani Loyi A Fanaka Ni Xikwembu?”). Ku hava ku xandzuka loku nga humelelaka hikwalaho ka ku fana ni Xikwembu, naswona Hosi leyi ya ha ku vekiwaka exiluvelweni hi ku hatlisa yi kombise leswi hi ku cukumeta Nyoka yo sungula, Sathana, ni tintsumi ta yena emisaveni. (Nhlavutelo 12:7-9) Ina, Yesu u khathalela ku chava Xikwembu etilweni, tanihi leswi a kombiseke ku chava Xikwembu loko a ha ri emisaveni. Yesu Kriste la kwetsimisiweke a nge wisi ku kondza a herisa vukhongeri bya mavunwa ni ku herisa nhlengeletano ya Sathana leyi vonakaka ni leyi nga vonakiki hi laha ku heleleke.
17. Ku sukela hi 1914, a ku humelela yini eku hetisekeni ka Matewu 25:31-33?
17 Ku sukela hi 1914, ku hetiseka ka vuprofeta bya Yesu hi byakwe eka Matewu 25:31-33 hi laha ku tsakisaka ku voningele xihundla xo kwetsima xa Xikwembu. Kwalaho Yesu u ri: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. Ú ta yisa tinyimpfu evokweni ra yena ra xinene, timbuti tona eka lera ximatsi.” Eyinhleni yakwe ya xivandla lexinene xo vona hinkwaswo ematilweni, Hosi, Muavanyisi na Muyimeri loyi a vangamaka wa ku chava Xikwembu u ta tirihisela, a sungula hi munhu wa ku homboloka ni mintlawa yin’wana leyi kanetaka ya Babilona Lonkulu, ni le ka mintlawa hinkwayo leyi saleke ni le ka vaseketeri lava fanaka ni timbuti va nhlengeletano ya Sathana leyi hombolokeke ya laha misaveni. Sathana endzhakunyana u ta pfaleriwa ekheleni. (Nhlavutelo 20:1-3) Kambe “lavo lulama” lava fanaka ni tinyimpfu va ta ya evuton’wini lebyi nga heriki. (Matewu 25:46) Onge ku landzelela ka wena ku chava Xikwembu ku nga ku veka entlaweni wolowo wo lulama!
18. I lunghelo rihi leri tsakisaka leri hi nga na rona mulunghana ni xihundla xo kwetsima xa ku chava Xikwembu?
18 Nhlavutelo 19:10 yi hi khutaza ku “gandzela Xikwembu.” Naswona ha yini ke? Tsalwa leri ri ya emahlweni ri ku: “Vumbhoni lebyi humesiweke hi Yesu, hi wona mongo wa [vuprofeta].” Kutani byo tala bya vuprofeta lebyi huhuteriweke bya minkarhi ya khale byi kombisa vumbhoni eka Yesu! Naswona tanihi leswi vuprofeta lebyi byi hetisekeke, xihundla xo kwetsima xa Xikwembu xi paluxeke hi ndlela leyi xiyekaka. Hikwalaho ke, ha tsaka ku tiva leswaku xihundla xo kwetsima xa ku chava loku ka Xikwembu xi munhuhatiwe tanihi Yesu. Hi ni lunghelo leri hlamarisaka ra ku landzelela mintila ya yena tanihi vatirheli lava titsongahataka va Mfumo wa Xikwembu. Ina, hi ni lunghelo ro hlanganyela eku twisiseni ni le ku twariseni ka xihundla xo kwetsima xa Xikwembu hinkwaxo hi ku ya hi mahungu lamanene!
A Wu Ta Hlamurisa Ku Yini Ke?
◻ Hi nga dyondza yini eka xikombiso xa Yesu xa ku chava Xikwembu?
◻ Hi nga hanya hi ku lulama hi laha Kriste a endleke ha kona hi ndlela yihi?
◻ I xihundla xihi lexi khomisaka tingana lexi hambanaka swinene ni xihundla xo kwetsima xa ku chava Xikwembu?
◻ Ku tlangela ka hina ka xihundla xo kwetsima xa ku chava Xikwembu ku fanele ku hi susumetela ku endla yihi?
[Xifaniso lexi nga eka tluka 16]
Tanihi muyimeri wa ku chava Xikwembu ni mutwarisi la gingiritekaka wa Mfumo, Yesu u swi kotile ku byela Pilato a ku: “Leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso”
[Xifaniso lexi nga eka tluka 18]
Ku chava ka Yesu Xikwembu ku kombisiwe loko a avanyise vatsari ni Vafarisi