Ku Tshembeka I Ndlela Yo Antswa

KU TSHEMBEKA ku kandziyisiwe ngopfu eBibeleni naswona swa laveka eka Vakriste va ntiyiso. (Matewu 22:39; 2 Vakorinto 8:21) Ku tlula kwalaho, ku tshembeka hakunene i ndlela yo antswa, hi laha swi kombisiweke ha kona evuton’wini bya vo tala namuntlha lava mianakanyo ni timbilu ta vona swi cinciweke hi vutivi lebyinene bya Bibele. Xikombiso xa leswi xi huma eLiberia.

Endzhaku ka nkambisiso wo leha hi xikhongelo, nkulu wa Mukriste ni nsati wa yena va pfale xitolo xa vona xa vurhungi. Ha yini? Hikuva a xi dya nkarhi wa vona wo tala ni ku kavanyeta mintirho ya vona ya nsimu ni dyondzo ya munhu hi xiyexe. Va pfumele ku aneriseka hi mali leyi va yi kumaka hi ku xavisa tidayi ta mpahla. Hambi swi ri tano, xikan’we-kan’we endzhaku ka loko va teke goza leri, minxavo ya dayi yi ehlile emakete wa kwalaho. Sweswi mali ya vona a yi nga ha ta swi kota ku hlayisa ndyangu. Xana a va ta endla yini?

Va kombele khampani leyi phakelaka dayi leswaku yi hunguta minxavo ya yona, sweswo a swi ta nyikela ntila wo antswa wa mpindzulo. Leswi swi ariwile. Hambi swi ri tano, khampani yi pfumele ku rhumela ti-invoice timbirhi, yin’we yi komba nxavo wa ntiyiso kutani leyi yin’wana yi komba nxavo lowu hungutiweke lowu nga ta nyikiwa Vaxavi leswaku va ta hakela xibalo lexintsongo. Leswi a swi ta pfumelela nkulu ku kuma mpindzulo wa vuxisi wa R5 200 eka nhundzu yin’wana ni yin’wana.

Makwerhu u arile ku va xiphemu xa fambiselo leri nga tshembekangiki naswona a swi ta tekela hulumendhe mali. Valawuri va khampani va hlamarile. Va tsarile: “Hi xixima ripfalo ra wena,” naswona va hlawule nkulu ku va muxavisi wa nhundzu ya vona la nga yexe eLiberia. Leswi sweswi a kotaka ku khathalela swilaveko swa nyama swa ndyangu wa yena hi laha ku aneleke, nkulu ni nsati wa yena va swi kotile ku teka vuphayona bya nkarhinyana, va tirha swin’we ni vamakwerhu ku kurisa bandlha. Entiyisweni, ku tshembeka ka vona ku tikombise ku ri mikateko eka vona.

Le Spain, Alfonso na yena u kume leswaku ku tshembeka i ndlela yo antswa. Jaha leri ri suke ekaya ri ri na 12 wa malembe, naswona endzhakunyana a ri xavisa swidzidzirisi, kun’we ni ku yiva mimovha, emakaya ni le switolo. Minkarhi yin’wana a yiva eka switolo swo tala ku fika eka swa khume hi siku rin’we. Eka malembe ya 21, mune wa vanghana va yena va n’wi fumbuterile swinene, va yiva mphakelo wa yena hinkwawo wa swidzidzirisi, va n’wi tshembisa ku n’wi dlaya loko o va vika emaphoriseni. Tanihi leswi a a tiviwa ngopfu hi maphorisa, a a chava no ya exibedlhele a ya tshunguriwa.

Loko a hola hakantsongo-ntsongo eka timbanga ta yena, Alfonso u anakanyisise swinene hi ndlela ya yena ya vutomi. U tsundzuke swin’wana hi Bibele ni minsiya ya milawu ya Vukriste leyi mana wa yena a n’wi byeleke yona loko a ha ri xihlangi. Kutani, a honisa marito ya yena, kambe sweswi u kombele dyondzo ya Bibele ni Timbhoni ta Yehova. Hi tsevu wa tin’hweti a a cince hi ku helela eka mahanyelo ni vumunhu bya yena naswona a fanelekela ku khuvuriwa.

Hambi swi ri tano, siku ra le mahlweni ko khuvuriwa ka yena, u amukele xitiviso xo ya humelela ehubyeni ku ya langutana ni xihehlo xa ku yiva loku hlomeke. A ku ri nandzu lowu a wu endleke khale. Hambi swi ri tano, Alfanso u pfumele nandzu wa yena naswona u pfaleriwile a ri karhi a yimele xigwevo xa yena. Muyimeleri wa yena u n’wi tsundzuxe ku vula leswaku a nga yivangi nchumu ni leswaku a a nga khomi xibalesa. Kambe Alfonso u sindzise ku vula ntiyiso. Hikwalaho ka nandzu ni rhekhodo ya yena leyo biha emaphoriseni, muchuchisi u n’wi gweve malembe ya 13. Kambe hikwalaho ka mahanyelo lamanene ni ku tshembeka, u gweviwe tsevu wa tin’hweti, nkarhi lowu ana se a wu tshameke loko a yimela xigwevo.

Sweswi Alfonso ni nsati wa yena va tirhela Yehova hi ku tshembeka, va tsakile ku kuma xikongomelo xa ntiyiso evuton’wini ni ku va va kombisile hi ntokoto wa vona leswaku ku tshembeka i ndlela yo antswa.