Swivutiso Swa Vahlayi

◼ Ku chaya ka nanga ya ntsumi ya vunkombo ya Nhlavutelo ku sungule rini ku chayiwa?

Eka Nhlavutelo tindzima 8, 9 na 11, hi hlaya hi tintsumi ta nkombo leti chayeke tinanga ta nkombo, ti twarisa makhombo ya ntikelo lowukulu eka swiyenge swa vanhu. Leswi swi yimela ku twarisiwa ka ku avanyisa ka Yehova loku hangalasiweke hi vanhu va Yehova enkarhini hinkwawo wa makumu hi laha ku xiyekaka ku sungula hi ntsombano wa le Cedar Point wa 1922.—Vona Nhlavutelo—Ku Chaputa Ka Yona Loku Hlamarisaka Ku Tshinele!, tindzima 21 ku ya ka 23 na ndzima 26.

Ku chayiwa ko sungula ka tinanga ta mune ku paluxa xiyimo xo fa xa moya xa xiyenge xa Vujagana xa “misava” ni “lwandle,” kun’we ni ka xiyimo lexi weke xa vafundhisi ni munyama wa moya wa Vujagana.—Nhlavutelo 8:7-12.

Matimu ma kombisa leswaku ku paluxiwa ka le rivaleni ka mintiyiso leyi entiyisweni ku sungule emahlweni ka 1922. Hi xikombiso, dyondzo leyi nge “Timiliyoni Leti Hanyaka Sweswi Ti Nga Ka Ti Nga Fi,” ro sungula yi nyikeriweke hi 1918 kutani yi humesiwa hi xivumbeko xa xibukwana hi 1920, xi vulavula hi ku hluleka ka Vujagana ni ku tshinela ka makumu ya misava leyi. The Golden Age ya September 29, 1920, yi byi paluxe kahle Vujagana tanihi muoswi, muhembi ni muhambukisi wa vanhu.

Kutani ke, ha yini buku ya Ku Chaputa Ka Nhlavutelo yi vula leswaku tinanga leti ta mune ti sungule ntsena ku chayiwa entsombanweni wa le Cedar Point hi 1922? Hikuva hi wona nkarhi lowu ku huwelela loku nge “twarisani, twarisani, twarisani Hosi ni Mfumo wa yona” ku twarisiweke ha wona, ku nyika matimba lamakulu entirhweni wo chumayela. Nkandziyiso wa Xihondzo xo Rindza xa Xinghezi wa November 1, 1922, wu ri: “Vanghana . . . va swi teke tanihi nkulumo-nkulu ya ntsombano leswaku lunghelo ra ntiyiso ni ntirho wa lava tinyiketeleke sweswi emisaveni i ku twarisa vukona bya Hosi, Hosi leyikulu ya tihosi, ni leswaku mfumo wa yena wu fikile, ni leswaku lowu i nchumu wa nkoka swinene wo wu endla eka vona.”

Nakambe swi fanele swi xiyiwa leswaku loko marungula ya mune yo avanyisa hinkwawo ya hangalasiwile hi Timbhoni ta Yehova ku sukela hi 1922, un’wana ni un’wana hi laha ku fanaka u kume matimba lamakulu eku amukeleni ka swiboho swa mune emintsombanweni leyi veke kona exikarhi ka 1922 na 1925. Makume ya timiliyoni ta tikopi ta swiboho leswi swi hangalasiwile hi ku landzelelana ka swona hi xivumbeko xo kandziyisiwa, swi paluxa xiyimo xo fa emoyeni xa Vujagana hi laha ku humelelaka.—Vona buku ya Ku Chaputa Ka Nhlavutelo, tluka 133, ndzimana 15.

Ku chayiwa ka tinanga tinharhu to hetelela ku katsa “makhombo.” (Nhlavutelo 8:13) Ku hambanile ni ku chayiwa ka tinanga leto sungula ta mune hikuva ti yelana ni swiendlakalo swo karhi. Ku chayiwa ka nanga ya vuntlhanu ku yelana ni ku ntshunxiwa ka vanhu va Xikwembu “ekheleni” hi 1919. Ya vutsevu yi yelana ni “tinhenha leti a ti gadile tihanci” ni tsima lerikulu ra ku chumayela ka misava hinkwayo loku sunguleke hi 1922. Ya vunkombo yi yelana ni ku tswariwa ka Mfumo wa Xikwembu hi 1914.—Nhlavutelo 9:1-19; 11:15-19.

Xin’wana ni xin’wana xa swiendlakalo leswi xi tise khombo eka Sathana ni misava ya yena. Ku ntshunxiwa ka vatotiwa ekheleni ra ku nga tirhi hi 1919 ku lume vafundhisi va Vujagana naswona ku kombise ku ariwa ka byona loku heleleke hi Yehova. Ku sukela hi 1922 ku ta fikela namuntlha, vuthu lerikulu ra vagadi va tihanci ri dlaye Vujagana, hi tlhelo ra moya, ri paluxa xiyimo xa byona lexi feke ni ku byi tsundzuxa hi ku lovisiwa ka byona loku taka. Kutani endzhaku ka ku velekiwa ka Mfumo hi 1914, Sathana u hlongoriwile etilweni, a tlhontlha swiphiqo leswi nga ni khombo exikarhi ka vanhu. Ku nga ri khale Mfumo wu ta susa vandla ra vanhu leri vonakaka ri tiyile leri Sathana a ri akeke (misava), wu kukula vanhu lava xandzukaka (lwandle) eArmagedoni.—Nhlavutelo 11:17–12:12; 21:1.

Entsombanweni wa le Cedar Point hi 1922, “makhombo” hinkwawo manharhu ma ve erivaleni emisaveni hinkwayo. Tsima ra ku chumayela leri sunguriweke hi nkarhi wolowo ri swi endle swi vonaka leswaku “tinjiya” a ti humile “ekheleni” naswona nhlaselo wa “tinhenha leti a ti gadile tihanci” a wu sungurile. Kutani xirhambo lexi nyanyulaka xo twarisa Hosi ni Mfumo wa yona a xi twanana hi laha ku heleleke ni ku chayiwa ka nanga ya vunkombo. Nkandziyiso wa March 1, 1925 wa Xihondzo xo Rindza xa Xinghezi wu hlamuserile leswaku swiendlakalo swa 1914, 1919 na 1922 a swi vhumbiwile eka Nhlavutelo ndzima 12. Loku a ku ri ku twisisa loku entekenyana ka ku tswariwa ka Mfumo, naswona ku hangalasiwile hi ku tshembeka hi Timbhoni ta Yehova. Ku tlula kwalaho, ku tivisiwa ka rungula leri ra khombo ku kume matimba lamakulu eku amukeriweni ni le ku hangalasiweni loku landzelelanaka ka swiboho swa matimba hi nkarhi wa mintsombano leyi khomiweke hi 1926 ku ya ka 1928.—Vona Nhlavutelo—Ku Chaputa Ka Yona Loku Hlamarisaka Ku Tshinele!, matluka 147, 149, 172.

Hikwalaho, ku chayiwa ka tinanga ta nkombo ku sungule hi 1922 naswona ku ye emahlweni hi malembe ya va-1920. Ku sukela kwalaho, vanhu va Yehova va tirhisane ni tintsumi handle ko chava eku byeleni vanhu hinkwavo leswaku Vujagana byi file emoyeni, vafundhisi va byona i varhangeri lava weke, naswona ku nga ri khale byona ni misava ya byona ya vusathana swi ta herisiwa.