Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka lowukulu eka wena? Kutani ha yini u nga ringeti miehleketo ya wena hi leswi landzelaka?

◻ Xana hi fanele ku endla yini loko hi ta vona ntwanano ni ku rhula ka vanhu va tinxaka hinkwato loku kombisiweke eka Esaya 2:4?

Xo sungula, hi fanele ku pfumela leswaku Muvumbi wa hina, Yehova, u ni mfanelo yo hi letela ‘etindleleni ta yena.’ Xa vumbirhi, hi fanele hi va ni ku navela ka xiviri ko tixaxameta ni milawu ya Xikwembu hi ku vula hi ku: ‘Hi ta famba etindleleni ta yena.’ (Esaya 2:2, 3)—12/15, matluka 5, 6.

◻ Ha yini Timbhoni ta Yehova ti nga hetiwi matimba ni ku tsanisiwa hi rivengo ni ku kanetiwa ka misava hinkwayo?

Yesu u vhumbe leswaku ku kanetiwa ko tano ni rivengo ku ta va mfungho lowu funghaka vagandzeri va xiviri. (Yohane 15:20, 21; 2 Timotiya 3:12) Kutani vahuweleri va mahungu lamanene va tiyisekisiwa leswaku va amukeleka eka Xikwembu. Ku engetela kwalaho, Timbhoni ta Yehova ta swi tiva leswaku ti na nseketelo wa Yehova, Xikwembu xa le Henhla-henhla.—1/1, tluka 12.

◻ Hi swihi swilaveko swin’wana swa xisekelo leswi hi fanelaka ku swi fikelela loko swikhongelo swa hina swi ta hlamuriwa?

Hi fanele hi tshemba hakunene leswaku Xikwembu xa hanya. Hi fanele hi “xi lava,” hi tiyiseka leswaku xi ta hakela lava endlaka tano. (Vaheveru 11:6) Nakambe, hi fanele hi tshinelela Yehova ha Yesu Kriste naswona yena ntsena. (Yohane 14:6, 14)—1/15, matluka 4, 6.

◻ Xana “Ku Chava Xikwembu” i yini? (1 Timotiya 3:16)

Ku chava Xikwembu i xichavo, ku gandzela ni ku tirhela Xikwembu, hi vutshembeki eka vuhosi bya xona bya hinkwako-nkwako.—1/15, tluka 11.

◻ I mani “munhu lowo homboloka” loyi Pawulo a vulavulaka ha yena eka 2 Vatesalonika 2:3?

Pawulo a nga vulavuli hi munhu un’we, hikuva u vula leswaku “munhu” loyi a a ri kona esikwini ra Pawulo naswona u ta hambeta a va kona ku kondza Yehova a n’wi lovisa emakun’wini ya mafambiselo lawa. Kutani ke, “munhu lowo homboloka” i xiga xo fanisela. Vumbhoni byi kombisa leswaku i ntlawa wa vafundhisi va Vujagana lava tikukumuxaka va manyunyu, lava hi malembe xidzana lama hundzeke va tivekeke ehenhla tanihi nawu hi voxe.—2/1, tluka 11.

◻ Xana makwanga ma nga herisiwa njhani?

Makwanga exikarhi ka vanhu ma nga herisiwa ntsena hi dyondzo ni mukhuva lowu faneleke, ku ri ni vuleteri kumbe milawu ya mahanyelo leyi nga tluriwiki leyi faneleke ku landzeleriwa. Dyondzo yo tano yi fanele yi huma eka xihlovo lexi nga riki na makwanga hi xoxe. I Xikwembu xa le tilweni ntsena lexi nga nyikelaka muxaka lowu wa dyondzo, naswona yi kumeka eka buku-mpfuno ya xona leyi tsariweke, Bibele leyo kwetsima.—2/15, tluka 5.

◻ Loko dyondzo ya munhu hi xiyexe ya Bibele yi ta aka ku chava Xikwembu, xana dyondzo yi fanele yi katsa yini?

Xikongomelo xa dyondzo ya wena ya munhu hi xiyexe a xi nge vi xo heta matluka ya buku kumbe ku tata mianakanyo ya wena hi mahungu ntsena. Ematshan’wini ya sweswo, loko u hlaya xiphemu xa Rito ra Xikwembu, u fanele ku teka nkarhi wo anakanyisisa hi leswi xi ku dyondzisaka swona hi timfanelo ni tindlela ta Yehova leswaku xichudeni xi ta va lexi fanaka swinene na Yehova etimhakeni leti.—3/1, tluka 13.

◻ Ha yini dyondzo ya Bibele ya munhu hi xiyexe nkarhi na nkarhi yi fanele yi katsa ku hlaya timhaka ta Evhangeli ya Yesu?

Xikombiso xa Yesu xi hi pfuna ku hlakulela ku chava Xikwembu. Yesu a a tiva Tata wa yena ku antswa ku tlula munhu wihi na wihi, kutani a a ta swi kota ku tekelela tindlela ni timfanelo ta Yehova swinene. Hikwalaho, u hi vekele xikombiso lexi heleleke xa ku chava Xikwembu. (Yohane 1:18; 14:9; Varhoma 13:14)—3/1, tluka 19.

◻ Eka xifaniso xa titalenta, xana a swi vula yini ku tirhisa titalenta? (Matewu 25:19-23)

Ku tirhisa titalenta a swi vula ku tirha tanihi vayimeri va Xikwembu hi ku tshembeka, ku endliwa vadyondzisiwa ni ku phamela mintiyiso ya moya eka ndyangu wa Xikwembu. (Matewu 24:45; 28:19, 20; 2 Vakorinto 5:20)—3/15, tluka 13.

◻ Xana Bibele yi hlawuleke hi swivumbeko swihi swinharhu loko yi pimanisiwa ni swihlovo swin’wana hinkwaswo swa xitsundzuxo?

Xo sungula, xitsundzuxo xa yona hi minkarhi hinkwayo xa pfuna. (Psalma 93:5) Xa vumbirhi, Bibele yi swi kotile ku tiyisela ndzingo wa nkarhi wo leha. (Esaya 40:8; 1 Petro 1:25) Xa vunharhu, ku anama ka xitsundzuxo xa Bibele a ku nge pimanisiwi na nchumu. Ku nga khathariseki swiphiqo kumbe swiboho leswi hi langutanaka na swona, ku ni vutlhari lebyi hi pfunaka eBibeleni.—4/1, tluka 13.

◻ Hi yihi mintila yimbirhi ya vumbhoni leyi kombisaka leswaku Bibele i Rito ra Xikwembu, hayi ra munhu?

Vutlhari lebyi nga pimanisiwiki na nchumu bya Bibele ni matimba ya yona yo cinca vanhu. (Swivuriso 2:1, 5, 6; Vaheveru 4:12)—4/1, tluka 20.