Tsundzuka Muvumbi Wa Wena Lonene eVuntshweni Bya Wena

“VANTSHWA Lava Nga Anerisekangiki: Mhaka Ya Vutomi Bya Misava Hinkwayo.” Xi hlayekisa xisweswo xihloko lexikulu xa The Star ya le Joni, eAfrika Dzonga. Mhaka ya le tlhelo ka xifaniso eka xihloko lexi yi ri: “Leswi vaaki vo tala va vatshwa va langutaneke ni malunghelo lama hikiweke lama yaka ma hungutiwa hi matsalwa ya vuxopaxopi ya misava hinkwayo, ku nga aneriseki ka vantshwa emadorobeni-nkulu lama ndlandlamukaka ku ve mhaka leyi xiyekaka evuton’wini bya matiko hinkwawo. Eka minkwetlembetano ya le Miami, eSan Salvador, eManagua, eTeheran ni le Kapa a ku ri ni xivumbeko xin’we—emhakeni yin’wana ni yin’wana wo sungula ku dlaya ni ku dlayiwa a a ri muntshwa.”

Sweswo swi humesiwe eka malembe ya khume lama hundzeke naswona swiyimo swi ye swi nyanya ku sukela kwalaho. Ha yini ku ri na ku nga aneriseki ko tano exikarhi ka vantshwa emisaveni hinkwayo? Ku nga tshembeki loku kulaka ka mafambiselo lawa ya swilo entiyisweni hi xona xivangelo xa kona. Ku pfumaleka ka mintirho ku fikelele tinhlohlori letikulu. Naswona hikwalaho ka vutomi bya ndyangu lebyi hohlokaka hi ku hatlisa, hi kwihi ku sirheleleka loku nga kona eka vantshwa? A swi hlamarisi leswi van’wana va vona va karhatekaka hi misava leyi va nga kotiki ku yi lawula. Xana leswi a swi vangiwi hi mhaka ya leswi va nga hava ntshembo lowu va nga bohelelaka vutomi bya vona eka wona?

Munhu a nga langutela leswaku vukhongeri bya misava byi nyika ntshembo wo tano. Hambi swi ri tano, muntshwa un’wana u tsarile: “Ndzi pfilunganyekile hakunene. . . . Ndzi na vanghana vo tala, lava nga eka vukhongeri byo tala byo hambana-hambana naswona va tifanela na mina. Ndzi pfilunganyekile hakunene lerova a ndzi tivi leswaku ndzi nga kholwa yini sweswi. Xana mi nga swi kota ku ndzi nyika xitsundzuxo ke?” Hi xihi xitsundzuxo lexi u nga xi nyikaka muntshwa wo tano?

Vantshwa lava namarhelaka swinene Rito ra Xikwembu ni bandlha ra ntiyiso ra Vukriste va sirhelelekile eka mpfilungano ni ku karhateka ko tano. Hambi loko vatshwa vo tala va ri hava ntshembo lowu tiyeke hi vumundzuku, vantshwa va Vukriste va tshemba Yehova Xikwembu ni Rito ra yena ro tshembeka ra ntiyiso. Hikwalaho, va ni ntshembo wo pona makumu ya mafambiselo lawa ya swilo va ri karhi va langutele vutomi lebyi nga heriki. Kutani, emisaveni leyi susiweke vuhomboloki ni vubihi, va ta vumba xiphemu xa xisekelo xa “misava leyintshwa” leyi eka yona “ku nga ta va ni ku lulama.” (2 Petro 3:13; Yohane 17:3) Leswaku va kuma mitshembo yo tano leyi tsakisaka, vantshwa va tsundzuxiwa leswaku va ‘tsundzuka Muvumbi wa vona Lonene.’ (Eklesiasta 12:1) Naswona xitsundzuxo xo antswa lexi nga nyikiwaka hi leswaku va va xiphemu lexikulu xa bandlha ra Vukriste ni ku khomelela eka rona. Ha yini leswi swi laveka?

N’wina vantshwa vo tala ebandlheni ra Vukriste mi ni vatswari lava pfumelaka lava mi rhandzaka ni ku mi khathalela. Bandlha rin’wana ni rin’wana ri ni vakulu va rona lava hlawuriweke, lava va tsakelaka swinene vuhlayiseki bya n’wina hi tlhelo ra moya. Mpfuno ni nkhathalelo wo tano a swi fanelanga swi tekeriwa ehansi. Ntiyiso lowu humaka eRitweni ra Xikwembu, kun’we ni nkongomiso wa le henhla, swi ta mi nyika ku hlayiseka, ntshuxeko eku karhatekeni ni tshembo lowu tiyeke hi vumundzuku. Hinkwaswo leswi swi ta ku pfuna leswaku u ‘tshama u ri na ripfumelo ni ripfalo lerinene’ naswona u namarhela ntshembo lowu fanaka ni xihako lexi sivelaka xikepe leswaku xi nga tokoti ku pinyuluka emalwandle lama karhiheke.—1 Timotiya 1:18, 19; ringanisa Vaheveru 6:19.

Balekela Swikoka-mahlo Swa Misava

Ku nga khathariseki mikateko ya moya yo hambana-hambana leyi n’wina vantshwa mi nga yi kumaka ebandlheni ra Vukriste, van’wana va tala ku landzelela tindlela ta misava. Onge hi loko va titwa va pfumala xokarhi lexi nga xa nkoka lexi nga kumiwaka ntsena emisaveni, ehandle ka bandlha ra Vukriste. Kambe xana misava entiyisweni yi na xokarhi xa nkoka lexi yi nga nyikaka xona?

Endzhaku ko heta malembe yo tlula 40 evutirhelini bya nkarhi hinkwawo, un’wana wa malandza ya Xikwembu u veka timhaka hi ndlela leyi: “Xiphemu xin’we ntsena xa vutomi bya mina, lexi ndzi tisolaka ha xona, hi lexiya xa loko ndzi nga si nghena entiyisweni. Hi nkarhi wolowo a ndzi ri xiphemu xa misava. A ndzi hanyela misava ntsena. Loko ndzi fike eka malembe ya 18 ivi ndzi kambisisa vutomi bya mina, ndzi vone leswaku a byi nga ri na nchumu. A ku nga ri na pakani, a ku nga ri na xikongomelo evuton’wini bya mina. Mintsako ya misava leyi a ndzi anakanya leswaku a ndzi ti phina ha yona entiyisweni yi tise ku karhateka ni mahlomulo ntsena. Ndzi sungule ku lava ntiyiso. Ndzi wu kumile naswona endzhaku ka lembe ndzi sungule ku nghenela ntirho wa nkarhi hinkwawo. A ndzi nga ri na mali, a ndzi ri na ntokoto wa lembe rin’we entiyisweni, ni ripfumelo ra leswaku Yehova u ta ndzi seketela. Sweswi loko ndzi kambisisa vutomi bya mina, mbirhi xa nharhu xa lebyi ndzi byi tirhiseleke ntirho wa nkarhi hinkwawo, ndza tsaka swinene ha byona. A ndzi nge swi lavi ku siva leswi ndzi swi kumeke hi ku tirhela Yehova hi xihi na xihi lexi misava yi nga xi nyikaka.” Hakunene, leswi swi engeta mintlhaveko ya magidi ya Timbhoni ta Yehova.

Kutani ha yini u navela swilo leswi Vakriste van’wana va swi tshikeke? Ha yini u navela swilo swa misava leswi yaka eku lovisiweni? (1 Yohane 2:15-17) Tanihi muntshwa, kumbexana u ehleketa leswaku ku tirhela Yehova swi tshikilela ngopfu naswona swi ta ku endla leswaku u lahlekeriwa hi ntsako lowu misava yi wu nyikaka. Kambe xana i vutlhari ku languta vatswari ni vakulu tanihi lava tshikilelaka ngopfu loko va lava ku ku pfuna leswaku u tsakisa Yehova ivi u kuma vutomi lebyi nga heriki?

Loko manana la rhumaka n’wana exitolo xa le kusuhi a n’wi tsundzuxa leswaku a yima a languta matlhelo ha mambirhi a nga si tlula xitarata, xana u nga n’wi teka a ri la tshikilelaka swinene? Ematshan’weni ya sweswo, xana a nga kombisi rirhandzu a ringeta ku sirhelela n’wana wa yena? A hi nge n’wana u honisa xitsundzuxo lexi ivi a tlumbiwa hi movha, a fa? Xana u nga hambeta u vona onge manana loyi a a tshikilela ngopfu? Ina, u nga ha anakanya leswaku a a fanele a n’wi tsundzuxile ka ha ri emahlweni, leswaku a sirhelela vutomi bya n’wana wa yena! Hi ku fanana, xitsundzuxo xo huma eRitweni ra Xikwembu ni nhlengeletano ya xona xi nyikiwa hi rirhandzu, hayi tanihi nchumu wo karhata kambe tanihi nsirhelelo.

Ku kulela ekaya ra Vukriste a swi anelanga ku ku endla u swi kota ku lwisana ni mintshikilelo ya misava leyi. U fanele wena hi wexe u khorwiseka hi ntiyiso wa Rito ra Xikwembu. Ku khorwiseka ko tano ka munhu hi xiyexe ni ku rhandza Muvumbi swi vumba xisekelo xa ku nyiketela vutomi bya wena eka Xikwembu. Ku khorwiseka loku ka munhu hi xiyexe nakambe ka laveka leswaku u ta swi kota ku lwela ripfumelo ra wena emahlweni ka van’wana. (1 Petro 3:15) Ku kongomisiwa hi Rito ra Xikwembu i xisekelo xa vutomi lebyi humelelaka. (Yoxuwa 1:8; Psalma 119:9) Kambe leswaku u humelela evuton’wini, nakambe u lava ndzetelo lowunene.

Ku Nyikela Ndzetelo Lowu Kongomeke

Entiyisweni, n’wina vatswari va Vukriste mi ta tsaka ku vona vana va n’wina va yimela swinene ntiyiso naswona va va swin’we na n’wina evugandzerini bya ntiyiso. Kahle-kahle i vutihlamuleri bya tatana ku kurisa vana “hi ku va laya ni ku va dyondzisa ta [Yehova].” (Vaefesa 6:4) Kambe xana u nga swi kota ku vona tindhawu leti u faneleke ku antswisa eka tona eku va leteleni? Xana u heta nkarhi lowu ringaneke ni vana va wena? Xana ma swi endla swilo tanihi hi ndyangu? Naswona xana ma tiphina hi mintlango leyi tengeke swin’we?

Mi nga rivaleni leswaku ku veka ka n’wina xikombiso lexinene ku na vuyelo bya matimba eka vana va n’wina. Loko mi lava leswaku va teka ntiyiso wu ri wa nkoka, kutani yoleyo hi yona ndlela leyi mi faneleke mi yi languta ha yona. (3 Yohane 2-4) Naswona loko u lava leswaku va xixima swinene nhlengeletano ya Yehova ni vakulu, wena hi wexe u fanele u va ni langutelo ro tano leri tengeke.

Hambi loko ku letela vana ngopfu-ngopfu ku nga ka vatswari, vakulu na vona va ni vutihlamuleri eka vantshwa va le bandlheni. Eku languteleni ka ntlhambi wa Xikwembu, valanguteri nakambe va fanele va risa swinyimpfana. (1 Petro 5:1-3) Mawaku xikombiso lexinene swonghasi lexi Yehova a xi vekeke hi ku khathalela swinene hambi ku ri lavantsongo swinene! (Esaya 40:11) Ku amukela xikombiso xa yena, varisi-ntsongo va Vakriste na vona va fanele va kombisa rirhandzu, ku tsakela ka rirhandzu eka vantshwa naswona va va endla va titwa va ri xiphemu xa bandlha. Vatshwa van’wana va phofule ku navela ka leswaku vakulu va hamba va vulavula na vona ni ku va pfuna evutirhelini bya nsimu.

Ku letela muntshwa swi vula swo tala ku tlula ku n’wi nyika vutivi bya le nhlokweni bya Matsalwa. Ku suka embilwini ya yena u fanele a venga leswi Xikwembu xi swi vengaka ni ku rhandza leswi Xikwembu xi swi rhandzaka. (Amos 5:14, 15) Loko a ta tsundzuka Muvumbi wa yena evuntshweni, u fanele a va la layiweke hi tlhelo ra matsalwa leswaku a famba hi ndlela ya Yehova ya ku lulama. (Swivuriso 22:6; 2 Timotiya 3:16) Vatswari a va fanelanga ku tshika ku nyikela ndzayo leyi lavekaka. Vatswari lava lavaka ku hlayisa vunghana ni vana va vona ku nga khathariseki leswi humelelaka va tala ku honisa nchumu lowu hoxeke, va vevukisa ku biha ka wona. Va kuceteriwa hi vutilawuri bya misava. Kambe i mutswari la nga ni rirhandzu la yingisaka swiviko swa leswaku n’wana wa yena a a huhwa naswona a nyikela ndzayo leyi faneleke. (Swivuriso 13:24) Entiyisweni, hi wihi mutswari wa Mukriste la lavaka ku hlayisa vunghana lebyi sekeriweke eka vutilawuri kambe a lahlekeriwa hi n’wana wa yena hikwalaho ka ku pfumala ndzayo leyi faneleke?—Swivuriso 22:15.

Vana Ni Xikongomelo eVuton’wini

Yehova Xikwembu u hi endle hi ndlela leyi endlaka leswaku hi kuma tsako lowukulu ni ku aneriseka eku n’wi tirheleni. Anakanyani hi nsimu leyikulu swinene leyi n’wina vantshwa mi nga yi rimaka. Kwalomu ka hafu ya vaaki va misava va ni malembe ya 20 ni lama nge hansi. Vantshwa lava va makanyeka exikarhi va vanhu vo tala. Hambi leswi va nga riki na tshembo, n’wina vatshwa va Vukriste mi ni ntshembo lowu tiyeke ni nchumu wo antswa lowu mi nga va avelaka wona. Hi mahanyelo ya wena lamanene ya Vukriste ni ku chivirikela ka wena ntirho wa Yehova, u nga ha kokela vo tala va vona entiyisweni. Xisweswo u nga va pfuna leswaku va kuma ndlela ya vutomi.

Xana hi yihi pakani leyi nga ni ntikelo leyi u nga vaka na yona ku tlula yo nyiketelaka vutomi bya wena entirhweni wa Yehova Xikwembu ke? Xana u tshama u anakanya hi ku nghenela ntirho wo chumayela lowu ponisaka vutomi exisekelweni xa nkarhi lowu taleke? Kumbexana u nga hlanganyela eku hangalaseni ka mahungu lamanene tanihi phayona kumbe u nga tirha eka rin’wana ra tihofisi ta marhavi ya Sosayiti ya Watch Tower laha tibuku ta Bibele ti humesiwaka kona. Hambi loko wo ka u nga swi koti ku endla sweswo, xana a wu nge endli ku gandzela Yehova ku va mhaka leyikulu evuton’wini bya wena, xisweswo u tsundzuka Muvumbi wa wena Lonene? U ni ntirho wa nkoka swinene. Hikwalaho, ku kondza ku fika makumu ya mafambiselo lawa ya swilo, tiyimisele ku va na ‘swo tala swo swi endla entirhweni wa Hosi.’—1 Vakorinto 15:58.

Kutani yanani emahlweni n’wina vantshwa va Vakriste. Tsundzukani Muvumbi wa n’wina Lonene sweswi, kutani u ta mi sirhelela loko a herisa misava leyi yi nga chaviki Xikwembu. Ina, Yehova u ta mi sirhelela hi nkarhi wolowo ivi a mi katekisa hi vumundzuku lebyi nga heriki, lebyi kwetsimaka.