Nkambisiso Wa Mahungu

Xana Swi Hundzeriwe Hi Nkarhi?

Hi ku ya hi muprista wa Anglican eAdelaide, Australia, switsundzuxo leswi lwisanaka ni ku nyanyuriwa ka miri loku nga yisaka eka vumbhisa ni vuoswi swi hundzeriwe hi nkarhi naswona a swi humi eswihlobyeni swa Vukriste. Eka dyondzo ya yena ya sweswinyana ehenhleni ka rimbewu, u vula leswaku mimpatswa leyi tshembisaneke ku tekana kahle-kahle a yi nga dyohi loko yi hlangana hi rimbewu emahlweni ka vukati. Nakambe dyondzo yi tiyisa leswaku vusodoma byi nga ha pfumeleriwa etimhakeni tin’wana. Hi ku ya hi Courier Mail ya le Brisbane, muvulavuleri wa Uniting Church eAustralia “u pfumelelane ni misinya ya milawu ya xisekelo ya xiviko lexi.”

Hambi swi ri tano, Bibele yi hlamusela kahle leswaku i ku rhandza ka Xikwembu leswaku hinkwerhu hi “fularhela vuoswi hinkwabyo” ni leswaku “loko ti ri timbhisa, ni lava gandzelaka swikwembu swa hava, ni vaoswi, ni vavanuna lava endlaka swa tingana ni vavanuna-kulobye . . . va nga ka va nga dyi ndzhaka ya Mfumo wa Xikwembu.” (1 Vatesalonika 4:3, 4; 1 Vakorinto 6:9, 10) Entiyisweni lava amukelaka Bibele tanihi Rito leri huhuteriweke ra Xikwembu va xiya leswaku langutelo ra yona hi rimbewu ri huma eka Muvumbi wo tlhariha ngopfu. Vuyelo eka lava hanyaka hi mimpimanyeto ya Bibele byi komba leswaku leswi vuriwaka vukongomisi bya mahanyelo lama hundzeriweke hi nkarhi swa ha seketela ku tiya ka mindyangu ni ku nyikela nsirhelelo wo lwisana ni swivati leswikulu swa mintlhaveko ni mavabyi lama nyenyetsaka lama vangiwaka hi ku tikhoma loko biha.

Nsivelo Wo Antswa Swinene

Ku tirhisiwa loko biha ka swidzidzirisi ka ha ri xiphiqo lexikulu. Kutani ke, hi yihi ndlela leyinene yo sirheleta vantshwa eku tirhiseni ka swidzidzirisi hi ndlela yo biha? Eka mbulavurisano lowu humesiweke eka phepha-hungu ra le Brazil leri nge O Estado de S.Paulo, profesa wa Mufurwa ni mutshunguri wa mianakanyo Claude Olievenstein u kandziyise xilaveko xa vukongomisi ni nseketelo wa rirhandzu. U te: “Loko vanhu namuntlha va vulavula hi swidzidzirisi, ntirho wa maphorisa, endlelo ra ku avanyisa, ni xikolo swa kandziyisiwa. Hambi swi ri tano, xilaveko lexikulu hi lexiya xa nsivelo wa ndyangu [ku tirhisa swidzidzirisi] . . . Vana vo tala a va swi tivi leswaku vulawuri bya tatana i yini. Tatana a nga kona; swi le rivaleni leswaku u tshikile.”

Loko a hlamusela mhaka leyi nsivelo wa ku tirhisa swidzidzirisi hi ndlela yo biha wu nga wa nkoka ha yona endyangwini, Dr. Olievenstein u tlhandlekele a ku: “Hi hanya eka vandla ro bindzula laha vanhu va nga ni tingana hi mahanyelo. Loko, hikwalaho ka swidzidzirisi, vana va hina va sungula ku kombisa mahanyelo man’wana, swi hikwalaho ka leswi hi nga ha dyondzisiki mahanyelo lamanene. Vandla ra hina ri ve leri nonon’hwaka, leri nga twiki, ro chivirika. Vanhu va anakanya ntsena hi ku lwela ku hanya.”

Hi ku ya hi magazini lowu nge Superinteressante, ndzavisiso wa U.S. wu tiyisa nkoka wa vulawuri bya vutswari. Magazini lowu wu te: “Vana va kondlo-a-ndzi-dyi lava tirhaka kahle ngopfu eswikambelweni swa xikolo ni lava tiyeke swinene emintlhavekweni va huma eka mindyangu leyi vatswari va tirhisaka vulawuri ku simeka milawu leyinene ya mahanyelo ni ku nyika ntshunxeko exikarhi ka mindzilakana leyi hlamuseriweke kahle. Hi ku fanana, ndzinganyeto wa vana va kondlo-a-ndzi-dyi lava godzomberiweke hi swidzidzirisi ni xihoko wu tiviwa wu ri ehansi eka mindyangu yo tano.”

Hi xivangelo lexinene, Bibele yi tsundzuxa vatswari yi ku: “Laya ṅwana wa wena, o ta ku nyika ku wisa, o ta ṭakisa moya wa wena.” (Swivuriso 29:17) Ina, ndzulamiso lowu sekeriweke eBibeleni wu nga pfuna vatswari ku sivela ku tirhisiwa ka swidzidzirisi hi ndlela yo biha ni ku antswisa ntikelo wa vutomi endyangwini hinkwawo.