Swivutiso Swa Vahlayi

◼ Xana swa fanela eka Mukriste ku hlota kumbe ku phasa tinhlampfi?

Swiendlo swo hambana-hambana swo hlota hakanyingi swi katsa mintlhaveko yo enta. Kutani swa antswa eka Vakriste ku lwela ku twisisa no tirhisa ku anakanya ka Yehova Xikwembu emhakeni leyi hi laha yi kumekaka ha kona eBibeleni.

Xikwembu xi nyike vanhu ku fuma “ŝihari” ni “ŝifuwo.” Eku sunguleni, vanhu a va nga ri na mpfumelelo wa Muvumbi, kumbexana hambi ku ri xilaveko xo karhi xo dlaya swiharhi leswaku swi va swakudya. (Genesa 1:24, 29, 30) Hi le ndzhaku ka Ndhambi ntsena laha Xikwembu xi nyikeke vanhu mpfumelelo wo dya nyama ya swiharhi leyi hi vukheta yi humesiweke “v̌utomi bya yona—ngati ya yona.” (Genesa 9:3, 4) Yoleyo yi nga ha va nyama ya swifuwo kumbe ya swiharhi.

Vaisrayele va fuwe swiharhi swo tanihi tinyimpfu ni tihomu, leswi a swi ta dlayiwa swi va swakudya loko va navela nyama. Nakambe va hlotile no phasa tinhlampfi ku kuma swakudya. (Deuteronoma 12:20-24; 14:4-20) Leswi swi pfumelelana ni nhlamuselo ya xikombiso xa Xikwembu xo vula leswaku xi ta ‘rhuma vaphasi lavo tala va tinhlampfi va ya phasa vanhu va yena ni vahloti lavo tala va ya va hlota.’ (Yeremia 16:16) Endhzaku, Yesu u katse vaphasi va tinhlampfi exikarhi ka vaapostola va yena naswona u va kongomise eka tindlela letinene to phasa.—Matewu 4:18-22; 17:27; Luka 5:2-6; Yohane 21:4-7.

Loko mupatriarka la kuleke Isaka a kombele mpandzwa wa nyama leyi a yi rhandzaka, n’wana wa yena Yakobo u rhandze ku dlaya swimbutana swimbirhi ku n’wi endlela mpandzwa. Hambi swi ri tano, Esawu u hlote xiharhi xa nhova ku kumela tata wa yena nyama. Xiya leswaku hambi leswi nyama ya swifuwo a yi kumeka, Isaka u kombele nyama ya swiharhi. Nakambe, xiya leswaku vana hinkwavo va dlaye swiharhi leswi a swi ta va swakudya, ku nga ri swa vona, kambe swa munhu un’wana.—Genesa 27:1-19.

Swiharhi a swi ta dlayiwa hi swivangelo swin’wana handle ka nyama. Madzovo ya swona a ya ta endliwa swiambalo. (2 Tihosi 1:8; Marka 1:6; Vaheveru 11:37) Swifunengeto leswi sirhelelaka ni switirho naswona a swi endliwa hi madzovo ya swiharhi, hambi ku ri swiharhi leswi yilaka swa thyaka leswi Vaisrayele a va nga swi dyi.—Eksoda 39:33, 34; Tinhlayo 24:7; Vaavanyisi 4:19; Psalma 56:8.

Xilaveko xa Xikwembu xa leswaku ngati ya xiharhi lexi dlayiweke yi halatiwa xi ta tsundzuxa vahloti leswaku vutomi bya xiharhi byi huma eka xona kutani byi fanele ku tirhisiwa hi xichavo, hayi ku dlaya ko tlula nawu. (Levitika 17:13) Entiyisweni Nimrod u dlaye swiharhi naswona hakanyingi u tibumabumerile hi vutshila bya yena bya vuhloti, mpimo kumbe ntsengo wa vudlayi bya yena, kumbe swidlodlo leswi nga ha vaka swi endliwile eka sweswo. A a ri “šihloti ša matimba e mahlweni ka Yehova.”—Genesa 10:9.

Ku tsakela ko tano ko hlota ku tlula mpimo kumbe ku dlaya swihari, kumbe ku ringela ku tlula mpimo, ku nga kula eka Mukriste. Hakanyingi muhloti kumbe muphasi wa tinhlampfi loyi a kambisiseke mbilu ya yena u kume leswaku a tluleriwe hi ‘ntsako wo dlaya.’ Nyanyuko wo tano wu fambisana ni ku lovisa vutomi bya swiharhi hi vomu. Kutani hambi leswi swi nga hoxangiki ku hlota kumbe ku phasa tinhlampfi (loko ku dlaya kumbe ku khoma ku tirhisiwa hi un’wana ku kuma swakudya kumbe xikongomelo xin’wana lexi fanelaka), a swi nga ta fanela ku endla tano loko Mukriste a ri ni moya lowu fanaka ni wa Nimrod. Kambe ku ni makhombo handle ko kuma ntsako wo hlongorisa, ku dlaya, kumbe xidlodlo xa vuhloti.

Xihondzo xo Rindza xa July 15, 1983 hi Xinghezi, xi hlamusele mhaka leyi ha yona Vakriste va ntiyiso va nga khomiki kumbe ku tshama ni swibamu, ku lwa ni vanhu kumbe ku tisirhelela eka vona. (Tluka 23-6) Ku anakanyisisa hi xitsundzuxo xexo swi endle Timbhoni tin’wana ti papalata hambi ku ri ku va na swibamu swo hlota. A hi vo tala lava hlawuleke ku cukumeta swibamu swa vona hinkwaswo kumbe ku papalata ku va na swona erivaleni ni ku tshama na swona emavokweni. Xisweswo Vakriste lava a va nge vi ni nsusumeto wo tinyungubyisa hi matlhari kumbe ku tshembela eka wona. Nakambe, ku va ni swibamu swo hlota, kumbe ku nga tshami na swona emavokweni, swi nge ma siveli mahlomulo. Mathlari lama nga ni khombo a ma nge kumeki emavokweni ya vana lava hi mhangu va nga ha vavisaka kumbe ku dlaya un’wana, kumbe leswaku swibamu swi va kona loko munhu a chuhe ku tlula mpimo kumbe a hlundzukile.—Ringanisa Swivuriso 22:3.

Vakriste van’wana va nga ha tsakela nantswo wa xiharhi kumbe nhlampfi yo karhi, naswona ndlela leyinene leyi tirhisiwaka yo kuma swakudya swo tano i ku hlota kumbe ku ringela. Van’wana va tsakela moya ni ku titoloveta loku fambisanaka ni ku hlota ekhwatini, kumbe va kuma leswaku tiawara to rhula to ringela ta phyuphyisa. Bibele a yi lwisani ni leswi, kutani a ku na xivangelo xo avanyisa van’wana loko va tsakela swilo swo tano kumbe e-e. Naswona xikombiso xa Isaka na vana va yena xi komba leswaku a ku na xivangelo xa leswaku i mani la nga ta dya xiharhi kumbe hlampfi.—Matewu 7:1-5; Varhoma 14:4.

Entiyisweni muapostola Petro a swi rhandza ngopfu ku phasa tinhlampfi. Ku ri ni tinhlampfi ti nga ri tingani leti nga ekusuhi, Yesu la pfuxiweke u n’wi pfune ku kambisisa mintlhaveko ya yena hi bindzu ra tinhlampfi kumbe ro phasa tinhlampfi. Yesu u vutisile: “Simoni, n’wana Yohane, xana wa ndzi rhandza [ku tlula swilo leswi]?”—21:1-3, 9-15; vona Xihondzo xo Rindza, xa November 1, 1988, tluka 31.

Hi ku fanana, Mukriste loyi a nga ni ripfalo lerinene loyi a hlawulaka ku ya hlota kumbe ku phasa u fanele ku va ni nkarhi lowu hleriweke kahle. Hi xikombiso, loko nguva yo hlota kumbe ku phasa yi ta pfuleka hi nkarhi lowu minhlangano ya bandlha yi vekiweke ha wona, xana a a ta endla yini? Kumbe xana ku vulavula ka yena ku komba leswaku wa tinyungubyisa hi vunghwazi bya yena bya ku hlota kumbe ku ringela? I swinene swonghasi loko Mukriste la vupfeke loyi, minkarhi yin’wana, a hlawulaka ku hlota kumbe ku phasa tinhlampfi a nga ha vulaka hi ku tiyiseka a ku: “Ina, Hosi wa swi tiva leswaku ndza ku rhandza [ku tlula swilo leswi].”—Yohane 21:16.