Gidi Ra Malembe Lerinene Ra Tshinela

“Kutani ndzi vona swiluvelo; lava tshameke ehenhla ka swona, va nyikiwa matimba ya ku avanyisa. Naswona, ndzi vona mimoya ya lava tsemiweke tinhloko hi mhaka ya ku twarisa vumbhoni bya Yesu ni ya ku vula Rito ra Xikwembu. A va gandzelanga xivandzana kumbe xifaniso xa xona, a va funghiwanga hi mfungho wa xona emimombyeni ya vona, kumbe emavokweni ya vona. Kutani va tlhela va hanya, va fuma na Kriste malembe ya 1 000. [Xikwembu] xi ta sula mihloti hinkwayo emahlweni ya [vanhu], ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona; hikuva leswo sungula swi hundzile.”—Nhlavutelo 20:4; 21:4.

XISWESWO Bibele yi vhumba gidi ra malembe lerinene leri tshinelaka—Malembe ya Gidi ya ku Fuma ka Yesu Kriste ni ntlawa wa tihosi ta le tilweni leti fumaka na yena. Kumbexana u tala ku teka vuprofeta lebyi tanihi vunwa, garingeto. Hambi swi ri tano, ku ni xivangelo lexikulu eka wena xo languta Gidi leri ra malembe tanihi leri taka hakunene!

Xo sungula, dyondzo ya Bibele yi ta ku paluxela leswaku yi tirhisane ni magidi ya malembe ya tsevu lama hundzeke ya matimu ya vanhu hi ndlela leyi hlamarisaka leyi tshembekaka. Ku tlula kwalaho, Bibele i buku ya vuprofeta, naswona nhlayo leyikulu ya vuvhumbi bya yona, kumbe vuprofeta, ana se yi hetisisiwile hi vuxokoxoko hinkwabyo.a Loko sweswo swi ri tano, ha yini Bibele yi fanele yi nga tshembeki eku vhumbeni ka gidi ra malembe ra ku fuma ka Kriste leri tshinelaka? Hambi swi ri tano, u nga ha hlamala leswi Bibele yi hi byelaka swona hi nkarhi wolowo. Xana wu ta hetisisa xikongomelo xihi? Naswona leswi tsakisaka eka wena, xana swi ta khumba vutomi bya wena hi ndlela yihi?

Ndzhaka Leyi Lahlekeke

Bibele yi komba leswaku ku Fuma ka Kriste ka Gidi ra Malembe i ndlela ya yena yo hundzisela ndzhaka ya nkoka swinene eka “vana va yena.” Kambe i ndzhaka yihi? Ni “vana” vahi? Ndzhaka yi nga ha hlamuseriwa tanihi xin’wana lexi hundzelaka eka n’wana loko munhu a fa. Loko kokwa wa hina Adamu a tikombise a nga yingisi Xikwembu, u lahlekeriwile yena ni vana va yena hinkwavo—rixaka hinkwaro ra vanhu—hi lunghelo ra vutomi lebyi nga heriki emisaveni ya paradeyisi. Xisweswo Adamu u hundzisele ndzhaka ya xidyoho, rifu, ni nhlomulo eka vatukulu va yena.—Genesa 3:1-19; Varhoma 5:12.

Yesu u te emisaveni hi nyama ku ta kumela nakambe vanhu ndzhaka leyi Adamu a yi lahleke. Leswi u swi endlile hi ku tikombisa a tshembekile eka Yehova Xikwembu, hi ku swi rhandza u nyikele vutomi bya yena ematshan’wini ya vanhu. (Yohane 3:16) Hi ku hanya vutomi byo hetiseka, byo kala xidyoho, Yesu u kume mfanelo ya vutomi lebyi hetisekeke lebyi nga heriki eParadeyisini emisaveni—xilo lexi Adamu a xi lahleke. Hambi swi ri tano, Yesu a nga yi tirhisanga mfanelo yeleyo; kumbe ku lahlekeriwa hi yona loko a file kutani a pfuxeriwa evuton’wini bya le tilweni. Hikwalaho a nga yi tirhisa tanihi ndzhaka ya nkoka yo yi hundzisela eka “vana” va yena.—Varhoma 5:18, 19.

Vadyandzhaka—“Vana” Va Kriste

Eka Esaya 9:6 Yesu hi vuprofeta u vuriwa “Tatana l’a nga riki na ku hela.” U va Tatana la nga Riki na ku Hela wa misava leyi kutsuriweke ya vanhu, exiyin’weni xo hundzisela ndzhaka eka vanhu lava va kutsuriweke, kumbe vana lava a va amukeleke. (Matewu. 20:28; nakambe vona Psalma 37:18, 29.) Leswi swi kombisiwe erivaleni eka xitshembiso xa yena: “Tanani n’wina lava katekisiweke hi Tata wa mina, amukelani Mfumo lowu nga lunghiseleriwa n’wina hi mpfhuka misava yi tumbuluka.” U ye emahlweni a ku: “Ku katekile lavo rhula, hikuva va ta dya ndzhaka ya misava.”—Matewu 5:5; 25:34.

Hambi swi ri tano, leswaku misava yi va ndzhaka leyi tlangelekaka, swiyimo swi fanele swi cinciwa hi laha ku heleleke—swi yisiwa eku hetisekeni! Yi fanele yi hundzuka misava leyi ku rhula loku heleleke ni ntwanano ku nga ta fuma exikarhi ka swivumbiwa hinkwaswo swa Xikwembu. (Esaya 11:6-9) Vuthala hinkwabyo bya ku nga hetiseki ka munhu byi fanele byi susiwa, ku katsa ni rifu. (1 Vakorinto 15:25, 26) Leswi swi vula leswaku lava feke, lava nga xiphemu xa vanhu lava kutsuriweke, va fanele ku pfuxiwa. Va nga va ni nkarhi wo va vadyandzhaka va Kriste hi ndlela leyi ntsena!—Yohane 5:28, 29.

Xisweswo, ku Fuma ka Kriste ka Gidi ra Malembe ku ta va nkarhi wa ntsako laha vanhu hakantsongontsongo va nga ta “ntshuxiwa evuhlongeni bya leswo bola” kutani va fikelela ku hetiseka. (Varhoma 8:21) Lexi tsakisaka, hambi ku ri tibuku leti nga kona ti teka leswi tanihi xikongomelo xa gidi ra malembe. Webster’s Ninth New Collegiate Dictionary (nkandziyiso wa 1985) yi hlamusela “gidi ra malembe” tanihi “nkarhi wa ntsako lowukulu kumbe wa ku hetiseka ka vanhu.”

Ku Tlula Mfumo Wa Solomoni

Gidi leri ra malembe ro saseka ri nga ha fanisiwa ni ku fuma ko rhula ni loku humelelaka ka Solomoni ka 40 wa malembe ehenhla ka Israyele wa khale. (1 Tihosi 4:24, 25, 29) Loko nkosikazi ya Xeba yi endzele Hosi Solomoni, yi te: “A ŝi ri leŝi tiyeke leŝi nḍi ŝi tweke etikweni ra mina e henhla ka marito ya wena ni v̌utlhari bya wena! A nḍi ŝi pfumelanga nḍi nga si ta, nḍi nga si ŝi v̌ona hi mahlo ya mina. Kambe, waŝiv̌o, a v̌a nḍi byelanga hafu ya ŝona: U tlula hi v̌utlhari ni rifuwo hinkwaŝo leŝi nḍi ŝi tweke. Ku katekile v̌anhu v̌a wena, ku katekile malanḍa ya wena la’ma yimaka hi masiku e mahlweni ka wena, la’ma yingisaka v̌utlhari bya wena!”—1 Tihosi 10:6-8.

Loko ku rhula, ku humelela, ni vutlhari bya ku fuma ka le misaveni ka Hosi Solomoni ka 40 wa malembe ku tlule, ina, ku langutela lokukulu ka nkosikazi ya Xeba ku andzisiwe ka mbirhi, kutani Mfumo wa Gidi ra Malembe wa Hosi Solomoni lonkulu wa le tilweni, Yesu Kriste, hakunene wu ta tlula leswi vanhu va swi anakanyaka! Emaritweni ya Yesu hi yexe, u “tlula Solomoni” hi yexe. (Mintirho 12:42) Ringeta ku anakanya rihanyo lerinene, ku humelela, ku rhula, vunene, ni swiyimo leswi tsakisaka emisaveni leswi u nga swi anakanyaka kambe a wu nge swi koti ku anakanya hambi ku ri xiphemu xa leswi Gidi ra Malembe ra Kriste ri swi khomeke.

Ku Fambisana Ni Gidi Ra Malembe Ra Vunharhu?

Swiendlakalo swa misava ku sukela hi 1914 swi komba leswaku hi hanya ‘eku heleni ka mafambiselo ya swilo.’ Yesu u ye emahlweni a vula leswaku rixaka leri tokotaka swiendlakalo leswi swi vhumbiweke “ri nga ka ri nga hundzi, ku nga si humelela swilo leswi hinkwaswo.” Kutani ke, xana leswi swi vula leswaku ku Fuma ka Gidi ra Malembe ka Kriste ku ta fambisana ni gidi ra malembe ra vunharhu?—Matewu 24:3-21, 34.

Yesu u tsundzuxe vadyondzisiwa va yena leswaku va nga xopaxopi. U te: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena.” (Mintirho 1:7) Nakambe mayelana ni “siku ni nkarhi” lowu pakaneke lowu swiendlakalo leswi swi nga humelela ha wona, Yesu u vule leswaku i Tata wa yena ntsena, Yehova Xikwembu, la tivaka. (Matewu 24:36) Xisweswo, Bibele a hi museketeri wa yihi na yihi ya nhlayo leyi kulaka ya vaprofeta va siku ra ku lovisiwa ni mintlawa leyi kombetelaka eka ndzoviso wa le xikarhi ka vusiku hi Lembe Lerintshwa, 1999, tanihi ku hela ka misava.

Hambi swi ri tano, swiendlakalo leswi nga kona swa misava hakunene swi komba kahle leswaku nkarhi wa ku hela ka mafambiselo ya swilo lawa ya munyama, yo biha wa ‘hela’ ni leswaku Gidi ra Malembe ra Kriste ri “tshinele.” (Varhoma 13:12, BX) Ematshan’wini yo ringeta ku kuma siku ra ntiyiso ni awara ya ku ta ka leswi, sweswi i nkarhi wo amukela vutivi bya swilaveko swa Xikwembu leswaku u pona. (Yohane 17:3) Hi ndlela leyi u nga ha dyondza ndlela yo va exikarhi ka lava Yesu a nga ta ku eka vona: “Tanani n’wina lava katekisiweke hi Tata wa mina, amukelani Mfumo lowu nga lunghiseleriwa n’wina hi mpfhuka misava yi tumbuluka.” (Matewu 25:34) Timbhoni ta Yehova ti tiyimiserile naswona ti nga swi kota ku ku pfuna leswaku u va exikarhi ka lava va nga ta tsakela mikateko ya Gidi ra Malembe leri taka.b

[Tinhlamuselo ta le hansi]

[Marito lama tshahiweke exihlokweni lama nga eka tluka 6]

“Tanani, n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka”