Kingdom News No. 36

Gidi Ra Malembe Lerintshwa—Xana Vumundzuku Byi Ku Khomele Yini?

Gidi Ra Malembe Lerintshwa—Xana I Ku Sungula Ka Nguva Leyintshwa?

EXIKARHI ka vusiku bya December 31, 1999, lembe-xidzana ra vu-20 ri kume ndzhuti ri yima.a I lembe-xidzana leri a ri ri ni mpfilumpfilu lowukulu swinene. Kambe eka rona ku tlhele ku sungula ni thekinoloji leyintshwa, ku va ni nhluvuko lowukulu eka swa vutshunguri, ku kumeka ka rungula ro tala ni ku kula ka xihatla ka ikhonomi ya misava hinkwayo. Xisweswo, vanhu vo tala va amukele gidi ra malembe lerintshwa hi mandla mambirhi, va ri teka ri ri leri taka ni ntshembo ni ku cinca. Xana swi nga endleka leswaku nyimpi, vusweti, nthyakiso wa tiko ni mavabyi swi herisiwa eka rona?

Vo tala va ehleketa sweswo. Xana u vona onge swi nga koteka leswaku gidi ra malembe lerintshwa ri ta ni ku cinca loku ku nga ku vuyerisaka—ku cinca loku nga ta endla leswaku u hanya u sirhelelekile, wena ni ndyangu wa wena? Xiya ndlela leyi swiphiqo swi nga ri swingani leswi hi langutaneke na swona swi nga swikulu ha yona.

Nthyakiso

Matiko lama hluvukeke ma “onha mbango ni ku thyakisa misava hinkwayo, ma tlhela ma kavanyeta fambiselo ra ikholoji.” Loko swilo swo famba hi ndlela leyi, “swilo swa ntumbuluko swi ta ya swi nonon’hweriwa.”—“Global Environment Outlook—2000,” United Nations Environment Programme.

Vuvabyi

“Ku languteriwe leswaku hi lembe ra 2020, eka vanhu va khume lava faka ematikweni lama hluvukeke, va nkombo va ta dlayiwa hi mavabyi lama nga tluleriki, kasi namuntlha, vanhu lava dlayiwaka hi mavabyi wolawo a va endli ni hafu ya nhlayo ya kona.”—“The Global Burden of Disease,” Harvard University Press, 1996.

Vativi van’wana va vula leswaku “hi 2010, vanhu lava va nga ta va va hanya va ta va va hunguteke hi 66 wa timiliyoni ematikweni ya 23 lama hlaseriweke swinene hi vuvabyi bya [AIDS (SIDA)].”—“Confronting AIDS: Evidence From the Developing World,” xiviko lexi humaka eka European Commission ni World Bank.

Vusweti

“Vanhu va kwalomu ka 1,3 wa magidi ya timiliyoni va hanya hi mali leyi nga ehansi ka dolara [R6] hi siku, naswona vanhu va kwalomu ka gidi ra timiliyoni a va swi koti ku kuma swilo swo tihanyisa.”—“Human Development Report 1999,” United Nations Development Programme.

Nyimpi

“Ku lwa ka [matiko yo hambana-hambana] ku nga ha ya ku nyanya hi ndlela leyi chavisaka. Leswi ku vangiwaka hi ku [avana] ka vanhu hi rixaka, swivongo ni vukhongeri, . . . ku lwa loku ku ta va . . . xivangelo xa nyimpi leyi nga ta va kona eka kotara yo sungula ya lembe-xidzana leri . . . , yi ta koxa vutomi bya madzana ya magidi ya vanhu lembe ni lembe.”—“New World Coming: American Security in the 21st Century,” U.S. Commission on National Security/21st Century.

Hikwalaho, ku chachula ni ku nyanyuka ko hoyozela gidi ra malembe lerintshwa ku tumbeta mhaka ya leswaku nthyakiso, vuvabyi, vusweti ni nyimpi swi ta engeteleka ku tlula rini na rini. Xivangelo-nkulu xa swiphiqo leswi i makwanga, ku nga tshembani ni vutianakanyi—ku nga swilo leswi swi nga ta ka swi nga herisiwi hi ku tirhisa ndzavisiso wa sayense, thekinoloji kumbe politiki.

Gidi Ra Malembe Leri Nga Ta Tisela Vanhu Mikateko

MUTSARI wa khale u tshame a ku: “Ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Munhu a ngo kayivela vuswikoti byo fuma misava ntsena kambe ni mfanelo yo yi fuma a nga na yona. I Yehovha Xikwembu ntsena, Muendli wa hina, la nga ni mfanelo naswona a tivaka ndlela yo tlhantlha swiphiqo swa vanhu.—Varhoma 11:33-36; Nhlavutelo 4:11.

Kambe swi ta endleka rini sweswo? Naswona swi ta endlekisa ku yini? Byi tele vumbhoni lebyi kombisaka leswaku hi le kusuhi ni ku fika emakumu ka ‘masiku yo hetelela.’ Pfula Bibele ya wena, kutani u hlaya 2 Timotiya 3:1-5. Yi swi hlamusela kahle leswi vanhu va nga ta va xiswona ‘eminkarhini leyi ya mangava.’ Tindzimana ta Matewu 24:3-14 na ta Luka 21:10, 11 na tona ti vulavula hi ‘masiku yo hetelela.’ Kwalaho ku vulavuriwa hi swiendlakalo swa xiviri leswi humeleleke ku sukela hi 1914 leswi khumbaka misava hinkwayo, swo tanihi nyimpi, mavabyi ni ku pfumaleka ka swakudya.

Ku nga ri khale ‘masiku yo hetelela’ ma ta hela. Daniyele 2:44 yi ri: “Xikwembu xa le tilweni xi ta veka mfumo lowu wu nga ta ka wu nga lovisiwi. . . . Wu ta pfotlosa kutani wu herisa mimfumo [ya misava] leyi hinkwayo, kambe wona wu ta tshama hilaha ku nga riki na makumu.” Xisweswo swi vuriwe ka ha ri emahlweni leswaku Xikwembu xi ta simeka Mfumo, kumbe hulumendhe leyi nga ta fuma misava. Hi ku ya hi Nhlavutelo 20:4, hulumendhe leyi yi ta fuma ku ringana gidi ra malembe—ku nga mileniyamu! Xiya tindlela tin’wana leti vutomi byi nga ta tsakisa ha yona eka vanhu hinkwavo hi nkarhi lowu wa Gidi ra Malembe leri vangamaka:

Timhaka Ta Ikhonomi. “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.”—Esaya 65:21, 22.

Rihanyo. “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” “Ku hava munhu la tshamaka kona la nga ta ku: ‘Ndza vabya.’”—Esaya 33:24; 35:5, 6.

Mbango. Xikwembu xi ta “lovisa lava onhaka misava.”—Nhlavutelo 11:18.

Ku Hanyisana Ka Vanhu. “A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha.”—Esaya 11:9.

Vanhu va timiliyoni va swi kholwa switshembiso leswi swa Bibele, leswi swi va endla leswaku va va ni langutelo lerinene, leri nga ni ntshembo malunghana ni nkarhi lowu taka. Hikwalaho ka sweswo, va swi kota ku langutana ni mintshikilelo swin’we ni swikarhato swa vutomi hi ndlela yo antswa. Xana Bibele yi nga va matimba lama kongomisaka vutomi bya wena hi ndlela yihi?

Vutivi Lebyi Yisaka eVuton’wini!

MINKARHI yin’wana, sayense ni thekinoloji, swi nga ha hlamarisa swinene! Hambiswiritano, vutivi bya vanhu a byi swi koti ku endla leswaku vutomi byi sirheleleka naswona byi tsakisa eka vanhu vo tala. Vutivi lebyi ku nga byona ntsena byi nga kotaka ku hetisisa leswi, hi lebyi hlamuseriwaka eBibeleni eka Yohane 17:3, leyi nge: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”

Vutivi byebyo byi kumeka eBibeleni. Hambileswi vanhu vo tala va hehlaka buku leyi yo kwetsima, a hi vangani eka vona lava tshameke va yi kambisisa hi voxe. Ku vuriwa yini hi wena? Ina, ku hlaya Bibele a hi matlangwana. Kambe i swa nkoka swinene. Bibele hi yona ntsena buku leyi ‘huhuteriweke hi Xikwembu naswona yi pfunaka ku dyondzisa, ku tshinya, ku lulamisa swilo ni ku laya eku lulameni.’—2 Timotiya 3:16.

Kutani ke, u nga sungurisa ku yini ku tolovelana ni Bibele? Hikwalaho ka yini u nga amukeli mpfuno wa Timbhoni ta Yehovha? Ti letela vanhu va timiliyoni emakaya ya vona mahala. Leswaku va ku pfuna emhakeni leyi, va tirhisa tibuku to hambana-hambana leti sekeriweke eBibeleni, to tanihi broxara leyi nge I Yini Leswi Xikwembu Xi Swi Languteleke Eka Hina? Yi nyikela tinhlamulo leti kongomeke ta swivutiso swo tala leswi u nga ha vaka u ri na swona malunghana ni Bibele, swo tanihi leswi: Xikwembu i mani? Hi xihi xikongomelo xa Xikwembu hi misava? Xana Mfumo wa Xikwembu i yini? Bibele yi nga byi antswisa njhani vutomi bya ndyangu wa wena?

Loko u swi tsakela leswaku un’wana wa Timbhoni ta Yehovha a ku endzela ekaya ra wena, hi kombela u tata xiphephana lexi nga laha hansi. Va ta tsaka ku ku nyika rungula leri engetelekeke malunghana ni ku Fuma loku vangamaka ka Gidi ra Malembe, ka Mfumo wa Xikwembu!

□ Ndzi nga swi tsakela ku amukela broxara leyi nge I Yini Leswi Xikwembu Xi Swi Languteleke Eka Hina?

□ Ndzi kombela mi ndzi endzela malunghana ni dyondzo ya le kaya ya mahala ya Bibele

[Nhlamuselo ya le hansi]