Ku Hlakulela Ku Tsakela Loku Pfuxiweke Hi Kingdom News No. 36
1 Xana u hetile ku fambisa mphakelo lowu u nyikiweke wona wa swiphephana swa Kingdom News No. 36? Xi ni xivutiso lexi nga enkarhini, lexi vanhu hinkwavo va anakanyisisaka ha xona: “Gidi Ra Malembe Lerintshwa—Xana Vumundzuku Byi Ku Khomele Yini?” Loko lembe ra 2000 ri ri karhi ri tshinela, vanhu a va ri ni mavonelo yo hambana-hambana malunghana ni leswi gidi ra malembe lerintshwa ri nga ta ta na swona. Kingdom News No. 36 yi hlamusela swin’wana swa leswi a swi languteriwile kutani yi hi tsundzuxa leswaku swiyimo swa misava a swi hi nyiki ntshembo mayelana ni nkarhi lowu taka. Gidi ra malembe leri ku nga rona ntsena ri nga ta tisa ku rhula ni nsirhelelo lowu vanhu vo tala va wu languteleke hi mahlo-ngati, i Gidi ra Malembe ra ku Fuma ka Kreste. Leswi hi tiyisekaka leswaku Mfumo wakwe wa ta hakunene sweswo swi hi susumetele ku yisa Kingdom News No. 36 eka un’wana ni un’wana loyi hi nga n’wi fikelelaka.
2 Ndlela Leyi Kingdom News Yi Amukeriweke Ha Yona: Ku fambisiwa ka Kingdom News enkarhini lowu hundzeke ku hi khutazile swinene entirhweni wa hina. Malunghana ni Kingdom News No. 35, rhavi ra le Canada ri tsarile: “Tsima leri ro hlawuleka ra ntirho wa nsimu ri seketeriwe hi ku hiseka hi vahuweleri ni maphayona naswona ku ve ni mintokoto yo tala leyi khutazaka.” A swi kanakanisi leswaku na wena u hiseke hi ndlela leyi fanaka loko u fambisa Kingdom News No. 36.
3 Tsima ra nan’waka ra ku fambisiwa ka Kingdom News ri hleriwe leswaku ri hela hi November 17, 2000. Xana nsimu hinkwayo leyi vandlha ra ka n’wina ri averiweke ku yi tirha yi hlanganisiwile? Loko yi nga si hlanganisiwa, vakulu va nga ha mi kombela leswaku mi ya emahlweni ni tsima leri kukondza November yi hela.
4 Xana vanhu va ndhawu ya ka n’wina va angula njhani loko mi va fambisela Kingdom News No. 36? Vanhu va nga ri vangani va ta tata xiphephana xa xinavetisi, va kombela broxara leyi nge Leswi Xi Swi Languteleke ni dyondzo ya le kaya ya Bibele kumbe va kombela xin’we xa swona. Hambiswiritano, vunyingi bya lava eku sunguleni va kombiseke ku tsakela mhaka leyi vulavulaka hi gidi ra malembe, swi nga endleka va nga ri teki goza kukondza Mbhoni ya Yehovha yi tlhela yi va endzela. Hinkwavo lava kombiseke ku tsakela va fanele va endzeriwa nakambe. Hi wihi nkarhi lowu nga vaka wunene ku va endzela ha wona? Va fanele va endzeriwa hi ku hatlisa hilaha swi nga kotekaka hakona.
5 Xiya mintokoto leyi veke kona hikwalaho ka ku tlhelela laha ku fambisiweke kona Kingdom News No. 35. Le Ireland phayona ri siye Kingdom News eka n’wini wa xitolo. Wansati loyi u tsakisiwe hi rungula leri kutani a kombela makwerhu wa xisati leswaku a tlhela a vuya. Makwerhu loyi u tlhelerile endzhaku ka masiku mambirhi kutani ku sunguriwe dyondzo ya Bibele. Le Denmark, ku siyiwe xiphephana xa Kingdom News emutini lowu a wu nga ri na munhu. Hi siku rero, wansati la tshamaka emutini wolowo u tate xiphephana xa xinavetisi kutani a xi rhumela ehofisini ya rhavi kutani rona ri xi hundzisela evandlheni ra kwalaho. Ku nga si hela vhiki, ku endze vamakwerhu vambirhi va xisati, va endla malunghiselelo ya ku sungula dyondzo kutani wansati loyi u ye enhlanganweni eHolweni ya Mfumo!
6 Leswi U Nga Swi Vulaka Loko U Tlhelela: Swa olova ku endla riendzo ro vuyela laha ku siyiweke Kingdom News naswona i nchumu lowu tsakisaka evutirhelini bya hina. Loko u endla tano, swi nga va swinene leswaku u famba ni xiphephana xa Kingdom News No. 36, hikuva swi nga endleka leswaku n’wini wa muti a nga xi khomanga xa yena. U nga ha ringeta ku tirhisa swiringanyeto leswi.
7 Endzhaku ko tsundzuxa n’wini wa muti leswaku hi wena mani, u nga ha ku:
◼ “Ndzi ku siyele xiphephana lexi nge ‘Gidi Ra Malembe Lerintshwa—Xana Vumundzuku Byi Ku Khomele Yini?’ Xana a swi ku khutazanga ku hlaya leswaku ku nga ri khale, ku Fuma ka Kreste ka Gidi ra Malembe ku ta sungula, ku tisa swiyimo swa Paradeyisi emisaveni? [N’wi kombe swifaniso swa Paradeyisi eka Kingdom News No. 36.] Eka tluka ro hetelela, u komberiwa ku endla xikombelo xa broxara leyi nge I Yini Leswi Xikwembu Xi Swi Languteleke Eka Hina?” N’wi kombe broxara leyi kutani u pfula eka dyondzo 5, vutisa xivutiso xo sungula u tlhela u hlaya ndzimana 1 na 2 kutani u kombela n’wini wa muti leswaku a hlamula. Hlaya u tlhela u hlamusela tsalwa rin’we kumbe mambirhi. Loko swi koteka, vutisa xivutiso xin’wana u tlhela u hlaya ni ndzimana ya kona, kutani endla malunghiselelo ya ku tlhela u vuya leswaku u ta yisa bulo rero emahlweni.
8 Tanihi leswi hi November ku nga ta tirhisiwa broxara leyi nge “Leswi Xi Swi Languteleke” kumbe buku leyi nge “Vutivi” loko u tlhelela evanhwini, u nga ha ku:
◼ “Nkarhi lowu hundzeke loko ndzi ku endzerile, ndzi ku siyele xiphephana lexi nge ‘Gidi Ra Malembe Lerintshwa—Xana Vumundzuku Byi Ku Khomele Yini?’ Xi tamele rungula leri nge u nga kuma dyondzo ya le kaya ya Bibele ya mahala. Ndzi tlhele ndzi vuya leswaku ndzi ta ku komba nchumu lowu hi wu tirhisaka loko hi dyondza ni vanhu. [N’wi kombe broxara leyi nge Leswi Xi Swi Languteleke, kutani u n’wi komba emakumu ka yona; kumbe n’wi kombe buku leyi nge Vutivi, ivi u pfula eka matluka 188-9.] Gidi ra malembe leri Bibele yi vulavulaka hi rona ri ta tisa swiyimo leswi fanaka ni leswi u swi vonaka eka xifaniso lexi. Leswaku hi fanelekela ku hanya eParadeyisini, hi fanele hi nghenisa vutivi lebyi kongomeke bya Xikwembu. Ndzi kombela u ndzi pfumelela ndzi ku kombisa hi ku komisa ndlela leyi hi dyondzaka Bibele ni vanhu ha yona.”
9 Ku fambisiwa ka Kingdom News No. 36 ku hi susumetele ku hlanganyela hi matimba evutirhelini bya hina, hi nyikela vumbhoni lebyi engetelekeke. Handle ko kanakana leswi swi pfuxe ku tsakela eka vanhu vo tala ensin’wini. Matshalatshala ya hina ya vun’we ya ku hlakulela ku tsakela loku, hi mpfuno wa Yehovha ma ta endla leswaku hi kuma vanhu lava engetelekeke lava fanaka ni tinyimpfu.—Mat. 10:11; Mint. 13:48, 49, 52.