Landzelela Ku Tsakela Loku Kombisiweke Hikwalaho Ka Xiphephana Xa Kingdom News
1 Emavhikini Ma Nga Ri Mangani Lama Hundzeke, Hi Tiphine Hi Lunghelo Ro Hangalasa Xiphephana Xa Kingdom news No. 35, Lexi Nge “Xana Vanhu Hinkwavo Va Ta Kala Va Rhandzana?” Vahuweleri Hinkwako-nkwako Va Tikarhatela Ku fikelela Vanhu Vo Tala Lava Lulameriwaka Hi Ku Va Fambisela Xiphephana Xa Kingdom News. (Mt. 10:11) Hambileswi Tsima Ri Hleleriweke ku hela Hi Sonto, November 16, Loko Ka Ha Ri Ni Nsimu yin’wana Leyi Faneleke Ku Tirhiwa, Vakulu Va Nga Ha Mi kombela Ku Hambeta Mi Hangalasa Xiphephana Xa Kingdom News No. 35 Loko Xa Ha Ri Kona Evandlheni.
2 Xiphephana lexi xa Kingdom News xi endle leswaku vanhu vo tala va tsakela. Va swi vona leswaku hi ntolovelo vanhu va cukumete rirhandzu ra ntumbuluko hikokwalaho va tivutisa malunghana ni leswi vumundzuku byi va khomeleke swona. (2 Tim. 3:3) Hi lava ku landzelela ku tsakela loku sunguriweke.
3 Vuyelo Bya Xiphephana Xa Kingdom News: Hi nkarhi wa tsima ra 1995 ra xiphephana xa Kingdom News, wansati la amukeleke xin’we xa swona u ye eminhlanganweni eHolweni ya Mfumo hikuva a a rhandza ku dyondza swo tala malunghana ni leswi Timbhoni ta Yehovha ti swi pfumelaka. Enhlanganweni wolowo u amukele dyondzo ya Bibele ivi endzhaku ka sweswo a nga ha xwi eminhlanganweni. Endzhakunyana, u tsale papila ri ya ekerekeni leyi a nghena eka yona, a tshika ku va xirho xa yona!
4 Ku fikela sweswi, madzana ya vanhu ensin’wini se va hlaye rungula leri nga eka xiphephana xa Kingdom News No. 35. Kambe xana n’wangulo wa vona eka xona a wu ri wihi? Hambileswi va tsakisiweke hi leswi va swi hlayeke, vo tala a va nge ri teki goza handle ka loko un’wana wa Timbhoni ta Yehovha a tlhela a va endzela. Xana u endla makungu ya ku tlhelela? Nkhathalelo wa hina wa rirhandzu hi vanhu-kulorhi wu fanele wu hi susumetela ku endla tano. Hinkwavo lava kombiseke ku tsakela xiphephana xa Kingdom News va fanele va endzeriwa nakambe.
5 I Yini Lexi U Nga Ta Xi Vula Loko U Tlhelela? U nga ha hlamusela hi ku komisa malunghana ni rungula leri nga enkarhini leri nga eka xiphephana xa Kingdom News ivi u vutisa xivutiso lexi tlhontlhaka mianakanyo. Yingisela hi vukheta loko n’wini wa muti a tiphofula leswaku u ta tiva leswi a swi ehleketaka. Kutani yisa nyingiso eka yinhla leyi faneleke leyi kumekaka eka broxara leyi nge Leswi Xi Swi Languteleke, leyi hlamuseriweke exiphephanini xa Kingdom News. Loko u kuma n’wangulo lowunene, ringeta ku sungula dyondzo ya Bibele xikan’we-kan’we.
6 Hi leswi swingheniso leswi ringanyetiwaka leswi u nga swi ringetaka loko u tlhelela eka lava kombiseke ku tsakela xiphephana xa “Kingdom News” No. 35:
◼ “Ndza tshemba leswaku wa xi tsundzuka xiphephana lexi ndzi ku siyeleke xona sweswinyana. Rungula ra xona ri khumba mhaka ya nkoka leyi hambanisaka vanhu namuntlha—ku pfumaleka ka rirhandzu ro rhandza van’wana.” Yisa nyingiso eka vumbhoni lebyi nga eka tluka 2 eka xiphephana xa Kingdom News ehansi ka xihloko lexi nge “Ku Rhandza Vaakelani A Swa Ha Ri Kona.” Kutani vutisa, “Xana u vona onge i xikongomelo xa Xikwembu leswaku vanhu va hanya hi ndlela leyi?” Yimela nhlamulo. Pfula dyondzo 5 eka broxara leyi nge Leswi Xi Swi Languteleke, ivi u sungula dyondzo ya Bibele.
◼ “Loko hi hlangana ro sungula, ndzi ku siyele xiphephana lexi nga ni nhloko-mhaka leyi nge ‘Xana Vanhu Hinkwavo Va Ta Kala Va Rhandzana?’ Xana u ehleketa leswaku misava yo tano yi nga va kona?” Yimela nhlamulo. Pfula dyondzo 6 eka broxara leyi nge Leswi Xi Swi Languteleke, ivi u hlaya ndzimana 6. Kutani hlaya xitshembiso xa Xikwembu eka Mikiya 4:3, 4. Loko n’wini wa muti a tikomba a tsakela, n’wi fambisele broxara leyi ivi u sungula dyondzo.
◼ “Loko ndzi ku endzerile enkarhini lowu nga hundza, ndzi ku siyele xiphephana lexi nge ‘Xana Vanhu Hinkwavo Va Ta Kala Va Rhandzana?’ Xi nyikele nhlamuselo malunghana ni dyondzo ya mahala ya le kaya ya Bibele. Ndzi vuyile leswaku ndzi ta ku kombisa xipfuneto xo dyondza lexi hi xi tirhisaka. [N’wi kombise buku leyi nge Vutivi.] Buku leyi yi wu hlamusela kahle nkarhi lowu vanhu hinkwavo va nga ta rhandzana ha wona, naswona yi hlamula swivutiso swin’wana leswi u nga ha tivutisaka swona: Ha yini hi dyuhala hi tlhela hi fa? Ha yini Xikwembu xi pfumelela ku xaniseka? Ku humelela yini hi varhandziwa va hina lava feke?” Kutani u vutisa, “Xana ndzi nga ku kombisa ndlela leyi hi dyondzaka ha yona?” Loko n’wini wa muti a ala dyondzo, n’wi vutise loko a ta swi tsakela ku hlaya buku hi yexe. Loko a swi tsakela, n’wi siyele buku hi munyikelo wa R4,00. Kunguhata ku tlhela u vuya.
7 Loko nsimu yi hlanganisiwile hinkwayo hi ku tirhisa xiphephana xa Kingdom News No. 35, hi nga ha fambisa buku leyi nge Vutivi enkarhini lowu seleke wa n’hweti. Swingheniso leswinene leswi ringanyetiweke swa buku leyi swi kumeka eka tluka ra le ndzhaku ra minkandziyiso ya Vutirheli Bya Hina Bya Mfumo bya March, June, na November 1996; ni bya June 1997.
8 Ku hangalasiwa loku ko hlawuleka ka xiphephana xa Kingdom News ku fanele ku tiyisa matshalatshala ya hina entirhweni wo chumayela. Hi ku pfuniwa hi Yehovha hi nga tiyiseka leswaku tsima leri ri ta humelela hakunene, hi pfuna vanhu leswaku va swi vona leswaku xikongomelo xa Xikwembu hi leswaku vanhu hinkwavo va rhandzana. Onge Yehovha a nga hambeta a katekisa matshalatshala ya hina loko hi landzelela ku tsakela loku kombisiweke eka xiphephana xa Kingdom News.