Xana Ku Hatle Ku Tlangeriwa Kumbe Ku Hlweriwile?

KU VURIWA swo tala sweswinyana malunghana ni ku sungula ka lembe-xidzana ra vu-21 ni gidi ra malembe ra vunharhu endzhaku ka ku velekiwa ka Yesu Kreste. Magazini lowu nge Newsweek wu vule leswaku “lembe-xidzana ra vu-20, leri sunguleke tanihi lembe-xidzana ra Nyimpi Ntsena naswona ri hetelela ri ri Nguva ya Bomo ya Athomo, swi vonaka ri hela ri ri Nguva ya Vuhungasi.” Enkandziyisweni wa yona wa January 22, 1997, wu vikile: “Tihotela leti kumekaka emisaveni hinkwayo ana se ti bukiwile” leswaku ku ta tlangeriwa Vusiku byo Hetelela bya Lembe leri, December 31, 1999.

Hambiswiritano, vanhu van’wana va vula leswaku ku tlangela loku ku endleke hi xihatla. Va vula leswaku, hilaha ku hambaneke ni leswi vanhu vo tala va swi vonisaka xiswona, lembe-xidzana ra vu-21 ni gidi ra malembe lerintshwa, a swi sunguli hi January 1, 2000, kambe swi sungula hi January 1, 2001. Tanihi leswi ri nga riki kona lembe leri vuriwaka lembe ra vu-0, lembe-xidzana ro sungula ri sungule hi lembe ra vu-1 ku ya eka ra vu-100, lembe-xidzana ra vumbirhi ri sungule hi 101 ku ya eka 200, swi fambisa sweswo. Kutani, ku vuriwa leswaku lembe-xidzana ra vu-20, leri sunguleke hi January 1, 1901, ni gidi ra malembe ra vumbirhi, leri sunguleke hi January 1, 1001, a swi nge heli kukondza ku fika December 31, 2000.

Ku ni yinhla yin’wana leyi faneleke yi xiyiwa. Tikhalendara ta hina ti hambanisa nkarhi hi ku tirhisa emahlweni ka kumbe endzhaku ka ku velekiwa ka Kreste. Sweswi swidyondzi se swa lemuka leswaku Yesu u velekiwe khale, hayi enkarhini lowu a wu ehleketiwa, kutani swi endla leswaku mahlayelo ya khalendara lama langutiwaka ma ri ya nkoka, ma va lama hoxeke. Ku ni mavonelo lama hambaneke malunghana ni nkarhi lowu Yesu a velekiweke ha wona, kambe ntlhandlamano wa minkarhi wa Bibele wu kombetela eka lembe ra 2 B.C.E. Hi ku ya hi hlayelo leri, entiyisweni gidi ra malembe ra vunharhu endzhaku ka ku velekiwa ka Kreste ri sungule hi xixikana xa lembe leri! Rungula leri engetelekeke ri nga kumeka eminkandziyisweni ya Xalamuka! ya May 22, 1997 (ya Xinghezi), eka tluka 28, ni ya December 22, 1975 (ya Xinghezi), eka tluka 27.a

Eka swiyimo hinkwaswo, i vutlhari leswaku u papalata ku va ni langutelo ro sihalala, u vula leswaku lembe-xidzana ra vu-21 ni gidi ra malembe lerintshwa swi ta sungula emavhikini ma nga ri mangani ntsena. Nilokoswiritano, hi ku landza langutelo leri dumeke, Xalamuka! yi vona swi fanerile enkarhini lowu, ku bula hi xihloko lexi nge “Lembe-xidzana Ra Vu-20—Malembe Ya Nkoka Ya Ku Cinca.”

[Nhlamuselo ya le hansi]