Langutelo Ra Bibele

Lembe Ra 2000, Xana I Ra Nkoka Ku Fikela Kwihi?

VANHU vo tala a va swi teki swi fambisana ni vukhongeri nikatsongo leswi matiko ya le Vupela-dyambu kun’we ni man’wana yo tala ma nga ta va xiswona hi lembe ra 2000. Hi xikombiso, Vayuda, Mamoslem ni Mahindu hinkwavo va ni tikhalendara ta vona vini ta vukhongeri leti nga fambisaniki ni ya le Vupela-dyambu. Malunghana ni masiku ya vukhongeri ni ya ndhavuko, Machayina ma landzela khalendara ya tin’hweti ta Bibele. Hikwalaho, vanhu va magidi ya timiliyoni namuntlha, kumbexana vunyingi lebyikulu bya vaaki va misava, a va voni nchumu wo hlawuleka eka lembe ra 2000.a

Hambiswiritano, vo tala va langutele hi mahlo-ngati ku tshinela ka masungulo ya gidi ra malembe leri taka hilaha swi kombisiweke hakona hi khalendara ya Gregory, ngopfu-ngopfu ematikweni ya le Vupela-dyambu. Van’wana a va ri langutelanga hi mahlo-ngati ntsena. Va languta lembe ra 2000 tanihi ku nghena ka nguva leyintshwa, tanihi ku cinca lokukulu ematin’wini. Vo tala lava vulaka leswaku va pfumela eBibeleni va yelanisa ku hetiseka ka vuprofeta ni lembe ra 2000. Van’wana va langutele leswaku swilo swa vukhongeri swi ta va exiyinweni xa le henhla. Van’wana va chava ndzoviso lowukulu—ku hela ka misava. Xana Bibele yi vula swo karhi malunghana ni ku langutela loku?

Yehovha, Muhlayisi Wa Nkarhi

Xikwembu xa Bibele xi vuriwa “Nkulukumba wa masiku.” (Daniyele 7:9) Xi lawula nkarhi hi ndlela leyi pakanisaka swinene, hilaha hi swi vonaka hakona hi matirhelo ya swilo swo tala leswi xi swi tumbuluxeke, ku sukela eka ndzhendzheleko wa tipulanete ku ya eka tiathomo letitsongo. Xi ni fambiselo ra xona ra nkarhi leri xi ri hlayisaka swinene. Bibele yi ri: “Xi yimise minkarhi leyi vekiweke ni ku veka maava ya lomu ku tshamaka vanhu.” (Mintirho 17:26) Yehovha i Muhlayisi wa nkarhi la pakanisaka.

Hikwalaho, Bibele yi nyikela nhlamuselo leyi pakanisaka ya ntlhandlamano wa minkarhi. Yi hlamusela rhekhodo leyi tlhandlamanaka leyi endlaka leswaku u hlayela hi ndlela leyi hlelekeke ku sukela eku sunguleni ka matimu ya munhu. Ku hlayela ko tano ku kombisa leswaku 4026 B.C.E. i lembe leri Xikwembu xi tumbuluxeke Adamu ha rona. Abrahama u velekiwe endzhaku ka malembe lama lavaka ku endla 2000. Loko Yesu a velekiwa a ku hundze malembe man’wana yo ringana 2000.

Vanhu van’wana lava dyondzaka ntlhandlamano wa minkarhi ya Bibele va tivekele minkarhi leyi kombetelaka eka masiku yo hlawuleka enkarhini lowu taka. Hi xikombiso, loko va tirhisa ku landzelelana ka minkarhi ya malembe ya kwalomu ka 2000 leyi hambanisaka Adamu, Abrahama na Yesu, van’wana va vhumba xiendlakalo lexi chavisaka eku heleni ka malembe ya 2000 ku sukela eku velekiweni ka Yesu. Lexi ko va xikombiso xin’wana lexi kunguhatiweke xa ku hlayela minkarhi lexi sekeriweke eka ntlhandlamano wa minkarhi ya Bibele.

Kavula, Bibele yi vulavula hi nkarhi lowu Yehovha Xikwembu a nga ta nghenelela etimhakeni ta vanhu hi ku susa vubihi ni ku tisa misava leyintshwa. Vuprofeta bya Bibele byi vulavula hi ‘minkarhi ya makumu,’ “makumu ya mafambiselo ya swilo,” ‘masiku yo hetelela,’ ni “siku ra Yehovha.” (Daniyele 8:17; Matewu 24:3; 2 Timotiya 3:1; 2 Petro 3:12) Hambiswiritano, “makumu” lama vhumbiweke eBibeleni a ma fambisani helo ni lembe ra 2000. Ku hava nchumu eMatsalweni lexi hlamuselaka xiendlakalo xo hlawuleka xa ku hela ka gidi ra vumbirhi ra malembe hilaha swi hlamuseriweke hakona hi khalendara ya Gregory.

“Xana Swilo Leswi Swi Ta Endleka Rini?”

Vaapostola va Yesu va kombise ku tsakela lokukulu ku tiva nkarhi lowu vekiweke hi Xikwembu loko va vutise Yesu va ku: “Hi byele, xana swilo leswi swi ta endleka rini, naswona xi ta va xihi xikombiso xa vukona bya wena ni xa makumu ya mafambiselo ya swilo?” (Matewu 24:3) Hilaha ku fanaka vo tala namuntlha va lava ku tiva malunghana ni vumundzuku. Swi tolovelekile ku va ni ku tsakela lokukulu eka vuprofeta byo tano lebyi xiyekaka bya Bibele ni nkarhi wa ku hetiseka ka byona. Hambiswiritano, i vutlhari ku amukela ni ku xixima xiyimo xa Xikwembu emhakeni leyi.

Hi ku tirhisa N’wana wakwe, Yehovha u paluxe swikongomelo swakwe naswona u nyikele nhlamulo leyi pakanisaka emhakeni leyi. Emahlweninyana ka ku va Yesu a tlhandlukela etilweni, vadyondzisiwa va yena va tlhele va n’wi vutisa malunghana ni nkarhi wa ku hetiseka ka switshembiso swa Xikwembu. Yesu u hlamule a ku: “A hi swa n’wina ku tiva minkarhi kumbe tinguva leswi Tatana a swi vekeke hi vulawuri byakwe.” (Mintirho 1:7) Eka xiendlakalo xa le mahlweninyana, Yesu u byele vadyondzisiwa vakwe a ku: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi a ri N’wana, kambe swi tiviwa hi Tatana ntsena.”—Matewu 24:36.

Entiyisweni, “ku tiva minkarhi kumbe tinguva,” ngopfu-ngopfu loko swi ta emhakeni ya ku hetiseka ka nkarhi lowu taka ka vuprofeta bya Bibele, a swi le vulawurini bya vanhu. Xikwembu xi hlawule ku ka xi nga hi tivisi rungula ro tano. (Matewu 24:22-44) Xana hi nga nghenelela eka xikongomelo xa Xikwembu hi ku tivekela “siku ra kona ni nkarhi wa kona,” leswaku hi lwisana ni ku rhandza ka xona? Kavula, leswi a swi nge endleki. (Tinhlayo 23:19; Varhoma 11:33, 34) Bibele yi ri: “Makungu ya Yehova ma tiyile hi laha ku nga heriki.” (Pisalema 33:11) Tanihi leswi a nga Xikwembu xa matimba hinkwawo, a nga tsandziwi hi nchumu.—Esaya 55:8-11.

Hambileswi swi nga ematimbeni ya Xikwembu ku hlayisa ku “tiva minkarhi kumbe tinguva . . . [hi ku ya hi] vulawuri [bya xona],” van’wana va ha lava ku mbambela. Van’wana va hundzuka vaprofeta lava langutaneke ni khombo lava tihlawuleke hi voxe. Hikwalaho ka xivangelo lexi muapostola Pawulo u nyike xiletelo lexi kongomeke eka Vatesalonika malunghana ni khombo ra ku yingisela vanhu lava vhumbaka masiku. U tsarile: “Hi kombela leswaku n’wina mi nga ninginisiwi hi ku hatlisa emianakanyweni ya n’wina hambi ku ri ku nyanyuriwa hi marito lama huhuteriweke kumbe hi rungula ra nomu kumbe hi papila leri vonakaka onge ri huma eka hina, ri kombisa leswaku siku ra Yehovha ri fikile. Ku nga tshuki ku va ni la mi kanganyisaka hi mukhuva wo karhi.”—2 Vatesalonika 2:1-3.

Timbhoni ta Yehovha ti ni ntshembo lowu tiyeke wa leswaku swikongomelo swa Xikwembu hi vumundzuku swi ta hetiseka hakunene enkarhini lowu xi wu vekeke ka ha ri emahlweni, hi siku ni nkarhi lowu faneleke lowu vekiweke hi xona. (Habakuku 2:3; 2 Petro 3:9, 10) Naswona ha pfumela leswaku swiendlakalo leswi swi ta humelela ku nga ri khale. (2 Timotiya 3:1-5) Hambiswiritano, a hi lavi ku vhumba kumbe ku seketela mavarivari lama hangalakeke ngopfu namuntlha.b Kunene, hambi i lembe ra 2000, kumbe ra 2001, kumbe nkarhi wihi na wihi lowu sunguriweke hi vanhu a wu fambisani ni nkarhi wa Yehovha lowu vekiweke.

[Tinhlamuselo ta le hansi]