2000—Xana I Lembe Ro Hlawuleka?
XANA ku ni nchumu wo hlawuleka malunghana ni lembe ra 2000? Hi ntolovelo vanhu lava tshamaka ematikweni ya le Vupela-dyambu va ri teka ri ri lembe ro sungula ra gidi ra malembe ra vunharhu. Ku karhi ku endliwa malunghiselelo lamakulu yo ri tlangela. Tiwachi letikulu ta elektroniki ti karhi ta vekiwa leswaku ti hlayela tisekoni loko ti ri karhi ti hunguteka kukondza ku sungula gidi ra malembe lerintshwa. Swiendlakalo swa ku tlangela Lembe Lerintshwa ra Gala hi Madyambu ya le Mahlweni ka rona swa karhi swa lulamisiwa. Swikipa leswi nga ni swiga leswi kombisaka ku hela ka gidi ra malembe swa xavisiwa emavhengeleni ya le swidorobanini swin’we ni le mavhengeleni ya le madorobeni lamakulu.
Tikereke letikulu ni letitsongo ti ta hlanganyela eminkhubyeni ya lembe hinkwaro. Eku sunguleni ka lembe leri taka, ku languteriwe leswaku Mupapa John Paul wa Vumbirhi u ta ya eIsrayele leswaku a ya kongomisa Marhoma Khatoliki eka leswi vitaniwaka “yubili ya ku tlangela gidi ra malembe ya Kereke ya Rhoma Khatoliki.” Ku ringanyetiwa leswaku exikarhi ka timiliyoni timbirhi ni hafu na tsevu wa timiliyoni ta vavalangi, ku suka eka vanhu va vukhongeri ku ya eka lava rhandzaka ku tiva, va kunguhata ku endzela eIsrayele lembe leri taka.
Ha yini vanhu vo tala swonghasi va kunguhata ku endzela eIsrayele? Roger Cardinal Etchegaray, mutirhi wa le Vatican, loko a vulavulela mupapa u te: “Lembe ra 2000 i ra ku tlangela Kreste ni vutomi bya yena etikweni leri. Hikwalaho swa fanela leswaku Mupapa a ta laha.” Xana lembe ra 2000 ri hlangana njhani na Kreste? Hi ntolovelo ku anakanyiwa leswaku lembe ra 2000 ri fungha hi ku kongoma malembe ya 2000 ku sukela loko Kreste a tswariwile. Kambe xana swi tano? Hi ta swi vona.
Lembe ra 2000 i ra nkoka swinene ni le ka swirho swa vukhongeri byin’wana. Swa khorwiseka leswaku ku nga si hela lembe leri taka, Yesu u ta tlhelela eNtshaveni ya Mitlhwari ni leswaku nyimpi ya Armagedoni, leyi ku vulavuriwaka ha yona ebukwini ya Nhlavutelo, yi ta lweriwa enkoveni wa Megido. (Nhlavutelo 16:14-16) Hikwalaho ko langutela swiendlakalo leswi hi mahlo-ngati, madzana ya vaaki va le United States va xavisa makaya ya vona ni nhundzu ya vona yo tala naswona va rhurhela eIsrayele. Leswaku ku vuyeriwa vo tala lava va nga ta ka va nga rhurhi, ku vuriwe leswaku muchumayeri un’wana la dumeke wa le United States u tshembise ku haxa ku vuya ka Yesu eka thelevhixini—ku ku dla, erivaleni!
Ematikweni ya le Vupela-dyambu, makungu ya ku nghena ka gidi ra malembe ra vunharhu ma karhi ma tiyisiwa. Hambiswiritano, vanhu va le matikweni man’wana va ya emahlweni va hanya hi ndlela ya ntolovelo. Vanhu lava—vunyingi bya vaaki va laha misaveni—a va pfumeli leswaku Yesu wa le Nazareta a ri Mesiya. Ni matsalelo ya minkarhi ya B.C. ku ya ka A.D. a va ma amukeli.a Hi xikombiso, Mamoslem yo tala ma tirhisa khalendara ya wona, leyi hi ku ya hi yona lembe leri taka ku nga ta va ku ri 1420—hayi 2000. Mamoslem ma hlayela malembe ya wona ku sukela eka siku leri muprofeta Muḥammad a balekeke ha rona a suka eMecca a ya eMedina. Hi ku angarhela, vanhu emisaveni hinkwayo va tirhisa tikhalendara to hambana-hambana ta 40.
Xana lembe ra 2000 ri fanele ri vula swo karhi eka Vakreste? Xana hakunene January 1, 2000, i siku leri nga ra nkoka swinene? Swivutiso leswi swi ta hlamuriwa exihlokweni lexi landzelaka.
[Nhlamuselo ya le hansi]
a Eka fambiselo ra ku pima nkarhi ra B.C. ku ya ka A.D., swiendlakalo leswi humeleleke emahlweni ka nkarhi lowu tolovelekeke wa ku tswariwa ka Yesu swi wela ehansi ka malembe ya “B.C.” (emahlweni ka Kreste); leswi humeleleke endzhaku ka ku tswariwa ka yena swi wela ehansi ka malembe ya “A.D.” (Anno Domini—“elembeni ra Hosi ya hina.”) Hambiswiritano, swidyondzi swin’wana leswi dyondzekeke swi tsakela ku tirhisa mimfungho leyi nge “B.C.E.” (emahlweni ka Nguva ya hina leyi Tolovelekeke) na “C.E.” (eka Nguva ya hina leyi Tolovelekeke.)