Ku Ponisa Misava Eku Onhiweni

EMATIN’WINI ya munhu, Xikwembu xi tshame xi ponisa misava eku onhiweni emavokweni ya vanhu. Xi endle tano hi ku tirhisa ndhambi ya misava hinkwayo emasikwini ya Nowa. A hi na yona rhekhodo ya leswaku vanhu a va wu onha mbango lowu vonakaka hi nkarhi wolowo. Kambe misava a yi onhiwa hi ndlela yin’wana lerova Xikwembu xi vona swi fanela ku teka goza hi vukarhi lebyikulu.

Bibele ya vika: “Misav̌a a yi onhakile e mahlweni ka Šikwembu, a yi tele mona. Šikwembu ši languta misav̌a, kutani maŝivo, a yi onhakile; hikuv̌a nyama yiṅwana ni yiṅwana a yi onhile ndlela ya yona e misav̌eni.” (Genesa 6:4, 11, 12) Ina, esikwini ra Nowa Xikwembu a xi languta misava yi ri leyi onhiweke hikwalaho ka vukarhi ni vubihi bya vanhu.

Hi ku fanana, loko Israyele wa khale a sungule ku aka eTikweni leri Tshembisiweke, Xikwembu xi tsundzuxile: “Mi nga ṭhuki mi onha tiko leri mi nga ka rona, hikuv̌a ngati yi onha tiko . . . Mi nga ṭhuki mi [thyakisa] tiko.” (Tinhlayo 35:33, 34) Hikwalaho, Kanana a ri onhiwile hikwalaho ka nandzu wa ngati wa vaaki va rona. Xikombiso lexi nyenyetsaka xa leswi hi leswi a va endla magandzelo hi vana va vona eka swikwembu swa vona.

Makanana nakambe a ma tikhoma hi ndlela yo biha swinene, naswona leswi swi khumbe langutelo ra Xikwembu hi tiko leri. Xi tsundzuxe Israyele xi ku: “Mi nga ṭhuki mi tinyamisa hi šilo šiṅwe ša ŝilo leŝi [ku tikhoma loko biha]: hikuv̌a e matiko lawa nḍi ma hlongoleke mahlweni ka ṅwina, ma tinyamisile hi ŝilo leŝi hikwaŝo. E tiko ri nyamisiwile hi ŝona; . . . misav̌a yi hlantile v̌aaki v̌a yona.” (Levitika 18:24, 25) Ku tikhoma loko biha ni ku halatiwa ka ngati swi onhe Kanana lerova Xikwembu xi herisa matiko ya Kanana.

Ku Onhiwa Ka Misava

Ku vuriwa yini hi namuntlha? Xana a hi hanyi enguveni ya vukarhi lebyi nga lawulekiki, ku halata ngati ni ku tikhoma loko biha? Ku nga khathariseki leswaku munhu u endla yini ku lulamisa ku onhaka loku a ku endleke emisaveni leyi vonekaka, a nge swi koti ku tlherisa vanhu lava ringanyeteriwaka eka dzana ra timiliyoni evuton’wini lava feke etinyimpini ta yena hi lembe xidzana leri; kumbe ku pfuxa timiliyoni leti dlayiweke hi swigevenga ni vahlaseriwa va ntsandza-vahlayi lava faka hi ndlala. Hakunene, a nge swi koti ku tlherisela timiliyoni leti ringanyeteriwaka eka 40 ku ya ka 60 ta vana lava nga siki velekiwaka lava vutomi bya vona byi herisiwaka hi ku xixa tinyimba lembe na lembe. Xana hi nga kanakana leswaku misava ya onhiwa emahlweni ya Xikwembu hi swilo swo tano—hi nga ha vulavuli hi ku tikhoma loko biha loku taleke swonghasi namuntlha?

Ku twisisa ku hi byela leswaku Xikwembu xi fanele xi teka goza hi ku hatlisa ku ponisa misava eka mintirho ya munhu yo onha, naswona vuprofeta bya Bibele bya swi tiyisekisa leswi. Kambe xana xi ta endla yini? Bibele yi vula leswaku xi ta “herisa lava herisaka misava.” (Nhlavutelo 11:18; ringanisa Matewu 24:3-14.) Tanihi leswi n’wini a hlongolaka muhirhi la onhaka, kutani Xikwembu xi ta “hlongola” lava onhaka ntumbuluko wa xona wo saseka, misava.

Bibele yi ri: “Kambe la’v̌o biha v̌a ta susiwa la misav̌eni, ni timbabva ti ta ṭhuv̌uriwa ka yona.” (Swivuriso 2:22) Goza leri ra Xikwembu leri taka, Bibele yi ri vitana Armagedoni. (Nhlavutelo 16:16) Yesu nakambe u ri vitana “nhlomulo lowukulu lowu nga si tshamaka wu va kona ku sukela eku sunguleni ka misava ku ta fikela sweswi, naswona a wu nge he vi kona nakambe.” (Matewu 24:21, NW) Wu ta tlula ni Ndhambi.

Xana lowu i ntlhantlho lowu hundzeletiweke kumbe wo homboloka? Doo, Xikwembu, tanihi Muvumbi wa misava, xi ni mfanelo yo boha leswaku i mani la nga ta tshama eka yona. Naswona xi ni mfanelo yo teka vanhu va ri ni vutihlamuleri eka magoza ya vona. Ku tlula kwalaho, loko Xikwembu xi pfumelela munhu a hambeta ni ndlela ya yena a nga yimisiwi, misava yi ta onhiwa eka mani na mani naswona vutomi a byi nge koteki. Hi tlhelo rin’wana, hi ku ‘herisa lava herisaka misava,’ Xikwembu xi hlayisa ndzhaka ya hina ya misava eka lava yi tlangelaka. Bibele ya tshembisa: “Hikuv̌a la’v̌a lulameke v̌a ta aka misav̌eni, la’v̌o tenga v̌a ta siyiwa kona.”—Swivuriso 2:21.

Hi mpfuno wa Xikwembu, timiliyoni ti kume matimba yo tikombisa ti nga ri na nandzu hi mhaka ya leswi ti lavaka ku siyiwa leswaku ti tiphina hi ntumbuluko wa Xikwembu. Nakambe ti landzelela mimpimanyeto leyi tlakukeke ya Xikwembu ya mahanyelo naswona ti papalata vukarhi ni nandzu wa ngati hi tindlela hinkwato. Hikwalaho, a hi vaonhi va misava hi ndlela leyi ya nkoka.

Misava Leyi Ponisiweke Eku Onhiweni

Vanhu vo tano sweswi va ni ntshembo lowu tsakisaka wa ku vona misava yi cinciwa eka xiyimo xa yona xa sweswi xa ku onhiwa yi va paradeyisi leyi tengeke. Phela, hambi yi ri mimiri ya vona yi ta tengisiwa, yi basisiwa eka mimbuyelo leyi onhaka ya xidyoho. Buku yo hetelela ya Bibele yi hlamusela lunghiselelo ra Xikwembu ra ku endla hinkwaswo leswi swi koteka tanihi “nambu wa mati ya vutomi” wo fanekisela. Ematlhelweni hinkwawo ya nambu, “ku ni murhi wa vutomi lowu nyikaka mihlovo ya 12 ya mihandzu, wu tswala mihandzu ya kona n’hweti yin’wana ni yin’wana; kutani matluka ya murhi i yo tshungula vanhu va matiko hinkwawo.”—Nhlavutelo 22:1, 2.

Xivono lexi lexi huhuteriweke i vumbhoni lebyi tiyeke bya leswaku Xikwembu xi ta yi ponisa misava ni vanhu lava nga eka yona eku herisiweni. Vuprofeta byin’wana byi nyikela xivono lexi antswaka xa misava yoleyo leyi kondleteriweke. Hi xikombiso, xiya xivono xa le mahlweni xa Esaya xo tanihi xiphato: “Tiko ra ntlhohe ri ta ṭaka, ni tiko le’ri omeke; makwanḍasi ma ta ṭakisisa, ma rumbuka kukota koṅhwa! Ma ta rumbuka hi ku tlurisa, ma ṭakisisa, ma ṭaka kunene, ma yimbelela tinsimu to ṭaka.” (Esaya 35:1, 2) Hi nkarhi wolowo malwandle lama thyakisiweke ni misava leyi onhiweke kumbe moya lowu nga ni chefu a swi nge vi kona.

Xa nkoka swinene, misava a yi nge onhiwi hi vukarhi, ku halata ngati kumbe ku tikhoma loko biha. Hi lava va xiximaka Xikwembu, mimpimanyeto ya xona ni ntumbuluko wa xona ntsena lava nga ta va kwalaho. (Nhlavutelo 21:7, 8) Kutani yingisa vuyelo lebyi vangamaka bya swilo leswi hinkwaswo: “[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile. . . . ‘Vonani, ndzi endla swilo hinkwaswo swi va leswintshwa.’”—Nhlavutelo 21:4, 5.

Mawaku vuyelo byo tsakisa swonghasi! Ha tsaka swonghasi leswi Xikwembu ku nga ri khale xi nga ta “herisa lava herisaka misava”! Naswona vona ndlela leyi switshembiso leswi huhuteriweke swi hi susumetaka ha yona leswaku hi lava ku tirhela Xikwembu lexi nga ta ponisa misava eku herisiweni ivi xi yi endla kaya ra paradeyisi ra vanhu va timbilu letinene!

[Marito lama tshahiweke exihlokweni lama nga eka tluka 6]

Bibele yi vula leswaku Xikwembu xi ta “herisa lava herisaka misava.”—Nhlavutelo 11:18