Wa Tsundzuka Xana?

Xana u tsakele ku hlaya minkandziyiso ya sweswinyana ya Xihondzo xo Rindza? Kutani, vona loko u nga hlamula swivutiso leswi landzelaka:

◻ Hi mpfhuka tintsumi leti nga yingisiki ti pfaleriwe eTartarus, xana leswi swi vule yini eka tona? (2 Petro 2:4)

A ta ha ri na vutshamo enhlengeletanweni yo kwetsima ya Yehova naswona sweswi ti susiwile eku voningeni ka Xikwembu. Hambi swi ri tano, ta ha tirha ehansi ka nkongomiso wa Sathana naswona ti hambeta ti hlayisa ku tirhisana lokukulu na vanhu, ti ringeta ku lawula vavanuna, vavasati, hambi ku ri vana. (Nhlavutelo 12:12, 17)—4/15, tluka 14.

◻ Ha yini swi ri swa nkoka ku ‘venga leswo biha’ emahlweni ya Yehova? (Psalma 97:10)

Lava va vengaka leswo biha a va nge ti lavi tindlela to byi nghenelela. Hi tlhelo rin’wana, vanhu lava nga swi vengiki va nga swi papalata hi tlhelo ra nyama kambe emianakanyweni va navela onge va nga hlanganyela eka swilo leswo biha.—4/15, tluka 21.

◻ Exifanisweni xa Yesu xa titalenta, xana i dyondzo yihi leyi tiyeke leyi vekiwaka emahlweni ka hinkwavo lava tivulaka valandzeri va Kriste? (Matewu 25:14-30)

Va fanele ku tirha leswaku va engetela rifuwo ra N’wini wa vona wa le tilweni hi ku hlanganyela hi laha ku taleke entirhweni wo chumayela. Kutani hi kona va nga tiyisekisiwaka ku amukela xibumabumelo xa Yesu ivi va hakeriwa. Xisweswo va papalata ku cukumetiwa exinyamini ehandle ni ku loviseriwa makumu.—5/1, tluka 9.

◻ Xana Yesu a a vula yini loko a byela vadyondzisiwa vakwe ku khongela va ku: “U nga hi yisi emiringweni.”? (Matewu 6:13)

Marito lawa a ma fanelanga ma twisisiwa tanihi lama vulaka leswaku Yehova u hi ringa leswaku hi dyoha. Ematshan’wini ya sweswo, hina, entiyisweni, hi kombela Yehova leswaku a nga hi pfumeleli hi tsana loko hi ringiwa kumbe loko hi tshikileriwa leswaku hi nga n’wi yingisi. Hi nga kombela Tata wa hina leswaku a kongomisa magoza ya hina leswaku ku nga ti ndzingo lowu hi hlulaka lowu swi nonon’hwaka ku va hi wu tiyisela. (1 Vakorinto 10:13)—5/15, tluka 19.

◻ Xana swi fanerile leswaku Mukriste a amukela mintlhavelo ya xiphemu xa ngati xo tanihi globulin kumbe albumin ya nsawutiso?

Hi ku fambisana ni nawu wa Xikwembu, Vakriste a va amukeli mimpompelo ya ngati ya swiphemu leswikulu swa ngati—plasma, tisele to tshwuka, tisele to basa, kumbe ti-platelet. Hambi swi ri tano, van’wana va Timbhoni ta Yehova hi ku pfumelelana ni ripfalo va titwe va swi kota ku amukela ntlhavelo wa xin’wana xa swiphemu leswintsongo swa piroteyini ya plasma. Lexi tsakisaka, tin’wana ta tiproteyini leti hi ntumbuluko ti hundza eka fambiselo ra ngati ra wansati la tikeke ku ya eka fambiselo leri hambaneke ra n’wana wa yena.—6/1, matluka 30, 31.

◻ Xana a ku ri xikongomelo xihi lexi hetisisiweke hi ku hlantswa ka Yesu milenge ya vadyondzisiwa eka Paseka yo hetelela ya le nawini?

Yesu a a dyondzisa vadyondzisiwa vakwe dyondzo ya ku titsongahata. A nga kona loyi a faneleke ku lava ndhawu ya le mahlweni, a ehleketa leswaku u hlawulekile. Ku ri na sweswo, hinkwavo va fanele ku landzela xikombiso xa Yesu ni ku navela ku tirhelana handle ko ya hi nghohe, ku nga khathariseki ndlela leyi ntirho wu nga tsakisiki kumbe ku tsongahata ha yona. (Yohane 13:12-17)—6/15, tluka 9.

◻ Vayuda va le Beriya va ‘kambisise matsalwa hi vukheta’ hi ku twisisa kwihi? (Mintirho 17:11)

A ku nga ri swona leswaku Vaberiya a va kanakana Pawulo ni rungula leri a va nyikileke rona, kambe va endle nkambisiso leswaku va kota ku tiyiseka leswaku Yesu a a ri Mesiya. Leswi vo tala va vona va nga vapfumeri swi kombisa leswaku nsusumeto wa vona a wu ri wa xiviri. (Mintirho 17:12)—6/15, tluka 18.

◻ “[Buku] ya Miv̌ango ya Yehova” a ku ri yini xana? (Tinhlayo 21:14)

Lawa a ku ri matimu lama tshembekaka ya tinyimpi ta Xikwembu hikwalaho ka vanhu va xona. Kumbexana ya sungule hi ku hlula ka Abrahama ehenhla ka vahlaseri lava hlomeke va Tiko leri Tshembisiweke tanihi laha swi tsariweke ha kona eka Genesa ndzima 14. Makumu lama hlamarisaka ya buku leyi ya ta va “ku lwa ka siku le’rikulu ra Šikwembu ša matimba hikwawo” eHar–Magedoni. (Nhlavutelo 16:14, 16, BX)—7/1, matluka 20, 22.

◻ Rito ra Xikwembu, Bibele, ri hi pfuna ku tiyisela ku vaviseka hi ndlela yihi?

Bibele ya hi hlamusela leswaku ha yini Yehova a pfumelele ku vaviseka, naswona yi tlhela yi hi tiyisekisa leswaku ku vaviseka ku ta hela ku nga ri khale. (Varhoma 5:12; Nhlavutelo 21:1-5)—7/15, matluka 4, 5.

◻ Vanhu va Xikwembu namuntlha va nga ‘kombisa ku vangama ka Yehova ku fana ni swivoni’ hi ndlela yihi? (2 Vakorinto 3:18)

Ku dzuneka ka Xikwembu ka vangama hikwalaho ka “Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu.” Timbhoni ta Yehova ti komba ku dzuneka loku hi ku vulavula hi ku dzuneka ka Yehova ni ku dzuneka ka Mfumo wa yena hi N’wana wa yena. (2 Vakorinto 4:4-6)—7/15, tluka 15, 16.

◻ Munhu u fanele ku khuvuriwa rini ke?

Nkhuvulo i goza leri tekiwaka loko munhu a endle ku tinyiketela, loku heleleke, ka xiviri ni loku nga hikiwangiki eka Yehova hi Kriste Yesu ku endla ku rhandza ka Xikwembu.—8/1, tluka 14.