Xana U Ta Hambeta U Famba eNtiyisweni?

“A NḌI na ku ṭaka lo’ku tlulaka loku nḍi nga na kona, loko . . . v̌ana v̌a mina v̌a famba entiyisweni.” (3 Yoh. 4, BX) Ku vurisile sweswo muapostola Yohane eku heleni ka vutomi bya yena byo leha. Ku tiyisela loku yaka emahlweni ‘ka vana va yena,’ lava a va ngheniseke “entiyisweni” swi n’wi tisele ntsako lowukulu. Nakambe Yehova wa tsaka loko vagandzeri va yena va tshama entiyisweni. Vona ndlela leyi a faneleke a tsaka ha yona namuntlha ku vona nhlengeletano leyikulu, yi hlayiwa hi timiliyoni, yi landzela ndlela yoleyo ya vutlhari!—Swivuriso 27:11.

Hambi swi ri tano, hambi loko vanhu va Xikwembu hinkwavo va khomelele entiyisweni handle ko tsekatseka, Vakriste van’wana va tsana hambi ku ri ku tshika vugandzeri lebyi tengeke. Leswi swi languteriwile, tanihi nchumu lowu fanaka wu humeleleke eka lembe xidzana ro sungula. (2 Timotiya 4:10; Vaheveru 2:1) Hambi swi ri tano, mhaka ya leswaku van’wana va tsana yi kombisa xilaveko xa leswaku hinkwavo va xiyaxiya vumoya bya vona vini. Pawulo u khutaze Vakriste hinkwavo: “Yanani emahlweni mi tikamba.” (2 Vakorinto 13:5) Mukriste un’wana ni un’wana u fanele ku tivutisa xivutiso lexi: ‘Ndzi nga tiyisekisa ku yini leswaku ndzi ta hambeta ndzi famba entiyisweni?’

Van’wana va tsanile kumbe hambi ku ri ku tshika ku famba entiyisweni hikuva va hetiwe matimba—kumbexana hi swiphiqo swa rihanyo, kumbe ku kwetlembetana ka vumunhu. Van’wana va tsanile hikuva va hambukisiwile. Va lava ku tsakela yin’wana ya mihandzu ya mafambiselo lawa ya swilo loko ma khomelela. Xana hi nga ku papalata hi ndlela yihi ku tsana? Leswaku hi kuma hlamulo, a hi kambisiseni xikombiso lexi Yesu a hi siyeleke xona.

Landzela Xikombiso Xa Yesu

Yesu u langutane ni swiyimo swo tala swo nonon’hwa. A fanela ku tamela ku kwetlembetana ka vumunhu exikarhi ka valandzeri vakwe, kun’we ni ku tiyisela rivengo ni ku hlekula ka valala va yena. Nakambe a a fanele ku alela mindzingo ya misava leyi. Hakunene, u nyikiwe rifuwo ni vukulukumba hi mpimo lowu va nga riki vangani lava tshameke va wu tiva. (Matewu 4:8-11; Yohane 6:14, 15) Hambi swi ri tano, Yesu u phikelele ku famba entiyisweni. I yini lexi n’wi pfuneke ku endla leswi?

Muapostola Pawulo wa hi byela loko a tsala a ku: “A hi tsutsumeni hi ku tiyisela empfhukeni lowu vekiweke emahlweni ka hina, hi languta swinene eka Muyimeri ni Muhetisisi Lonkulu wa ripfumelo ra hina, Yesu. Hikwalaho ka ntsako lowu vekiweke emahlweni ka yena u tiyiselele mhandzi ya nxaniso, a nga vuli nchumu hi tingana, kutani u tshamile evokweni ra xinene ra xiluvelo xa Xikwembu.” (Vaheveru 12:1, 2, NW) Emhakeni ya Yesu, ku veka emiehleketweni “ntsako lowu a vekeriweke emahlweni ka yena,” tihakelo ta le henhla leti n’wi rindzeleke, swi n’wi pfune ku hambeta a famba entiyisweni. “Ntsako [lowu] wu vekiweke emahlweni ka yena” wu tlule swinene swirhalanganya kumbe swihambukisi leswi a a boheka ku langutana na swona.

Ku tsundzuka hakelo swi nga hi pfuna ku tiyisela, hi laha swi endleke Yesu ha kona. (Nhlavutelo 22:12) Hi xikombiso, ehleketa hi mufambi loyi a fambaka hi ndlela ya le ntshaveni leyi karhataka. Wa karhala ni ku hela matimba. Goza rin’wana ni rin’wana i matshalatshala, naswona ndlela yi vonaka yi nga heleli. Kutani u fika ehenhla ka nhlohlorhi kutani le kule a vona doroba leri a kongomeke eka rona. Kan’we-kan’we ku famba ku languteka ku olovanyana. Langutelo leri vonakaka kahle ra laha a yaka kona ri n’wi pfuna ku rivala ku karhala ka yena. Hi ku fanana Mukriste u swi kuma swi olova ku hambeta a famba entiyisweni loko a ku tsundzuka swinene laha a yaka kona.

Tekelela Muapostola Pawulo

Un’wana loyi a tiyiseleke ngopfu leswi a swi ta va swi n’wi hete matimba a a ri muapostola Pawulo. A a fanele ku tlhantlha ku avana ni ku kwetlembetana ka vumunhu exikarhi ka vamakwerhu, kun’we ni ku langutana ni swiphiqo leswo nonon’hwa swa vutomi, nxaniso, maxangu ni swiphiqo swa miri hambi ku ri ku kaneta exikarhi ka mabandlha. (1 Vakorinto 1:10; 2 Vakorinto 10:7-12; 11:21-29; 12:7-10) Hikwalaho ka yini Pawulo a nga helanga mbilu lerova a lan’wa? Wa hlamusela: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) A nga ringetanga ku rhwala mindzhwalo ya yena a ri swakwe. Ku ri na sweswo, Pawulo u langute eka Yehova leswaku a n’wi pfuna.—Psalma 55:22.

Xihlovo xa le henhla xa matimba lexi Pawulo a kombeleke ku va xi n’wi pfuna ku tiyisela xa ha ri kona ni namuntlha. Bibele yi ri: “[Yehova] o nyika l’a kareleke matimba ya yena, o pfuša l’a heleke mbilu. Timbhuri ta karala, ta hela matimba, ni tinhenha ti lav̌a ku wa; kambe la’v̌a ṭhembaka Yehova v̌a engeta v̌a kuma matimba la’mantŝha. V̌a ta haha tani hi magama, v̌a ta ṭuṭuma v̌a nga karali; v̌a ta famba v̌a nga ṭani!” (Esaya 40:29-31) Loko hi languta eka Yehova leswaku a hi nyika matimba hi dyondzo ya munhu hi xiyexe, ku va kona eminhlanganweni, ntirho wa ku chivirika wa Vukriste ni—ngopfu-ngopfu—xikhongelo, hi ta swi kota ku tiyisela miringo ni swirhalanganya leswi swi nga humelelaka nkarhi na nkarhi.—Psalma 1:1-3; Varhoma 10:10; 1 Vatesalonika 5:16, 17; Vaheveru 10:23-25.

Timiliyoni Ti Lunghiselela Ku Hanya eParadeyisini

Sathana i xikwembu xa mafambiselo lawa ya swilo, laha Vakriste va nga valuveri hakunene, vaaki va tiko rin’wana. (2 Vakorinto 4:4) Hikwalaho, a hi fanelanga ku hlamala loko minkarhi yin’wana hi langutana ni swirhalanganya kumbe swihambukisi. Pawulo u tsarile ebukwini ya Vaheveru: “Kwala misaveni, a hi na muti lowu tiyeke, kambe hi lava muti lowu wa ha taka.” (Vaheveru 13:14) Ku tsundzuka leswaku ntshembo wa hina a wu le misaveni leyi ya khale kambe eka leyi yi nga ta ta nakambe swi hi pfuna leswaku hi nga tsani.

Hi tindlela tin’wana, Vakriste va fana ni vahlapfa lava va siyaka tiko ra ka vona hi ku lava vutomi byo antswa kun’wana. Tanihi nawu lowu tolovelekeke, leri i goza ro tika ku ri teka. Swi katsa ku longa kumbe ku hambana ni rifuwo ra yena hinkwaro kutani a siya kaya leri tolovelekeke, kun’we ni vanghana ni maxaka. Nakambe swi katsa ku ya eka tiko leri nga tolovelekangiki, ku hanya exikarhi ka vanhu lava swi nga endlekaka leswaku va nga n’wi amukeli, ni ku dyondza ririmi lerintshwa ni ndlela ya vutomi leyi nga tolovelekangiki. Hambi swi ri tano, vo tala va endla ku rhurha ko tano ntsena hi mintshembo ya ku hluvukisa xiyimo xa vona xa swilo leswi vonakaka eka misava leyi.

Lava va rhurhaka, kavula eka mafambiselo lawa ya khale ya swilo kutani va va xiphemu xa vanhu va Xikwembu va langutana ni mitlhontlho leyi fanaka. Va endla mindzulamiso ya ndhavuko leswaku va hanya hi ku pfumelelana ni mimpimanyeto leyi baseke ya Rito ra Xikwembu, naswona va dyondza ‘ririmi leri tengeke’ ra ntiyiso. (Sofonia 3:9; 1 Vakorinto 6:9-11) Nakambe va tirha hi matimba, ku tirhela Hosi leyikulu ya Mfumo wa Xikwembu, Yesu Kriste. Ku tlula kwalaho, etimhakeni to tala maxaka ya vona ni khale ka vanghana vo hambana va vona, lerova kahle-kahle va boheka ku va siya.

Kambe Vakriste va ni swo tala swinene swo swi kuma ku tlula lava va rhurhaka hi swivangelo swa ikhonomi. Hi xikombiso, va ta eka vanhu lava va va rhandzaka ni ku va khathalela. (Luka 18:29, 30) Xa nkoka ngopfu, va ta eka vuxaka bya le kusuhi na Yehova, Xikwembu xa vuako. Va kuma ku rhula ka miehleketo ni ntshembo mayelana ni vumundzuku loko va languta mahlweni eku hetisekeni ka switshembiso leswi hlamarisaka swa Xikwembu. (Vafilipiya 4:8, 9) Lava va nga ni ku tlangela loku faneleke ka timhaka leti va nge pfumeleli swihambukisi kumbe swirhalanganya swi va tsanisa hi ku helela. A va nga hambukisiwi egondzweni lero khuma leri yisaka evuton’wini.—Matewu 7:13, 14; 1 Yohane 2:15-17.

Khathalela Rihanyo Ra Wena Ra Moya

Loko hi khathalela rihanyo ra hina ra nyama hi minkarhi hinkwayo, hi ni nkarhi lowu antswaka wo sivela mavabyi. Naswona loko hi tshuka hi vabya, hi hlakarhela hi ku hatlisa. Hi ku fanana, loko hi khathalela rihanyu ra hina ra moya, hi hlayisa xivono lexinene xa mikateko leyi hi yi tsakelaka sweswi ni leyi yi hi rindzeleke, na loko hi dyondza ku titshega ematimbeni ya Yehova ku ri na ya hina, hi ta va eka xiyimo lexi antswaka xo tamela swiphiqo leswi. A hi nge swi koti ku papalata swihambukisi kumbe swiyimo leswi hetaka matimba hi ku helela. Kambe loko hi khathalela rihanyo ra hina ra moya kahle ka ha ri mahlweni, swilo swo tano a swi nga hi hluli.

Tsundzuka, Yehova wa tsaka loko vagandzeri va yena va tiyisela. Kutani a hi tsakiseni mbilu ya yena hi ku hambeta hi famba entiyisweni.