Xana Wa Tiyisela?
1 “Ndzi hava xivangelo lexikulu xa ku nkhensa ku tlula swilo leswi, . . . leswaku vana va mina va tama va famba entiyisweni.” (3 Yoh. 4) Ku tiyisela ka vana va Yohane va moya ku n’wi tisele ntsako lowukulu. Swi fanele swi tsakisa Tata wa hina la nge matilweni ku vona timiliyoni ta lava va languteriweke ku va vana vakwe “va tama va famba entiyisweni”!—Swiv. 23:15, 16; 27:11.
2 Hambiloko vunyingi bya vanhu va Xikwembu va phikelela eku hisekeleni ka ntirho wa Vukreste, van’wana va sungule ku hola hakatsongo-tsongo. Hambileswi kumbexana a va ri ni nkhinkhi loko va sungula ku dyondza ntiyiso, loko malembe ma ri karhi ma famba, va enerisiwe hi ku hlanganyela katsongo entirhweni wa ku endla vadyondzisiwa.
3 Swa twisiseka leswaku ku nga ha hiseki ka van’wana ku vangiwa hi vuvabyi ni ku dyuhala. Hambiswiritano, va fanele ku bumabumeriwa hikwalaho ka ku tiyisela ka vona. Va endla leswi va nga swi kotaka. Kambe un’wana ni un’wana la nyiketeleke vutomi byakwe eka Xikwembu u fanele ku tivutisa: ‘Xana ndzi pfumelele swilo leswi laviwaka hi mina swi va swona swo rhanga evuton’wini bya mina, kutani swilaveko swa Mfumo swi nga ha vi swa nkoka? Xana se ndza ‘kufumela’ kumbe ndza ha tikarhata hi “matimba”?’ (Nhlav. 3:15, 16; Luka 13:24) Onge hinkwerhu hi nga swi anakanyisisa hi xikhongelo leswi hi swi endlaka kutani hi antswisa laha swi lavekaka, hi ri karhi hi tsundzuka leswaku Yehovha u tshembisa ku nyika “ku vangama ni ku xiximeka ni ku rhula eka un’wana ni un’wana loyi a endlaka leswi nga swinene.”—Rhom. 2:10.
4 Ndlela Ya Ku Tiyisela: I yini lexi pfuneke Yesu leswaku a tiyisela? Pawulo u te: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.” (Hev. 12:1-3) Ntsako lowu a wu vekiwe emahlweni ka Yesu a wu ri wa nkoka swinene ku tlula miringo ya nkarhinyana leyi a a fanele a langutana na yona. Ku anakanya hi ntsako lowu vekiweke emahlweni ka hina swi nga hi pfuna na hina leswaku hi tiyisela. (Nhlav. 21:4, 7; 22:12) Loko hi langutela eka Yehovha leswaku a hi nyika matimba hi dyondzo ya munhu hi xiyexe, hi ku va kona eminhlanganweni minkarhi hinkwayo ni ku khongela hi ku phikelela, hi ta kota ku tiyisela entirhweni lowu a hi nyikeke wona leswaku hi wu endla.
5 Yehovha wa tsaka loko vanhu vakwe vo tshembeka va tiyisela. Hikokwalaho a hi n’wi tsakiseni hilaha ku engetelekeke hi ku hambeta hi “famba entiyisweni.”