“Yanani Emahlweni Mi Tikamba, Ku Vona Loko ma Ha Ri Eku Pfumeleni”
Tinhla Leti Humaka Eka Vakorinto Va Vumbirhi
MUAPOSTOLA Pawulo a a khumbeka hi Vakriste va le Korinto. Xana a va ta yi languta hi ndlela yihi ndzayo leyi nyikeriweke epapileni ra yena ro sungula leri yaka eka vona? A a ri eMakedoniya loko Tito a fika ni xiviko lexi tsakisaka xa leswaku papila ri vavise Vakorinto lerova va ya eku hundzukeni. Vona ndlela leyi sweswo swi tsakiseke Pawulo ha yona!—2 Vakorinto 7:8-13.
Pawulo u tsale Vakorinto va Vumbirhi a ri eMakedoniya, kumbexana endzhaku ka le xikarhi ka lembe hi 55 C.E. Epapileni leri u hlamusele magoza lama tekiweke ku hlayisa bandlha ri basile, ku aka ku navela ku nyikela vapfumeri lava pfumalaka eYudiya ni ku sirhelela vuapostola bya yena. Swo tala swa leswi Pawulo a swi vuleke swi nga hi pfuna ku ‘ya emahlweni hi tikamba loko ha ha ri eku pfumeleni.’ (13:5) Kutani, i yini leswi hi nga swi kumaka eka papila leri?
Tirhela Xikwembu Lexi Chavelelaka
Muapostola u kombise leswaku tanihi leswi Xikwembu xi hi chavelelaka eka nhlomulo wa hina hinkwawo, hi fanele ku chavelela van’wana ni ku va khongelela. (1:1–2:11) Hambi leswi Pawulo ni vanghana va yena a va ri ehansi ka ntshikilelo lowukulu, Xikwembu xi va kutsurile. Hambi swi ri tano, Vakorinto a va ta pfuna hi swikhongelo hikwalaho ka vona, tanihi leswi hi faneleke ku khongelela van’wana lava va amukelaka ripfumelo ra ntiyiso. Kambe ku vuriwa yini hi wanuna wa muoswi loyi ku vulavuriweke ha yena eka 1 Vakorinto ndzima 5? Entiyisweni u susiwe eku hlanganyeleni kambe u hundzukile. Vona ndlela leyi a faneleke a chaveleleke ha yona loko Vakorinto va n’wi rivalerile ni ku n’wi vuyisa hi rirhandzu exikarhi ka vona.
Marito ya Pawulo ma nga engetela ku tlangela ka hina ka ntirho wa Vukriste, ma tiyisa ku yimela ka hina ripfumelo ra ntiyiso. (2:12–6:10) Phela, malandza ya ntwanano lowuntshwa ma na lunghelo ra ku va eka “nxaxamelo lowu hlulaka” lowu rhangeriwaka hi Xikwembu! Pawulo ni vatirhi-kulobye va ve ni vutirheli lebyi xiximekaka hikwalaho ka musa lowu va wu kombisiweke. Ku fana na vona, vatotiwa va namuntlha va ni vutirheli bya ku vuyelelana. Hambi swi ri tano, Timbhoni ta Yehova hinkwato ti endla van’wana va fuwa hi vutirheli bya tona.
Hetisisa Ku Kwetsima Kutani U Va Ni Ku Hanana
Pawulo wa hi kombisa leswaku malandza ya Vukriste ma fanele ku hetisisa ku kwetsima eku chaveni Yehova. (6:11–7:16) Loko hi ta yima hi tiyile eku pfumeleni, hi fanele ku papalata ku tihlanganisa ni lava va nga pfumeriki, naswona hi fanele ku basisiwa eku nyamisiweni ka nyama ni ka moya. Vakorinto a va endla xiendlo xa ku basisa hi ku susa mudyohi wa mahanyelo yo biha eku hlanganyeleni, naswona Pawulo u tsakile leswi papila ra yena ro sungula ri va vaviseke lerova va hundzuka leswaku va ponisiwa.
Nakambe hi dyondza leswaku malandza lama chavaka Xikwembu ma hakeriwa hi kwalaho ka ku hanana ka wona. (8:1–9:15) Mayelana ni minyikelo ya ‘vakwetsimi’ lava pfumalaka, Pawulo u kombise xikombiso lexinene xa Vamakedoniya. A va hanana ku tlula vuswikoti bya vona, naswona a a tshemba ku vona muxaka lowu fanaka wa ku hanana eka Vakorinto. Ku nyika ka vona—ni ka hina—ku fanele ku huma embilwini, hikuva “Xikwembu xi rhandza loyi a nyikaka a tsakile” naswona xi fuwisa vanhu va xona hi ku hanana ka tinxaka hinkwato.
Pawulo—Muapostola Loyi A Khathalelaka
Loko hi hetisisa xin’wana ni xin’wana entirhweni wa Yehova tanihi malandza a hi tinyungubyiseni hi yena, hayi hi hina. (10:1–12:13) Phela, hi nga sivela mianakanyo leyi hoxeke hi matlhari ya moya ‘lama tiyisiweke hi Xikwembu.’ “Vaapostola lavakulu” lava tinyungubyisaka exikarhi ka Vakorinto a va nga ta faneleka eka rhekhodo ya Pawulo ya ku tiyisela tanihi nandza wa Kriste. Hambi swi ri tano, leswaku a nga tlakusiwi ngopfu, Xikwembu a xi susanga “ripatsu [ra yena] enyameni”—kumbe mahlo lama nga voniki kahle kumbe vaapostola volavo va mavunwa. Ematshan’wini ya sweswo Pawulo a a ta tinyungubyisa hi ku tsana ka yena leswaku “matimba ya Kriste” ma ta va ehenhla ka yena ku fana na tende. Tanihi munhu loyi a khomeleleke swi tiya eku pfumeleni, a nga tikombisanga a ri ehansi eka vaapostola lavakulu. Vakorinto va vone swikombiso swa vuapostola leswi Pawulo a swi kombiseke exikarhi ka vona hi ku “[lehisa] mbilu swinene, ni ku endla mahlori, ni swihlamariso, ni mintirho ya matimba.”
Tanihi nandza ni muapostola, Pawulo a a ri ni ku tsakela ka moya ka vapfumeri-kulobye embilwini, hi laha hi fanelaka ku endla ha kona. (12:14–13:14) A a ‘tinyiketa ku lahlekeriwa hi laha ku heleleke hi ku tsaka hikwalaho ka mimoya-xiviri ya vona.’ Kambe Pawulo u chave leswaku loko a fika eKorinto, a a ta kuma van’wana lava va nga hundzukangiki eka mintirho ya nyama. Hikwalaho, u tsundzuxe hinkwavo ku ya emahlweni va tikamba ku vona loko va ha ri eku pfumeleni naswona u khongelele leswaku va “nga endli xo biha ni xin’we.” Eku heteleleni, u va khutaze ku tsaka, va amukela ku tsundzuxiwa, ni ku chaveleriwa va va ni ku anakanya kun’we, ni ku hanya hi ku rhula. Mawaku ndzayo leyinene swonghasi ni le ka hina!
Yana eMahlweni U Tikambela!
Papila ra vumbirhi ra Pawulo leri yaka eka Vakriste va le Korinto xisweswo ri ringanyeta tindlela to hambana-hambana ta ku ya emahlweni hi tikamba ku vona loko ha ha ri eku pfumeleni. Marito ya yena hakunene ma fanele ma hi susumetela ku chavelela van’wana, tanihi leswi Xikwembu xi hi chavelelaka enhlomulweni hinkwawo wa hina. Leswi muapostola a swi vuleke mayelana ni vutirheli bya Vukriste swi fanele swi hi susumetela ku byi hetisisa hi ku tshembeka loko hi hetisisa ku kwetsima eku chaveni Yehova.
Ku tirhisa ndzayo ya Pawulo swi nga hi endla kahle leswaku hi va ni ku hanana ngopfu ni ku va lava pfunaka. Hambi swi ri tano, marito ya yena ma fanele ma hi susumetela ku tinyungubyisa hi Yehova hayi hi hina vini. Ma fanele ku kurisa nkhathalelo wa hina wa rirhandzu eka vapfumeri-kulobye. Naswona hakunene leti ni tinhla tin’wana eka Vakorinto wa Vumbirhi swi nga hi pfuna ku ‘ya emahlweni hi tikamba ku vona loko ha ha ri eku pfumeleni.’
[Bokisi/Xifaniso lexi nga eka tluka 26]
KOMBISA KU DZUNEKA KA YEHOVA: Loko Muxe a rhelele a suka eNtshaveni ya Sinayi a ri ni maribye ya Vumbhoni, mombo wa yena a wu humesa miseve hikwalaho ka leswi Xikwembu xi vulavuleke na yena. (Eksoda 34:29, 30) Pawulo u vule leswi kutani a ku: “Hina hinkwerhu lava kombaka ku vangama ka Hosi ku fana ni xivoni, hi mimombo leyi fununguriweke, hi hundzukile lava fanaka na yena, hi ku vangama loku ngangamukaka ku ya emahlweni. Hosi yi endlile sweswo, yona yi nga Moya.” (2 Vakorinto 3:7-18) Swivoni swa khale swa voko a swi endliwa hi ntsompfu wo tanihi nsimbi kumbe koporo kutani a swi pholixiwa ngopfu leswaku swi va ni ku vangama lokunene ehenhla ka swona. Ku fana ni swivoni, vatotiwa va kombisa ku dzuneka ka Xikwembu loku vangamaka eka vona ku huma eka Yesu Kriste, swi ya emahlweni ‘swi va hundzuluxela exifanisweni’ lexi cinciweke hi N’wana la kombisaka ku dzuneka wa Yehova. (2 Vakorinto 4:6; Vaefesa 5:1) Hikwalaho ka moya lowo kwetsima ni Matsalwa, Xikwembu xi vumba eka vona “munhu lontshwa,” xikombiso xa timfanelo ta xona n’wini. (Vaefesa 4:24; Vakolosa 3:10) Hambi loko ntshembo wa hina wu ri wa le tilweni kumbe wa la misaveni, a hi kombiseni vumunhu byebyo kutani hi tlangela lunghelo ra ku kombisa ku dzuneka ka Xikwembu evutirhelini bya hina.
[Bokisi/Xifaniso lexi nga eka tluka 27]
‘MATLHARI YA VULULAMI’: Ndlela yin’wana leyi Pawulo ni vanghana va yena va tibumabumeleke ha yona tanihi malandza ya Xikwembu a ku ri “hi matlhari ya ku lulama, la’ma tameriwaka hi v̌oko ra šinene ni ra šimaṭi.” (2 Vakorinto 6:3-7, BX) Voko ra xinene a ri tirhisiwa ku khoma tlhari, kutani ra ximatsi ri khoma xitlhangu. Hambi leswi a va hlaseriwa hi matlhelo hinkwawo, Pawulo ni vatirhi-kulobye a va hlomele ku lwa nyimpi ya moya. A yi lwiwa ni vadyondzisi va mavunwa ni “vaapostola lavakulu” leswaku bandlha ra le Korinto ri nga hambukisiwi eku tinyiketeleni eka Kriste. Pawulo a nga pfuniwanga hi matlhari ya nyama leyi dyohaka—ya vukanganyisi, ya mano kumbe ya vuxisi. (2 Vakorinto 10:8-10; 11:3, 12-14; 12:11, 16) Ku ri na sweswo, “matlhari” lama tirhisiweke a ma ri tindlela to lulama, to yisa nsusumeto wa vugandzeri bya ntiyiso emahlweni leswaku ku lwisaniwa ni minhlaselo hinkwayo. Timbhoni ta Yehova sweswi ti tirhisa ‘matlhari yo tano ya vululami’ hi xikongomelo lexi fanaka.