Ku Humelele Yini Eka Mukhuva Wa Munhu?

“Ha yini vana va khomiwa hi tihanyi eka nguva leyi? Ha yini swiharhi swi khomiwa hi tihanyi? Ha yini ku ri ni vukari? . . . Ha yini vanhu va nghenela vutherorisi? Ha yini vanhu va tirhisa swidzidzirisi? . . . Ha yini, loko mi ri na xin’wana ni xin’wana, vanhu van’wana va hundzukela eka swilo leswi swi tsanisaka nhluvuko hinkwawo?”

SWIVUTISO sweswo swi vutisiwe hi rito leri tlakukeke hi holobye-nkulu wa Britain. Kumbexana u tivutise swivutiso leswi fanaka minkarhi yo tala. Xana u kume tinhlamulo to karhi leti anerisaka?

Loko a veka swivutiso swa yena erivaleni, holobye-nkulu u te: “Hi malembe yo tala loko ndza ha ri ntsongo naswona ndzi ri eka tipolitiki hi mintshembo ni milorho ni ku navela ka mina hinkwako, eka mina ni le ka tintangha ta mina to tala swi tikombe onge loko ho fikelela malembe lawa hi nga ta va ni makaya lamanene, dyondzo leyinene, xiyimo xa vutomi lexi tsakisaka, kutani xin’wana ni xin’wana a xi ta va xi tshamisekile naswona a hi ta va ni vumundzuku lebyinene ni lebyo olova swinene. Sweswi ha swi tiva leswaku sweswo a swi tano. Hi kongomane ni swiphiqo swa xiviri swa mukhuva wa munhu.”—Xiitaliki i xerhu.

Mukhuva wa munhu wu nga hlamuseriwa tanihi “endlelo ra tindlela ni mintolovelo ya xisekelo ya vanhu.” Entiyisweni, tindlela ni mintolovelo leswi lwisanaka swi nga vanga swiphiqo eka mpimo wa munhu, wa tiko, kumbe hambi ku ri wa matiko hinkwawo. Kambe mukhuva wa munhu wu fanele ku soriwa ku fikela kwihi hakunene, hikwalaho ka mimboyamelo ya namuntlha leyi nga ni khombo ya vukari, vutherorisi, ku xavisiwa ka swidzidzirisi ni swo fana ni sweswo ke?

Xana ku fanele ku soriwa mukhuva wa munhu ntsena hikwalaho ka swiyimo leswi xungetaka ku “[tsanisa] nhluvuko hinkwawo”? Kumbe xana ti kona timhaka tin’wana leti hi faneleke ku ti languta ku hlamusela leswaku ha yini vanhu va nghenela mikhuva leyi sorisaka, ya vutianakanyi hi ku olova swonghasi, kasi va nga fikelela swiyimo swa le henhla, leswi xiximekaka? A hi voneni.