Xiphemu Xa Valawuri Lava Tlakukeke

“I nandza wa Xikwembu ku ku pfuna. Kambe loko u endla leswo biha, u fanele ku chava.”—VARHOMA 13:4.

1, 2. Xana vo tala eVujaganini va katsekise ku yini eka mindzhundzunuko?

MALEMBE mambirhi lama hundzeke ntsombano wa vabixopo eLondon wu tlhontlhe muhleri la kariheke eka New York Post. Ntsombano lowu a wu ri Nhlengeletano ya Lambeth, leyi a yi ri na vabixopo lava tlulaka 500 va kereke ya Anglican. Vukari lebyi byi vangiwe hi xiboho lexi amukeriweke hi nhlengeletano xi kandziyisa ku twisisa vanhu “lava, endzhaku ka ku tirhisa tindlela hinkwato, va hlawuleke ndlela yo hloma va lwa tanihi ndlela yi ri yoxe yo tisa vululami.”

² Kahle-kahle, Post yi vule leswaku lexi a xi ri xiendlo xa vutherorisi. Hambi swi ri tano, vabixopo a va landzela mboyamelo lowu kulaka ntsena. Vonelo ra vona a ri hambananga ni ra vaprista va Makhatoliki va le Ghana lava bumabumeleke nyimpi ya vaaki tanihi leyi hatlisaka, leyi tiyeke ni ndlela yo hlayiseka ya ku ntshunxa Afrika; kumbe ya bixopo wa Methodist wa Afrika loyi a hlambanyeke ku byarha “nyimpi ya ntsunxeko yi ko yi hela”; kumbe ndlela ya varhumiwa lavo tala va Vujagana lava lweke ni vaxandzukeli va tihulumendhe leti simekiweke eAsia ni le Amerika Dzonga.

Vakriste Va Ntiyiso A Va ‘Lwisani Na Byona Vuhosi’

3, 4. (a) Hi yihi misinya ya milawu leyi tluriwaka hi lava vuriwaka Vakriste lava kondletelaka ndzhundzunuko? (b) Xana munhu un’wana u kume yini eka Timbhoni ta Yehova?

³ Hi lembe xidzana ro sungula, Yesu u vule leswi hi valandzeri vakwe. “A hi va misava, tanihi leswi na mina ndzi nga riki wa misava.” (Yohane 17:14) Wihi na wihi la vuriwaka Mukriste, loyi a seketelaka ndzhundzunuko i xiphemu xa misava hi ku helela. A hi mulandzeri wa Yesu; naswona a nga “tiveki ehansi ka tihosi.” (Varhoma 13:1) U ta endla kahle leswaku a yingisa xitsundzuxo xa muapostola Pawulo xa leswaku “loyi a solaka vuhosi, ú sola ku lerisa ka Xikwembu, kutani lava solaka, va tivangela ku avanyisiwa.”—Varhoma 13:2.

⁴ Ku hambana ni lavo tala eVujaganini, Timbhoni ta Yehova a ti byi ngheneli vukarhi byo hloma. Wanuna le Yuropa u swi vonile leswi. Wa tsala: “Loko ndzi vone leswi vukhongeri ni tipolitiki ti swi endleke, ndzi tinyiketele ku onha nawu wa vanhu lowu simekiweke. Ndzi nghenele ntlawa wa matherorisi kutani ndzi leteriwa ku tirhisa tinxaka hinkwato ta matlhari; ndzi hlanganyele eku phangeni loko tala ko hloma. Vutomi bya mina a byi ri ekhombyeni hi mikarhi hinkwayo. Hi ku famba ka nkarhi, swi ve erivaleni leswaku a hi tirhela donki yo fa. A ndzi ri wanuna loyi a karhatekeke, ni la pfumalaka ntshembo hi laha ku heleleke evuton’wini. Kutani Mbhoni yi gongondza enyangweni wa hina. Yi ndzi byela hi Mfumo wa Xikwembu. Ku sindzisa leswi a ku ri ku dya nkarhi, ndzi ringanyete leswaku nkatanga a yingisela. U yingiserile, naswona dyondzo ya Bibele ya le kaya yi sunguriwile. Eku heteleleni, ndzi pfumerile ku va kona eka dyondzo leyi. Marito ma tsandzeka ku hlamusela ntshunxeko lowu ndzi veke na wona loko ndzi twisise matimba lama susumetelaka vanhu evubihini. Xitshembiso lexi hlamarisaka xa Mfumo xi ndzi nyike ntshembo lowu tiyisaka ni xikongomelo evuton’wini.”

5. Ha yini Vakriste va titsongahata hi ku rhula eka valawuri lava tlakukeke, naswona leswi swi ta va tano ku fikela rini?

⁵ Vakriste i varhumiwa kumbe vayimeri va Xikwembu na Kriste. (Esaya 61:1, 2; 2 Vakorinto 5:20; Vaefesa 6:19, 20) Hikokwalaho, va tshama va nga ri na tlhelo eka madzolonga ya misava leyi. Hambi leswi mafambiselo man’wana ya politiki ma vonakaka ma humelela swinene hi ikhonomi ku tlula man’wana, naswona man’wana ma pfumelelaka ntshunxeko lowu engetelekeke ku tlula man’wana, Vakriste a va seketeli kumbe ku tlakusa fambiselo rin’wana ehenhla ka rin’wana. Va swi tiva leswaku mafambiselo hinkwawo a ma hetisekanga. I ku “lerisa ka Xikwembu” leswaku ma tama ma ha ri kona ku kondza Mfumo wa xona wu sungula ku fuma. (Daniel 2:44) Hikwalaho, Vakriste va tshama va ri lava titsongahataka hi ku rhula eka valawuri lava tlakukeke va ri karhi va kondletela vuhlayiseki lebyi nga heriki bya van’wana hi ku chumayela mahungu lamanene ya Mfumo.—Matewu 24:14; 1 Petro 3:11, 12.

Ku Yingisa Nawu

6. Ha yini milawu yo tala ya vanhu yi ri leyinene hambi leswi “misava hinkwayo yi [nga] le hansi ka matimba ya Lowo biha”?

⁶ Tihulumendhe ta misava ti veka mafambiselo ya milawu, naswona yo tala ya milawu leyi hi leyinene. Xana leswi swi fanele swi hi hlamarisa, hi mhaka ya leswi ‘misava hinkwayo yi nga hansi ka matimba ya Lowo biha’? (1 Yohane 5:19) Doo. Yehova u nyike Adamu tata wa hina wo sungula, ripfalo, naswona vuswikoti lebyi bya ntumbuluko bya ku tiva leswinene ni leswo biha, byi kombisiwa hi tindlela to tala emilawini ya vanhu. (Varhoma 2:13-16 ) Hammurabi, khale ka munyiki wa nawu eBabilona, u vike mfungho wa nawu wakwe hi mukhuva lowu, a ku: “Enkarhini wolowo, mina Hammurabi, hosana yo chava Xikwembu leyi tinyiketeleke [va] ndzi hlawurile leswaku ndzi kondletela vuhlayiseki bya vanhu, ni ku tisa vululami etikweni, ni ku herisa vuhomboloki ni vubihi, leswaku lava matimba swinene va nga tshikeleri lavo pfumala ntamu.”

7. Loko un’wana a tlula nawu, i mani loyi a nga ni mfanelo yo n’wi xupula, naswona ha yini?

⁷ Tihulumendhe to tala ti ta vula leswaku xikongomelo xa milawu ya tona hi lexi fanaka: ku kondletela vuhlayiseki bya vaaki ni ku rhula exikarhi ka vanhu. Hikwalaho, va rihisa swiendlo leswi nga lavekiki, tanihi ku dlaya ni vukhamba, kutani va veka swinawana, tanihi swihika-rivilo ni milawu yo paka. Vahi ni vahi lava tlulaka nawu hi vomu, va kanetana ni valawuri “va tivangela ku avanyisiwa.” Ku avanyisa loku humaka ka mani ke? Ku nga ri loku humaka eka Xikwembu. Rito ra Xigriki leri laha ri hundzuluxiweke va ku ku avanyisa, ri nga ha kombetela eka mafambiselo ya mfumo ematshan’wini ya ku avanyisa ka Yehova. (Ringanisa 1 Vakorinto 6:7.) Loko wihi na wihi a endla leswi nga riki nawini, valawuri lava tlakukeke va ni mfanelo ya ku n’wi xupula.

8. Bandlha ri ta hlamula njhani loko xirho xi endle nandzu lowukulu?

⁸ Timbhoni ta Yehova ti ni ndhuma leyinene hikwalaho ka ku nga kanetani ni valawuri va vanhu. Loko swi endleka leswaku munhu ebandlheni a tlula nawu, bandlha a ri nge n’wi pfuni leswaku a balekela nxupulo lowu faneleke. Loko wihi na wihi a yiva, a dlaya, a sandza ni ku kanganyisa eka xibalo xakwe, a pfinya ni ku tirhisa vuxisi ni swidzidzirisi leswi nga riki nawini, kumbe a lwisana ni nawu wa valawuri hi ndlela yihi na yihi, u ta kuma ndzayo yo tika yo huma ebandlheni—naswona a nga fanelanga a titwa a ri la xanisiwaka loko a xupuriwa hi valawuri va tiko.—1 Vakorinto 5:12, 13; 1 Petro 2:13-17, 20.

Nchumu Wa Ku Wu Chava

9. I nsirhelelo wihi lowu fanelaka lowu Vakriste va nga na wona loko va xungetiwa hi vanhu lavo homboloka?

⁹ Pawulo u yisa nhlamuselo ya yena hi valawuri lava tlakukeke emahlweni, a ku: “Tihosi i valala ku nga ri eka lava endlaka leswinene, kambe eka lava endlaka leswo biha. Xana u lava ku hanya u nga chavi emahlweni ka hosi xana? [Hambeta u] endla leswinene, yi ta ku khensa.” (Varhoma 13:3) A hi Vakriste vo tshembeka lava fanelaka ku chava ku xupuriwa hi vuhosi, kambe i vaendli va vuhomboloki, lava ‘endlaka leswo biha,’ vugevenga. Loko ti xungetiwa hi vanhu vo tano lava hombolokeke, Timbhoni ta Yehova hi laha ku faneleke ti nga ha amukela nsirhelelo wa maphorisa kumbe wa mavuthu ya mfumo.—Mintirho 23:12-22.

10. Xana Timbhoni ta Yehova ti ‘vongiwe’ njhani hi vulawuri?

¹⁰ Eka Mukriste la hlayisaka nawu wa vulawuri lebyi tlakukeke, Pawulo u ri: “U ta vongiwa hikwalaho ka swona.” (NW) Tanihi xikombiso xa leswi, anakanya hi mapapila lama amukeriweke hi Timbhoni ta Yehova le Brazil endzhaku ka mintsombano ya vona ya muganga. Leri humaka eka khanselara wa ndzawulo ya mintlango ya ka masipala: “Ku dzuneka lokukulu ku lulamela hi ku tikhoma ka n’wina ko rhula. Swa tiyisa emisaveni leyi karhatekeke ya namuntlha ku tiva leswaku lavo tala swonghasi va ha tshemba ni ku gandzela Xikwembu.” Ro huma eka mufambisi wa rivala ra mintlango ra ka masipala: “Ku nga khathariseki nhlayo leyikulu ya lava a va ri kona, a ku na mhangu leyi rhekhodiweke leyi onheke xiendlekalo lexi, hikwalaho ka ku pfuniwa hi nhlengeletano leyi hlelekeke.” Leri taka hi le hofisini ya meyara ri ri: “Hi lava ku tirhisa nkarhi lowu leswaku hi mi nkhensa hi ku hleleka ka n’wina loku hlamarisaka, ka ku tirhandzela, naswona hi mi navelela mikateko eka swiendlakalo swa nkarhi lowu taka.”

11. Hikwalaho ka yini ku chumayeriwa ka mahungu lamanene ku nga ta ka ku nga vuriwi leswaku i ntirho wo biha?

¹¹ Rito “leswinene” ri kombetela eka mintirho ya ku yingisa milawu ya valawuri lava tlakukeke. Ku tlula kwalaho, ntirho wa hina wa ku chumayela, lowu lerisiweke hi Xikwembu ku nga ri munhu, a hi ntirho wo biha—yinhla leyi valawuri va tipolitiki va fanelaka ku yi xiya. I mpfuno wa vanhu lowu antswisaka mahanyelo eka lava yingisaka. Hikwalaho, i ntshembo wa hina leswaku valawuri lava tlakukeke va ta hlayisa mfanelo ya hina yo chumayela eka van’wana. Pawulo u kombele eka valawuri leswaku a ta simeka ku chumayela mahungu lamanene hi nawu. (Mintirho 16:35-40; 25:8-12; Vafilipiya 1:7) Sweswinyana, le Jarimani-vuxa, Hungary, Poland, Romania, Benin ni le Myanmar (Burma) Timbhoni ta Yehova hi ku fanana, ti lave ni ku kuma ku xiyiwa ka le nawini ka ntirho wa tona.

“I Nandza Wa Xikwembu”

12-14. Xana valawuri lava tlakukeke va tirhise ku yini tanihi nandza wa Xikwembu (a) emikarhini ya Bibele? (b) emikarhini ya manguva lawa?

¹² Loko a vulavula hi mulawuri wa tiko, Pawulo u ya mahlweni a ku: “I nandza wa Xikwembu ku ku pfuna. Kambe loko u endla leswo biha, u fanele ku chava, hikuva hosi a yi lo halahala ku tamela banga; yi rhumiwile hi Xikwembu ku va murihiseti la baka mudyohi.”—Varhoma 13:4.

¹³ Minkarhi yin’wana valawuri va tiko va tirhe tanihi nandza wa Xikwembu hi tindlela leti kongomeke. Korexi u endle tano loko a byela Vayuda ku huma eBabilona ni ku tlhela va aka yindlu ya Xikwembu. (Ezra 1:1-4; Esaya 44:28) Ataserkisi a a ri nandza wa Xikwembu loko a rhuma Ezra ni nhlengo wa ku pfuxeta yindlu yoleyo ni le ndzhaku loko a rhumela Nehemiya ku ya pfuxeta marhangu ya Yerusalema. (Ezra 7:11-26; 8:25-30; Nehemia 2:1-8) Valawuri lava tlakukeke va Varhoma va hetisise sweswo loko va ntshunxa Pawulo entshungwini wa vahlaseri le Yerusalema, ni ku n’wi sirhelela hi nkarhi wa ku tshoveka ka byatso, ni ku n’wi lulamisela leswaku a va ni yindlu yakwe eRhoma.—Mintirho 21:31, 32; 28:7-10, 30, 31.

¹⁴ Hi ku fanana, valawuri va kwalaho va tirhe ku fana ni nandza wa Xikwembu emikarhini ya manguva lawa. Hi xikombiso, hi 1959, Huvo ya le Henhla ya Canada yi vule leswaku, un’wana wa Timbhoni ta Yehova loyi a hehliweke eQuebec hi ku hangalasa vuxisi ni tibuku to hehla, a a nga ri na nandzu—xisweswo yi lwisana ni rivengo ni ra holobyenkulu wa Quebec wa nkarhi wolowo, Maurice Duplessis.

15. Xana valawuri va tirha tanihi nandza wa Xikwembu hi ndlela yihi leyi tolovelekeke, naswona i mfanelo yihi leyi leswi swi va nyikaka yona?

¹⁵ Nakambe, hi ndlela leyi tolovelekeke, tihulumendhe ta misava ti tirha tanihi malandza ya Xikwembu, hi ku hlayisa ku hleleka ka tiko ku kondza Mfumo wa Xikwembu wu teka vutihlamuleri byebyo. Hi ku ya hi Pawulo, ku ta fikela namuntlha vuhosi byi “tamela banga” ku kombisa mfanelo ya byona yo xupula. Hakanyingi, leswi swi khumba ku boha kumbe ndziho. Ematikweni man’wana swi nga ha katsa xigwevo xa rifu.a Hi hala tlhelo, matiko yo tala ma hlawule ku nga vi na xona xigwevo xa rifu, naswona sweswo swi le ka wona.

16. (a) Tanihi leswi mulawuri a nga nandza wa Xikwembu, hi swihi leswi van’wana va malandza ya Xikwembu va nga swi vona swi ri swinene ku swi endla? (b) I muxaka wihi wa ntirho lowu Mukriste a nga taka a nga wu amukeri, naswona hikwalaho ka yini?

¹⁶ Mhaka ya leswaku valawuri lava tlakukeke i nandza wa Xikwembu, yi hlamusela mhaka leyi ha yona Daniyele, ni Vaheveru vanharhu, Nehemiya na Mordekayi va koteke ku amukela swiyimo swa vutihlamuleri eka tihulumendhe ta Babilona na Peresiya. Xisweswo a va ta kombela eka vulawuri bya Mfumo ku pfuna vanhu va Xikwembu. (Nehemia 1:11; Ester 10:3; Daniel 2:48, 49; 6:1, 2) Namuntlha Vakriste van’wana va tirha entirhweni wa tihulumendhe. Kambe leswi va hambaneke ni misava, a va ngheneli mavandla ya tipolitiki, va lava swikhundlha swa tipolitiki, kumbe ku amukela swikhundla swa ku vumba milawu ya hulumendhe etinhlengeletanweni ta tipolitiki.

Xilaveko Xa Ripfumelo

17. I swiyimo swihi leswi nga ha tlhontlhaka van’wana va lava nga riki Vakriste leswaku va lwa ni vuhosi?

¹⁷ Kambe ke, ku vuriwa yini loko vuhosi byi pfumelela vuhomboloki kumbe hambi ku ri ntshikilelo? Xana Vakriste va fanele ku ringeta ku siva vuhosi hi byin’wana lebyi vonakaka byi antswa? Phela, ku homboloka ni vubihi bya hulumendhe a hi swintshwa. Hi lembe xidzana ro sungula, Mufumi wa Rhoma u amukele vuhomboloki byo tanihi vuhlonga. Nakambe u pfumelele vatirhela-mfumo lavo homboloka. Bibele yi vulavula hi valuvisi lava a va dyelela, muavanyisi la nga lulamangiki, ni mufumi wa xifundzhankulu loyi a a rindzela swisiva-nomu.—Luka 3:12, 13; 18:2-5; Mintirho 24:26, 27.

18, 19. (a) Xana Vakriste va endlisa ku yini loko ku ri na vuhomboloki eka vatirhi va le ka hulumendhe? (b) Vakriste va byi hluvukise njhani vutomi bya vanhu, hi laha swi kombisiweke ha kona hi n’wamatimu eka bokisi leri nga laha hansi?

¹⁸ Vakriste a va ta va va ringete ku herisa vubihi byo tano khale koloko, kambe a va swi endlanga. Hi xikombiso, Pawulo a nga chumayelanga hi ku hela ka vuhlonga, naswona Vakriste lava nga ni mahlonga a va nga va byelanga leswaku va ntshunxa mahlonga ya vona. Ku ri na sweswo, u lerise mahlonga ni vini va wona leswaku va kombisa nsovo loko va tirhisana. (1 Vakorinto 7:20-24; Vaefesa 6:1-9; Filemoni 10-16; nakambe vona 1 Petro 2:18) Hi ku fanana, Vakriste a va nga katseki eka mindzhundzunuko. A va gingiriteka swinene eku chumayeleni ka “mahungu lamanene ya ku rhula.” (Mintirho 10:36) Hi 66 C.E., vuthu ra Rhoma ri rhendzele Yerusalema kutani ri ntlhentlha. Ematshan’wini ya ku tshama ni vasirheleri va muti lava xandzukeke, Vakriste va Vaheveru ‘va tsutsumele etintshaveni’ hi ku yingisa vukongomisi bya Yesu.—Luka 21:20, 21.

¹⁹ Vakriste vo sungula va hanye ni swilo hi mukhuva lowu a swi ri ha wona kutani va ringeta ku antswisa vutomi bya vanhu hi ku va pfuna leswaku va landzela misinya ya milawu ya Bibele. N’wamatimu John Lord, ebukwini yakwe leyi nge The Old Roman World, u tsarile: “Ku hlula ka ntiyiso ka Vukriste a ku voniwa eku endleni ka vanhu lava amukelaka dyondzo ya vona va va lavanene, ematshan’wini ya ku cinca mavandla lama dumeke, kumbe hulumendhe, kumbe milawu.” Xana namuntlha Vakriste va fanele ku endla leswi hambaneke?

Loko Mfumo Wu Nga Ta Pfuna

20, 21. (a) Xana mulawuri un’wana wa tiko u tsandzeke njhani ku tirha tanihi nandza wa Xikwembu wa leswinene? (b) Xana Timbhoni ta Yehova ti fanele ku endla yini loko ti xanisiwa hi nhlohlotelo wa Mfumo?

²⁰ Hi September 1972, nxaniso wa vukari wu sungule ehenhleni ka Timbhoni ta Yehova etikweni leri nge Afrika xikarhi. Magidi a ma phangeriwa nhundzu ya wona hinkwayo naswona ma khomiwa hi tihanyi tin’wana leti katsaka ku hima, ku xanisa ni ku dlaya. Xana vulawuri lebyi tlakukeke byi wu hetisisile ndzhwalo wa byona wo sirhelela Timbhoni? E-e! Ematshan’wini ya sweswo, byi khutaze vukari, leswi vangeleke Vakriste lava vo rhula leswaku va balekela eka matiko-akelana leswaku va ta hlayiseka.

²¹ Xana Timbhoni ta Yehova a ti fanelanga ku karihela vaxanisi vo tano ke? E-e. Vakriste va fanele va lehisa timbilu va tiyiselela ndzhukano lowo tano, va titsongahata hi ku tekelela Yesu: “Loko va n’wi twisa ku vava, a nga vulanga leswaku ú ta tirihisela, kambe ú swi tshikile emavokweni ya loyi a avanyisaka hi ku lulama.” (1 Petro 2:23) Va tsundzuka leswaku loko Yesu a khomiwile le ntangeni wa Getsemani, u tshinye mudyondzisiwa loyi a teke ni banga ku ta n’wi sirhelela, kutani endzhaku u byele Pontiyo Pilato a ku: “Mfumo wa mina a hi wa misava leyi; loko a wu ri wa misava leyi, malandza ya mina a ma ta lwa leswaku ndzi nga nyiketiwi eka Vayuda; kambe hilaha swi nga hakona, mfumo wa mina a hi wa laha hansi.”—Yohane 18:36; Matewu 26:52; Luka 22:50, 51.

22. I xikombiso xihi lexinene lexi Timbhoni tin’wana eAfrika ti xi kombiseke loko ti xanisiwa hi tihanyi?

²² Va ri na xikombiso xa Yesu emiehleketweni, Timbhoni teto ta le Afrika ti ve ni xivindzi xa ku landzela xitsundzuxo xa Pawulo: “Mi nga rihiseli swo biha hi leswo biha, ni ka munhu ni un’we. Ringetani ku endla leswi vanhu hinkwavo va swi vonaka swi ri swo saseka. Endlani hinkwaswo leswi mi swi kotaka, hi tlhelo ra n’wina, ku hanyisana ni vanhu hinkwavo hi ku rhula. Varhandziwa, mi nga tshuki mi tirihisela mi ri n’wina; kambe kendlukelani vukari bya Xikwembu, hikuva ku tsariwile va ku: ‘Ku rihisa i ka mina; hi mina loyi ndzi nga ta rihisela, ku vula [Yehova].’” (Varhoma 12:17-19; ringanisa Vaheveru 10:32-34.) Mawaku xikombiso lexonghasi lexi tiyisaka lexi vamakwerhu va le Afrika va nga xona eka hina hinkwerhu namuntlha! Hambi loko vulawuri byi ala ku teka magoza lamanene, Vakriste va ntiyiso a va yi lan’wi misinya ya milawu ya Bibele.

23. I swivutiso swihi leswi nga ha ta kaneriwa?

²³ Kambe ke, i yini lexi valawuri lava tlakukeke va nga xi langutelaka eka Vakriste? Xana ku na mimpimo yo karhi eka swilaveko leswi va nga swi lavaka? Leswi swi ta kaneriwa eka nhloko-mhaka leyi landzelaka.

[Nhlamuselo ya le hansi]

Xana U Nga Hlamusela?

◻ I tindlela tihi tin’wana leti munhu a nga ‘solaka’ valawuri lava tlakukeke ha tona?

◻ Xana hi kwihi “ku lerisa ka Xikwembu” malunghana ni ku xixima vulawuri bya hulumendhe?

◻ Xana valawuri i “valala” hi ndlela yihi ke?

◻ Xana tihulumendhe ta vanhu ti tirha njhani tanihi “nandza wa Xikwembu”?

[Bokisi leri nga eka tluka 21]

Papila Ro Huma Eka Ndhuna Ya Maphorisa

PAPILA leri nga ni mfungho wa “Mfumo Wa Mani Na Mani Wa Tiko Ra Minas Gerais” ri te ehofisini ya rhavi ra Sosayiti ya Watch Tower eBrazil. A ri huma eka ndhuna ya maphorisa ya doroba ra Conquista. Xana a ku ri na xokarhi lexi hoxeke? Papila a ri hlamusele hi roxe. Ri ri:

“Eka Nkulukumba:

“I ntsako ku titivisa eka wena hi ku tirhisa papila leri. A a ndzi ri ndhuna ya maphorisa edorobeni ra Conquista, Minas Gerais, ku lava ku va malembe manharhu. Entirhweni, nkarhi hinkwawo a ndzi ringeta ku xiya-xiya, kambe ndzi ve ni swiphiqo eku hlayiseni ka ku rhula ekhotsweni. Vakhotsiwa, hambi loko va leteriwile emintirhweni ya vona, a va karhata.

“Endzhaku ka tin’hwetinyana, Senhor O— u te edorobeni ra hina kutani a tivula tanihi un’wana wa Timbhoni ta Yehova. U sungule ku chumayela hi Bibele eka vakhotsiwa van’wana, u va dyondzise ku hlaya ni ku tsala naswona u va kombe swisekelo swa nsivela-mavabyi ni tindlela ta mahanyelo lamanene kun’we ni ku va byela hi Bibele yo Kwetsima. Ndlela leyi muchumayeri a tirheke ha yona yi kombise ku tinyiketela, rirhandzu ni ku tikarhata. Mahanyelo ya vakhotsiwa hi ku hatlisa ma cincile, ma antswa, leswi hlamariseke vahlaleri ni ku va endla va tlangela.

“Hi ku languta leswi endlekeke ekhotsweni ra hina, ndzi tsakela ku tivisa Watch Tower Bible and Tract Society hi ku tlangela ka hina mayelana ni ntirho lowunene lowu endliweke etikweni ra hina hi muchumayeri la xiyekaka.”

Malunghana ni vulawuri bya hulumendhe, muapostola Pawulo u te: “Hambeta u endla leswinene, u ta nkhensiwa hi swona.” (Varhoma 13:3) Leswi a swi ri tano hakunene hi mhaka leyi nga laha henhla. Mawaku vumbhoni bya matimba lama hundzulaka ya Rito ra Xikwembu lebyi mahungu lamanene ma byi hetisiseke hi tin’hwetinyana ntsena, leyi endlelo ra ndziho a ri nga ta yi kota hi malembe yo tala!—Psalma 19:7-9.