Ku Titsongahata Ka Hina Loku Hikiweke Eka Valawuri Lava Tlakukeke
“Hikwalaho swa fanela leswaku munhu a tiveka ehansi.”—VARHOMA 13:5.
1. I ntokoto wihi wo nonon’hwa lowu Timbhoni ta Yehova ti veke na wona emavokweni ya valawuri lava tlakukeke va Vunazi, naswona xana leswi a swi ri hikwalaho ka ku “endla leswo biha”?
HI JANUARY 7, 1940, Franz Reiter ni vantshwa van’wana va ntlhanu va le Austria, va dlayiwile hi muchini wo tsema tinhamu. A va ri Timbhoni ta Yehova, Bibelforscher, naswona va fe hi mhaka ya leswi a va nga ta swi kota ku lwela Mfumo wa Hitler hikwalaho ka ripfalo ra vona. Reiter a ri un’wana wa Timbhoni ta magidi leti feleke ripfumelo ra tona hi nkarhi wa nyimpi ya vumbirhi ya misava. Vo tala va tiyisele malembe layo tala etikampeni ta nxaniso. Xana hinkwavo lava va dlayiwe hi “banga” ra valawuri lava tlakukeke va Vunazi hi ku “endla leswo biha”? (Varhoma 13:4) Nikantsongo! Hambi leswi va xanisekeke emavokweni ya valawuri, marito man’wana ya Pawulo ma komba leswaku Vakriste lava va yingise swileriso swa Xikwembu eka Varhoma ndzima 13.
2. I xivangelo xihi lexi fanelaka xa ku va lava titsongahataka eka valawuri lava tlakukeke?
2 Eka Varhoma 13:5, muapostola wa tsala: “Hikwalaho swa fanela leswaku munhu a tiveka ehansi ka vuhosi, ku nga ri ntsena hikwalaho ka ku chava ku biwa, kambe ku ri hikwalaho ka ripfalo.” Eku sunguleni, Pawulo u vule leswaku ku tamela ka hosi “banga” a ku ri xivangelo lexinene xa ku titsongahata eka yona. Kambe sweswi u nyika xivangelo lexi tiyeke: ripfalo. Hi tikarhatela ku tirhela Xikwembu hi “ripfalo leri tengeke.” (2 Timotiya 1:3) Bibele yi hi byela leswaku hi titsongahata evalawurini lava tlakukeke, naswona hi yingisa hi mhaka ya leswi hi lavaka ku endla leswi nga swinene emahlweni ya Xikwembu. (Vaheveru 5:14) Hakunene, ripfalo ra hina leri leteriweke hi Bibele ri hi susumetela ku yingisa vulawuri hambi loko ku nga ri na munhu loyi a hi langutelaka.—Ringanisa Eklesiasta 10:20.
“Nakambe Hi Swona Leswi Endlaka Leswaku Mi Humesa Ndzuvo”
3, 4. I vito rihi leri Timbhoni ta Yehova ti nga na rona, naswona Vakriste va fanele ku hakela mindzuvo?
3 Malembe lama hundzeke, eNigeria a ku ri ni madzolonga ehenhleni ka ku hakela mindzuvo. Vutomi byo hlaya byi lahlekile, kutani valawuri va vita vuthu. Masocha ma nghena eHolweni ya Mfumo laha nhlangano a wu ya emahlweni kutani ma lava ku tiva xikongomelo xa nhlangano lowu. Ehenhleni ko kuma leswaku a ku ri nhlangano wa dyondzo ya Bibele wa Timbhoni ta Yehova, ndhuna leyi langutelaka yi byele masocha leswaku ma famba, yi ku: “Timbhoni ta Yehova a hi vona vahlohloteri va leswaku ku nga humesiwi ndzuvo.”
4 Timbhoni teto ta le Nigeria a ti ri na ndhuma hi ku hanya hi ku pfumelelana ni marito ya Pawulo lama nge: “Nakambe hi swona leswi endlaka leswaku mi humesa ndzuvo; hikuva tihosi i vatirhi va Xikwembu, lava tinyiketaka ku tirha ntirho wolowo.” (Varhoma 13:6) Loko Yesu a nyika nawu lowu nge, ‘Nyika Khezari leswi nga swa Khezari,’ a a vulavula mayelana ni ku hakela ndzuvo. (Matewu 22:21) Valawuri va kwalaho va lunghisa magondzo, nsirhelelo wa maphorisa, tilayiburari, ntleketlo, swikolo, mintirho ya poso ni swin’wana swo tala. Hakanyingi ha ma tirhisa malunghiselelo lawa. Swa fanela leswaku hi va hakela hi ndzuvo wa hina.
“Humeselani Hinkwavo Timfanelo Ta Vona”
5. Xana xi vula yini xiga lexi nge “humeselani hinkwavo timfanelo ta vona”?
5 Pawulo u ya emahlweni a ku: “Humeselani hinkwavo timfanelo ta vona: loyi a fanelaka ku amukela ndzuvo, n’wi nyikeni; loyi a fanelaka ku luviwa, n’wi luveni; loyi a fanelaka ku chaviwa; n’wi chaveni; loyi a fanelaka ku xiximiwa, n’wi xiximeni.” (Varhoma 13:7) Rito “hinkwavo” ri katsa mulawuri wihi na wihi wa kwalaho loyi a nga nandza wa Xikwembu evanhwini. A ri hlawuli. Hambi loko hi ri hansi ka fambiselo ra tipolitiki leri hina hi nga ri laviki, ndzuvo ha wu hakela. Loko laha hi tshamaka kona vukhongeri byi ntshunxekile ku nga hakeli ndzuvo, mabandlha ma nga swi tirhisa leswi. Naswona ku fana ni vaaki van’wana, Vakriste va nga tirhisa malunghiselelo wahi na wahi ya le nawini lama endliweke ku hika mindzuvo leyi va yi hakelaka. Kambe a ku na Mukriste loyi a fanelaka ku balekela ku hakela ndzuvo hi ndlela leyi nga riki enawini.—Ringanisa Matewu 5:41; 17:24-27.
6, 7. Ha yini hi fanele ku hakela mindzuvo hambi loko mali ya kona yi tirhisiwa ku lulamisa swilo leswi hi nga pfumelelaniki na swona kumbe hambi loko vulawuri byi hi xanisa?
6 A hi nge kumbexana, ndzuvo wu languteka wu nga fanelanga. Kumbexana ku vuriwa yini loko xiphemu xa mali ya ndzuvo xi tirhisiwa ku lulamisa swilo swo karhi leswi hi nga pfumelelaniki na swona, tanihi ku xixisa tinyimba handle ko hakerisa, vuhlayisi bya ngati, kumbe minongonoko leyi lwisanaka ni langutelo ra hina ra vukalatlhelo? Ha yi hakela hinkwayo mindzuvo ya hina. I vuhosi lebyi fanelaka byi va ni vutihlamuleri bya ndlela leyi byi tirhisaka mali ya ndzuvo ha yona. A hi lerisiwanga leswaku hi avanyisa vuhosi. Xikwembu i “Muav̌anyisi wa misav̌a,” naswona hi nkarhi wa xona, xi ta tengisana ni tihulumendhe ehenhleni ka ndlela leyi ti tirhiseke vulawuri bya tona ha yona. (Psalma 94:2; Yeremia 25:31) Ku kondza sweswo swi endleka, mindzuvo ha yi hakela.
7 Ku vuriwa yini loko vulawuri byi hi xanisa? Ha ha yi hakela mindzuvo hikwalaho ka mintirho leyi endliwaka ya siku na siku. Malunghana ni Timbhoni leti tokotaka nxaniso etikweni rin’wana ra Afrika, Examiner ya le San Francisco yi te: “U nga va teka tanihi vaaki lava nga xikombiso lexinene. Va hakela ndzuvo hi ku tinyiketela, va hlayisa vavabyi, ni ku lwa ni ku pfumala dyondzo.” Ina, Timbhoni teto leti xanisiwaka ti yi hakerile mindzuvo.
Ku ‘Chava’ Ni Ku ‘Xixima’
8. I ku ‘chava’ kwihi loku hi ku nyikaka vulawuri?
8 Ku ‘chava’ ka Varhoma 13:7 a hi ku chava ka vutoya, kambe i xichavo eka valawuri va tiko, ku chava ku tlula nawu wa vona. Xichavo lexi xi kombisiwa hikwalaho ka xikhundlha lexi katsekaka, ku nga ri hikwalaho ka munhu la tirhaka eka xikhundlha xexo. Bibele, loko yi vulavula hi ku profeta hi Tiberiyo mufumi wa Rhoma, yi n’wi vula “un’wana l’a solekaka.” (Daniel 11:21) Kambe a ri mufumi, naswona hi ndlela yoleyo, Mukriste a ta n’wi kombisa xichavo ni ku n’wi xixima.
9. Hi tihi tindlela tin’wana leti hi kombisaka xichavo eka valawuri va vanhu ha tona?
9 Malunghana ni ku xixima, hi landzela ndzayo ya Yesu ya ku nga nyiki mavito lama sekeriweke eka xikhundlha xa vukhongeri. (Matewu 23:8-10) Kambe loko swi ta eka valawuri va tiko, ha tsaka ku va vitana hi vito rihi na rihi leri nga ha lavekaka leswaku hi va xixima. Pawulo u tirhise rito “la chavisekaka” loko a vulavula ni vafumi va Rhoma. (Mintirho 26:25) Daniel u vule Nebukadnetsara a ku “Hosi ya nga.” (Daniel 4:19) Namuntlha, Vakriste va nga ha tirhisa marito yo tanihi “Muchaviseki” kumbe “Nkulukumba.” Va nga ha yima loko muavanyisi a nghena ehubyeni kumbe hi ku xixima, va nkhisama emahlweni ka mufumi loko sweswo ku ri mukhuva wa kona.
Ku Titsongahata Loku Hikiweke
10. Xana Yesu u swi kombise njhani leswaku ku ni mindzilakana eka swilo leswi mulawuri wa vanhu a nga swi lavaka eka Mukriste?
10 Tanihi leswi Timbhoni ta Yehova ti nga ehansi ka valawuri va vanhu, ha yini Franz Reiter ni van’wana lavo tala swinene va xaniseke hi ndlela leyi? Hikuva ku titsongahata ka hina ku hikiwile, naswona mulawuri hakanyingi a nga swi xiyi leswaku ku ni mindzilakana ya Bibele leyi vekiweke eka leswi a nga swi lavaka. Loko mulawuri a lava swo karhi leswi lwisanaka ni ripfalo leri leteriweke ra Mukriste, u tlula ndzilakano lowu Xikwembu xi n’wi nyikeke wona. Yesu u kombise leswi loko a te: “Nyikani Khezari leswi nga swa Khezari, ni Xikwembu leswi nga swa Xikwembu.” (Matewu 22:21) Loko Khezari a lava leswi nga swa Xikwembu, hi fanele hi tsundzuka leswaku Xikwembu hi xona xi fanelaka ku rhangisiwa.
11. Hi wihi nsinya wa nawu lowu kombisaka leswaku ku ni mindzilakano eka leswi mulawuri wa vanhu a nga lavaka leswaku swi amukeriwa hinkwako?
11 Xana leswi i ku pfukela kumbe vukanganyisi? Doo. Entiyisweni, i ku ndlandlamuxiwa ka nsinya wa nawu lowu lemukiwaka hi matiko layo tala lama hluvukeke. Hi lembe xidzana ra vu-15, munhu loyi va nge i Peter von Hagenbach u tengisiwile hikwalaho ka ku sungula mfumo wa tihanyi emugangeni wa Yuropa laha a a lawula kona. Ku tisirhelela kakwe, ka leswaku a a landzela ntsena swileriso swa hosi yakwe, Mufumi Lonkulu wa le Burgundy, ku ariwile. Xikombelo xa leswaku munhu la endlaka nsele a nga tengisiwi loko a landzela swileriso swa mulawuri la tlakukeke xi endliwile hi makhamba yo hlaya ku sukela kwalaho—leswi xiyekaka ngopfu i swa swigevenga swa nyimpi ya Vunazi emahlweni ka Huvo ya Matiko Hinkwawo eNuremberg. Hi ntolovelo leswi a swi ariwa. Huvo ya Matiko Hinkwawo yi vule leswi eku avanyiseni ka yona: “Vanhu va ni vutihlamuleri bya misava hinkwayo lebyi tlulaka mindzhwalo ya tiko ya ku yingisa leyi simekiweke hi mimfumo yo hambana-hambana.”
12. I swikombiso swihi swa Matsalwa swa malandza ya Xikwembu lama aleke ku yingisa swilaveko leswi nga fanelangiki swa mfumo?
12 Malandza ya Xikwembu a ma swi xiya nkarhi hinkwawo leswaku ku ni mindzilakana eku titsongahateni loku hi ripfalo ma nga na kona evalawurini lava tlakukeke. Kwalomu ka nkarhi lowu Muxe a tswariweke ha wona le Egipta, Faro a lerisa masungukati mambirhi ya Vaheveru leswaku ma dlaya vana va vafana hinkwavo va Vaheveru lava ha ku tswariwaka. Hambi swi ri tano, masungukati lawa ma hlayise vana va hanya. Xana a ma hoxile hi ku nga n’wi yingisi Faro? E-e, a ma landzela ripfalo ra vona leri va nyikiweke hi Xikwembu, naswona Xikwembu xi ma katekisile hikwalaho ka swona. (Eksoda 1:15-20) Loko Israyele a ri evukhumbini eBabilona, Nebukadnetsara u lave leswaku tindhuna ta yena, ku katsa ni Vaheveru, Xadraka, Mexaka na Abedi-Nego, va nkhinsama emahlweni ka xifaniso lexi a xi vekile erivaleni ra Dura. Vaheveru lavanharhu va arile. Xana a va hoxisile? E-e, hikuva ku landzela xileriso xa hosi a swi vula ku tlula nawu wa Xikwembu.—Eksoda 20:4, 5; Daniel 3:1-18.
‘Yingisa Xikwembu Tanihi Mufumi’
13. I xikombiso xihi lexi Vakriste vo sungula va xi nyikeke emhakeni ya ku titsongahata loku hikiweke eka valawuri lava tlakukeke?
13 Hi ku fanana, loko valawuri va Vayuda va lerise Petro na Yohane leswaku va tshika ku chumayela hi Yesu, va hlamurile: “A ku avanyise n’wina: Xana swi lulamile emahlweni ka Xikwembu ku yingisa n’wina ku tlula xona xana?” (Mintirho 4:19; 5:29) A va nga ta tshika ku vulavula. Magazini lowu nge The Christian Century wu kokela nyingiso eka xiyimo xin’wana xa ripfalo leri tekiweke hi Vakriste vo sungula loko wu ku: “Vakriste vo sungula a va nga tirhi eka mavuthu lama hlomaka. Roland Bainton u vula leswaku ‘ku sukela eku heleni ka nguva ya Testamente Leyintshwa ku ya emalembeni ya khume A.D. 170-180, a ku na vumbhoni bya Vakriste vahi na vahi va ri enyimpini’ (Christian Attitudes Toward War and Peace [Abingdon, 1960], matl. 67-8). . . . Swift u vula leswaku Justin Martyr, u ri ‘swo boha leswaku Vakriste va hambana ni swiendlo swa vukari.’”
14, 15. Hi yihi misinya yin’wana ya milawu ya Bibele leyi a yi fuma ku yingisa loku hikiweke ka Vakriste vo sungula eka valawuri va vanhu?
14 Hikwalaho ka yini Vakriste vo sungula va nga tirhanga tanihi masocha? Handle ko kanakana, un’wana ni un’wana u dyondze Rito ni milawu ya Xikwembu hi vukheta ivi a endla xiboho exisekelweni xa ripfumelo ra yena leri leteriweke hi Bibele. Va hlayise vukala-tlhelo, naswona a va nga ri “va misava,” kutani vukala-tlhelo bya vona byi va sivele ku langa tlhelo emadzolongeni ya misava leyi. (Yohane 17:16; 18:36) Nakambe, a va ri va Xikwembu. (2 Timotiya 2:19) Ku lwela Mfumo a swi ta vula ku nyika Khezari leswi nga swa Xikwembu. Nakambe, a va ri xiphemu xa vumakwavo bya misava hinkwayo lebyi hlanganisiweke swin’we hi rirhandzu. (Yohane 13:34, 35; Vakolosa 3:14; 1 Petro 4:8; 5:9) Hikwalaho ka ripfalo lerinene a va nga ta hloma matlhari ku endlela ku dlaya Mukriste-kulobye.
15 Ku engetela eka leswi, Vakriste a va nga ta fambisana ni mikhuva leyi tolovelekeke ya vukhongeri, tanihi ku gandzela mufumi. Hikwalaho ka sweswo, a va langutiwa tanihi “vanhu vo hlamarisa ni va khombo, naswona tiko hinkwaro a ri va ehleketelela.” (Still the Bible Speaks, hi W. A. Smart) Hambi leswi Pawulo a tsaleke leswaku Vakriste va fanele ‘ku chava loyi a fanelaka ku chaviwa,’ a va ku rivalanga ku chava lokukulu ka vona, kumbe xichavo xa vona eka Yehova. (Varhoma 13:7; Psalma 86:11) Yesu hi yexe u te: “Mi nga tshuki mi chava lava dlayaka miri, va ri hava matimba yo dlaya moya; kambe chavani loyi a nga ni matimba yo lovisa moya ni miri wa munhu [eGehena].”—Matewu 10:28.
16. (a) Hi le ka timhaka tihi laha Vakriste va fanelaka ku pima ku titsongahata eka valawuri lava tlakukeke hi vukheta? (b) Bokisi leri nga eka tluka 27 ri hlamusela yini?
16 Tanihi Vakriste, hi amukela mintlhontlho leyi fanaka namuntlha. A hi nge vi na xiphemu eka dyondzo yihi na yihi ya ku gandzela swifaniso ya manguva lawa—ku nga ha va swivumbeko swa vugandzeri eka xifaniso kumbe ku langutela ku ponisiwa emunhwini kumbe enhlengeletanweni. (1 Vakorinto 10:14; 1 Yonane 5:21) Naswona ku fana ni Vakriste vo sungula, a hi nge byi landzuri vukala-tlhelo bya hina bya Vukriste.—Ringanisa 2 Vakorinto 10:4.
“Moya Wa Ku Olova Ni Wa Xichavo”
17. I xitsundzuxo xihi lexi Petro a xi nyikaka lava xanisekaka hikwalaho ka ripfalo?
17 Muapostola Petro u tsale hi xiyimo xa hina xa ripfalo ivi a ku: “Hikuva wa nkhenseka munhu loyi a vekaka Xikwembu embilwini, kutani a tiyisela emahlomulweni a ri karhi a twa ku vaviseka a nga onhanga nchumu.” (1 Petro 2:19) Ee, swa nkhenseka eka Xikwembu loko Mukriste a yima a tiyile ku nga khathariseki nxaniso, naswona ku na mpfuno lowu engetelekeke wa leswaku ripfumelo ra Mukriste ra tiyisiwa ni ku kambisisiwa. (Yakobo 1:2-4; 1 Petro 1:6, 7; 5:8-10) Nakambe Petro u tsarile a ku: “Kambe ni loko mi twisiwa ku vava hikwalaho ka leswo lulama, mi katekile. Etimbilwini ta n’wina, kombisani xichavo eka Kriste, leswi a nga Hosi; masiku hinkwawo tilunghiseleni ku tihlamulela eka un’wana ni un’wana loyi a mi vutisaka ehenhla ka ku tshemba loku mi nga na kona, kambe mi swi endla hi moya wa ku olova ni wa xichavo. Naswona, mi tshama mi ri ni ripfalo leri tengeke, leswaku loko mi hemberiwa, lava sandzaka mahanyelo ya n’wina layo lulama ya Kriste, va ta khomiwa hi tingana.” (1 Petro 3:14, 15) I ndzayo leyi pfunaka hakunene!
18, 19. Xana langutelo ra xichavo ni ku twisisa ri nga pfuna njhani loko vulawuri byi veka mindzilakana eka ntshunxeko wa hina wa ku gandzela?
18 Loko nxaniso wu pfuka hi mhaka ya leswi mulawuri a nga xi twisisiki xiyimo xa Vukriste kumbe hi mhaka ya leswi varhangeri va vukhongeri bya Vujagana va onheke vito ra Timbhoni ta Yehova eka vulawuri, ku nyikela tihlamuselo leti twalaka eka vulawuri swi nga ha hunguta ntshikilelo. Hi ku va ni moya wo olova ni xichavo, Mukriste a nge tirihiseri hi nyama ehenhla ka lava n’wi xanisaka. Hambi swi ri tano, u tirhisa ndlela yin’wana ni yin’wana leyi nga enawini leyi kumekaka ku lwela ripfumelo ra yena. Kutani a veka timhaka emavokweni ya Yehova.—Vafilipiya 1:7; Vakolosa 4:5, 6.
19 Xichavo lexi enteke xi tlhela xi kongomisa Mukriste ku endla matshalatshala, handle ko lwisana ni ripfalo ra yena leswaku a yingisa vulawuri. Hi xikombiso, loko minhlangano ya bandlha yi tirhisiwa, Vakriste va ta kuma tindlela to karhi leti tumbeleke, leswaku va hambeta va wundleka etafuleni ra Yehova. Mulawuri wa le Henhla-henhla, Yehova Xikwembu, wa hi byela ha Pawulo a ku: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona.” (Vaheveru 10:24, 25) Kambe tinhlengeletano to tano ti nga khomiwa hi vutlhari. Hambi loko lava nga kona va nga ri vangani ntsena, hi nga tiyiseka leswaku Xikwembu xa ma katekisa malunghiselelo yo tano.—Ringanisa Matewu 18:20.
20. Loko ku chumayela ka le rivaleni ka mahungu lamanene ku yirisiwile, xana Vakriste va nga ha langutana njhani ni xiyimo?
20 Hi ku fanana, valawuri van’wana va ku yirisile ku chumayeriwa ka mahungu lamanene erivaleni. Vakriste lava hanyaka ehansi ka vona va tsundzuka leswaku ha Yesu hi byakwe, Mulawuri la nge Henhla-henhla u te: “Evhangeli yi fanela ku rhanga yi twarisiwa ematikweni hinkwawo.” (Marka 13:10) Xisweswo, va yingisa Mulawuri la nge Henhla-henhla ku nga khathariseki leswi va humelelaka. Loko swi koteka, vaapostola a va chumayela erivaleni na hi yindlu na yindlu, kambe ku ni tindlela tin’wana ta ku fikelela vanhu, tanihi ku nyikela vumbhoni bya xitshuketa. (Yohane 4:7-15; Mintirho 5:42; 20:20) Hakanyingi valawuri a va nge lwisani ni ntirho wo chumayela loko ku tirhisiwa Bibele ntsena—leswi kombisaka xilaveko xa leswaku Timbhoni hinkwato ti tolovelana kahle ni ku anakanyisisa hi Matsalwa. (Ringanisa Mintirho 17:2, 17.) Hi ku va ni vurhenha ni xichavo, hakanyingi Vakriste va nga ha kuma ndlela ya ku yingisa Yehova handle ko pfuxa vukari bya valawuri lava tlakukeke.—Tito 3:1, 2.
21. Loko Khezari a nga tshiki ku xanisa ka yena, i ndlela yihi leyi Vakriste va nga yi hlawulaka?
21 Kambe, minkarhi yin’wana valawuri a va tshiki ku xanisa Vakriste. Kutani, hi ripfalo ro tenga, hi nga tiyisela hi endla leswinene ntsena. Muntshwa Franz Reiter u langutane ni ku hlawula: ku landzula ripfumelo ra yena kumbe ku fa. Tanihi leswi a nga ta tshika ku gandzela Xikwembu, hi xivindzi u fikelele rifu rakwe. Hi vusiku bya le mahlweni ka ku va a fa, Franz u tsalele mana wakwe a ku: “Mundzuku ni mixo ndzi ta dlayiwa. Ndzi ni matimba ya mina lama humaka eka Xikwembu, lama fanaka ni ya Vakriste va ntiyiso hinkwavo va le ndzhaku emikarhini leyi hundzeke . . . Loko wo yima u tiyile ku fikela eku feni, hi ta tlhela hi hlangana eku pfukeni ka vafi.”
22. Xana hi ni ntshembo wihi, naswona enkarhini lowu hi fanele hi ya mahlweni hi ndlela yihi?
22 Siku rin’wana vanhu hinkwavo va ta va ehansi ka nawu wun’we wo lulama, wa Yehova Xikwembu. Hi ripfalo lerinene hi fanele hi xiya malunghiselelo ya Xikwembu ni ku hlayisa ku titsongahata ka hina loku hikiweke eka valawuri lava tlakukeke hi nkarhi lowu fanaka hi ri karhi hi yingisa Hosi ya hina Leyikulu Yehova, eka swilo hinkwaswo, ku fikela enkarhini wolowo.—Vafilipiya 4:5-7.
Wa Tsundzuka Xana?
◻ Hi xihi xivangelo lexi hi endlaka hi titsongahata eka valawuri lava tlakukeke?
◻ Hikwalaho ka yini hi fanele hi nga kanakani ku humesa ndzuvo lowu Khezari a wu lerisaka?
◻ I muxaka wihi wa ku xixima lowu hi fanelaka ku wu nyika vulawuri?
◻ Ha yini ku titsongahata ka hina eka Khezari ku ri loku hikiweke?
◻ Loko hi xanisiwa hi mhaka ya leswi Khezari a lavaka leswi nga swa Xikwembu, xana hi fanele ku endlisa ku yini?
[Bokisi leri nga eka tluka 27]
Xichavo, ku nga ri ku gandzela
Mixo wun’wana hi nkarhi wa xikolo, Terra, Mbhoni ya Yehova leyintsongo ya le Canada, u xiye leswaku mudyondzisi wakwe u teke mudyondzi-kulobye a n’wi humesa etlilasini ku ringana nkarhinyana. Endzhakunyana ka sweswo, mudyondzisi a vita Terra khwatsi leswaku a famba na yena ehofisini ya nhloko ya xikolo.
Eku fikeni ka vona kwalaho, Terra u vone mujeko wa le Canada wu khavisiwile, wu hingakanye desika ra nhloko ya xikolo. Mudyondzisi a byela Terra leswaku a tshwutelela mujeko! U ringanyete leswaku, leswi Terra a nga yimbeleriki risimu ra rixaka kumbe ku losa mujeko, a ku nga ri na xivangelo xa ku ka a nga endli nchumu wo tano. Terra u arile, a hlamusela leswaku hambi leswi Timbhoni ta Yehova ti nga wu gandzeriki mujeko, kambe ta wu xixima.
Loko a tlhelela etlilasini, mudyondzisi u tivise leswaku wa ha ku endla nkambisiso. U teke vadyondzi vambirhi, kutani a ya na vona ha un’we-un’we ehofisini ya nhloko ya xikolo ivi a va byela leswaku va tshwutelela xifaniso. Lowo sungula u ve ni xiphemu eka mihivani yo seketela tiko, kambe u tshwutelele xifaniso loko a byeriwe ku endla tano. Hi laha ku hambaneke, Terra a nga ri yimbelelanga risimu kumbe ku losa mujeko; hambi swi ri tano, u arile ku ka a nga xiximi mujeko hi ndlela leyi. Mudyondzisi u kombise leswaku Terra a ri yena ntsena loyi a kombiseke xichavo lexi faneleke.—1990 Yearbook of Jehovah’s Witnesses.
[Laha Swifaniso Swi Humaka Kona eka tluka 23]
French Embassy Press & Information Division
USSR Mission to the UN