Xixima N’wana, Mutirheli Lonkulu Wa Yehova

“La nga riki na xichavo eka N’wana, a nga na xichavo ni ka Tatana la n’wi rhumeke.”—YOHANE 5:23.

1. Xana dyondzo ya Vujagana eka Vunharhu-un’we yi tisa xisandzu eka Yesu hi ndlela yihi?

NAMUNTLHA vo tala lava vuriwaka Vakriste eVujaganini va vula leswaku va xixima Yesu Kriste, kambe va endla leswi hambaneke. Njhani? Phela, vo tala va vula leswaku Yesu i Xikwembu xa Matimba Hinkwawo, ni leswaku Xikwembu, Mutumbuluxi wa swilo hinkwaswo, xi tile emisaveni ivi xi hanya, xi tlhela xi fa tanihi munhu. Mhaka leyi yi nghenisiwe eka dyondzo ya Vunharhu-un’we, leyi yi nga dyondzo-nkulu ya Vujagana. Kambe loko Vunharhu-un’we ku ri mavunwa, loko Yesu entiyisweni a ri ntsongo naswona a ri ehansi ka Xikwembu, xana ku onhiwa loku ka vuxaka byakwe ni Xikwembu a a ku nga ta hlundzukisa Yesu ke? Entiyisweni, a a ta languta ku onhiwa ko tano tanihi loku ku n’wi tiselaka xisandzu, yena na hinkwaswo leswi a swi dyondziseke.

2. Xana Matsalwa ma swi veka njhani erivaleni leswaku Yesu hi lontsongo eka Xikwembu naswona wa titsongahata eka xona?

² Ntiyiso hi leswaku, Yesu a nga tivulanga ni siku ni rin’we leswaku i Xikwembu, kambe hi ku phindha-phindha u tivule leswaku i “N’wana wa Xikwembu.” Hambi valala vakwe va swi pfumerile leswi. (Yohane 10:36; 19:7) Yesu a a xalamukela ku hlawulekisa Tatana ni ku titsongahata eka Yena, hi laha a pfumelaka ha kona: “N’wana a nga ka a nga tisunguleli a endla xilo hi yexe; ú endla ntsena lexi a xi voneke xi endliwa hi Tata wa yena; hinkwaswo leswi Tatana a swi endlaka, na yena N’wana wa swi endla. Ndzi nga ka ndzi nga tisunguleli ndzi endla xilo hi ndzexe . . . hikuva a ndzi lavi ku endla ku rhandza ka mina, kambe ku rhandza ka Loyi a ndzi rhumeke.” Nakambe u te: “Ndzi huma eka yena, naswona hi yena la ndzi rhumeke.” U tlhele a ku: “Hikuva mina sweswi ndzi nga kwala ndzi huma eka Xikwembu.” (Yohane 5:19, 30; 7:28, 29; 8:42) Yesu a nga ringanyetanga ni kan’we leswaku a a ri Xikwembu kumbe leswaku a a ringana na xona. Kutani ku dyondzisa nchumu wo tano swi tisa xisandzu eka Yesu.

Tindlela Tin’wana Leti Van’wana Va Xumbadzaka Yesu Ha Tona

3. (a) Xana van’wana eka Vujagana va n’wi tisela xisandzu hi ku ala yini malunghana na Yesu? (b) Hi byihi vumbhoni lebyi Yesu a byi nyikeke malunghana ni vukona bya yena a nga si va munhu?

³ Lexi hlamarisaka, eka Vujagana ku na van’wana lava tisaka xisandzu eka Yesu hi ku ala leswaku a a ri kona loko a nga si va munhu. Hambi swi ri tano, loko ho twisisa leswaku Yesu u te emisaveni a huma hi le tilweni hi ku kongoma, hi nga sungula ku n’wi xixima kahle. Yesu hi yexe u vule hi ku phindha-phindha leswaku a a ri kona loko a nga si va munhu. U te: “A ku na munhu loyi a tshamaka a tlhandlukela ematilweni, loko ku nga ri loyi a xikeke hi le matilweni, yena N’wana-wa-Munhu.” Endzhaku u vule leswaku: “Hi mina vuswa lebyi hanyaka lebyi xikeke hi le tilweni . . . Mi ta vula yini, siku mi vonaka N’wana-wa-Munhu a tlhandluka a ya laha a a ri kona ni khale xana?” A tlhela a ku: “N’wina mi huma kwala hansi; mina ndzi huma le henhla . . . Ndzi tiyisile ndzi ri ka n’wina: Loko Abrahama a nga si va kona, mina a ndzi ri ‘Loyi ndzi nga yena.’” (Yohane 3:13; 6:51, 62; 8:23, 58) Nakambe, exikhongelweni xakwe eka Tata wa yena wa le matilweni hi vusiku bya ku xengiwa kakwe, Yesu u kombetele eka vukona byakwe emahlweni ko va munhu.—Yohane 17:5.

4. (a) Hi tihi tindlela leti engetelekeke leti vo tala va tisaka xisandzu eka Yesu ha tona? (b) Hi byihi vumbhoni lebyi byi faneleke byi ringanile ku tiyisa leswaku Yesu hakunene u tshame a hanya, naswona hikwalaho ka yini?

⁴ Van’wana eka Vujagana va kaneta ni leswaku Yesu a a ri munhu wa matimu, ni leswaku u tshame a hanya tanihi munhu. Loko hakunene a a nga vanga kona, a a ku nga ta kaneriwa leswaku hikwalaho ka yini hi fanele ku n’wi xixima. Kambe, vumbhoni lebyi hlayisiweke eMatsalweni bya timbhoni to tala leti nga swi vona hi mahlo, byi fanele byi va vumbhoni lebyi eneleke byo herisa ku kanakana ka leswaku Yesu u tshame a hanya emisaveni hakunene. (Yohane 21:25) Leswi i ntiyiso ngopfu-ngopfu leswi Vakriste vo sungula hakanyingi va dyondziseke hi Yesu vutomi ni ntshunxeko wa vona swi ri ekhombyeni. (Mintirho 12:1-4; Nhlavutelo 1:9) Hambi swi ri tano, handle ka leswi valandzeri vakwe va swi tsaleke mayelana na yena, xana vukona bya Yesu byi nga kombisiwa?

5, 6. Xana vumbhoni bya matimu, handle ka Matsalwa, byi kombisa yini malunghana ni vukona bya ntiyiso bya Yesu Kriste?

⁵ The New Encyclopædia Britannica (1987) yi ri: “Timhaka leti nga laviki nseketelo ti kombisa leswaku eminkarhini ya khale, hambi valala va Vukriste a va ma kanakananga matimu ya Yesu.” Hi tihi tin’wana ta timhaka leti to ka ti nga lavi nseketelo? Hi ku ya hi Joseph Klausner mudyondzi wa Muyuda, ku na vumbhoni bya tibuku ta khale ta Talmud. (Jesus of Nazareth, tluka 20) Ku na vumbhoni bya Josephus n’wamatimu wa Muyuda wa lembe xidzana ro sungula. Hi xikombiso, u hlamusela ku khandliwa ka Yakobo, a n’wi hlamusela tanihi “makwavo wa xinuna wa Yesu loyi a a vuriwa Kriste.”—Jewish Antiquities, XX, [ix, 1].

⁶ Ku engetela kwalaho, ku ni vumbhoni bya van’wamatimu vo sungula va Rhoma, ngopfu-ngopfu lebyiya bya Tacitus loyi a fundzhiwa swinene. Eku sunguleni ka lembe xidzana ra vumbirhi u tsale hi “ntlawa lowu a wu vengiwa hikwalaho ka ku vengeka ka wona, lowu tiko a ri wu vula Vakriste. Christus [Kriste], laha vito [Vakriste] ri sunguleke kona, wu tokote nxupulo wo tlula mpimo hi nkarhi wa ku fuma ka Tiberiyo emavokweni ya un’wana wa vayimeri va hina.” (The Annals, XV, XLIV) Hi ku vona vumbhoni bya leswaku Yesu a a ri munhu wa matimu byi ri lebyi hlamarisaka, mudyondzisi wa filosofi ya mahanyelo wa Mufurwa wa lembe xidzana ra vu-18, Jean-Jacques Rousseau, u kombisile a ku: “Matimu ya Socrates, lawa ku nga riki na munhu la ringanyeta ku ma kanakana, a ma sekeriwi khwatsi ku fana ni ya Yesu Kriste.”

Swivangelo Swo Xixima N’wana

7. (a) Hi byihi vumbhoni bya Matsalwa lebyi hi bohaka ku xixima Yesu Kriste? (b) Xana Yehova u hambete a n’wi dzunisisa ku yini N’wana wa yena?

⁷ Sweswi hi ta emhakeni ya ku xixima Yesu Kriste. Leswaku valandzeri vakwe va fanele va n’wi xixima swi nga voniwa eka marito yakwe eka Yohane 5:22, 23: “Naswona Tatana a nga avanyisi munhu ni un’we, kambe ú nyikile N’wana ntirho hinkwawo wo avanyisa, leswaku hinkwavo va va ni xichavo eka N’wana, kukotisa leswi va nga ni xichavo eka Tatana. Un’wana ni un’wana la nga riki na xichavo eka N’wana, a nga na xichavo ni ka Tatana la n’wi rhumeke.” Ku sukela eku pfuxiweni ka Kriste eku feni, Yehova u dzunise N’wana wakwe hi mpimo lowukulu swinene, u ‘n’wi ambexe harhi ya ku kwetsima ni xichavo hikwalaho ka leswi a tokoteke rifu.’ (Vaheveru 2:9; 1 Petro 3:22) Kahle-kahle, hi ni swivangelo swo xixima Yesu hikwalaho ka leswi a nga xiswona na hi leswi a swi endleke.

8. I mintiyiso yihi leyi nga tolovelekangiki malunghana na Yesu Kriste leyi a faneriwaka hi xichavo hikwalaho ka yona?

⁸ Yesu Kriste u faneriwa hi xichavo hikuva, tanihi Logos, kumbe Rito, i muhlanganisi la tlakukeke wa Yehova. Ematsalweni, swa vonaka leswaku “Rito” ri kombetela eka Yesu a nga si ta emisaveni ni loko se a tlhandlukele ematilweni. (Yohane 1:1; Nhlavutelo 19:13) Eka Nhlavutelo 3:14 u tivula “masungulo ya leswi tumbuluxiweke hi Xikwembu.” A hi yena “mativula ya hinkwaswo leswi tumbuluxiweke” ntsena, kambe tanihi ‘N’wana la nga un’we,’ wo va yexe la vumbiweke hi ku kongoma hi Yehova Xikwembu. (Vakolosa 1:15; Yohane 3:16) Ku engetela kwalaho, “swilo hinkwaswo swi tumbuluxiwile hi yena, kutani a ku na xilo ni xin’we lexi tumbulukeke loko ku nga ri hi yena.” (Yohane 1:3) Hikwalaho, loko hi hlaya eka Genesa 1:26 leswaku Xikwembu xi te, “A hi endl[e] munhu hi šifaniso ša hina, a ta fana na hina,” “hina” loyi u katsa Logos kumbe Rito. Entiyisweni, leswaku Yesu eka vukona bya yena a nga si va munhu a a ri na lunghelo ro hlamarisa ro tirha na Yehova Xikwembu eku tumbuluxeni, swi n’wi endla a faneriwa hi xichavo lexikulu.

9. Ha yini hi gimeta hi leswaku Mikayele i ntsumi leyikulu, naswona xana Mikayele u n’wi xixime njhani Yehova mayelana ni miri wa Muxe?

⁹ Nakambe Yesu Kriste u faneriwa hi xichavo hikuva hi yena ntsumi leyikulu, kumbe murhangeri wa tintsumi wa Yehova. Xana makumu wolawo hi ma fikelela hi swisekelo swihi ke? Phela, riviti “murhangeri” leri vulaka “lonkulu” kumbe “nhloko,” ri kombisa leswaku ku na ntsumi yin’we leyikulu. Rito ra Xikwembu ri vulavula hi yona loko ri kombetela eka Hosi Yesu Kriste la pfuxiweke. Ha hlaya: “Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni.” (1 Vatesalonika 4:16) Ntsumi leyikulu yi na vito, hi laha hi hlayaka ha kona eka Yuda 9: “Mikayele ntsumi leyikulu, loko a lwetana na Diyavulosi va phikisana hi ntsumbu wa Muxe, ú chavile ku avanyisa Diyavulosi ni ku humesa marito ya ku n’wi sandza, kambe ú te: ‘Hosi a yi ku tshinye!’” Hi ku nga rhangeli Yehova emahlweni a avanyisa Diyavulosi, xisweswo Yesu u xixime Tata wa yena wa le matilweni.

10. (a) Xana Mikayele u rhangerisa ku yini eku lweleni ka Mfumo wa Xikwembu? (b) Hi xihi xiphemu lexi Mikayele a xi hetisiseke mayelana ni tiko ra Israyele?

¹⁰ Mikayele ntsumi leyikulu u lwela Mfumo wa Xikwembu, u rhangela eku suseni ka Sathana ni mavandla yakwe ya vudemona ematilweni. (Nhlavutelo 12:7-10) Naswona muprofeta Daniyele u vula leswaku ‘u yimela vanhu va Xikwembu.’ (Daniel 12:1) Hikwalaho, swi le rivaleni leswaku Mikayele i “nṭumi ya Šikwembu le’yi rhangeleke mav̌andla ya Israyele” ni leswaku hi yena loyi Xikwembu xi n’wi tirhiseke ku tisa vanhu va xona eTikweni ra Xitshembiso. Xikwembu xi lerisa xi ku: “Yi yingiseni kutani mi endla leswi yi swi vulaka. Mi nga yi xandzukeli . . . hikuva vito ra mina ri le ka yona.” (Eksoda 14:19; 23:20, 21, NW) Handle ko tipfinyinga, ntsumi leyikulu ya Yehova yi fanele yi tsakele swinene vanhu va vito ro fanekisela ra Xikwembu. Hi laha ku fanelaka yi pfune ntsumi yin’wana leyi a yi rhumiwe ku ya chavelela muprofeta Daniyele, loyi a a pfaleriwe ndlela hi demona ra matimba. (Daniel 10:13) Xisweswo swi nga ha va leswi twisisekaka ku gimeta hi leswaku ntsumi leyi yayarheleke tinhenha ta 185 000 ta Senakeribi a ku ri Mikayele ntsumi leyikulu.—Esaya 37:36.

11. Xana, Yesu u faneriwa hi xichavo xa hina hikwalaho ko va a landzelele ndlela yihi ya vutomi emisaveni?

¹¹ Yesu Kriste a nga faneli ku xiximiwa hikwalaho ka leswi a nga swona ntsena kambe nakambe u faneriwa hi xichavo xa hina hikwalaho ka leswi a swi endleke. Hi xikombiso, wo va yena ntsena munhu loyi a hanyeke vutomi lebyi hetisekeke. Adamu na Evha va vumbiwe va hetisekile, kambe ku hetiseka ka vona a ku tlhavelanga hi dyambu. Hambi swi ri tano, Yesu Kriste u tshame a ‘tshembekile, a pfumala nandzu, naswona a a hambanile ni vadyohi’ ku nga khathariseki hinkwaswo leswi Diyavulosi a a ta swi tisa ehenhla ka yena hi ndlela ya miringo ni nxaniso. Eka hinkwaswo leswi “a nga dyohanga nchumu, a nga vulanga swo kanganyisa van’wana.” A a ta swi kota ku ta tlhontlha vakaneti vakwe va vukhongeri hi ku kongoma a ku: “I mani eka n’wina la nga kombaka xidyoho xa mina xana?” A nga kona ni un’we wa vona loyi a a ta komba! (Vaheveru 7:26; 1 Petro 2:22; Yohane 8:46) Naswona hikwalaho ko hlayisa vutshembeki lebyi nga hava xivati, Yesu u lwele Tata wakwe wa le tilweni tanihi Hosi ya vuako hinkwabyo leyi fanelekaka ni ku kombisa Diyavulosi a ri musunguri wa mavunwa ni muhembi lonkulu.—Swivuriso 27:11.

12. (a) Xana Yesu a a ri munhu wa njhani, naswona u endle yini naswona u tokote yini ematshan’wini ya van’wana? (b) Hikwalaho ka yini a a wu ta vula leswaku Yesu u faneriwa hi xichavo xa hina hikwalaho ka leswi a swi endleke ni hikwalaho ka leswi a swi tokoteke?

¹² Yesu Kriste u faneriwa hi xichavo xa hina, ku nga ri leswaku u hanye vutomi lebyi hetisekeke byo pfumala xidyoho, kambe na hi leswi a a ri munhu lonene, wo pfumala vutianakanyi, ni munhu la tinyiketeleke. (Ringanisa Varhoma 5:7) U tirhele swilaveko swa vanhu swa moya ni swa nyama handle ko karhala. Mayana ku hiseka konghasi loku a ku kombiseke hikwalaho ka yindlu ya Tata wa yena, naswona vona ku leha mbilu loku a ku kombiseke loko a tirhisana ni vadyondzisiwa vakwe! Vona ku xaniseka loku a a tiyimisele ku ku tokota leswaku a endla ku rhandza ka Tata wa yena! Mayelana ni ku xanisiwa kakwe entangeni wa Getsemana, Bibele yi ri: “Kakuloko a ri emaxangwini lamakulu, a khongela hi matimba ngopfu, nyuku wa yena wu ko wu xiririka, wu fana ni mathonsi ya ngati lama tshonelaka emisaveni.” Ina, u “khongele ni ku kombela hi ku titsongahata, a huwelela hi matimba ni ku rila hi mihloti.” (Luka 22:44; Vaheveru 5:7) Mawaku ku pakanisa konghasi ka muprofeta Esaya loku a ku vhumbheleke ku xanisiwa ka yena eka Esaya 53:3-7!

13. I xikombiso xihi lexinene lexi Yesu a hi vekeleke xona hi ku xixima Tata wakwe la nge matilweni?

¹³ Nakambe Yesu u faneriwa hi xichavo xa hina hikwalaho ka xikombiso lexinene lexi a hi vekeleke xona hi ku xixima Tata wa yena wa le matilweni. A a ta vula kahle a ku: “Ndzi xixima tata wa mina.” (Yohane 8:49) Minkarhi hinkwayo a a fundzha Yehova Xikwembu hi marito ni mintirho yakwe. Xisweswo, loko a hanyise munhu, mhaka ya Bibele yi ri, vanhu a va nga dzunisi Yesu, kambe a “va dzunisa Xikwembu.” (Marka 2:12) Hikwalaho, emakun’wini ya vutirheli byakwe bya le misaveni, Yesu a a ta vula hi ku kongoma loko a khongela eka Tata wa yena wa le matilweni a ku: “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha.”—Yohane 17:4.

Leswi A Hi Endleleke Swona

14. Xana rifu ra Yesu ri hi hetisisele yini lexi n’wi endlaka a faneriwa hi xichavo?

¹⁴ Vona ndlela leyi Yesu Kriste a faneriwaka swinene hi xichavo xa hina hikwalaho ka hinkwaswo leswi a hi endleleke swona! U fele swidyoho swa hina leswaku hi ta kota ku vuyelelana na Yehova Xikwembu. Yesu u vule leswi mayelana na yena: “N’wana wa munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.” (Matewu 20:28) Xisweswo, rifu rakwe ri endle hinkwaswo swi koteka leswi Mfumo wu nga ta hi endlela swona hina vanhu: vutomi lebyi nga riki na ku fa ematilweni eka lava 144 000 lava vumbaka mutekiwa wa yena ni vutomi lebyi nga heriki emisaveni ya paradeyisi, eka timiliyoni leti kombisaka ripfumelo ni ku tiyisela ka tona ehansi ka ndzingo.—Psalma 37:29; Nhlavutelo 14:1-3; 21:3, 4.

15. Hi xihi xikombiso xin’wana xa Yesu xo paluxa vumunhu bya Tata wa yena eka hina?

¹⁵ Tanihi Mudyondzisi Lonkulu, Yesu Kriste u faneriwa hi xichavo hikuva u paluxe ku rhandza ka Tata wa yena ni vumunhu bya yena eka hina hi ku hetiseka. Hi xikombiso, eka Dyondzo yakwe ya le Ntshaveni, u kombetele eka ku hanana ka Tata wa yena hi ku tsuvukisa dyambu ni ku nisa mpfula hi ku fanana eka lavo biha ni lavanene ivi a ku: “Mi fanele ku hetiseka, hilaha Tata wa n’wina wa le tilweni na yena a hetisekeke.”—Matewu 5:44-48.

16. Xana muapostola Pawulo u yi katsakanye njhani ndlela ya Yesu leyi fanelaka hi xichavo?

¹⁶ Muapostola Pawulo u yi katsakanye khwatsi ndlela ya Yesu ya ku faneriwa hi xichavo loko a tsale a ku: “A a ri ni xiyimo xin’we ni Xikwembu, kutani a nga tekanga ku ringana ka yena ni Xikwembu xi va xilo lexi a nga khomelelaka eka xona, kambe u titshiketile hi ku teka xiyimo xa nandza, a velekiwa a ri la fanaka ni vanhu. Loko a voniwa a ri la fanaka ni munhu, u titsongahatile, a va loyi a yingiselaka ku fikela eku feni, a fa hi rifu [emhandzini ya nxaniso].”—Vafilipiya 2:5-8.

Ndlela Leyi Hi Nga Xiximaka N’wana Ha Yona

17, 18. Hi tihi tindlela to hambana-hambana leti hi nga tisaka xichavo eka Yesu Kriste ha tona?

¹⁷ Hi laha handle ko tipfinyinga Yesu Kriste a faneriwaka hi xichavo xa hina ha kona, hi ta eka xivutiso lexi nge: Xana hi nga n’wi xixima njhani N’wana? Leswi hi swi endla hi ku kombisa ripfumelo egandzelweni rakwe ra nkutsulo, naswona hi kombisa ripfumelo rero hi ku teka magoza lama lavekaka ya ku tisola, ku hundzuka, ku tinyiketela, ni ku khuvuriwa. Hi ku ta eka Yehova hi xikhongelo hi vito ra Yesu, hi xixima Yesu. Nakambe ha n’wi xixima loko hi yingisela marito yakwe lama nge: “Loko munhu a lava ku ndzi landza, a a titshike, a tirhwexa [mhandzi ya yena ya nxaniso], kutani a ndzi landza.” (Matewu 16:24) Hi xixima Yesu Kriste loko hi yingisa switsundzuxo swakwe swo hambeta hi lava Mfumo wa Xikwembu ni ku lulama ka xona ku sungula, naswona ha n’wi xixima loko hi yingisa xileriso xakwe xo hlanganyela entirhweni wo endla vadyondzisiwa. Nakambe, hi xixima Yesu loko hi kombisa rirhandzu ra vumakwerhu leri a vuleke leswaku a a ri ta kombisa valandzeri vakwe hinkwavo va ntiyiso.—Matewu 6:33; 28:19, 20; Yohane 13:34, 35.

¹⁸ Nakambe, hi tisa xichavo eka N’wana hi ku tirhwexa vito ra yena, hi tivula Vakriste, ivi hi hanya hi ku ya hi vito rero hi ku tikhoma ka hina lokunene. (Mintirho 11:26; 1 Petro 2:11, 12) Muapostola Petro u vule leswaku hi fanele ku landzela swinene minkondzo ya Yesu. (1 Petro 2:21) Xisweswo, ha n’wi xixima nakambe loko hi n’wi tekelela eka mahanyelo ya hina hinkwawo. Naswona entiyisweni, loko lembe rin’wana ni rin’wana hi tlangela Xitsundzuxo xa rifu ra Kriste, hi n’wi nyika xichavo xo hlawuleka.—1 Vakorinto 11:23-26.

19, 20. (a) Hi tihi tihakelo leti Yesu a ti khomeleke valandzeri vakwe sweswi ni le nkarhini lowu taka hikwalaho ko n’wi xixima? (b) I ntshembo wihi lowu hi nga vaka na wona malunghana ni N’wana?

¹⁹ Xana hi tihi tihakelo leti Yesu a ti engetelelaka vadyondzisiwa vakwe hikwalaho ko landzela ndlela leyi n’wi fundzhaka? U te: “Ndzi tiyisile ndzi ri ka n’wina: Un’wana ni un’wana la tshikeke muti wa yena, kumbe makwavo wa xinuna kumbe wa xisati, kumbe mana wa yena, kumbe tata wa yena, kumbe vana, kumbe masimu, hikwalaho ka mina ni hikwalaho ka Evhangeli, ú ta nyikiwa swilo leswi ka dzana eminkarhini ya sweswi: hi leswaku tindlu, ni vamakwavo, ni vamanana, ni vana, ni masimu swin’we ni ku xaniseka; kutani eminkarhini leyi taka, ú ta nyikiwa vutomi lebyi nga heriki.”—Marka 10:29, 30.

²⁰ Swa twala leswaku loko hi tinyiketela hikwalaho ka Yesu, u ta tiyiseka leswaku ha hakeriwa. Yesu wa hi tiyisekisa a ku: “Un’wana ni un’wana la nga ta ndzi vula emahlweni ka vanhu, na mina ndzi ta n’wi vula emahlweni ka Tata wa mina la nge matilweni.” (Matewu 10:32) Hikwalaho, hi laha Tatana la nge matilweni a xiximaka lava n’wi xiximaka ha kona, hi nga tiyiseka leswaku N’wana la nga swakwe wa Yehova u ta tekelela Tata wa yena emhakeni leyi, hi laha N’wana a endlaka ha kona eka timhaka tin’wana.

A Wu Ta Hlamula Njhani?

◻ Xana lavo tala eka Vujagana va tisa xisandzu eka N’wana hi ndlela yihi?

◻ Hi byihi vumbhoni lebyi Yesu a byi nyikeke mayelana ni vukona byakwe a nga si va munhu?

◻ Hi swihi swivangelo swin’wana leswi hi nga na swona swo xixima Yesu?

◻ Hi tihi tindlela tin’wana leti hi nga xiximaka Yesu ha tona?

◻ Ku xixima Yesu Kriste swi nyika mimpfuno yihi?