“Siku Ra Hosi”

“KUTANI, hi siku ra Hosi, ndzi tela hi Moya.” (Nhlavutelo 1:10) I muapostola Yohane la dyuhaleke la vuleke tano, loyi a kombisiweke laha henhla, eka ndzima yo sungula ya buku ya Bibele ya Nhlavutelo. Marito yakwe ma hi pfuna ku kuma nkarhi wa ku hetiseka ka swivono leswikulu leswi a hambetaka a swi hlamusela.

Hambi swi ri tano, a hi hinkwavo lava pfumelelanaka ni ku hundzuluxela loku ka Nhlavutelo 1:10. Hi xikombiso, ku muhundzuluxeri wa Bibele ya Mujarimani Jörg Zink u yi hundzuluxerisa xileswi: “Yi tatiwe hi moya lowo kwetsima—a ku ri Sonto.” Hambi swi ri tano, ku hundzuluxela ko tala ka Tibibele ku hundzuluxela xivulwa xa Xigriki teiʹ ky·ri·a·keiʹ he·meʹrai tanihi “siku ra Hosi.” Kasi enhlamuselweni ya le hansi vo tala va vula leswaku yi kombetela eka Sonto. Xana leswi i ntiyiso?

Herders Bibelkommentar ya Xijarimani, ku nga buku yo hlamusela ya Khatoliki, yi hlamusela leswi miehleketo leyi yi vulaka swona loko yi ku: “Laha [eka Nhlavutelo 1:10] nhlamuselo a yi vuli Siku ra ku Avanyisa ka Makumu, leri hi ku fanana ri tiviwaka tanihi ‘Siku ra Hosi,’ kambe esikwini ro karhi ra vhiki. Vakriste vo sungula va sungule ku tlangela siku ro sungula ra vhiki tanihi siku ra mintirho-nkulu ya kereke ya vona khale exikarhi ka lembe xidzana ro sungula. (Mintirho 20:7; 1 Vakor. 16:2)” Hambi swi ri tano, matsalwa lamambirhi lama kombisiweke hi buku yoleyo ya tinhlamuselo a ma kombisi nikantsongo leswaku Vakriste va lembe xidzana ro sungula a va languta siku ro sungula ra vhiki tanihi “siku ra mintirho ya vona leyikulu ya kereke.”

Tsalwa ro sungula, Mintirho 20:7, ri rhekhoda ntsena leswaku Pawulo, vanakulobye vakwe lava a famba na vona, ni Vakriste va le Trowasi va hlengeletane kun’we hi siku ro sungula ra vhiki, va hlengeletanela ku dya. Tanihi leswi Pawulo a a ta hambana na vona hi siku leri landzelaka naswona a a nga ha ta tlhela a va vona swa nkarhinyana, u tirhise nkarhi wolowo ku vulavula na vona hi ku lehisa.

Tsalwa ra vumbirhi, 1 Vakorinto 16:2, ri khutaze Vakriste eKorinto leswaku “hi siku ro sungula ra vhiki” va veka mali etlhelweni leswaku va ta va ni xo nyikela ha xona eka lava pfumalaka eYudiya. Mudyondzi Adolf Deissmann u ringanyeta leswaku siku leri ri nga ha va ri ve siku ra hakelo. Hi mpimo wihi na wihi, ku ringanyeta ka Pawulo a a ku pfuna, tanihi leswi mali a a yi ta tirhisiwa exikarhi ka vhiki.

Ku hava eBibeleni laha ku vuriwaka leswaku Vakriste hi nkarhi wa vaapostola va langute siku ro sungula ra vhiki, leri sweswi ri vuriwaka Sonto, tanihi muxaka wa savata ya Vukriste, siku leri vekiweke etlhelweni hi ku helela, ri vekeriwa minhlangano leyi tolovelekeke ya vugandzeri. A a ku ri endzhaku ka rifu ra vaapostola ntsena laha Sonto rero ri sunguleke ku langutiwa hi ndlela leyi ivi ri sungula ku vuriwa “siku ra Hosi.” Lexi a a ku ri xiphemu xa vugwinehi lebyi vhumbiweke hi Yesu ni vaapostola hi voxe.—Matewu 13:36-43; Mintirho 20:29, 30; 1 Yohane 2:18.

Kutani ke, “siku ra Hosi” i yini? Mongo wa Nhlavutelo 1:10 wu kombetela eka Yesu tanihi Hosi leyi siku rero ri nga ra yona. Rito ra Xikwembu ri xaxameta swiga swo tanihi “siku ra Hosi ya hina Yesu Kriste” kun’we ni nkarhi wa ku avanyisiwa ka vanhu ni ku pfuxetiwa ka paradeyisi.—1 Vakorinto 1:8; 15:24-26; Vafilipiya 1:6, 10; 2:16.

Hikwalaho, Hans Bruns, eku hundzuluxeleni kakwe loku hlamuselaka ka Das Neue Testament (Testamente Leyintshwa) u tiyisile loko a ku: “Van’wana va kholwa leswaku laha [Yohane] u vulavula hi Sonto, kambe swi vonaka onge u kombetela eSikwini lerikulu ra Hosi, leri tinhlamuselo takwe hinkwato ti khumbanaka na rona.” W. E. Vine u ri: “‘Siku ra Hosi’ . . . i Siku ra ku avanyisa ka Yena loku kombisiwaka emisaveni.” Lexikon zur Bibel ya Fritz Rienecker (Xihlamusela-marito xa Bibele) xi ri “siku ra Hosi” kahle-kahle ku vuriwa “siku ra ku avanyisa.”

Nhlamuselo leyinene ya xiga lexi nge “siku ra Hosi” yi hi pfuna ku twisisa buku hinkwayo ya Nhlavutelo. Ku tlula kwalaho, vumbhoni bya kona hi leswaku siku rero ana se a ri sungurile. Kutani ke, vona ndlela leyi swi nga swa nkoka ha yona leswaku hi ‘yingisa marito ya vuprofeta bya Nhlavutelo ivi hi hlayisa swilo leswi tsariweke ka yona’!—Nhlavutelo 1:3, 19.

[Xifaniso lexi nga eka tluka 27]

Nhlamuselo leyi nga le rivaleni na le nkarhini ya ndzimana ha yin’we ebukwini ya Nhlavutelo ya nyikeriwa ebukwini leyi nge “Nhlavutelo—Ku Chaputa Ka Yona Loku Hlamarisaka Ku Tshinele!” Xipfuno lexi xa Bibele lexi tsakisaka swonghasi xa kumeka sweswi hi tindzimi ta 33