Vana Kona Eka Ntsombano Wa Muganga Wa “Varhandzi Va Ntshunxeko”!
MASIKU manharhu lama vuyerisaka ya ndzetelo wa Bibele ya ku yimerile. Vana kona hi 10:20 hi Ravuntlhanu ni mixo loko ntsombano wu sungula hi vuyimbeleri. Tiphine hi nkulumo yo pfula leyi nge, “Ha Yini U Kambisisa Nawu Lowu Hetisekeke Wa Ntshunxeko?,” ni xiphemu xo hetelela xa nongonoko wa ni mixo, nkulumo-nkulu: “Xikongomelo Na Ku Tirhisa Ntshunxeko Wa Hina Lowu Hi Nyikiweke Hi Xikwembu.”
Hi Ravuntlhanu ni ndzhenga, xitsundzuxo xi ta nyikiwa Vakriste leswaku va hetisisa ntirho wa vona tanihi vatirheli va Xikwembu. “Xana U Bizi—Hi Mintirho Leyi Feke Kumbe Hi Ntirho Wa Yehova?” na “Vanhu Lava Ntshunxekeke Kambe Va Ri Ni Vutihlamuleri” i tinhloko-mhaka timbirhi leti nga ta ndlandlamuxiwa. Xikhutazo xa leswaku munhu a tirhisa ntshunxeko ku tirhela Yehova xi ta nyikeriwa eka drama leyi nga ni swiambalo swa kona. Yi ta kombetela eka mintokoto ya Ezra ni vanghana vakwe lava vuyeke le Babilona va ya eYerusalema hi 468 B.C.E. ku ya sasekisa tempele ya Xikwembu.
Nongonoko wa Mugqivela ni mixo wu ta kandziyisa nxaxamelo wa swiphemu swinharhu, “Ntshunxeko Ni Vutihlamuleri eVuton’wini Bya Ndyangu.” Leyi nga ta landzela i nkulumo leyi kambisisaka moya-xiviri leyi nge “Tshama U Ri La Ntshunxekeke Leswaku U Tirhela Yehova” yi ta va nkulumo ya ku tinyiketela ni nkhuvulo wa Vukriste. Ni ndzhenga vo tala va ta va va xi yimele hi mahlo-ngati xiphemu lexi nge “Xana Ku Nghenela Vukati I Xilotlelo Xo Kuma Ntsako?” Nongonoko wu ta hetelela hi yinhla leyi handle ko kanakana yi nga ta nyanyula varhandzi va ntshunxeko hinkwavo.
U ta lava ku va kona ni mixo hi Sonto leswaku u twa nxaxamelo wa swiphemu swinharhu wa “Ku Tirha Tanihi Vaphasi Va Vanhu.” Lowu wu ta hlamusela xifaniso xa Yesu xa nkukuto ni tinhlampfi naswona wu ta kombisa xiphemu lexi hi nga vaka na xona eku hetisekeni ka xona. Nongonoko wa ni mixo wu ta hetelela hi tinkulumo ta nkoka “Ku Tshama U Xalamukile ‘Enkarhini Wa Makumu’” na “I Vamani Lava Nga Ta Pona ‘Nkarhi Wa Nhlomulo’?” Kutani ke, ni ndzhenga, u nge swi lavi ku lahlekeriwa hi nkulumo ya le rivaleni, “Ku Twarisa Misava Leyintshwa Ya Xikwembu Ya Ntshunxeko!” Emahlweni ka nkulumo yo hetelela, ku ta va ni nhlamuselo ya xihloko xa dyondzo ya Xihondzo xo Rindza xa vhiki rero. Tana na kopi ya wena ya magazini wa nkarhi wolowo.
Ku sukela hi September ku ya ka January, mintsombano yo tlula 20 yi hleriwile eAfrika Dzonga ntsena, kutani ku ta va na wun’we lowu nga riki kule ni kaya ra wena. Hlela ni Timbhoni ta Yehova ta kwalaho mayelana ni nkarhi na ndhawu ya lowu nga ekusuhi na wena.