Swikombiso—Xilotlelo Xo Fikelela Timbilu

DAVHIDA a a baleka leswaku a ponisa vutomi bya yena. Nala wa yena i Sawulo, hosi leyi totiweke ya Israyele. Hambi swi ri tano, Sawulo i munhu la teleke rivengo eka Davhida, swi nyanyisiwa hi mavondzo. Eka nhloto wa yona wo dlaya, hosi sweswi yi na masocha yo ringana 3 000. Hi ku tluriwa swinene hi nhlayo, Davhida ni vavanuna va yena va tumbele empfungwe ka bako emananga.

Loko Davhida ni vavanuna va yena va hlengeletanile emunyameni, ku humelela xiyimo lexi hlamarisaka. Hosi Sawulo u nghena endzeni ka bako rolero ku ya tipfuna kona. Davhida wa nyandlamela a ya eka nala wakwe la nga xiyiki nchumu, a ri ni tlhari evokweni ra yena. Kambe lexi hlamariseke vavanuna va Davhida, a nga yi dlayi hosi. Wo tsema makumu ya nguvu ya Sawulo ntsena. Davhida u ri: “Yehova a a nḍi siv̌ele ku endlela hosi ya mina, a nga muhlawuriwa wa Yehova, e mhaka leyi, nḍi tlakusa v̌oko ra mina henhla ka yena! hikuv̌a i muhlawuriwa wa Yehova.”—1 Samuel 24: 2-7.

Mhaka leyi ya Bibele yi hi dyondzisa dyondzo ya vutlhari ya ku xixima vuhosi bya Xikwembu lebyi nyikeriweke. Nakambe yi fikelela mbilu, kumbexana hambi ku ri leyi pfunaka ku tlula xitsundzuxo lexi nga erivaleni. Sweswo i matimba ya timhaka leti rhekhodiweke eRitweni ra Xikwembu leswaku ri hi dyondzisa.—Varhoma 15:4.

Hi laha swi faneleke, Timbhoni ta Yehova ti ringeta ku endla hi matimba loko ti chumayela mahungu lamanene, ti fambisa tidyondzo ta le kaya ta Bibele, ti nyikela tinkulumo ta Matsalwa kumbe ti nyikela vumbhoni bya xitshuketa. Ti ringeta ku fikelela timbilu hi ku hlamusela mintokoto ni ku tirhisa swifaniso. Buku ya tona ya Theocratic Ministry School Guidebook ya hlamusela: “Swifaniso swi pfuxa ku tsakela ni ku kandziyisa mianakanyo ya nkoka. Swi pfuxa ku anakanya ka munhu ni ku endla leswaku a twisisa mianakanyo leyintshwa. Swikombiso leswi hlawuriweke kahle swi fambisana ni nsusumeto wa mianakanyo ni nsusumeto wa mintlhaveko. . . . Nkarhi wun’wana xikombiso xi nga pfuna ku papalata ku kaneta.”a—Tluka 168.

Ebukwini ya yena leyi nge Essentials of Public Speaking, Warren DuBois wa xiya: “Mutsari kumbe xivulavuri a xi phofule mianakanyo ya xona hi swiendlo kumbe marito ya swivumbiwa swa vanhu naswona mhaka leyi nga riki erivaleni a yi ve leyi dyondzisaka ni ku tsakisa.” Xisweswo ku endla mhaka leyi ana se yi tiviwaka ni leyi nyikaka vutomi leswaku yi dyondzisa ni ku tsakisa handle ko kanakana swi ta pfuna vatirheli va Vukriste ku fikelela timbilu.

Swikombiso Leswi Dyondzisaka

I xikombiso xa muxaka muni lexi tirhaka kahle? Hakanyingi, hi lexi sekeriweke eka swilo leswi vayingiseri va nga swi hlamuselaka hi ku olova. Yesu Kriste u veke xikombiso lexinene emhakeni leyi. Eka Dyondzo ya yena ya le Ntshaveni, Yesu u vulavule hi swilo swo tano leswi tolovelekeke swo tanihi munyu, timboni ni tinyenyana. (Matewu 5:1–7:29) Hi xikombiso, un’wana ni un’wana a a tolovelane ni timboni leti a ti tirhisa mafurha ya mitlhwari ni leti minkarhi yin’wana a ti vekiwa eka xitlhoma-rivoni. Hikwalaho, vadyondzisiwa va Yesu va fanele va swi xiyile leswaku va fanele va va varhwali va ku vonakala ka moya loko a va byele leswaku: “Naswona, a va lumeki rivoni ku ri khubumeta hi xirhundzu, kambe va ri veka ehenhla, kutani ri voninga hinkwavo lava nge ndlwini. Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge tilweni.” (Matewu 5:15, 16) Swikombiso swo olova leswi fanelaka mhaka swi nga pfuna vatirheli va Vukriste ku veka mianakanyo ni tidyondzo ta Bibele erivaleni.

Kumbexana swikombiso swa matimba swa Yesu a swi kongomisiwa evan’hwini. Xiya leswi rhekhodiweke eka Luka tindzimana 15 na 16. Vatsari ni Vafarisi a va hehla Yesu hi ku va a amukela vadyohi ni valuvisi. Loko a hlamula, u vule timhaka leti khumbaka swinene mayelana ni vanhu. U vulavule hi murisi la kumeke nyimpfu ya yena leyi lahlekeke, wansati la kumeke khoyini leyi lahlekeke, n’wana wa vusopfa la tlheleleke ekaya ni nandza lowo homboloka.

Swikombiso swa xiviri ni mintokoto ya ntiyiso ya vutomi yi nga va leyi tirhaka eka mutirheli wa Mukriste. Hi xikombiso, xiya ndlela leyi Alexander H. Macmillan, la fambeke ngopfu tanihi xivulavuri xa le rivaleni ku ringana malembe ya 60, a wu hlamuseleke ha yona ntiyiso wa Bibele hi vafi. Hi ku hatlisa emahlweni ka rifu ra tata wa yena, loyi a a tshemba leswaku moya a wu fi, Macmillan u ve ni mbulavurisano lowu na yena:

“Tata wa mina u ndzi vutise xivutiso lexi kongomeke a ku: ‘N’wananga, xana ndzi ta va ni xivundza esirheni loko ndza ha yimele leswaku mfumo wu sungula ntirho wa wona wo tata misava hi ku hetiseka?’

“Xexo a ku ri xivutiso lexi jaha ri tsandzekeke ku xi hlamula hi ndlela leyi anerisaka eka nkulunkumba loyi a a rindzele leswi hambaneke.

“Loko ndzi hlamula ndzi n’wi vutisile ndzi ku: ‘Tatana, xana u etlele kahle vusiku bya matolo?’

“U hlamurile a ku: ‘Ina, n’wananga, ndzi etlele kahle endzhaku ka loko n’anga yi ndzi nyike tiphilisi ta vurhongo.’

“‘Xana a wu ri ni xivundza loko u etlele?’

“‘Doo, a xi nga ri kona. Ndzi navela onge ndzi nga etlela nkarhi hinkwawo, hikuva hi nkarhi wolowo a ndzi twi xitlhavi.’”

Kutani A. H. Macmillan u hlayele tata wa yena Yobo 14:13-15 na 3:17-19 kutani a ku: “Kutani wa swi vona tatana, vafi va le ka vurhongo bya rifu naswona a va tivi nchumu loko va ri eka xiyimo xexo, kutani va nga va ni xivundza hi ndlela yihi?”

Vona dyondzo yonghasi! Loko u ri un’wana wa Timbhoni ta Yehova, na wena u nga ha tirhisa matsalwa ni swikombiso leswi pfuxaka mianakanyo ni mbilu.

Ku Kuma Swikombiso

Kambe xana hi nga swi kuma kwihi swikombiso leswi humelelaka ni mintokoto ya ntiyiso ya vutomi? Swo tala swi nga ha humesiwa eka rifuwo ra wena leri humaka eka ntokoto wa munhu hi xiyexe. Hi xikombiso, xana wa swi lava ku kombisa mikateko ya ripfumelo, matimba ya xikhongelo kumbe ntsako wa vutirheli? Loko u ri Mukriste la tinyiketeleke, hi ku fanana u nga ha hlamusela swiendlakalo swo hambana-hambana evuton’wini bya wena n’wini. U nga ha twa mintokoto leyinene emihlangan’weni ya bandlha kumbe loko u vulavula ni Vakriste kulobye. Kumbe u nga ha hlaya ntokoto lowu khutazaka eka Yearbook of Jehovah’s Witnesses. Nakambe, Watch Tower Publications Index yi kombetela eka mintokoto leyi gandlisiweke yo huma emisaveni hinkwayo.

Xana u nga wu hlamusela njhani ntokoto hi laha ku humelelaka? Hi xikombiso, ku vumba mhaka leyi tsakisaka swi ta ku pfuna ku koka nyingiso wa vayingiseri va wena. U nga ha sungula ntokoto hi ku: “Phayona rin’wana ri sungule ku vona ndlela leyi Yehova a katekisaka lava n’wi tshembaka ha yona.” Xikan’we-kan’we, vayingiseri va wena va ta lava ku tiva mikateko leyi muhuweleri wa nkarhi hinkwawo wa Mfumo a yi tsakeleke. Tiyiseka leswaku wa va byela.

Ringeta ku hlamusela ntokoto hi marito ya wena. Nyikela timhaka, hikuva hi ku endla tano swi engetela ku tsakela emhakeni. Hi ku hlamusela mhaka leyi twalaka ya xiyimo lexi katsekeke, u nga ha susumeta vayingiseri va wena hi ku olova. Kambe tiyiseka leswaku a wu ngheneleli ngopfu eku va byeleni ka mhaka lerova va tsandzeka ku twisisa leswaku ha yini u hlamusela ntokoto. Nakambe, papalata ku swi hundzeleta, hikuva hambi loko leswi swo endla mhaka yi tsakisa ngopfu, swi nga ha onha ntiyiso wa wena. Eka xivangelo lexi fanaka, papalata ku hundzisa mavari-vari kumbe ku hlamusela ntokoto lowu u nga riki ni vumbhoni bya wona.

Ku Endla Bibele Yi Dyondzisa

Mintokoto leyi dyondzisaka swinene yi kumeka eBibeleni hi yoxe. Hi xikombiso, kumbexana u lava ku komba xichudeni xa Bibele kumbe vayingiseri leswaku vana va nga yimela Yehova Xikwembu. U nga ha anakanya ku tirhisa mhaka ya nhwana la nga boxiwangiki la vulavuleke ni nsati wa Namani hi Elixa muprofeta wa Yehova. Xo sungula, hlaya mhaka leyi nga eka 2 Tihosi 5:1-5. Kutani u nga ha vutisa: “Xana u anakanya leswaku a swi nonon’hwa ku fikela kwihi eka nhwana loyi ku hlayisa vutshembeki eka Xikwembu etikweni ra vugandzeri bya mavunwa? Xana a swi nga lavi xivindzi eka yena ku vulavula hi laha swi tshembisaka hi Yehova ni muprofeta wa yena?”

Ku lavisisa ka le mahlweni ku nga ha va ku ku pfunile ku endla leswaku mhaka yi dyondzisa. U nga ha va u kume rungula leri pfunaka ehansi ka swihloko leswi nge NAAMAN, SYRIA na ELISHA eka Watch Tower Publications Index. Tinhlamuselo ta le tlhelo eka Tibibele tin’wana ti nga ha va ti ku kongomise eka mhaka leyi nga eka 2 Tihosi ku ya eka Psalma 148:12, 13, laha hi hlayaka: “Madžaha ni v̌anhwana, ŝikoša ni v̌ana! A v̌a ḍunise v̌ito ra Yehova! Hikuv̌a v̌ito ra yena hi rona ntsena le’ri tlakukeke, v̌uhosi bya yena byi tlakukile ku tlula misav̌a ni matilo.” Vona xikhutazo xonghasi eka vantshwa lava vulaka rito ra Xikwembu hi xivindzi!—Mintirho 4:29-31.

Loko u ri mutirheli wa Mukriste, ‘nyikela nyingiso lowunene eka dyondzo ya wena’ emhakeni leyi. (1 Timotiya 4:16) U nga vulavuli ntiyiso ntsena—wu kombise. Endla timhaka ta Bibele ti tsakisa ni ku vula xa nchumu. Tirhisa mintokoto ni swifaniso leswi fanelekaka. Leti i tindlela to fikelela mbilu.

[Nhlamuselo ya le hansi]

[Xifaniso lexi nga eka tluka 29]

Ku fana na Yesu, malandza ya Vukriste ya namuntlha ya nga tirhisa swifaniso leswi nyanyulaka ku hundzisa rungula ra wona ni ku fikelela timbilu