Xiviko Xa Vahuweleri Va Mfumo

‘Va Tsaka Lava Nga Ni Ndlala Ya Moya’

YESU u te: “Ku katekile swisiwana emoyeni.” (Matewu 5:3) Vanhu vo tano va ta lava rungula leri nyikaka vutomi leri humaka eRitweni ra Xikwembu, Bibele, naswona ku amukela vutivi lebyi swi ta va yisa evuton’wini lebyi nga heriki.—Matewu 4:4; Yohane 17:3.

◻ Munhu la nga ni ndlala ya moya etikweni ra Afrika u fambe tiawara ta mune exirhamini ni le xinyamini leswaku a ya kuma kopi ya Buku Yanga Ya Timhaka Ta Bibele. Loko a fika emutini lowu Timbhoni ta Yehova a ti chumayela kona, a a hele matimba ku kuma leswaku buku yo hetelela yi fambisiwile. U tshame emutini ku ringana masiku manharhu ku kondza loko mphakelo lowu engetelekeke wa tibuku wu kumeka, kutani eku heteleleni u tsakile ku va a kume rungula leri lerinene ra moya.

Hi n’hweti ya tona ya ku tshama endhawini leyi yi nga yoxe, Timbhoni ti hangalase tibuku ta 55, tibroxara ta 365 ni timagazini ta 145, naswona va kume swikhokhelo swa 5. A va tsake ngopfu, loko va suka, vana ni lavakulu va va huwelela hi ririmi ra Xikipele va ku: “Onge Yehova a nga va na n’wina!” Matshalatshala ma endliwile ku landzelela ku tsakela.

Munhu un’wana etikweni rero na yena a a ri ni ndlala ya moya. A a ri mukhomi wa mali ya kereke ya yena ni mulanguteri wa vutihungasi wa tiko ra ka vona. Loko Timbhoni ti fika eka yena, hi mihloti u pfumerile leswaku kereke yi tsandzekile ku fikelela swilaveko swa Bibele swa Vukriste. Timbhoni ti n’wi kombe eBibeleni ya yena ndlela leyi a nga vonaka vukhongeri bya ntiyiso ha yona. Kutani u ve kona eka mihlangano mimbirhi eHolweni ya Mfumo naswona endzhaku u te: “Leswi ndzi swi voneke ni ku swi twa hakunene swi ndzi khorwisile leswaku leswi i ntiyiso.” U nyanyuriwe hi minhlangano ni mahanyelo ya lava a va ri kona. U vone leswaku leswi Timbhoni leti teke eka yena ti swi vuleke a ku nga ri swilo leswi va lorheke ha swona kambe i swilo swa ntiyiso. Kutani u sungule ku teka magoza yo tsema vuxaka bya yena ni kereke, naswona leswi swi nyikele vumbhoni lebyinene evan’hwini.

◻ Muntshwa un’wana la nghenaka Katekizimu wa Melanesia eNew Caledonia a a ri ni ndlala ya moya. U kume kopi ya buku leyi nge Ntiyiso Lowu Yisaka eVuton’wini Lebyi Nga Heriki etafuleni endlwini ya mana wa yena, naswona u hlaye tindzima 2 na 3. Matsalwa ya Bibele ya Eksoda 20:4, 5 na Yohane 4:23, 24 lama hlamuseriweke kwalaho ya khumbe mbilu ya yena. Hi ku vona leswi matsalwa lawa ma swi vulaka, u vutise muprista wa yena mhaka leyi ha yona Kereke ya Khatholiki yi yaka emahlweni yi tirhisa swifaniso evugandzerini bya yona. Muprista u balekele xivutiso. Munhu loyi u ye eka vukhongeri byo hlayanyana bya “Vukriste,” kambe a va n’wi nyikangi nhlamulo leyi anerisaka eka swivutiso swa yena. Eku heteleleni u ehlekete ku ya eka nhlangano wa Timbhoni ta Yehova ni mana wa yena, loyi ana se a a kombise ku tsakela ntiyiso. Rirhandzu leri a ri voneke exikarhi ka Timbhoni ni tidyondzo ta vona leti sekeriweke eBibeleni swi n’wi tsakise ngopfu.

Ku nga khathariseki mpfhuka lowukulu, a a hamba a khandziya mimovha loko a ya eminhlanganweni, hi ku hatlisa a teka xiyimo xa ntiyiso, naswona u khuvuriwile. Sweswi i nandza wa vutirheli. Mana wa yena ni vamakwavo va yena vambirhi va xisati na vona va ve Timbhoni ta Yehova. Jaha leri ri chumayele eka rixaka ra ka vona naswona ri sungule tidyondzo to tala ta Bibele. Sweswi ku ni vanhu vo hlayanyana lava vaka kona emihlanganweni endhawini leyi—hinkwaswo swi humelele hikwalaho ka jaha leri xiyeke buku leyi nga etafuleni leyi hlamuselaka Bibele, ri yi hlaya ni ku teka leswi ri swi hlayeke swi ri swa nkoka.

Yehova u ni nongonoko lowukulu wo wundla hi tlhelo ra moya lowu tirhaka namuntlha, naswona mintshungu ya pfuneka ha wona. Esaya hi ku fanela u profetile hi swona loko a ku: “Maŝivo, malanḍa ya mina ma ta dya, kambe ṅwina [swirho swa vukhongeri byo hemba] mi ta v̌a ni ndlala.” (Esaya 65:13) Ha tsaka loko hi pfuneka eka lunghiselelo ra Yehova ra leswaku a anerisa ndlala ya hina ya moya.