Xiviko Xa Vahuweleri Va Mfumo
Ku Enerisa Lava Nga Ni Ndlala Ya Moya—eXikolweni
“VA TSAKA lava khathalelaka xilaveko xa vona xa moya,” ku vula Yesu eDyondzweni yakwe ya le Ntshaveni. (Matewu 5:3, NW) Vana vo tala lava nga exikolweni va ni torha ra ku tiva Xikwembu ni swikongomelo swa xona leswi hlamarisaka. Va lava tinhlamulo ta swivutiso leswi khumbaka vutomi naswona va lava ku tiva ndlela leyi va faneleke ku hanya ha yona leswaku va amukeriwa hi Xikwembu, kutani va kuma ntsako. Leswi a swi tikomba le xikolweni xa le Swihlaleni swa Virgin leswi lawuriwaka hi Britain. Un’wana wa Timbhoni ta Yehovha kwalaho wa hlamusela:
◻ “Ndzi ve kona eka nhlangano wa vatswari ni mathicara exikolweni xa ka hina, naswona ku hlamuseriwe swo tala malunghana ni swidzidzirisi, ku nwa, ku gangisana, ku hlalela TV, mimpimo ya vuswikoti bya swichudeni etidyondzweni, ni timhaka tin’wana, kutani ndzi bohe ku teka buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, ndzi yi nyika nhloko ya xikolo ya xisati. Endzhaku ko kambisisa buku leyi, u vule leswaku rungula ra yona hi rona leri a va lava rona, ivi a vutisa loko swi nga koteka leswaku xikolo xi kuma tikopi leti nga ta ringana swichudeni swa 120. Ku buriwe hi mhaka leyi ni vakulu va vandlha, kutani va fikelele makumu yo nyikela hi tibuku leti exikolweni. Loko hi boxa mhaka leyi, mathicara ma kombele leswaku hi yisa tibuku leti eka swichudeni. Ku ye Timbhoni timbirhi, naswona tlilasi a yi tele hi swichudeni, swi va rindzerile. Vamakwerhu va vulavule hafu ya awara, naswona ku hlayiwe mintokoto leyi kombisaka ndlela leyi buku leyi yi pfuneke lavatsongo ni lavakulu ha yona eka timagazini ta Sosayiti ya Watch Tower. Kutani swichudeni swi nyikiwe tibuku leti a swi ti langutele hi mahlo ngati.”
Swa tsakisa ku tiva leswaku xikolo lexi xi fikelele makumu yo tirhisa buku leyi tanihi xiphemu xa tidyondzo ta nkarhi na nkarhi eka ntlawa wa lembe ra vumune ni ra vuntlhanu. Hakunene yi ta hlamula swivutiso swo tala leswi swichudeni leswi swi nga na swona malunghana ni vutomi ni vumundzuku.
Ku Enerisa Lava Nga Ni Ndlala Ya Moya—Le Papua New Guinea
Ntokoto lowu landzelaka wu kumiwe eka mulanguteri la famba-fambaka. Wu kombisa mpimo wa ndlala ya moya leyi vanhu va tiko rero va nga na yona, ni ndlela leyi tibuku ta hina leti sekeriweke eBibeleni ti humelelaka ha yona eku eneriseni ka ndlala ya vona.
◻ “Tanihi leswi a ndzi hluleka ku endzela muti wa Kamberatoro,” ku vula mulanguteri loyi, “ndzi hete nkarhi wa mina ndzi ri karhi ndzi tirha ni vandlha leritsongo ra le Vanimo. Ku ni vanhu vo tala lava tsakelaka laha. Vanhu vo hlayanyana va le Bewani va amukele tibuku. Wanuna un’wana u ndzi kombele leswaku ndzi endzela muti lowu, a vula leswaku u ta ndzi lunghiselela ndhawu yo tshama eka yona. Vanhu vo tala va tolovelane na tona tibuku ta hina. Nkarhi na nkarhi loko hi ya edorobeni ra Vanimo, a hi heleriwa hi tibuku, hambi ho famba ni mabokisi manharhu. Buku Yanga Ya Timhaka Ta Bibele yi tekiwa tanihi ya risima swinene. Vanhu va famba va lavana na yona. Tibuku leti ndzi fambeke na tona ti tekiwe hi ku hatlisa swinene. Loko hi kombisa vanhu tibuku ta hina, van’wana a va vutisa va ku: ‘Yi kwihi buku leya xitshopana?’ Wanuna un’wana u ode tsevu wa tona. U ndzi nyike vito ni adirese ya yena, a ndzi kombela leswaku ndzi endla leswaku swi tivisiwa eka xiya-ni-moya loko ndzi ti kumile. Kutani yena a a ta suka emutini wa ka vona a ta ti teka.” Mulanguteri la famba-fambaka wa tlhandlekela: “Ndzi kume leswaku vanhu vo tala le Vanimo va ni tibuku leti nge Ku Lavisisa Ka Vanhu Xikwembu na Swivutiso Leswi Vantshwa Va Swi Vutisaka—Tinhlamulo Leti Tirhaka.”
Leswi swi kombisa ndlela leyi ha yona vanhu va timbilu leto tshembeka va nga ni ndlala ya swakudya swa moya leswi kumekaka eBibeleni ni tibuku leti Yehovha a ti lunghiseleleke hi ku tirhisa “nandza la tshembekaka, wo tlhariha.” (Matewu 24:45-47) Timbhoni ta Yehovha ti tsakile swonghasi hi leswi ti kotaka ku pfuna vanhu lava va nga ni ndlala ya ntiyiso!
[Xifaniso lexi nga eka tluka 19]
Ku nyikela vumbhoni le Papua New Guinea