Xiviko Xa Vahuweleri Va Mfumo Ku Hlula

Mintlhontlho “eTikweni Ra Leswi Nga Languteriwangiki”

MUAPOSTOLA PAWULO u vutise Vakreste va lembe-xidzana ro sungula le Korinto a ku: “Ni loko mhalamhala yi nga pfumi swinene, i mani la nga ta hloma matlhari ya nyimpi xana? Swi tano na n’wina, loko mi vulavula hi ririmi leri nga tiviwiki. Ehandle ka loko mi humesa rito leri twalaka, xana vanhu va ta tivisa ku yini leswi mi swi vulaka?”—1 Vakorinto 14:8, 9. Le Papua New Guinea, leri minkarhi yin’wana ri vitaniwaka Tiko ra leswi nga Languteriwangiki, Timbhoni ta Yehovha ti hlangavetana ni swihinga leswi chavisaka loko ti ri karhi ti chumayela rungula leri twisisekaka ra Bibele. Ti chumayela eka vanhu lava vulavulaka tindzimi to hambana-hambana to tlula 700 naswona va ni mindhavuko yo hambana-hambana. Timbhoni ti tlhela ti langutana ni tindhawu leti nga ni tintshava, ku pfumaleka ka mapato ni ku andza ka vugevenga. Handle ka swiphiqo leswi hinkwaswo, ku ni ku kanetiwa loku humaka eka mintlawa ya vukhongeri, naswona minkarhi yin’wana, hambi ku ri eka mathicara eswikolweni. Hambiswiritano, ndzetelo lowunene wa moya ni layiburari leyi kulaka ya swipfuneto swo dyondza Bibele hi tindzimi ta kwalaho swi hlomisela Timbhoni ku yisa mahungu lamanene tanihi mhalamhala leyi pfumaka swinene. Hakanyingi n’wangulo wa kona i wunene, hilaha xiviko lexi landzelaka xi kombisaka hakona:

• Eku sunguleni ka lembe lerintshwa ra xikolo, mudyondzisi u lave ku tiva lexi endlaka vana va Timbhoni ta Yehovha va nga losi mujeko kumbe ku yimbelela risimu ra rixaka. U kongomise xivutiso xa yena eka Maiola, xichudeni xa malembe ya 13 hi vukhale lexi nga Mbhoni leyi khuvuriweke. Maiola u n’wi nyike nhlamuselo leyinene, leyi sekeriweke eMatsalweni. Mudyondzisi u amukele nhlamuselo ya yena tanihi leswi a yi huma eBibeleni. Nhlamuselo ya yena yi tlhele yi byeriwa vatirhi hinkwavo va le xikolweni. Endzhakunyana, loko swichudeni swi averiwe ku tsala switsalwana, Maiola u hlawule nhloko-mhaka ya Vunharhu-un’we. Xitsalwana xa yena xi swi tlule hinkwaswo etlilasini, naswona mudyondzisi u n’wi vutisile leswaku u ri kume kwihi rungula leri. U n’wi kombe buku leyi nge U Nga Hanya Hi Masiku aParadeyisini eMisaveni hi ririmi ra Xinghezi. Mudyondzisi u ye emahlweni a komba tlilasi hinkwayo buku leyi, naswona vo tala va tilavele tikopi ta vona vini. Siku leri tlhandlamaka, Maiola u fambise 14 wa tibuku na 7 wa timagazini eka vadyondzi-kulobye, naswona u sungule tidyondzo ta Bibele ni van’wana vanharhu. Pakani ya Maiola i ku va mutirheli wa nkarhi hinkwawo.

• Ntlawa lowu nga woxe wa Timbhoni ta Yehovha eximutanini xa le ribuweni ekusuhi ni Hlaluko ra Moresby wu langutane ni nkaneto ku sukela eku sunguleni ka va-1970. Hambiswiritano, sweswinyana wu kume mpfuno eka xihlovo lexi a wu nga xi langutelanga. Bixopo wa Kereke ya United wa kwalaho, muaka-tiko wa le Papua New Guinea loyi a dyondzeke entsungeni wa malwandle, u kombele ku vutisiwa swivutiso hi vayingiseri ekerekeni siku rin’wana. Wanuna un’wana u vutisile: “Ku ni vukhongeri byimbirhi emutini wa ka hina—ku nga Kereke ya United na Timbhoni ta Yehovha. Xana hi fanele hi endla yini loko Timbhoni ti ta emakaya ya hina?” Endzhaku ka ku yima nkarhi wo leha, bixopo u te: “Wa tiva, a ndzi tivi leswaku ndzi nga ku byela yini. Sweswinyana, Timbhoni timbirhi ti tile ekaya ka mina. Ti ndzi vutise xivutiso, a ndzi nga yi tivi nhlamulo ya kona, ku nga khathariseki dyondzo ya mina hinkwayo ya le yunivhesiti. Kambe ti ndzi nyike nhlamulo hi ku olova yi huma eBibeleni. Kutani a ndzi nge mi byeli leswaku mi endla yini—ndzi ta swi tshikela n’wina. Loko mi nga lavi ku ti yingisela mi nga yingiseli, kambe mi nga ti kariheli.” Muyimeri la famba-fambaka wa Sosayiti ya Watch Tower loyi endzhakunyana a endzeleke ntlawa lowu wa Timbhoni u te: “Vanhu vo tala emutini va yingisele Timbhoni loko ti ri karhi ti chumayela. Van’wana va tlhele va va rhamba emakaya ya vona. Sweswi i ndhawu yo tsakisa ku chumayela eka yona.”