Tsakani Hi Ntshembo Wa Mfumo!

“Tsakani eku languteleni, mi tiyisela emaxangwini.”—VARHOMA 12:12.

1. Ha yini hi kuma ntsako hi ku tihlanganisa na Yehova, naswona muapostola Pawulo u khutaze Vakriste ku endla yini?

“XIKWEMBU lexi tsakeke.” (1 Timotiya 1:11, NW) Vona ndlela leyi leswi swi hlamuselaka Yehova ha yona! Ha yini? Hikuva mintirho ya yena hinkwayo yi n’wi tisela ntsako. Hikuva Yehova i Xihlovo xa swilo hinkwaswo leswinene ni leswi tsakisaka, swivumbiwa swa yena hinkwaswo leswi tlhariheke swi nga kuma ntsako hi ku tihlanganisa na yena. Hi ku hatlisa, muapostola Pawulo u khutaze Vakriste ku tlangela lunghelo leri tsakisaka ra ku tiva Yehova Xikwembu, ra ku nkhensa mikateko ya Yena hinkwayo ya ntumbuluko leyi hlamarisaka, ni ku ti tsakela hi tintswalo ta rirhandzu leti A va kombisaka tona. Pawulo u tsarile: “Titsakeleni eHosini masiku hinkwawo; ndzi tlhela ndzi vurisa sweswo, ndzi ri: Titsakeleni!”—Vafilipiya 4:4; Psalma 104:31.

2. I ku langutela kwihi loku tisaka ntsako, naswona Vakriste va khutaziwa ku endla yini malunghana ni ku langutela loku?

² Xana Vakriste va xi hlayisa xikhutazo lexi Pawulo a xi nyikeleke? Hakunene va xi hlayisa! Vamakwavo va Yesu Kriste va moya va tsaka hi ntshembo lowu kwetsimaka lowu Xikwembu xi va nyikeke wona. (Varhoma 8:19-21; Vafilipiya 3:20, 21) Ina, va swi tiva leswaku va ta hlanganyela eku hetisiseni ka ntshembo lowu lowukulu wa vumundzuku bya vanhu, hinkwavo lava hanyaka ni lava feke, hi ku tirha na Kriste eka hulumendhe ya yena ya Mfumo wa le tilweni. Anakanya ndlela leyi va nga ta tsakela malunghelo ya vona yo va vadyandzhaka-kulobye ha yona, va tirha tanihi tihosi na vaprista! (Nhlavutelo 20:6) Mawaku ntsako lowu va nga ta wu kuma loko va ri karhi va pfuna vanhu lava tshembekaka leswaku va fikelela ku hetiseka naswona va pfuna ku kongomisa ku kondleteriwa ka Paradeyisi emisaveni ya hina! Entiyisweni, malandza ya Xikwembu hinkwawo ma na “xisekelo xa ntshembo wa vutomi lebyi nga heriki lebyi Xikwembu, lexi nga hembiki, xi wu tshembiseke khale koloko.” (Tito 1:2, NW) Hi ku vona ntshembo lowu lowunene, muapostola Pawulo u khutaza Vakriste hinkwavo a ku: “Tsakani eku languteleni.”—Varhoma 12:12.a

Ntsako Wa Ntiyiso—Mfanelo Ya Mbilu

3, 4. (a) Xana rito ‘ku tsaka’ ri vula yini, naswona Vakriste va fanele ku tsaka kangani? (b) Ntsako wa ntiyiso i yini, naswona wu titshege ha yini?

³ ‘Ku tsaka’ swi vula ku va ni ntsako ni ku wu kombisa; a swi vuli ku va exiyin’weni xa ku nyanyuka, kumbe xa ku va ni ntsako lowu nga lawulekiki nkarhi hinkwawo. Maendli lama yelanaka ni marito ya Xiheveru ni ya Xigriki lama tirhisiweke eBibeleni ku vula “ntsako,” “ku nyanyuka,” na “ku titsakela” ma hlamusela ntsako wa le ndzeni ni lowu kombisiwaka ehandle. Vakriste va khutaziwa ku ‘hambeta va titsakela,’ “tshamani mi tsakile.”—2 Vakorinto 13:11; 1 Vatesalonika 5:16.

⁴ Kambe munhu a nga swi kotisa ku yini ku tshama a tsakile? Leswi swa koteka hikuva ntsako wa ntiyiso i mfanelo ya mbilu, ya moya, ya le ndzeni swinene. (Deuteronoma 28:47; Swivuriso 15:13; 17:22) I mfanelo ya moya wa Xikwembu, leyi Pawulo a yi xaxameteke endzhaku ka rirhandzu. (Vagalatiya 5:22) Tanihi leswi yi nga mfanelo ya le ndzeni, a yi titsheganga eka swilo swa le handle, hambi ku ri eka vamakwerhu va hina. Kambe yi titshege eka moya wa Xikwembu lowo kwetsima. Naswona yi huma eka ku aneriseka lokuya ka le ndzeni swinene ka ku tiva leswaku u na ntiyiso, ku langutela ka Mfumo, ni leswaku u endla leswi tsakisaka Yehova. Hikwalaho, ntsako a hi mfanelo ntsena ya vumunhu leyi hi velekiwaka na yona; i xiphemu xa “munhu lontshwa,” nhlengeleto wa timfanelo leti hlawulaka Yesu Kriste.—Vaefesa 4:24; Vakolosa 3:10.

5. Minkombiso ya ntsako wa le handle yi nga va kona rini naswona hi ndlela yihi?

⁵ Hambi leswi ntsako wu nga mfanelo ya mbilu, kambe wu nga ha kombisiwa ehandle minkarhi yin’wana. Xana ntsako wu nga kombisiwa njhani ehandle minkarhi yin’wana? Ku nga ha va hi ndlela yihi na yihi ku sukela eku ntshunxekeni ka xikandza ku ya eku khaneni ka xiviri hi ntsako. (1 Tihosi 1:40; Luka 1:44; Mintirho 3:8; 6:15) Hikwalaho ke, xana leswi swi vula leswaku vanhu lava va nga vulavuliki ngopfu kumbe lava nga tshameliki ku n’wayitela a va na ntsako? Doo! Ntsako wa ntiyiso a wu tikombisi hi ku bula, ku hleka, ku n’wayitela, kumbe ku hlekelela minkarhi hinkwayo. Swiyimo swi vangela ntsako leswaku wu tikombisa hi tindlela to hambana-hambana. A hi ntsako wu ri woxe lowu hi endlaka hi twanana eHolweni ya Mfumo kambe, ku ri na sweswo, i ku twelana ni rirhandzu ra hina ra vumakwerhu.

6. Ha yini Vakriste va tsaka nkarhi hinkwawo hambi loko va langutane ni swiyimo leswi nga tsakisiki?

⁶ Xivumbeko xa ntsako xa nkarhi hinkwawo i vukona bya wona bya le ndzeni, bya nkarhi hinkwawo tanihi xivumbeko xa le mbilwini xa vumunhu lebyintshwa bya Mukriste. Leswi hi swona swi endlaka swi koteka leswaku ku tsakiwa minkarhi hinkwayo. Phela, minkarhi yin’wana hi nga ha khunguvanyisiwa hi nchumu wo karhi, kumbe hi nga ha langutana ni swiyimo leswi nga tsakisiki. Kambe hi nga ha tama hi va na wona ntsako etimbilwini ta hina. Vakriste van’wana va khale a a va ri mahlonga, va ri ni vini lava karhataka. Xana Vakriste vo tano a va ta va na wona ntsako minkarhi hinkwayo? Ina, hikwalaho ka ntshembo wa vona wa Mfumo ni ntsako etimbilwini ta vona.—Yohane 15:11; 16:24; 17:13.

7. (a) Xana Yesu u te yini mayelana ni ku tsaka ehansi ka maxangu? (b) I yini lexi xi hi pfunaka ku tiyisela ehansi ka maxangu, naswona i mani la vekeke xikombiso lexinene emhakeni leyi?

⁷ Endzhakunyana ka loko muapostola Pawulo a te: “Tsakani eku languteleni,” u engetile a ku: “Mi tiyisela emaxangwini.” (Varhoma 12:12) Yesu na yena u vulavule hi ntsako ehansi ka maxangu loko a vule leswi eka Matewu 5:11, 12: “Mi ta kateka loko va mi rhuketela, loko va mi xanisa . . . tsakani, mi tsakisisa, hikuva hakelo ya n’wina i yikulu ematilweni.” Ku tsaka ni ku tsakisisa, laha a swi bohi leswaku ku va nkombiso wa le handle wa xiviri; kahle-kahle i ku aneriseka ka le ndzeni, loku munhu a vaka na kona hi ku tsakisa Yehova na Yesu Kriste hi ku khomelela swi tiya ehansi ka maxangu. (Mintirho 5:41) Entiyisweni, i ntsako, lowu wu hi pfunaka ku tiyisela ehansi ka maxangu. (1 Vatesalonika 1:6) Emhakeni leyi, Yesu u veke xikombiso lexinene ngopfu. Matsalwa ma hi byela: “A nga chavanga . . . ku byarha [mhandzi ya nxaniso] hikwalaho ka ku tsaka loku vekiweke emahlweni ka yena.”—Vaheveru 12:2.

Ku Titsakela Eku Languteleni Ku Nga Khathariseki Swiphiqo

8. Hi swihi swiphiqo leswi Vakriste va nga ha langutanaka na swona, kambe ha yini swiphiqo swi nga wu susi ntsako wa Mukriste?

⁸ Ku va nandza wa Yehova a swi n’wi suseli munhu swiphiqo. Ku nga ha va ni swiphiqo swa ndyangu, swiphiqo swa timali, rihanyo leri nga hetisekangiki, kumbe ku fa ka varhandziwa. Hambi leswi swilo swo tano swi nga ha vangaka gome, a swi xi susi xisekelo xa hina xa ku titsakela eku languteleni ka Mfumo, ntsako wa le ndzeni lowu hi nga na wona etimbilwini ta hina.—1 Vatesalonika 4:13.

9. I swiphiqo swihi leswi Abrahama a ri na swona, naswona hi swi tivisa ku yini leswaku a ri na ntsako embilwini ya yena?

⁹ Hi xikombiso, xiya Abrahama. Minkarhi yin’wana vutomi a byi nga n’wi tsakisi. A a ri na swiphiqo swa ndyangu. Nhlantswa ya yena, Agari, na nsati wa yena, Sara a va nga twanani. A ku ri na ku holova. (Genesa 16:4, 5) Iximayele a a endla fenya hi Isaka, a n’wi xanisa. (Genesa 21:8, 9; Vagalatiya 4:29) Eku heteleleni, nsati wa Abrahama la rhandzekaka, Sara, a fa. (Genesa 23:2) Ku nga khathariseki swiphiqo leswi, u titsakerile eku languteleni ka Mbewu ya Mfumo, Mbewu ya Abrahama, leyi ha yona mindyangu hinkwayo ya misava a yi ta tikatekisa ha yona. (Genesa 22:15-18) Hi ntsako lowu nga embilwini ya yena, u tiyiserile entirhweni wa Yehova hi malembe lama ringanaka dzana endzhaku ka ku siya muti wa rikwavo wa Ur. Hikwalaho ha yena ku tsariwe leswi: “A a langutele muti lowu nga ni masungulo lamanene, lowu muaki ni muendli wa wona xi nga Xikwembu.” Hikwalaho ka ripfumelo ra Abrahama eka Mfumo wa Vumesiya lowu taka, Hosi Yesu, loko ana se a vekiwe Hosi hi Xikwembu, u swi kotile ku vula a ku: “Abrahama u tsakile ngopfu ku vona siku ra mina; u ri vonile, a va a tsaka.”—Vaheveru 11:10; Yohane 8:56.

10, 11. (a) Hi yihi nyimpi leyi hina tanihi Vakriste hi langutaneke na yona, naswona hi kutsuriwa njhani? (b) I yini lexi hi pfunaka ku lwa hi laha ku hetisekeke eka nyimpi leyi yo lwa ni nyama ya hina ya vudyoho?

¹⁰ Tanihi vanhu lava nga hetisekangiki, na hina hi na nyama ya vudyoho leyi hi faneleke ku lwisana na yona, naswona nyimpi leyi yo lwela ku endla leswinene yi nga ha hi khomisa gome swinene. Hambi swi ri tano, ku lwisana ka hina ni ku tsana ka hina a swi vuli swona leswaku a hi na ku langutela. Pawulo u titwe a karhatekile hikwalaho ka nyimpi leyi, kutani a ku: “I mani la nga ta ndzi ntshunxa emirini lowu ndzi yisaka ku feni xana? A ku nkhensiwe Xikwembu ha Yesu Kriste, Hosi ya hina!” (Varhoma 7:24, 25) Ha Yesu Kriste ni nkutsulo lowu a wu nyikeleke, hi kutsuriwile.—Varhoma 5:19-21.

¹¹ Gandzelo ra Kriste ra nkutsulo ra hi pfuneta eka ku tsandzeka ka hina ku lwa nyimpi hi ku hetiseka. Hi nga titsakela hi nkutsulo lowu hikuva wu endla leswaku ku basisiwa ka mapfalo ni ku rivaleriwa ka swidyoho swa hina swi koteka. Eka Vaheveru 9:14, Pawulo u vulavula hi “ngati ya Kriste” leyi nga ni matimba ya ku “basisa mapfalo ya hina emintirhweni leyi nga pfuniki nchumu.” Xisweswo, mapfalo ya Vakriste a ma fanelanga ku tikeriwa hi ku tiavanyisa ni ku titwa nandzu. Leswi, ku katsa ni ntshembo lowu hi nga na wona, swi vumba matimba lamakulu ya ku tsaka loku tsakisaka. (Psalma 103:8-14; Varhoma 8:1, 2, 32) Loko hi anakanya ku langutela ka hina, hinkwerhu ka hina hi ta khutazeka leswaku hi lwa nyimpi hi laha ku humelelaka.

Ku Tshama Hi Ri Karhi Hi Tsundzuka Ku Langutela Ka Hina

12. I ku langutela kwihi loku Vakriste lava totiweke va nga anakanyaka ha kona?

¹² I swa nkoka leswaku masalela lama totiweke hi moya ni va tinyimpfu tin’wana va tshama va ri karhi va tsundzuka “ku langutela ka ku ponisiwa” ka vona, va ku ambala tanihi xihuku xa xisirhelelo. (1 Vatesalonika 5:8) Vakriste lava totiweke va nga ha anakanya hi lunghelo leronghasi ra ku kuma ku nga fi etilweni, va kota ku ya eka Yehova Xikwembu, ni ku tsakela xinghana xa xiviri na Yesu Kriste la Kwetsimisiweke ni vaapostola ni hinkwavo va 144 000, lava hlayiseke vutshembeki hi malembe xidzana yo tala. Mawaku vunghana byonghasi lebyi nga hlamuselekiki!

13. Xana vatotiwa lava ha riki emisaveni va titwisa ku yini hi ku langutela ka vona?

¹³ Xana vatotiwa va nga ri vangani lava ha riki emisaveni va titwisa ku yini hi ku langutela ka vona ka Mfumo? Leswi swi nga katsakanyiwa hi marito ya F. W. Franz, muungameri wa Sosayiti ya Watch Tower loyi a khuvuriweke hi 1913: “Ku langutela ka hina i nchumu wa xiviri, naswona ku ta hetisisiwa hi laha ku teleke ku fikela eka lowo hetelela wa lava 144 000 va swirho swa ntlhambinyana ku tlula mpimo lowu hi wu anakanyaka. Hina va masalela lava a hi ri kona hi lembe ra 1914, lava hinkwerhu a hi langutela ku ya etilweni, a hi yi lahlanga mianakanyo ya hina ya nkoka ya ku langutela loku. Kambe ha ha tiyile hi laha a hi ri ha kona, naswona hi ya hi ku tlangela swinene loko hi ya emahlweni hi ku langutela. I nchumu lowu faneriwaka hi ku wu yimela, hambi loko wu nga lava malembe ya miliyoni. Ndzi xiya ku langutela ka hina ku ri ka nkoka ku tlula rini na rini, naswona a ndzi swi lavi ku lahlekeriwa hi ku ku tlangela. Nakambe ku langutela ka ntlhambinyana ku nyika xitiyisekiso xa leswaku ku langutela ka ntshungu lowukulu wa tinyimpfu tin’wana, ku ta hetiseka na kona, ku tlula leswi hi anakanyisaka xiswona, a ku nge tsandzeki. Hi swona leswi swi hi endlaka hi khomelela ku fikela enkarhini lowu, naswona hi ta hambeta hi tiyisela ku kondza Xikwembu xi kombisa leswaku hakunene xi tiyisile eka ‘switshembiso swa [xona] leswikulu ngopfu, swa risima.’”—2 Petro 1:4; Tinhlayo 23:19; Varhoma 5:5.

Ku Titsakela Sweswi Eku Languteleni Ka Paradeyisi

14. Hi wihi ntshembo lowu ntshungu lowukulu wu wu hlayisaka emianakanyweni?

¹⁴ Nhlamuselo yo tano leyi tsakisaka ya ripfumelo yi nghenisa swivangelo leswi tiyeke swa ku tsaka, eka ntshungu lowukulu wa tinyimpfu tin’wana. (Nhlavutelo 7:15, 16) Lavo tano va fanele va tsundzuka ntshembo wa ku pona Armagedoni. Ina, va langutela ku vona Mfumo wa Xikwembu wu lwela vuhosi bya hinkwako-nkwako bya Yehova Xikwembu ni ku kwetsimisa vito ra yena leri kwetsimaka hi ku tisa mahlomulo lamakulu, lama nga ta susa vanhu lavo biha lava Diyavulosi a veke xikwembu xa vona emisaveni. Mawaku ntsako lowu nga ta va wona ku pona nhlomulo wolowo lowukulu!—Daniel 2:44; Nhlavutelo 7:14.

15. (a) Hi wihi ntirho wa ku hanyisa lowu Yesu a wu endleke loko a ha ri emisaveni, naswona ha yini? (b) Xana swilaveko swa rihanyo leswi nga ta laviwa hi vaponi va Armagedoni swi ta va swihi naswona ha yini swi hambanile eka swa lava va pfuxiweke?

¹⁵ Malunghana ni ntshungu lowukulu, Nhlavutelo 7:17 yi ri: “Xinyimpfana . . . xi ta va murisi wa vona xi ta va yisa eswihlobyeni swa mati ya vutomi, kutani Xikwembu xi ta sula mihloti hinkwayo emahlweni ya vona.” Hambi leswi vuprofeta lebyi byi hetisekaka hi tlhelo ra moya sweswi, vaponi va Armagedoni va ta byi vona byi hetiseka hi xiviri. Njhani? Xana Yesu u endle yini loko a ha ri emisaveni? U horise lava lamaleke, a endla swilema swi famba, a pfula tindleve leti pfalekeke ni mahlo lama nga voniki, a horisa nhlokonho, ku oma swirho ni “mavabyi ya tinxaka-xaka.” (Matewu 9:35; 15:30, 31) Xana sweswo a hi swona leswi Vakriste va swi lavaka namuntlha? Ntshungu lowukulu wu ta rhwala vulema ni mavabyi ya misava ya khale wu ya na swona emisaveni leyintshwa. Xana hi anakanya leswaku Xinyimpfana xi ta endla yini hi sweswo? Swilaveko swa vaponi va Armagedoni swi ta va swi hambane swinene ni swilaveko swa lava nga ta pfuxiwa. Lava va pfuxiweke va ta vumbiwa hi vuntshwa va ri na mimiri leyi nga ni rihanyo, leyi hanyeke kahle, ni leyi hetisekeke hambi leswi va nga ta va va ha ri na ku nga hetiseki ka vumunhu. Hikwalaho ka ku pfuxiwa loku ka singita, handle ko kanakana a va nge lavi ku lunghisiwa eka mavabyi yo karhi ya khale hi ku horisiwa hi singita. Hi tlhelo rin’wana, hikwalaho ka ntokoto wa vona lowu hlawulekeke wa ku pona Armagedoni, vo tala va ntshungu lowukulu va ta lava ku hanyisiwa hi singita naswona va ta hanyisiwa. Handle ko kanakana, xikongomelo-nkulu xa ku hanyisa ka Yesu a ku ri ku khutaza ntshungu lowukulu hi ntshembo lowu tsakisaka wa leswaku a wu nge poni ntsena, kambe wu ta tlhela wu hanyisiwa.

16. (a) Ku horisiwa ka singita eka vaponi va Armagedoni ku nga ha humelela rini, naswona vuyelo byi ta va byihi? (b) Hi nkarhi wa Gidi ra Malembe hi ta hambeta hi titsakela eka ntshembo wihi?

¹⁶ Ku horisa koloko ka singita ku endleka eka vaponi va Armagedoni endzhakunyana ka Armagedoni naswona ka ha sele nkarhi wo leha leswaku ku pfuxiwa ku sungula. (Esaya 33:24; 35:5, 6; Nhlavutelo 21:4; ringanisa Marka 5:25-29.) Kutani vanhu va ta cukumeta magilasi ya mahlo, minxongotelo, tinhonga ta swilema, rihlaka ra mavhilwa, meno yo endliwa, ni swipfuno swa ku twa, na swin’wana. Mawaku ntsako wonghasi! Vona ndlela leyi goza ro sungula ra ku kondletela, ra Yesu, ri fanelanaka ni xiphemu xa vaponi va Armagedoni, tanihi masungulo ya misava leyintshwa! Mavabyi lawa ma vavisaka ma ta herisiwa leswaku vaponi lava va ta hambeta va famba hi ku chivirika, va langutele ntirho lowu tsakisaka wa Gidi ra Malembe lowu nga emahlweni ka vona hi ku hiseka, va nga tshikileriwi hi minhlaselo leyi misava ya khale yi nga ha vaka yi yi tisile ehenhla ka vona. Naswona hinkwavo hi nkarhi wa Gidi ra Malembe va ta tsakela ntshembo wo fikelela mpimo lowu heleleke wa vutomi bya vanhu lebyi hetisekeke eku heleni ka malembe wolawo ya gidi.

17. I mintsako yihi leyi nga ta va kona loko ntirho wa ku kondletela Paradeyisi wu ya emahlweni?

¹⁷ Loko koloko ku ri ku langutela ka wena, anakanya hi ntsako wa ku hlanganyela eku kondleteleni ka Paradeyisi emisaveni. (Luka 23:42, 43) A swi kanakanisi leswaku vaponi va Armagedoni va ta pfuneta eku basiseni ka misava kutani xisweswo va lunghisa tindhawu letinene leti lava feke va nga ta pfuxeriwa eka tona. Minkosi yi ta siviwa hi minongonoko yo amukela lava pfuxiweke, ku katsa ni varhandziwa va hina lava feke. Naswona anakanya hi xinakulobye lexi fuwisaka xa ku va ni vavanuna ni vavasati lava tshembekaka va malembe xidzana lama hundzeke. I mani loyi ngopfu-ngopfu u lavaka ku vulavula na yena? Xana i Avele, Enoko, Nowa, Yobo, Abrahama, Sara, Isaka, Yakobo, Yosefa, Muxe, Yoxuwa, Rahava, Debora, Samsoni, Davhida, Eliya, Elixa Yeremiya, Ezekiyele, Daniyele, kumbe Yohane Mukhuvuri? Kutani ke, ntshembo lowu wu tsakisaka na wona i xiphemu xa ku langutela ka wena. U ta swi kota ku vulavula na vona, u dyondza eka vona naswona u tirha na vona eku endleni ka misava hinkwayo yi va paradeyisi.

18. I mintsako yihi yin’wana leyi hi nga yi anakanyaka?

¹⁸ Nakambe, anakanya hi swakudya leswi nga ni rihanyo, mati lama tengeke, ni moya lowu baseke, kun’we ni misava ya hina leyi kondleteriweke yi fuwa hi laha ku hetisekeke hi ndlela leyi Yehova a a yi vumbe ha yona eku sunguleni. Kutani ke, vutomi a byi nge he vi ku tsakela ku hetiseka ntsena kambe byi ta va ku katseka hi ku hiseka na hi xitalo eka mintirho leyi tsakisaka. Anakanya hi vanhu va misava hinkwayo lava ntshunxekeke eka vugevenga, manyunyu, mavondzo, ku holova—vumakwerhu lebyi mihandzu ya moya yi hlakuleriwaka ni ku humesiwa hi hinkwavo eka byona. Mawaku ku tsakisa ka swona!—Vagalatiya 5:22, 23.

Ku Langutela Loku Endlaka Vutomi Byi Va Bya Nkoka

19. (a) Xana ku titsakela loku boxiwaka eka Varhoma 12:12 ku ta kumiwa rini? (b) Ha yini hi fanele ku tiyimisela leswaku hi nga pfumeleli mindzhwalo ya vutomi yi susumetela ku langutela ka hina etlhelo?

¹⁹ Ku langutela loku hetisekeke a ka ha languteriwi, kutani ku tsaka loku Pawulo a vulavulaka ha kona eka Varhoma 12:12 ku ta kumiwa sweswi. (Varhoma 8:24) Ku anakanya ntsena hi minkateko leyi Mfumo wa Xikwembu wu nga ta yi tisa, swi hi endla hi tsakela ku langutela koloko sweswi. Kutani ke, tiyiseka leswaku a wu yi pfumeleli mindzhwalo ya vutomi emisaveni leyi onhakeke, yi susumetela ku langutela ka wena loku kwetsimaka etlhelo. U nga karhali ivi u hela matimba, u lahlekeriwa hi ntshembo lowu nga emahlweni. (Vaheveru 12:3) Ku cukumeta ndlela ya Vukriste a ku nge swi tlhantlhi swiphiqo swa wena. Tsundzuka, loko munhu a tshika ku tirhela Xikwembu hikwalaho ka mindzhwalo hinkwayo ya vutomi sweswi, wa ha tikeriwa hi mindzhwalo yoleyo, kambe u lahlekeriwa hi ku langutela naswona u lahlekeriwa hi ku tsakela mintshembo leyi hlamarisaka leyi nga emahlweni.

20. I nkucetelo wihi lowu ntshembo wa Mfumo wu nga na wona eka lava va wu hlayisaka, naswona ha yini?

²⁰ Vanhu va Yehova va tiyiseka leswaku va ta va ni vutomi lebyi tsakisaka. Ku langutela ka vona loku vangamaka, loku nyanyulaka ku endla vutomi byi va bya nkoka. Naswona a va wu tumbeti ntshembo lowu lowu tsakisaka. E-e, va hisekela ku wu avela van’wana. (2 Vakorinto 3:12) Kutani ke, lava hlayisaka ku langutela ka Mfumo i vanhu lava tiyisekaka, naswona va lava ku khutaza van’wana hi ku va byela mahungu lamanene lama humaka eka Xikwembu. Leswi swi endla leswaku vutomi bya lava amukelaka rungula hi ku langutela loku hlamarisaka swinene loku nga si tshamaka ku nyikiwa vanhu hinkwavo byi tsakisa—ntshembo wa Mfumo lowu nga ta kondletela Paradeyisi emisaveni. Loko vanhu va nga wu amukeli, ha ha ya emahlweni hi titsakela hikuva hi ni ku langutela. Lava va nga yingisiki va lahlekeriwa; hina a hi lahlekeriwi.—2 Vakorinto 4:3, 4.

21. I yini lexi nga ekusuhi, naswona ntshembo wa hina hi fanele hi wu langutisa ku yini?

²¹ Xitshembiso xa Xikwembu xi ri: “Vonani, ndzi endla swilo hinkwaswo swi va leswintshwa.” (Nhlavutelo 21:5) Misava leyintshwa leyi nga ni mikateko leyi tsakisaka leyi nga heriki yi tshinele. Ntshembo wa hina—wa vutomi etilweni kumbe eparadeyisini emisaveni—i wa nkoka; khomelela eka wona. Emasikwini lawa ya makumu lama nonon’hwaka ku tlula rini na rini, wu langute tanihi “mhingu ya moya[-xiviri] leyi tiyeke ni leyi tshembekaka.” Leswi hi nga na ku langutela loku tiyeke eka Yehova, “ribye leri nga heriki—Ribye ra minkarhi ni minkarhi,” hakunene ni sweswi hi na xivangelo lexi tiyeke ni lexi tsakisaka, xa ku ‘titsakela eku languteleni’ loku vekiweke emahlweni ka hina.—Vaheveru 6:19; Esaya 26:4, The Amplified Bible.

[Nhlamuselo ya le hansi]

Swivutiso Swa Mpfuxeto

◻ Hi kwihi ku langutela lokukulu ka vanhu?

◻ Ntsako wa ntiyiso i yini?

◻ Xana ku hanyisiwa ka singita ka vaponi va Armagedoni ku ta humelela rini?

◻ Ha yini hi nga fanelanga hi pfumelela mindzhwalo ya vutomi yi susumetela ku langutela ka hina etlhelo?

◻ I mintsako yihi leyi u yi langutelaka emisaveni leyintshwa?

[Xifaniso lexi nga eka tluka 9]

Xana mbilu ya wena a yi nge khapi hi ntsako hi ku vona ku hanyisa loku Yesu a tshameke a ku endla?

[Xifaniso lexi nga eka tluka 10]

Lava va titsakelaka eka Mfumo va khutaza van’wana hi ku va avela ntshembo wa vona