Xitiviso
Mpfuno Eka Tikomiti Ta Huvo Leyi Fumaka
Swirho swa Huvo leyi Fumaka ya Timbhoni ta Yehova, leswi sweswi swi nga 12 hi nhlayo, swi hambeta swi tirha hi ku tshembeka eswiavelweni swa swona. Minkarhi hinkwayo swi swi khensa swinene swirho swo tshembeka swa “ntshungu lowukulu” lowu andzaka, hi nseketelo ni ku chivirika ka swona. (Nhlavutelo 7:9, 15) Hikwalaho ka ku andza lokukulu emisaveni hinkwayo, swi tikomba swi fanela enkarhini wa sweswi ku nyikela mpfuno lowu engetelekeke eka Huvo leyi Fumaka. Xisweswo ku kungahatiwe ku rhamba vapfuni vo hlayanyana, ngopfu-ngopfu va ntshungu lowukulu, leswaku va katseka eka minhlangano yin’wana ni yin’wana ya Tikomiti ta Huvo leyi Fumaka, hi leswaku, Komiti ya Vatirhi, ya ku Kandziyisa, ya Ntirho, yo Dyondzisa ni yo Tsala. Xisweswo, nhlayo leyi vaka kona eka minhlangano yin’wana ni yin’wana ya tikomiti leti yi ta engeteriwa yi fika eka nkombo kumbe nhungu. Hi ku kongomisiwa hi swirho swa komiti ya Huvo leyi Fumaka, vapfuni lava va ta hlanganyela eku kaneleni ka timhaka naswona va ta endla swiavelo swin’wana leswi va nyikiwaka swona hi komiti. Endlelo leri lerintshwa ri ta sungula ku tirha hi May 1, 1992.
Emalembeni yo tala swinene ku fikela sweswi, nhlayo ya masalela ya Timbhoni leti totiweke a a yi ri karhi yi hunguteka, loko nhlayo ya ntshungu lowukulu yi andza ku tlula ndlela leyi a hi langutele ha yona. (Esaya 60:22) Hi khensa Yehova hi ku andza loku loku hlamarisaka! Loko vito lerintshwa leri nge Timbhoni ta Yehova, ri amukeriwe hi ku tsaka hi 1931, nhlohlorhi ya vahuweleri va Mfumo a yi ri 39 372, vo tala va vona va tivule leswaku i vamakwavo va Kriste lava totiweke. (Esaya 43:10-12; Vaheveru 2:11) Endzhaku ka malembe ya makume-tsevu, hi 1991, nhlohlorhi ya misava hinkwayo ya vahuweleri a yi ri 4 278 820, laha eka vona ku nga 8 850 ntsena lava tivuleke masalela lama totiweke. Hi laha a swi languteriwe ha kona hi ku ya hi Matsalwa, sweswi “ntshungu lowukulu” wu tlula masalela ya “ntlhambinyana” hi nhlayo yo tlula 480 eka 1. (Luka 12:32; Nhlavutelo 7:4-9) Leswaku ma khathalela swilaveko swa Mfumo leswi kulaka, masalela ma lava ntirhisano ni nseketelo wa ntshungu lowukulu naswona ma wu tlangela swinene.
Hi laha swi hlamuseriweke ha kona enkandziyisweni lowu wa Xihondzo xo Rindza, ku ni ntlawa lowu tirhaka na Israyele wa moya namuntlha lowu fanaka ni Vanethinimi ni vana va malandza ya Solomoni lava vuyeke hi le vuhlongeni bya Babilona ni masalela ya Vayuda; vanhu lava va nga riki va Israyele a a va tele ku tlula Valevhi lava vuyeke. (Ezra 2:40-58; 8:15-20) “Lava nyikiweke” exikarhi ka ntshungu lowukulu wa namuntlha i vavanuna va Vakriste lava wupfeke lava veke ni ntokoto lowu aneleke hikwalaho ko endla ntirho wo langutela marhavi, entirhweni wo famba-famba, ni le xikarhi ka mabandlha ya 66 000 lawa sweswi ma simekiweke emisaveni hinkwayo.
Sweswinyana, a ku ri ni Swikolo swa Vutirheli bya Mfumo emisaveni hinkwayo swo letela valanguteri ni vapfuni va vona ku nga malandza ya vutirheli. Le United States ntsena, a ku ri ni valanguteri va 59 420. Xisweswo “vakulukumba” lava va hlomiseriwe ku hetisisa vutihlamuleri bya vona hi ndlela leyi humelelaka.—1 Petro 5:1-3; ringanisa Vaefesa 4:8, 11.
Le yindlu-nkulu ya Timbhoni ta Yehova eBrooklyn, van’wana “lava nyikiweke” va tirhe malembe yo tala swinene. Lava va katsa valanguteri lava wupfeke vo huma eka ntshungu lowukulu lava va veke ni vuswikoti ni ntokoto lowukulu. Xisweswo, Huvo leyi Fumaka yi hlawule valanguteri vo tano va nga ri vangani leswaku va pfuna eminhlanganweni ya tikomiti ta Huvo leyi Fumaka. Lava a hi xikolokolo leswaku va va vavanuna lava nga ni rhekhodo ya ntirho leyi leheke swinene ku tlula ya van’wana. Kambe, i vavanuna lava wupfeke, lava nga ni ntokoto ni timfanelo leti va endlaka va kota ku nyikela mpfuno eka swivandla swokarhi. Ku averiwa ka vona leswaku va tirha ni komiti a ku va endli leswaku va va lava hlawulekeke hi ndlela yo karhi. Hi laha Yesu a vuleke ha kona eka vadyondzisiwa vakwe, “hinkwenu mi vamakwavo.” (Matewu 23:8) Hambi swi ri tano, vavanuna lava va ta byarhisiwa swilo swo tala, leswi vulaka leswaku ku “ta laviwa leswo tala” eka vona.—Luka 12:48.
Ha tsaka hi nhluvuko lowu nhlengeletano ya Yehova yi wu endlaka namuntlha. Emalembeni ya khume lama hundzeke, ku ve ni ku andza ka tiphesente ta kwalomu ka 100 eka nhlayo ya lava tirhaka ensin’wini, hi ku pfumelelana ni vuprofeta lebyi nga mayelana na Davhida Lonkulu, Yesu Kriste: “Ku andza ka hulumendhe yakwe ni ku rhula a ku nge vi na ku hela.” (Esaya 9:7, King James Version) Hi ndlela leyi fanaka ni leyi Vanetinimi va tirheke ha yona etlhelo ka vaprista eku lunghiseni ka makhumbi ya Yerusalema, ni namuntlha vuprofeta lebyi vulavulaka hi nhlengeletano ya Yehova bya karhi bya hetiseka: “V̌ana v̌a ṅeni v̌a ta aka rirhangu ra wena.” (Esaya 60:10; Nehemia 3:22, 26) Vanethinimi va manguva lawa va fanele va bumabumeriwa swinene hi ku chivirika ka vona eku akeni ka vugandzeri bya ntiyiso, va pfuna “v̌aprista v̌a Yehova” eka ntirho wihi na wihi lowu va nga averiwaka wona enhlengeletanweni ya Yehova ya misava hinkwayo.—Esaya 61:5, 6.