Tana eNtsombanweni Wa Muganga Wa “Vabyarhi Va Ku Vonakala”

“WAŜWIV̌O, munyama wu ta funengeta misav̌a, ni papa le’ra ntima ri ta v̌a henhla ka matiko.” (Esaya 60:2) Mawaku ndlela leyi marito lawa ma nga ya ntiyiso ha yona namuntlha! Handle ko kanakana, vukhongeri bya mavunwa byi veka vanhu emunyameni mayelana ni muxaka wa vugandzeri lebyi tsakisaka Xikwembu. Hikwalaho ka yini? Hikuva Sathana, xikwembu xa mafambiselo lawa ya swilo u “pfarile miehleketo ya vanhu lava va nga pfumeriki.”—2 Vakorinto 4:4.

Lava hambaneke ngopfu ni lava pfariweke mahlo hi Sathana, i Timbhoni ta Yehova. Marito ya muprofeta Esaya ma nga tirhisiwa eka vona, loko a ku: “Yehova u ta humelela, kutani ku twala ka yena ku ta v̌oninga henhla ka wena.” (Esaya 60:2) Vona ndlela leyi va nyanyukeke ha yona hi ku va va hume emunyameni va ta eku vonakaleni loku hlamarisaka ka Xikwembu! I ku vonakala ka moya, ntiyiso wa Rito ra Xikwembu lowu voningelaka mianakanyo, leswaku ni lava nga emunyameni wa xiviri va vona ntiyiso.

Kavula, ku laveka mpfuno. A swi olovi leswaku un’wana loyi a tihlayelaka Bibele handle ko tirhisa swipfuneto leswi lunghiseleriweke hi Xikwembu a vona ku vonakala. Hi yona mhaka leyi Yehova Xikwembu a nyikeleke “nandza la tshembekaka, wo tlhariha,” loyi a vhumbiweke eka Matewu 24:45-47. Namuntlha “nandza” yoloye u yimeriwa hi Huvo leyi Fumaka ya Timbhoni ta Yehova. Ntsombano lowu wa Muganga wa “Vabyarhi Va ku Vonakala” wu lunghiseleriwe ehansi ka nkongomiso wa huvo leyi.

Xikongomelo xa ntsombano lowu i ku pfuna vanhu hinkwavo va Yehova leswaku va va vabyarhi lavanene va ku vonakala, hi ku ya hi marito ya Pawulo eka Vafilipiya 2:15. Eka yona, Vakriste va khutaziwa ku vangama ku kota ‘timboni emisaveni.’—Matewu 5:14, 16.

EAfrika Dzonga, nongonoko wa Mintsombano ya Muganga ya “Vabyarhi Va Ku Vonakala” wu kunguhatiwe ku sungula hi Ravuntlhanu, December 11. Hi 10:20 a.m., nongonoko wa tinsimu wu ta pfuna hinkwavo leswaku va va exiyin’weni lexinene xa mbilu ni mianakanyo, va lunghekela nongonoko wa moya lowu taka. Siku rin’wana ni rin’wana ri ni nhloko-mhaka ya rona, naswona nhloko-mhaka ya Ravuntlhanu hi leyi nge, “Humesani Ku Vonakala Ka N’wina Ni Ntiyiso Wa N’wina.”—Psalma 43:3.

Nongonoko wa Ravuntlhanu wu ni nkulumo-nkulu leyi nge, “Vabyarhi Va Ku Vonakala—Hi Xikongomelo Xihi?” Entiyisweni, Vakriste a hi vabyarhi va ku vonakala hi nsusumeto wo karhi wa vona vini, wa vutianakanyi. Ematshan’wini ya sweswo, va tirha hi swivangelo swo fana ni leswi Yesu Kriste, Mubyarhi-nkulu wa ku Vonakala a swi teleke emisaveni, ku nga ku nyikela vumbhoni bya ntiyiso ni ku kwetsimisa vito ra Mutumbuluxi. Hi laha ku faneleke, malunghana na yena n’wini Yesu u te: “Loko ndza ha ri laha misaveni, ndzi ku vonakala ka misava.” (Yohane 9:5) Xisweswo, u hi boxele ntila leswaku hi landzelerisisa minkondzo ya yena. (1 Petro 2:21) Nhlikanhi wa siku rero ro sungula wu ta va ni nkulumo ni drama ya Bibele leyi vulavulaka hi Hosi Yosiyasi, leyi nga ta tsakisa swinene eka vantshwa.

Nhloko-mhaka ya Mugqivela hi leyi nge “Mi Ku Vonakala Ka Misava . . . Ku Vonakala Ka N’wina A Ku Voninge.” (Matewu 5:14, 16) Nongonoko wa ni mixo wu ta va ni nxaxamelo lowu nga ni xihloko lexi nge, “Ku Endla Ku Vonakala Ka N’wina Ku Voninga.” Ku ta va ni nkarhi wa lava tinyiketeleke eka Yehova leswaku va khuvuriwa. Nongonoko wa ni ndzhenga wu ta nyikela nxanxamelo lowu voningelaka lowu nga ni xihloko lexi nge “Ku Humesa Ku Vonakala Eka Vukona Ni Ku Humelela Ka Kriste.”

Nhloko-mhaka leyi hlawuleriweke Sonto, siku ra vunharhu ni ro hetelela ra ntsombano lowu, hi leyi nge “Fambani Ha Kona, Ku Kotisa Vana Va Ku Vonakala.” (Vaefesa 5:8) Nongonoko wa ni mixo wu ta va ni nxaxamelo lowu nga ni xihloko lexi nge “Ku Khathalelana eNdyangwini Wa Vukriste,” lowu wu nga ta vulavula hi mindzhwalo ya ndyangu. Ku ta tlhela ku va ni nkulumo leyi hlamuselaka leswaku swi vula yini ku titsongahata eka Xikwembu ni le ka Kriste.

Ntsombano wu ta fikela emaninginingini ya wona hi Sonto ni ndzhenga hi nkulumo ya le rivaleni leyi nga ni xihloko lexi nge “Landzelela Ku Vonakala Ka Misava.” Nkulumo leyi yi ta va ni nhlamuselo ya Yohane 1:1-16 naswona yi ta kombisa xilaveko xa vutivi bya Bibele, yi kandziyisa leswaku Yesu Kriste i ku vonakala ka misava. Ntsombano wu ta pfala hi xikhutazo xa matimba lexi nge “Hambetani Mi Famba Eku Vonakaleni.”

Kombisa ku tlangela ka wena nkhuvo lowu wa moya lowu Yehova a wu lunghiselelaka hi nhlengeletano yakwe leyi vonakaka. Vana kona ku sukela eka risimu ro pfula hi Ravuntlhanu ni mixo ku fikela eka xikhongelo xo pfala hi Sonto ni ndzhenga. Yingisela hi vukheta eka hinkwaswo leswi vuriwaka eplatifomo. Tsala tinhla leti nga ta ku pfuna leswaku u yingisela ni leswaku u languta eka tona nkarhi lowu taka. Xo hetelela, kunguhata ku hoxa xandla eka ntirho wo tirhandzela. Xisweswo, u ta tiphina ku nga ri hi mikateko leyikulu yo nyika ntsena, kambe ni hi mikateko yo amukela.—Mintirho 20:35.