Xana Yi Kona Ndlela Yo Huma Eka Xiyimo Xa Vudyoho Lexi Munhu A Nga Eka Xona?
CHISAKO swin’we ni vana va yena va kondlo-a-ndzi-dyi va mune, hi ntolovelo a a tirha ku basisa swihambukelo edorobeni-nkulu kwalomu ka tikhilomitara ta 600 ku suka ekaya ra yena. Loko a ri karhi a tirha, a a yimbelela risimu ra Xibudha, leri a a nga yi twisisi nhlamuselo ya rona. A a ku ri mukhuva wun’wana wa ntlawa wa vukhongeri lowu a wu lava ku tshubula xikongomelo xa vukhongeri hinkwabyo.
“Ku nga khathariseki ku ya emahlweni ni swiendlo swa ku tilan’wa,” Chisako wa tsundzuka, “a ndzi swi kotanga ku hundzula vumunhu bya mina. A ndzi nga swi koti ku rivalela van’wana embilwini ya mina naswona a ndzi nga swi koti ku kombisa rirhandzu hi mbilu hinkwayo.”
Hambi ku ri ematikweni ya le Vuxeni, laha vunyingi bya vanhu byi nga tiviki xidyoho lexi boxiweke eBibeleni, vo tala va biwa hi ripfalo loko va voyamela eka swidyoho, tanihi Chisako. (Varhoma 2:14, 15) Xana i mani loyi a nga si tshamaka a khomiwa hi gome hi ku nga kombisi vunene eka vanhu van’wana loko va ri eka swiyimo leswi vavisaka, kumbe la nga si tshamaka a tisola hikwalaho ka marito lama a ma nga fanelanga ku tirhisiwa? (Yakobo 4:17) Naswona xana nala luya wo biha, ku nga mavondzo, a nga ngheni eka lavantshwa ni lavakulu hi ku fanana?
Ha yini vanhu va ri ni mintlhaveko yo tano leyi karhatekaka? Hikuva hambi va swi xiya kumbe a va swi xiyi, va ni ku titwa ka le ndzeni eka leswi hoxeke, ka xidyoho. Hakunene, hambi vanhu va yi xiya dyondzo ya Bibele ya xidyoho kumbe a va yi xiyi, hinkwavo va khumbiwa hi mboyamelo wa vudyoho. Mutshila un’wana emhakeni leyi u gimete hi ku: “Vanhu hinkwavo va dyohile, hikokwalaho ku kwetsima loku a va nyikiwile hi Xikwembu, va ku pfumala.”—Varhoma 3:23.
Xana Xidyoho Xi Nga Suriwa?
Vanhu vo tala namuntlha, ngopfu-ngopfu eVujaganini, va le ku ringeteni ka ku susa mintlhaveko ya xidyoho ni nandzu emapfalweni ya vona. “Rito leri nge ‘xidyoho’ . . . se ri nyamalarile,” ku vule Dr. Karl Menninger ebukwini ya yena leyi nge Whatever Became of Sin? Hambi swi ri tano, ku papalata rito “xidyoho” swi pfuna katsongo ku fana ni mukhalabye la lavaka ku papalata rito “dyuhala”. Hi fanele hi langutana ni mhaka ya leswaku hi ni mimboyamelo ya vudyoho naswona hi lava ku ponisiwa eka ku hlupheka. Kambe hi mani?
Pawulo muapostola wa Mukriste u vutise xivutiso xexo endzhaku ko pfumela ku dyoha ka yena hambi leswi a a nga swi lavi ku endla tano, a ku: “Yoo! mina munhu wa khombo leronghasi! I mani la nga ta ndzi tshunxa emirini lowu wu ndzi yisaka eku feni xana?” Kutani Pawulo u ye emahlweni a hlamula: “A ku nkhensiwe Xikwembu ha Yesu Kriste, Hosi ya hina!” Ha yini? Hikuva Xikwembu xi lunghiselele ku rivaleriwa ka xidyoho hi gandzelo ra Yesu.—Varhoma 7:14-25.
Hambi swi ri tano, vunyingi bya lava nga riki Vakriste bya 3 500 000 000 (nhlayo ya lava tivulaka Vakriste yi andzisiwe kambirhi) va vona dyondzo ya nkutsulo yi nonon’hwa ku yi twisisa. Hi xikombiso, dyondzo ya nkutsulo yi ve xikhunguvanyiso lexikulu swinene eka Mumoslem la tshamaka eJapani loyi a nga dyondza Bibele nkarhinyana. Eka vunyingi bya lava tshamaka eVuxeni dyondzo ya leswaku munhu a nga fela hinkwavo i a yi tolovelekangi.
Leswi swa twisiseka, tanihi leswi ni van’wana eVujaganini va kumaka xisekelo xa dyondzo leyi xi nonon’hwa ku xi twisisa. New Catholic Encyclopedia yi te: “Eka swiphemu swin’wana ntivo-vukwembu wa Nkutsulo a wu fikeleriwanga naswona wu hambeta wu tiveka hi woxe tanihi xiphiqo eka ntivo-vukwembu.”
Mpimo wa mpfilungano eka dyondzo leyi wu kombisiwa kahle hi marito ya mutsari wa vukhongeri N. H. Barbour: “Rifu ra Kriste a ri nga ha ta tirha ku hakela xigwevo xa swidyoho swa munhu ku tlula leswi ku tlhava neleta emirini wa nhongana ivi u yi vangela ku xaniseka ni rifu a swi ta tekisiwa xiswona hi mutswari la nga munhu tanihi xigwevo lexi faneleke hikwalaho ko thyakisa n’wana wa yena.” Loyi a a tirhisana na Barbour, a a ri Charles T. Russell, loyi a nga vona xilaveko xa xihatla xo lwela dyondzo ya nkutsulo. U herise xinakulobye xa yena na Barbour naswona hi 1879 a sungula ku humesa magazini lowuntshwa, lowu endzhakunyana wu nga va magazini lowu u nga eku wu hlayeni. Ku sukela eku sunguleni ka xona, Xihondzo xo Rindza xi ve nghwazi ya gandzelo ra nkutsulo ra Yesu Kriste.
Xana dyondzo leyi yi nga amukeriwa hi lava nga tiviki masungulo ya “Vukriste”? Leswaku hi kumisisa leswi, a hi languteni hi vukheta eka dyondzo leyi ya munhu loyi a felaka hinkwavo.