Ala Mianakanyo Ya Hava Ya Misava, Landzela Mintiyiso Ya Mfumo

“Kutani ke, hambetani mi lava mfumo ni ku lulama ka yena ku sungula, kutani hinkwaswo swilo leswin’wana mi ta engeteleriwa swona.”—MATEWU 6:33, NW.

1. Hi xihi xitsundzuxo lexi Rito ra Xikwembu ri xi nyikaka malunghana ni mbilu yo fanekisela, naswona hi yihi yin’wana ya tindlela letikulu leti yi hi hambukisaka ha tona?

“HLAYISA mbilu ya wena ku tlurisa le’ŝi hlayisiwaka, hikuv̌a i šihlov̌o ša v̌utomi.” (Swivuriso 4:23) Ha yini a swi ri swa nkoka leswaku Hosi Solomoni a nyika xitsundzuxo lexi? Hi mhaka ya leswi “mbilu yi [nga] ni mano e ku tlula hikwaŝo, yi borile ngopfu.” (Yeremia 17:9) Ndlela yin’wana leyikulu leyi mbilu ya hina yo fanekisela yi nga hi xisaka ha yona i ku hi vangela leswaku hi tipeta eka mianakanyo ya hava ya misava. Kambe, xana mianakanyo ya hava i yini? I mianakanyo leyi nga riki ya ntiyiso, milorho, ni ku tsendzeleka ka mianakanyo. Loko milorho leyi yi va mianakanyo ya hava ya misava, a ya ha ri ku dya nkarhi ntsena kambe yi tlhela yi va ni khombo. Hikwalaho, hi fanele hi yi ala hi ku helela. Kahle-kahle, loko hi venga vuhomboloki ku fana na Yesu, hi ta sirhelela timbilu ta hina leswaku ti nga tipeti eka mianakanyo ya hava ya misava.—Vaheveru 1:8, 9.

2. Xana mianakanyo ya hava ya misava i yini, naswona ha yini hi fanele hi yi ala?

² Kambe, xana mianakanyo ha hava ya misava i yini? I mianakanyo ya hava leyi yelanaka ni misava leyi, leyi nga ehansi ka matimba ya Sathana. Malunghana na yona muapostola Yohane u tsarile: “Hikuva hinkwaswo leswi nge misaveni, ku navela ka miri, ni ku navela ka mahlo, ni ku tikurisa hi swa vutomi lebyi, a hi leswi Tatana a swi tsakelaka, kambe swi tsakela hi va misava.” (1 Yohane 2:16; 5:19) Ha yini Vakriste va fanele va papalata mianakanyo ya hava ya misava? Hi mhaka ya leswi mianakanyo yoleyo ya hava yi pfuxaka ku navela ka vutianakanyi emianakanyweni ni le mbilwini. Ku anakanyisisa hi ku endla swilo leswi hoxeke entiyisweni ku nga ha va mpfuxeto wo karhi emianakanyweni ya leswi munhu a nga ta swi endla hakunene. Mudyondzisiwa Yakobo wa hi tsundzuxa: “Kambe munhu un’wana ni un’wana wa ringiwa loko a kokiwa ni ku phasiwa hi ku navela ka yena n’wini. Kutani loko ku navela ku korwile, ku tswala xidyoho; xidyoho xona, loko xi hetisekile, xi tswala rifu.”—Yakobo 1:14, 15.

Swikombiso Leswi Tsundzuxaka

3. I mhaka ya mani leyi nyikelaka xikombiso lexikulu xa khombo ra mianakanyo ya hava ya vutianakanyi?

³ A hi kambisiseni swikombiso leswi kombisaka mhaka leyi ha yona mianakanyo ya hava ya misava yi faneleke yi ariwa. Mhaka ya Sathana Diyavulosi yi hi nyika xikombiso xa khombo leri nga vangiwaka hi ku tipeta eka mianakanyo ya hava ya vutianakanyi. U pfumelele mintlhaveko ya vutianakanyi leswaku yi kula embilwini yakwe lerova a navela xiyimo lexi tlakukeke xa Yehova tanihi Hosi ya Vuako Hinkwabyo ivi a lava ku gandzeriwa. (Luka 4:5-8) Xana a ku ri mianakanyo leyi nga riki ya xiviri? Ina! Sweswo swi ta kombisiwa kahle loko Sathana a bohiwa malembe ya gidi naswona ngopfu-ngopfu loko a hoxiwa “etiveni ra ndzilo,” ku nga rifu ra vumbirhi.—Nhlavutelo 20:1-3, 10.

4. Sathana u n’wi hambukise njhani Evha?

⁴ Hi na xikombiso xin’wana lexi nga xitsundzuxo emhakeni ya Evha, wansati wo sungula. Eka matshalatshala ya Sathana yo hetisisa ku navela ka yena, u xise Evha hi ku nghenisa emiehleketweni ya yena mianakanyo ya leswaku loko o dya mbhandzu lowu yirisiweke, a nge fi kambe u ta fana ni Xikwembu, a tiva leswinene ni swo biha. Xana mianakanyo yoleyo a yi nga ri ya xiviri, ya vutianakanyi? Hakunene, hi laha hi nga swi vonaka ha kona hi ku avanyisiwa ka Evha na nuna wakwe Adamu hi Yehova, loko a va tengisa. Hikwalaho, va lahlekeriwe hi lunghelo ra vutomi eParadeyisini swin’we ni vana va vona hinkwavo lava nga hetisekangiki.—Genesa 3:1-19; Varhoma 5:12.

5. I yini lexi endleke leswaku tintsumi tin’wana ta vana va Xikwembu ti wa, naswona vuyelo byi ve byihi eka tona?

⁵ Nakambe hi na xikombiso xa xitsundzuxo xa vana van’wana va tintsumi va Xikwembu. (Genesa 6:1-4) Ematshan’weni yo aneriseka hi mikateko leyi va yi kumaka etilweni laha ku nga na Yehova, va ve ni nyanyuko ehenhleni ka vavasati va le misaveni ni ku anakanya ndlela leyi a swi ta tsakisa ha yona ku va ni vuxaka bya rimbewu na vona. Hikwalaho ko kokiwa hi mianakanyo leyi ya hava, tintsumi leti nga yingisangiki sweswi ti pfaleriwe emunyameni hi tlhelo ra moya eThatharasi, ti yimela ku herisiwa eku heleni ka ku Fuma ka Malembe ya Gidi ka Yesu Kriste.—2 Petro 2:4; Yuda 6; Nhlavutelo 20:10.

Ala Mianakanyo Ya Hava Ya Misava

6, 7. Ha yini mianakanyo ya hava ya misava hi rifuwo ra leswi vonakaka yi ri na khombo naswona yi hambukisa?

⁶ Sweswi a hi kambisiseni yin’wana ya mianakanyo ya hava leyi tolovelekeke ni leyi nga ni khombo swinene leyi hlohloteriwaka hi Sathana. Eka xihaxa mahungu xihi na xihi hi khutaziwa ku tipeta eka mianakanyo ya hava ya misava. Leswi hakanyingi swi vangiwa hi ku navela rifuwo. Kahle-kahle, a hi xihoxo ku va ni rifuwo. Abrahama, Yobo na Hosi Davhida lava chavaka Xikwembu a a va fumile swinene, kambe a va nga swi hlongorisi swilo leswi vonakaka. Mianakanyo ya hava ya swilo leswi vonakaka yi susumetela vanhu leswaku va tirha swinene hi matimba malembe yo tala leswaku va ta kuma rifuwo. Mianakanyo yo tano ya hava yi tlhela yi va susumetela leswaku va tipeta eka tinxaka hinkwato ta ku gembula, tanihi ku beja tihanci ni ku xava mathikithi ya ku gembula. Hi nga tshuki hi yengiwa hi ku anakanya hi rifuwo. Loko hi ehleketa leswaku rifuwo ra swilo leswi vonakaka ri na nsirhelelo, a hi xiyeni xivuriso lexi xa ntiyiso: “Rifuwo a ri pfuni ntšhumu e sikwini ra v̌ukari, kambe ku lulama ku lwela munhu e ku feni.” (Swivuriso 11:4) Hakunene, rifuwo ra swilo leswi vonakaka a ri nge hi pfuni leswaku hi pona ‘nhlomulo lowukulu.’—Matewu 24:21; Nhlavutelo 7:9, 14.

⁷ Rifuwo ra swilo leswi vonakaka ri nga hi hambukisa hi ku olova. Hi yona mhaka leyi ha yona hi byeriwaka ku: “Rifuwo ra mufuwi i khokholo ra yena, e ku anakanyeni ka yena, i rirhangu ra šitšhav̌elo.” (Swivuriso 18:11) Ina, hi le “ku anakanyeni ka yena” ntsena, hikuva rifuwo ri na nsirhelelo lowutsongo swinene loko swilo swi ya swi durha swinene, loko ikhonomi yi wa, loko ku va ni minkwetlembetano ya politiki, kumbe vuvabyi lebyikulu. Yesu Kriste u tsundzuxe hi vuhunguki bya ku tshemba rifuwo ra swilo leswi vonakaka. (Luka 12:13-21) Nakambe hi na marito ya xitsundzuxo ya muapostola Pawulo: “Hikuva ku rhandza ngopfu mali i rimitsu ra leswo biha hinkwaswo; hi yo mhaka ya ku navela mali ngopfu leyi yi nga hambukisa van’wana, va tshika vupfumeri, kutani timbilu ta vona ti ngheniwa hi mivilelo leyo tala.”—1 Timotiya 6:10.

8. Xana mianakanyo ya hava ya misava yi hangalake hi mpimo wihi hi tlhelo ra rimbewu, naswona leswi swi na makhombo wahi?

⁸ Mianakanyo yin’wana ya hava yi fambisana ni vuxaka bya rimbewu lebyi nga riki enawini. Mpimo lowu vanhu lava nga ni vudyoho va lavaka ha yona ku anakanyisisa hi rimbewu, wu nga voniwa eka ndlela leyi mimbulavulo ya thyaka yi taleke ha yona hi ku va va ba riqingho ri ya kun’wana ivi va yingisa marungula ya swifaniso leswi nga ambalangiki. Le United States, ku ba riqingo ri ya etindhawini ta swifaniso leswi nga ambalangiki i bindzu lerikulu swinene. Loko ho pfumelela mianakanyo ya hina yi tshama eka vuxaka bya rimbewu lebyi thyakeke, xana hi ta va hi nga ri vakanganyisi, lava vonakaka va ri Vakriste lava baseke? Naswona xana a ku na khombo ra leswaku mianakanyo yo tano ya hava yi nga yisa eka vuxaka lebyi thyakeke? Leswi swi humelerile naswona swi endle leswaku van’wana va susiwa ebandlheni ra Vukriste hi ku katseka eka vuoswi ni vumbhisa. Hi ku ya hi marito ya Yesu eka Matewu 5:27, 28, xana hinkwavo lava hambetaka va tipeta eka mianakanyo yo tano yo hava a va na nandzu wa vuoswi etimbilwini ta vona?

9. Hi xihi xitsundzuxo lexi Matsalwa ma hi nyikaka xona ehenhleni ka mianakanyo ya hava ya misava?

⁹ Leswaku hi hlula mboyamelo wa timbilu ta hina ta vudyoho wo tipeta eka mianakanyo yo tano ya hava, hi fanele hi tsundzuka xitsundzuxo xa Pawulo: “Emahlweni ka Xikwembu, ku hava ni xivumbiwa ni xin’we lexi tumbeleke. Hinkwaswo swi lo tlangandla, erivaleni, emahlweni ka Loyi hi fanelaka ku tihlamulela eka yena.” (Vaheveru 4:13) Minkarhi hinkwayo hi fanele hi lava ku fana na Muxe, loyi a “tiyise[leke] onge hi loko a ri karhi a vona loyi a nga voniwiki.” (Vaheveru 11:27) Ina, hi fanele hi hambeta hi tibyela leswaku mianakanyo ya hava ya misava a yi n’wi tsakisi Yehova naswona yi ngo hi vavisa ntsena. Hi fanele hi khathalela ku hlakulela mihandzu ya Xikwembu ya moya, ngopfu-ngopfu ku tikhoma, hikuva a hi nge swi koti ku balekela ntiyiso wa leswaku, loko hi byala enyameni, hi ta tshovela ku bola enyameni.—Vagalatiya 5:22, 23; 6:7, 8.

Mintiyiso Ya Mfumo

10, 11. (a) Hi yihi mintiyiso leyi seketelaka vukona bya Muvumbi? (b) Hi byihi vumbhoni lebyi nga kona bya leswaku hakunene Bibele i Rito ra Xikwembu? (c) Hi byihi vumbhoni byo seketela vukona bya Hosi ya Mfumo wa Xikwembu?

¹⁰ Ndlela yo antswa swinene yo ala mianakanyo ya hava ya misava i ku hambeta u landzelela mintiyiso ya Mfumo. Mintiyiso ya Mfumo leyi humesiwaka hi Xikwembu yi hambana swinene ni mianakanyo ya hava ya misava. Xana Xikwembu xi kona? A swi kanakanisi leswaku xi kona. Ntumbuluko lowu vonakaka wu seketela mhaka leyi. (Varhoma 1:20) Hi tsundzuxiwa hi leswi swi vuriweke eka malembe yo tlula dzana lama hundzeke ebukwini leyi nge The Divine Plan of the Ages, leyi humesiweke hi Sosayiti ya Watch Tower. Yi te: “Loyi a nga swi kotaka ku languta exibakabakeni hi theleskopu, kumbe hambi ku ri hi tihlo rinene, ivi a vona ku kula ka ntumbuluko, ku hleleka ka wona, ku saseka, mavumbekelo, ku twanana ni ku hambana-hambana ka wona, kambe a tlhela a kanakana leswaku Muvumbi wa swilo leswi u tlakukile swinene eka yena hi vutlhari ni matimba, kumbe loyi a nga tshukaka a anakanye leswaku nhleleko wo tano wu humelele hi xiwelo, handle ka Muvumbi, u lahlekeriwe swinene hi mianakanyo kumbe ku honisa mintiyiso lerova a fanela leswi Bibele yi n’wi vulaka swona, xiphukuphuku (loyi a honisaka kumbe la pfumalaka mianakanyo).”—Psalm 14:1.

¹¹ I Bibele leyi yo Kwetsima leyi yi hi byelaka hi Mfumo. Xana Bibele hakunene i Rito leri tsariweke ra Xikwembu? Ina, hi laha swi nga voniwaka ha kona hi ku twanana ka yona, ku pakanisa ka yona hi tlhelo ra sanyense ni matimba ya yona yo cinca vutomi bya vanhu naswona ngopfu-ngopfu hi ku hetiseka ka vuprofeta bya yona.a Ku vuriwa yini hi Hosi ya Mfumo wa Xikwembu, Yesu Kriste? Xana yi kona hakunene? Timhaka ta Evhangeli ni mapapila lama huhuteriweke hi Xikwembu ya Matsalwa ya Xigriki ya Vukriste ma seketela matimu ya Yesu Kriste hi ndlela leyi nga kanakanisiki ni leyi tlakukeke swinene. Malunghana ni matimu ya Yesu, nakambe ku na vumbhoni bya Talmud ya Xiyuda, leyi kombetelaka eka yena tanihi munhu. Kutani ni van’wamatimu va Vayuda ni va Varhoma va lembe xidzana ro sungula C.E. va endla tano.

12, 13. Hi yihi mintiyiso leyi seketelaka leswaku Mfumo wa Xikwembu i wa xiviri?

¹² Ku vuriwa yini hi vukona bya Mfumo hi woxe? Wu honisiwa ngopfu hi Vujagana, hi laha swi kombisiwaka ha kona hi xivilelo lexi xa Mupresbiteriya lonkulu: “Entiyisweni se ku hundze malembe ya makume-nharhu ku sukela loko ndzi yingisela matshalatshala ya mufundhisi yo hlamusela vanhu vakwe mhaka ya leswaku Mfumo i wa xiviri eka vona.” Kambe, ku kwetsimisiwa ka vito ra Yehova hi Mfumo i nhloko-mhaka ya Rito rakwe. Xikwembu hi xoxe xi endle xitshembiso xo sungula xa Mfumo, xi ku: “Nḍi ta v̌eka ku v̌engana e šikari ka wena ni wansati, ni šikari ka rišaka ra wena ni rišaka ra wansati; ri ta ku faya nhloko, wena, u ri luma širenḍe.” (Genesa 3:15) Mfumo wu fanekiseriwe hi rixaka ra Israyele, ngopfu-ngopfu hi nkarhi wa ku fuma ka Hosi Solomoni. (Psalma 72) Ku tlula kwalaho, Mfumo a wu ri nhloko-mhaka ya ku chumayela ka Yesu. (Matewu 4:17) U wu kombise hi swifaniso swo tala, swo tanihi leswi nga eka Matewu ndzima 13. Yesu u hi byele leswaku hi khongelela Mfumo ni ku hambeta hi wu lava ku sungula. (Matewu 6:9, 10, 33) Kahle-kahle, Mfumo wa Xikwembu wu boxiwa kwalomu ka minkarhi ya 150 eMatsalweni ya Vukriste ya Xigriki.

¹³ Mfumo i hulumendhe ya xiviri, leyi nga ni matimba hi vulawuri, naswona wu ta hetisisa hinkwaswo leswi languteriweke. Wu ni milawu, leyi kumekaka eBibeleni. Mfumo ana se wu hetisise swilo swo tala. Wu na vafumiwa lava tshembekaka—Timbhoni ta Yehova to tlula 4 000 000. Ti chumayela mahungu lamanene ya Mfumo wa Xikwembu ematikweni lama tlulaka 211, ku hetisisa Matewu 24:14. Eka lembe ra vona ra ntirho ra 1991, va hete tiawara ta 951- 870 021 va ri karhi va chumayela rungula ra Mfumo. Ntirho lowu wu humesa mimbuyelo leyi vonakaka, leyi tiyeke, loko mintshungu yi dyondza ‘ririmi leri tengeke’ ra ntiyiso wa Bibele.—Sofonia 3:9.

Ku Landzelela Mintiyiso Ya Mfumo

14. Hi ku tiyisa njhani ku tiva ka hina leswaku Mfumo i wa xiviri?

¹⁴ Kutani ke, hi nga yi landzelerisa ku yini mintiyiso ya Mfumo? Ntshembo wa hina wu fanele wu seketeriwa swinene hi ku khorwiseka loku tiyeke. Misava leyintshwa leyi tshembisiweke hi Xikwembu yi fanele yi va ya xiviri eka hina. (2 Petro 3:13) Naswona hi fanele hi va ni ripfumelo eka xitshembiso xa leswaku Xikwembu “xi ta sula mihloti hinkwayo emahlweni ya [hina], ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:4) Hi nga tiyisekisa ku yini leswaku mhaka leyi i ya xiviri? Swo boha leswaku yi hetiseka hi nkarhi wa Xikwembu lowu faneleke, hikuva a swi koteki leswaku xi hemba. (Tito 1:1, 2; Vaheveru 6:18) Hi fanele hi anakanyisisa hi switshembiso leswi. Ku titeka hi ri emisaveni ya Xikwembu leyintshwa, ni ku tiphina hi mikateko ya yona a hi mianakanyo ya hava, kambe i xikombiso xa ripfumelo. Hi laha Pawulo a swi hlamuselaka ha kona, “ku pfumela i ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.” (Vaheveru 11:1) A hi tiyiseni ripfumelo ra hina hi ku hamba hi tiwundla hi Rito ra Xikwembu ni tibuku ta Vukriste leti hi pfunaka ku ri twisisa ni ku ri tirhisa. Loko hi tirhisa nkarhi wo tala hi byela van’wana hi ta Mfumo, hi ndlela leyi lunghiseleriweke ni ya xitshuketa, hi ta ya hi tiyisa swinene ripfumelo ra hina ni ku endla ntshembo wa hina eka rona wu vangama.

15. Hi byihi vutihlamuleri lebyi hi nga na byona malunghana ni vutirheli bya Vukriste?

¹⁵ Nakambe hi fanele hi tirha hi ku pfumelelana ni mintiyiso ya Mfumo hi ku antswisa ntirho wa vutirheli bya hina. Tanihi leswi ka ha riki na swo tala swo swi endla, hi nga swi endlisa ku yini leswi? (Matewu 9:37, 38) Xivulavulelo lexi nge a ku na munhu la kuleke lerova a nga ha swi koti ku dyondza, xi tiyisile. Ku nga khathariseki leswaku hi na malembe mangani hi ri karhi hi hlanganyela entirhweni wo nyikela vumbhoni, hi nga wu endla nhluvuko. Hi ku va lava humelelaka swinene eku tirhiseni ka Rito ra Xikwembu, hi ta swi kota ku pfuna van’wana leswaku va twa rito ra Hosi, Yesu Kriste. (Ringanisa Yohane 10:16.) Loko hi tsundzuka leswaku vumundzuku lebyi nga heriki bya vanhu bya katseka, hi ta susumeteriwa ku hlanganisa nsimu ya hina kahle leswaku hi va nyika nkarhi lowu phindha-phindhiweke wa leswaku va tikombisa laha va yimeke kona, leswaku i “tinyimpfu” kumbe i “timbuti.” (Matewu 25:31-46) Kavula, leswi swi vula ku hlayisa rhekhodo leyinene ya lava nga riki kona emakaya, ngopfu-ngopfu lava va tsakelaka rungula ra Mfumo.

Hambetani Mi Landzelela Mfumo

16. I vamani lava vekeke xikombiso lexinene malunghana ni ku landzela mintiyiso ya Mfumo, naswona va wu “lwela” njhani Mfumo?

¹⁶ Matshalatshala lamakulu ma laveka leswaku hi hambeta hi landzelela mintiyiso ya Mfumo. Xana xikombiso lexinene xa ku gingirika xa Vakriste lava saleke lava totiweke a xi hi khutazi ke? I khale va ri karhi va landzelela mintiyiso ya Mfumo. Ku chivirika loku ku hlamuseriwile emaritweni ya Yesu lama nge: “Ku sukela enkarhini wa Yohane Mukhuvuri ku fikela enkarhini wa sweswi, ku ngheniwa eMfun’weni wa matilo hi ku tirhisa matimba, kutani va matimba hi vona lava titekelaka wona.” (Matewu 11:12) Laha leswi vuriwaka a hi swona leswaku valala va vutla Mfumo. Kambe, leswi swi kombetela eka ntirho wa lava va nga enxaxamelweni wa Mfumo. Mudyondzi un’wana wa Bibele u te: “Hi ndlela leyi ku hlamuseriwa ku tiyimisela, ku tikarhatela swinene mfumo wa Vumesiya lowu tshinelaka.” Vatotiwa va tirhe hi matimba hinkwawo leswaku va endla Mfumo wu va wa vona. Ku laveka matshalatshala yo tano ya ku tinyiketela eka “tinyimpfu tin’wana” leswaku na tona ti ta fanelekela ku va vafumiwa va laha misaveni va Mfumo wa le tilweni wa Xikwembu.—Yohane 10:16.

17. Vumundzuku bya lava hlongorisaka mianakanyo ya hava ya misava byi ta va byihi?

¹⁷ Hakunene, hi hanya enkarhini wo hlawuleka lowu hi pfulekeleke. Lava va landzelelaka mianakanyo ya hava ya misava siku rin’wana va ta hlangana na swo. Vumundzuku bya vona byi hlamuseriwa kahle hi marito lawa: “Tani hi munhu loko a ri ni ndlala a lora, a ku a dya, kutani a pfuka, a twa ndlala; kukotisa ni munhu l’a nga ni tora, loko a lora leŝaku a ri kari a nwa; kutani a pfuka, a karele, kambe moya wa yena wu ni tora.” (Esaya 29:8) Hakunene, mianakanyo ya hava ya misava a yi nge n’wi anerisi munhu kumbe ku n’wi tsakisa.

18. Hikwalaho ka leswi Mfumo wu nga wa xiviri, hi fanele hi endla yini, naswona hi ri karhi hi langutela yini?

¹⁸ Mfumo wa Yehova i wa xiviri. Wa fuma, kasi mafambiselo lawa yo biha ya swilo ma langutane ni ndzoviso wa xihatla, lowu heleleke. Hikwalaho, yingisa xitsundzuxo xa Pawulo: “Hikokwalaho hi nga tshuki hi etlela kukota leswi van’wana va endlisaka swona, kambe a hi hitekeni, hi tikhoma.” (1 Vatesalonika 5:6) Onge hi nga hlayisa timbilu ni mianakanyo ya hina swi ri eka mintiyiso ya Mfumo, ivi xisweswo hi tsakela mikateko leyi nga heriki. Naswona onge hi nga swi kota ku twa Hosi ya Mfumo wolowo loko yi ku eka hina: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.”—Matewu 25:34.

[Nhlamuselo ya le hansi]

U Nga Hlamurisa Ku Yini?

◻ Mianakanyo ya hava ya misava i yini, naswona ha yini hi fanele hi yi ala?

◻ Hi swihi swikombiso leswi hi kombisaka ku hoxa ka ku tipeta emianakanyweni ya hava ya misava?

◻ Hi tihi tinhla leti seketelaka vukona bya Muvumbi, Rito rakwe leri tsariweke, Yesu Kriste ni Mfumo?

◻ Hi ri tiyisa njhani ripfumelo ra hina eka mintiyiso ya Mfumo?

[Xifaniso lexi nga eka tluka 15]

Mianakanyo ya hava ya misava hakanyingi yi vangiwa hi ku navela rifuwo ra leswi vonakaka

[Xifaniso lexi nga eka tluka 16]

Ku chumayela mahungu lamanene i ndlela yin’wana yo landzela mintiyiso ya Mfumo

[Xifaniso lexi nga eka tluka 17]

Xana u landzela mintiyiso ya Mfumo hi ku dyondza Rito ra Xikwembu hi ku hiseka?