‘Tisani Vukhume Hinkwabyo eNdlwini Ya Vuhlayiselo’
‘Ndzi ringeni, eka leswi, leswaku xana ndzi nge mi pfuleli tinyangwa ta matilo.’—MALAKIYA 3:10.
1. (a) Hi lembe xidzana ra vuntlhanu B.C.E., xana i xirhambo xihi lexi Yehovha a xi nyikeke vanhu vakwe? (b) Hi lembe xidzana ro sungula C.E., i yini leswi veke kona hikwalaho ka ku ta ka Yehovha etempeleni a ta avanyisa?
HI LEMBE xidzana ra vuntlhanu B.C.E., Vaisrayele a a va nga tshembeki eka Yehovha. A va felela ku humesa vukhume, va tisa swiharhi leswi nga faneriki etempeleni leswaku swi va magandzelo. Hambi swi ri tano, Yehovha u tshembise leswaku loko vo tisa vukhume hinkwabyo endlwini ya vuhlayiselo, a a ta va chululela mikateko va kondza va eneriseka. (Malakiya 3:8-10) Kwalomu ka malembe ya 500 endzhaku, Yehovha, a yimeriwe hi Yesu tanihi murhumiwa wa Yena wa ntwanano, u te etempeleni eYerusalema leswaku a ta avanyisa. (Malakiya 3:1) Israyele tanihi tiko u kumiwe a pfumala, kambe vanhu lava tlheleleke eka Yehovha va katekisiwe hi laha ku fuweke. (Malakiya 3:7) Va totiwile leswaku va va vana va moya va Yehovha, ntumbuluko lowuntshwa, ‘Israyele wa Xikwembu.’—Vagalatiya 6:16; Varhoma 3:25, 26.
2. Xana Malakiya 3:1-10 a a fanele ku hetiseka rini ra vumbirhi, naswona hi rhambiwa ku endla yini malunghana ni leswi?
2 Emalembeni yo lava ku va 1 900 endzhaku ka leswi, hi 1914, Yesu u vekiwe exiluvelweni a va Hosi ya Mfumo wa le tilweni wa Xikwembu, naswona marito lama huhuteriweke hi Xikwembu eka Malakiya 3:1-10 a a ma fanele ku hetiseka ra vumbirhi. Mayelana ni xiendlakalo lexi xo tsakisa, namuntlha Vakreste va rhambiwa ku tisa vukhume hinkwabyo endlwini ya vuhlayiselo. Loko hi endla tano, na hina hi ta kuma mikateko ku kondza hi eneriseka.
3. A a ri mani murhumiwa loyi a lunghisa ndlela emahlweni ka Yehovha (a) hi lembe xidzana ro sungula? (b) emahlweni ka nyimpi yo sungula ya misava?
3 Mayelana ni ku ta kakwe etempeleni, Yehovha u te: “V̌onani, nḍi ta ruma nṭumi ya mina, yi ta lungisa ndlela e mahlweni ka mina.” (Malakiya 3:1) Tanihi ku hetiseka ka leswi ka lembe xidzana ro sungula, Yohane Mukhuvuri u te eIsrayele a chumayela ku hundzuka eswidyohweni. (Marka 1:2, 3) Xana a a wu ri kona ntirho wo lunghiselela ku ta ka Yehovha ra vumbirhi etempeleni? Ina. Eka makume ya malembe emahlweni ka nyimpi yo sungula ya misava, Swichudeni swa Bibele swi humelerile emisaveni swi dyondzisa dyondzo leyi tengeke ya Bibele ni ku paluxa mavunwa lama delelaka Xikwembu, tanihi tidyondzo ta Vunharhu-un’we ni ndzilo wa tihele. Swi tlhele swi tsundzuxa hi ku hela ka Minkarhi ya Vamatiko hi 1914. Vo tala va va amukerile vabyarhi lava va ku vonakala.—Pisalema 43:3; Matewu 5:14, 16.
4. I swivutiso swihi leswi a a swi fanele ku hlamuriwa esikwini ra Hosi?
4 Lembe ra 1914 ri sungule leswi Bibele yi swi vulaka “siku ra Hosi.” (Nhlavutelo 1:10) Swiendlakalo leswi tsemaka nhlana a a swi ta humelela hi nguva yoleyo, ku katsa ni ku voniwa ka “nandza la tshembekaka, wo tlhariha” ni ku vekiwa ka yena a “va mulanguteri wa rifuwo hinkwaro ra n’wini wa yena.” (Matewu 24:45-47) Le ndzhaku hi 1914, magidi ya tikereke a a ma tivula Vakreste. Xana hi wihi ntlawa lowu a a wu ta amukeriwa hi N’wini, Yesu Kreste, tanihi nandza wa yena wo tshembeka, wa vutlharhi? Xivutiso xexo a a xi ta hlamuriwa loko Yehovha a ta etempeleni.
A Ta eTempeleni Ya Moya
5, 6. (a) Xana hi le tempeleni yihi leyi Yehovha a teke eka yona a ta avanyisa? (b) I ku avanyisa kwihi loku Vujagana byi ku kumaka eka Yehovha?
5 Hambi swi ri tano, xana hi yihi tempele leyi a teke eka yona? Kahle-kahle a hi tempele ya xiviri ya le Yerusalema. Yo hetelela eka titempele toleto yi herisiwe khale hi 70 C.E. Hambi swi ri tano, Yehovha u na yona tempele leyikulu leyi fanekiseriweke hi yoleyo ya le Yerusalema. Pawulo u vulavule hi tempele leyi leyikulu, a kombisa ndlela leyi kunene yi nga yikulu ha yona, ni leswaku yi ni xivandla xo kwetsima etilweni ni xivava la misaveni. (Vaheveru 9:11, 12, 24; 10:19, 20) Hi le ka tempele leyi leyikulu ya moya laha Yehovha a teke a ta avanyisa.—Ringanisa Nhlavutelo 11:1; 15:8.
6 Xana leswi swi endleke rini? Hi ku ya hi vumbhoni byo tala lebyi nga kona, swi endleke hi 1918.a Xana vuyelo byi ve byihi? Loko byi ri Vujagana, Yehovha u byi vone tanihi nhlengeletano leyi mavoko ya yona ma xiririkaka tingati, fambiselo leri onhakeke ra vukhongeri, leri ri endleke vunghwavava ni misava leyi, ri endla ntwanano ni van’wankumi, ri tshikelela swisiwana, ri dyondzisa tidyondzo ta vuhedeni ematshan’wini yo tirhisa vugandzeri lebyi tengeke. (Yakobo 1:27; 4:4) Hi ku tirhisa Malakiya, Yehovha u tsundzuxile: “Nḍi [ta] v̌a mboni le’yi hatlisaka timhaka e henhla ka v̌angoma, ni v̌aoŝani, ni la’v̌a hlambanyaka hi mav̌unwa, ni la’v̌a tekaka hakelo ya l’a hakeriwaka, ni ya noni, ni ya šisiwana.” (Malakiya 3:5) Leswi, Vujagana byi swi endlile hinkwaswo naswona byi tlule mpimo. Hi 1919 a a swi lo dla leswaku Yehovha u byi avanyisele ku byi herisa ku katsa na Babilona Lonkulu a helerile, bako ra misava hinkwayo ra vukhongeri bya mavunwa. Ku sukela kwalaho, xirhambo xi yisiwe eka vanhu va timbilu letinene: “N’wina vanhu va mina, humani mi n’wi siya.”—Nhlavutelo 18:1, 4.
7. Xana hi wihi loyi Yesu a n’wi amukeleke tanihi nandza wa yena wo tshembeka, wa vutlharhi?
7 Kutani ke, a a ri mani nandza wo tshembeka, wa vutlharhi? Hi lembe xidzana ro sungula, u sunguriwe hi ntlawanyana lowu amukeleke ntirho wo nyikela vumbhoni wa Yohane Mukhuvuri na Yesu, murhumiwa wa ntwanano. Eka lembe xidzana ra hina, a a ku ri magidi ma nga ri mangani ya lava amukeleke ntirho wo lunghisa ndlela wa Swichudeni swa Bibele emalembeni lama rhangeleke 1914. Vanhu lava, va tiyiselele miringo yo vava enkarhini wa nyimpi yo sungula ya misava, kambe va kombise leswaku timbilu ta vona a a ti ri na Yehovha.
Ntirho Wo Basisa
8, 9. Le ndzhaku hi 1918, xana nandza wo tshembeka, wa vutlharhi, a a lava ku basisiwa hi tindlela tihi, naswona i xitshembiso xihi lexi Yehovha a xi endleke mayelana ni leswi?
8 Hambi swi ri tano, na wona ntlawa lowu a a wu lava ku basisiwa. Van’wana lava a va tihlanganise na vona va hundzuke valala va ripfumelo, kutani a a va fanele ku susiwa. (Vafilipiya 3:18) Van’wana a a va nga swi lavi ku byarha vutihlamuleri lebyi vaka kona loko u tirhela Yehovha, naswona va kendlukile. (Vaheveru 2:1) Handle ka sweswo, a a ku ri ni mikhuva ya Vubabilona leyi a yi sele, leyi a yi lava ku susiwa. Na yena nandza wo tshembeka, wa vutlharhi, a a fanela ku basisiwa hi ku helela. Xiyimo lexi faneleke xa vukala-tlhelo a a xi fanele xi dyondziwa ni ku tirhisiwa. Naswona leswi misava yi hambeteke yi onhaka ngopfu, va boheke ku lwa hi matimba leswaku va hlayisa vandlha ri basile hi tlhelo ra mahanyelo ni le moyeni.—Ringanisa Yuda 3, 4.
9 Ee, ku basisa a ku laveka, kambe hi rirhandzu Yehovha u tshembisile mayelana na Yesu la vekiweke exiluvelweni a ku: “O ta ṭhama, a ri kari a ṅwokisa, a basisa silver; o ta basisa v̌ana v̌a Levi, a v̌a tengisa e ku fana ni nsuku ni ku kotisa silver, leŝaku v̌a v̌a e ka Yehova, v̌a humesa maganḍelo hi ku lulama.” (Malakiya 3:3) Ku sukela hi 1918, Yehovha, hi ku tirhisa murhumiwa wakwe wa ntwanano, u hetisise xitshembiso xa yena ni ku basisa vanhu va yena.
10. Xana i mixaka yihi ya magandzelo leyi vanhu va Xikwembu a a va tisa yona, naswona Yehovha u va nyike xirhambo xihi?
10 Vamakwavo va Kreste lava totiweke ku katsa ni ntshungu lowukulu lowu endzhaku wu tihlanganiseke na vona entirhweni wa Yehovha, hinkwavo va pfunekile hi ku tirha ka Yehovha tanihi mun’okisi ni mubasisi wa silivhere. (Nhlavutelo 7:9, 14, 15) Tanihi nhlengeletano, va tile, naswona va ha ta, va humesa nyiko ya gandzelo hi ku lulama. Naswona magandzelo ya vona ma “ṭakisa Yehova, kukotisa e mikarini ya khale, ni kukotisa e malembeni ya khale-khale.” (Malakiya 3:4) A a ku ri lava, lava Yehovha a va rhambeke hi ndlela yo profeta a ku: “Tisani ndlwini ya v̌uhlayiselo e ku av̌anyisa ka v̌ukhume ka hikwaŝo leŝi mi ŝi fuweke, ŝakudya ŝi v̌a kona e ndlwini ya mina; mi nḍi ringa ha kona, ku v̌ula Yehova wa mav̌andla, kutani mi ta v̌ona šana nḍi nga ka nḍi nga mi pfuleri mafester ya tilo, nḍi v̌a nḍi mi tšhululela e ku kateka hi mpimo lo’wu tlurisaka!”—Malakiya 3:10.
Magandzelo Ni Vukhume
11. Ha yini ku nyikela hi ku ya hi fambiselo ra Nawu wa Muxe swi nga ha laveki?
11 Esikwini ra Malakiya, vanhu va Xikwembu a a va tisa magandzelo ya xiviri ni vukhume, tanihi mavele, mihandzu, ni swifuwo. Ni le sikwini ra Yesu, Vaisrayele lava tshembekeke a a va endla magandzelo ya xiviri etempeleni. Hambi swi ri tano, endzhaku ka rifu ra Yesu, sweswo hinkwaswo swi hundzukile. Nawu wu dlayiwile, swin’we ni xileriso xa ku nyikela hi magandzelo ya swilo swo karhi swa nyama kumbe vukhume. (Vaefesa 2:15) Yesu u hetisise magandzelo yo fanekisela lama profetiweke ehansi ka Nawu. (Vaefesa 5:2; Vaheveru 10:1, 2, 10) Kutani ke, xana Vakreste va fanele va tisa magandzelo ni vukhume hi ndlela yihi?
12. I mixaka yihi ya minyikelo ni magandzelo ya moya leyi Vakreste va yi endlaka?
12 Eka vona, magandzelo ma vonaka ma ri ya muxaka wa moya. (Ringanisa Vafilipiya 2:17; 2 Timotiya 4:6.) Hi xikombiso, Pawulo u vulavule hi ntirho wo chumayela tanihi gandzelo loko a ku: “A hi humeseni magandzelo masiku hinkwawo ha yena Yesu, hi dzunisa Xikwembu ha wona, hi ri karhi hi vonga vito ra xona hi marito lama humaka emilon’weni ya hina.” U kombetele eka muxaka wun’wana wa gandzelo ra moya loko a khongotela a ku: “Mi nga rivali ku endla leswinene ni ku pambulela van’wana leswi mi nga na swona, hikuva magandzelo lawa hi wona lama tsakisaka Xikwembu.” (Vaheveru 13:15, 16) Loko vatswari va khutaza vana va vona ku nghenela ntirho wa vuphayona, va nga ha vuriwa leswaku va nyikela ha vona eka Yehovha, ku fana na Yefta la nyikeleke hi n’wana wakwe wa nhwanyana leswaku a va “ganḍelo le’ri hisiwaka” eka Xikwembu, lexi nga endla leswaku a hlula.—Vaavanyisi 11:30, 31, 39.
13. Ha yini swi nga laveki eka Vakreste leswaku va nyikela hi vukhume bya xiviri bya miholo ya vona?
13 Hambi swi ri tano, ku vuriwa yini hi vukhume? Xana Vakreste swa va boha ku vekela etlhelweni vukhume bya miholo ya vona ya nyama ivi va nyikela hi byona enhlengeletanweni ya Yehovha, ku fana ni leswi endliwaka etikerekeni tin’wana ta Vujagana? Doo, sweswo a swi laveki. A ri kona tsalwa leri vulaka nawu wo tano eka Vakreste. Loko Pawulo a hlengeleta minyikelo ya vapfumari eYudiya, a nga wu vulanga mpimo wo karhi lowu fanelaka ku nyikeriwa. Ku ri na sweswo, u te: “Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.” (2 Vakorinto 9:7) Loko a vulavula hi lava nga evutirhelini byo hlawuleka, Pawulo u kombise leswaku hambi leswi van’wana a a va hlayisiwa kahle hi minyikelo ya ku tirhandzela, yena a a tiyimesele ku tirha, a tihlayisa. (Mintirho 18:3, 4; 1 Vakorinto 9:13-15) Ku hava vukhume lebyi a byi vekeriwe xikongomelo lexi.
14. (a) Ha yini ku tisa vukhume swi nga vuli swona ku nyikela hi swilo swa hina hinkwaswo eka Yehovha? (b) Xana i yini lexi yimeriwaka hi vukhume?
14 Kahle-kahle, eka Vakreste vukhume byi fanekisela xo karhi, kumbe, ku xi yimela. Leswi ku nga vukhume, naswona nhlayo khume eBibeleni yi talaka ku yimela ku helela ka misava, xana swa vukhume swi fanekisela ku nyikela ka hina hi swilo swa hina hinkwaswo eka Yehovha? Doo. Loko hi tinyiketela eka Yehovha ivi hi kombisa sweswo hi nkhuvulo wa mati, hi kona laha hi vaka hi nyikela eka yena hi swilo swa hina hinkwaswo. Ku sukela enkarhini lowu hi tinyiketeleke ha wona, a hi na nchumu lowu se wu nga riki wa Yehovha. Kambe, Yehovha u pfumelela vanhu leswaku va humesa leswi nga swa vona. Hikwalaho, vukhume byi yimela xiphemu xa leswi nga swa hina, leswi hi swi yisaka eka Yehovha, kumbe hi swi tirhisaka entirhweni wa Yehovha, tanihi ku kombisa leswaku ha n’wi rhandza ni ku lemuka mhaka ya leswaku hi va yena. Vukhume bya manguva lawa a byo fanela ku va vukhume hi ku helela. Nkarhi wun’wana byi ta va byitsongo. Eka van’wana byi ta va byo tala. Munhu un’wana ni un’wana u tisa leswi mbilu yakwe yi n’wi susumetelaka ku tisa swona ni leswi swiyimo swakwe swi n’wi pfumelelaka swona.
15, 16. Xana i yini leswi katsiwaka eka vukhume bya hina bya moya?
15 Xana ku katseka yini eka vukhume lebyi bya moya? Xin’wana, hi nyika Yehovha nkarhi ni matimba ya hina. Nkarhi lowu hi wu tirhisaka eminhlanganweni, ni ku ya etinhlengeletanweni, emintsombanweni, entirhweni wa nsimu, hinkwawo ka wona i nchumu wun’wana lowu nyikeriwaka eka Yehovha—i xiphemu xa vukhume bya hina. Nkarhi ni matimba lawa hi ma tirhisaka ku endzela lava vabyaka ni ku pfuna van’wana—na swona, i xiphemu xa vukhume bya hina. Ku pfuneta eku akiweni ka Tiholo ta Mfumo ni ku nghenisa xandla eku hlayiseni ni le ku basiseni ka holo na swona i xiphemu hi laha ku fanaka.
16 Nakambe vukhume bya hina byi katsa minyikelo ya hina ya timali. Hi ku andza loku engetelekeke ka nhlengeletano ya Yehovha emalembeni ya sweswinyana, ndzhwalo wa timali wu tlakukile. Tiholo letintshwa ta Mfumo ta laveka, ku katsa ni miako ya marhavi lamantshwa ni Tiholo letintshwa ta Tinhlengeletano, swin’we ni ku hlayisa leti se ti akiweke. Ku hakela mali leyi tirhisiweke hi lava va tiendleke va kumeka leswaku va endla ntirho wo hlawuleka—laha hakanyingi va endlaka matshalatshala leswaku va endla tano—na swona swi tisa ntlhontlho lowukulu. Hi 1991 mali ya ku hlayisa varhumiwa, valanguteri lava famba-fambaka, ni maphayona yo hlawuleka ntsena yi tlule 110 wa timiliyoni ta tirhandi, hinkwayo ka yona yi hlanganisiwe hi minyikelo ya ku tirhandzela.
17. Kahle-kahle, i yini leswi hi fanelaka ku nyikela ha swona swi va vukhume bya hina bya moya?
17 Kahle-kahle, i yini lexi hi faneleke ku nyikela ha xona tanihi vukhume bya hina bya moya? Yehovha a nga veki mpimo. Kambe, ku tlangela ku tinyiketela, ku rhandza Yehovha ni vamakwerhu hi ntiyiso, swin’we ni nsusumeto wa xihatla lowu vangiwaka hi ku lemuka leswaku ku ni vutomi lebyi nga ekhombyeni, swi hi khutaza ku tisa hinkwabyo vukhume bya hina bya moya. Hi titwa hi susumeteleka ku tirhela Yehovha ku fikela eka mpimo lowukulu lowu hi wu kotaka. Loko hi felela kumbe hi tinyiketela hi ri karhi hi n’unun’uta kumbe ku nyikela hi swilo swa hina hi ku gungula, leswi a a swi ta fana ni ku kanganyisa Xikwembu.—Ringanisa Luka 21:1-4.
Va Katekisiwa Va Kondza Va Eneriseka
18, 19. Xana vanhu va Yehovha va katekisiwe njhani hi ku tisa vukhume bya vona hinkwabyo?
18 Ku sukela hi 1919, vanhu va Yehovha va swi amukele hi mandla mambirhi ku tirhisa nkarhi, matimba ni mali ya vona eka swilaveko swa ntirho wo chumayela. Kunene va tise vukhume hinkwabyo endlwini ya vuhlayiselo. Hikwalaho ka sweswo, Yehovha u hetisise xitshembiso xakwe ni ku va chululela mikateko va kondza va eneriseka. Leswi swi vonake ngopfu hi ku andza ka vona hi nhlayo leyikulu. Ku sukela eka magidi ma nga ri mangani ya vatotiwa lava a a va tirhela Yehovha hi nkarhi lowu a teke ha wona etempeleni hi 1918, vatotiwa ni vanghana va vona va andze ku ta fikela laha namuntlha va endlaka nhlayo leyi engetelekeke yo tlula mune wa timiliyoni ematikweni yo hambana ya 211. (Esaya 60:22) Lava va tlhele va katekisiwa hi ku kula loku yaka emahlweni ka ku twisisa ntiyiso. Rito ra vuprofeta ri endliwe ri tiya eka vona. Ntshembo wa ku hetiseka ka makungu ya Yehovha wu simekiwe hi laha ku tiyeke. (2 Petro 1:19) I vanhu lava ‘dyondzisiwaka hi Yehovha’ hakunene.—Esaya 54:13.
19 Hi ku tirhisa Malakiya, Yehovha u vhumbhe mikateko yin’wana: “Kwalaho la’v̌a tšhav̌aka Yehova v̌a v̌ulav̌ula kuṅwe, uṅwana ni makwav̌o, kutani Yehova a riya ndlev̌e, a yingisela; buku ya šiṭunḍušo yi ṭariwa e mahlweni ka yena, yi ṭaleriwa la’v̌a tšhav̌aka Yehova ni la’v̌a ṭunḍukaka v̌ito ra yena.” (Malakiya 3:16) Etinhlengeletanweni hinkwato leti ti tivulaka ta Vukreste, i Timbhoni ta Yehovha ntsena leti tsundzukaka vito ra yena ni ku tlhela ti ri kwetsimisa exikarhi ka tinxaka. (Pisalema 34:3) Vona ndlela yonghasi leyi ti tsakaka ha yona hi ku tiyisekisiwa leswaku Yehovha wa byi tsundzuka vutshembeki bya tona!
20, 21. (a) Xana i vuxaka byihi lebyi katekisiweke lebyi Vakreste va ntiyiso va byi tsakelaka? (b) Eka Vakreste, xana i ku hambana kwihi loku yaka ku vonaka ngopfu?
20 Masalela lama totiweke i vanhu va Yehovha vo hlawuleka, swin’we ni ntshungu lowukulu, lowu khitikanelaka ku hlanganyela na vona, wu tshovela na vona mikateko ya vugandzeri lebyi tengeke. (Zakariya 8:23) Hi ku tirhisa Malakiya, Yehovha u tshembisile a ku: “V̌a ta v̌a v̌a mina hi šiv̌iri e sikwini le’ri nga ta endliwa hi mina; nḍi ta v̌a ṭeṭelela ku fana ni loko munhu a ṭeṭelela ṅwana wa yena l’a ṅwi tirelaka.” (Malakiya 3:17) Mayana nkateko wa leswaku Yehovha u ni ntsetselelo wonghasi eka vona!
21 Kunene, ku hambana ka Vukreste bya ntiyiso ni bya mavunwa ku ya ku vonaka ngopfu swinene. Loko vanhu va Yehovha va lwela ku hlayisa mimpimanyeto ya yena, Vujagana byi ya byi mbombomela ngopfu eka mahanyelo lama thyakeke ya misava leyi. Kunene, marito ya Yehovha ma ve ya ntiyiso: “Mi ta tlhela mi v̌ona ku hambana lo’ku nga kona e ka l’a lulameke ni lo’wo biha, ni ka l’a tirelaka Šikwembu ni l’a nga ši tireliki!”—Malakiya 3:18.
22. I mikateko yihi leyi hi nga tiyisekaka leswaku hi ta yi kuma loko hi hambeta hi tisa vukhume hinkwabyo?
22 Ku nga ri khale, siku ra ku avanyisa ri ta fika eka Vakreste va mavunwa. “V̌onani, siku ra ta, le’ri hisaka e ku fana ni nḍilo wa šitiko, kutani v̌atikukumuši hikwav̌o ni hikwav̌o la’v̌a endlaka ŝo biha v̌a ta kotisa byanyi bya ku oma; siku le’ri taka ri ta v̌a hisa, ku v̌ula Yehova wa mav̌andla.” (Malakiya 4:1) Vanhu va Yehovha va swi tiva leswaku u ta va sirhelela enkarhini wolowo, hi laha a sirheleleke ha kona tiko rakwe ra moya endzhaku hi 70 C.E. (Malakiya 4:2) Vona ntsako lowu va vaka na wona hi ku va ni xitiyisekiso xolexo! Hikwalaho, ku fikela enkarhini wolowo, un’wana ni un’wana wa hina a kombise ku tlangela ni ku rhandza ka hina Yehovha hi ku tisa vukhume hinkwabyo endlwini ya vuhlayiselo. Kutani, hi nga tiyiseka leswaku u ta ya emahlweni a hi katekisa ku kondza hi eneriseka.
[Nhlamuselo ya le hansi]
a Ku kuma rungula leri engetelekeke, languta Xihondzo xo Rindza xa June 15, 1987, matluka 14-20.
Xana U Nga Hlamusela?
◻ Eminkarhini ya manguva lawa, xana Yehovha u te rini etempeleni swin’we ni murhumiwa wa yena wa ntwanano?
◻ Xana i mani nandza wo tshembeka ni wa vutlharhi, naswona i ku basisiwa kwihi loku a a ku lava endzhaku ka 1918?
◻ I muxaka muni wa magandzelo ya moya lowu Vakreste va ntiyiso va wu tisaka eka Yehovha?
◻ Xana i vukhume byihi lebyi Vakreste va rhambiwaka ku byi tisa endlwini ya vuhlayiselo?
◻ Xana i mikateko yihi leyi vanhu va Xikwembu va yi kumaka hi ku nyikela vukhume bya moya?
[Xifaniso lexi nga eka tluka 15]
Vukhume bya hina bya moya byi katsa ku nyikela hi matimba ya hina ni swilo swa hina leswaku hi aka Tiholo ta Mfumo
[Xifaniso lexi nga eka tluka 16]
Hikwalaho ko va Yehovha a katekise vanhu va yena, miako yo tala yi lavekile, ku katsa ni Tiholo ta Mfumo ni Tiholo ta Tinhlengeletano