Xiviko Xa Vahuweleri Va Mfumo

Va Hundzule Ndlela Leyi A Va Hanya Ha Yona

HANDLE ko kanakana u va vonile va vulavula ni van’wana eswitarateni, va famba hi yindlu ni yindlu, kumbe va hlanganyela minhlangano ya Vukreste eTiholweni ta Mfumo. Hi vulavula hi vantshwa lava ambalaka kahle va Timbhoni ta Yehovha. U nga ha gimeta hi leswaku i Timbhoni hi leswi vatswari va vona va va dyondziseke ku va tona, kavula, swi tano eka vunyingi bya vona. Hi hala tlhelo, ku na vantshwa van’wana lava nga ni masungulo lama hambaneke swinene, ni lava vutomi bya vona byo sungula, byi hambaneke swinene ni lebyi va hanyaka byona sweswi. Hi xikombiso, lava kombisiweke etlukeni leri landzelaka a va hanya ni mintlawa leyi hanyelo ra yona a ku ri vugevenga ni ku tirhisa swidzidzirisi hi ndlela yo biha. I yini lexi endleke leswaku va hundzula vutomi bya vona hi ku helela? A hi endzeleni doroba rin’wana eNorway kutani hi tihlanganisa ni vantshwa vo tano lava hundzukeke.

Masungulo Ya Ku Hundzuka

Loko Timbhoni timbirhi ti hlangana na Annette entirhweni wa yindlu na yindlu, a a ri na malembe ya 19. Wa tsundzuka: “A ndzi byeriwe ko tala leswaku ndzi nga tshuki ndzi vulavula ni Timbhoni ta Yehovha, kambe hi ku lava ku tiva, ndzi va pfumelele va nghena.” U sungule ku tirhisa swidzidzirisi ku sukela loko a ri ni malembe ya 11, naswona u katsekile eka vukhamba byo hambana-hambana ni ku yiva mimovha.

Mahungu lamanene ya Mfumo ma n’wi tsakisile. Ngopfu-ngopfu u khutaziwe hi ntshembo wo pfuka eku feni, hi mhaka ya leswi mana wakwe a nga fa loko yena a ri ni malembe ya ntlhanu. Kutani u amukele dyondzo ya le kaya ya Bibele ya mahala, ivi a sungula ku ta eminhlanganweni eHolweni ya Mfumo. U byele xigangu xakwe ni van’wana leswi a a ri ku swi dyondzeni. Vuyelo bya kona byi ve byihi? A va nga lavi ku twa nchumu hi vugandzeri bya ntiyiso, kutani va vula leswaku Annette u xisiwile. Hambi swi ri tano, van’wana va lava a va kaneta swinene, endzhaku va sungule ku dyondza Bibele.

Xikombiso xin’wana i Espen, jaha ra malembe ya 20. U twe mahungu lamanene ya Mfumo hi xigangu xa Annette, kutani xikan’we-kan’we a lava dyondzo ya Bibele. Kambe, a a rindzele ku tirhela xigwevo xa le khotsweni xa tin’hweti ta mune, tanihi leswi a katseka eku yiveni ka swidzidzirisi naswona kukota Annette, a katseka eka vukhamba byo hambana-hambana. A a dzaha fole, mbangi ni swidzidzirisi swin’wana. I yini lexi sweswi xi endlaka leswaku munhu loyi a katsekeke eka swilo swo tano a lava ku dyondza Bibele? Espen u sungule ku vona vuhava bya hanyelo rakwe ni leswaku ri hava xikongomelo. Wa hlamusela: “Ndzi kokiwe hi switshembiso swa Bibele swa nkarhi lowu taka, leswi swi ndzi nyike xikongomelo evuton’wini. Hi loko ndzi sungula ku dyondza, leswaku ndzi kumisisa loko ndzi byeriwe ntiyiso hakunene.”

Van’wana Va Lava Ku Dyondza Bibele

Enkarhini lowu, jaha leri tshamaka endhawini yin’we ni vantshwa lava boxiweke, ri twe mahungu lamanene ivi ri sungula ku dyondza ni ku ta eminhlanganweni. Ku sunguriwe dyondzo ni un’wana wa vantshwa lava, ivi a sungula ku hlanganyela. Endzhakunyana ka sweswo, jaha rin’wana ri joyine vanghana va rona eku dyondzeni ka Bibele kutani ri endla nhluvuko hi tlhelo ra moya. Hi loko muntshwa un’wana a tsakisiwa hi ku hundzuka loku a ku endliwa hi vanghana va yena, kutani endzhaku ka nkarhinyana, u lave ku dyondza Bibele.

Gilbert, mutivi wa vuyimbeleri lontsongo, un’wana wa ntlawa lowu, u sungule ku dyondza Bibele. Vatswari va yena va fe hi khensa, kutani u chaveleriwe hi ntshembo wa Bibele wa ku pfuxiwa ka vafi. (Yohane 5:28, 29) Na yena a a dzaha mbangi, a hanya vutomi lebyi nga tsakisiki naswona a navela ku va mutlangi-nkulu wa vuyimbeleri bya rock. Hambi swi ri tano, hi ku famba ka nkarhi, u endle nhluvuko lowunene hi tlhelo ra moya kutani hi ku hatlisa a endla xiboho xa ku va Mbhoni ya Yehovha. Eku heteleleni, ndzisana ya Espen na yona yi sungule ku lavisisa Bibele ni ku hlanganyela ni Timbhoni.

Ntiyiso Wa Bibele Wa Byi Hundzula Vutomi

Ku ve ni ku hundzuka lokukulu eka vantshwa lava, lava a va ambala hi ndlela ya vusopfa, va nga kami misisi ni ku katseka eka swidzidzirisi, vukhamba ni vugevenga byin’wana. Annette i muhuweleri lonene wa Mfumo naswona u tirhe tanihi phayona ku ringana lembe. Espen na Gilbert va tirhe tanihi maphayona ya nkarhinyana, nakambe i malandza ya vutirheli. Hinkwavo ka vona va teke evandlheni ra Vukreste. Van’wana va mune lava na vona a va ri eka ntlawa wun’we i vahuweleri lava chivirikaka va Mfumo!

Ku vuriwa yini hi xigwevo xa tin’hweti ta mune lexi Espen a a fanele a xi tirhela? Hikwalaho ka ku hundzuka loku a ku endleke evuton’wini bya yena, xigwevo xa yena xi hundzuriwe xi va ntirho wa tiawara ta 80 ntsena. Hi mpfumelelo wa maphorisa ni van’wana, u hete tiawara leti a tirha eHolweni ya Mfumo ya Timbhoni ta Yehovha. Maphorisa ma tsakisiwe ngopfu hi lunghiselelo leri.

Ina, vantshwa vo tala emisaveni hinkwayo va kule va ri swigevenga. Kambe ntiyiso wa Rito ra Xikwembu wu va nyike tinhlamulo ta swivutiso swa nkoka ni ntshembo lowu tiyeke wa vumundzuku. Kutani, a va ha ri swigevenga kumbe vatirhisi va swidzidzirisi, naswona a va ha ambali hi ndlela ya vusopfa. Leswi va hundzuleke ndlela leyi a va hanya ha yona, va fana kahle ni vanhu lava boxiweke laha henhla—vantshwa lava ambaleke kahle ni lava va nga Timbhoni ta Yehovha leti hisekaka. Va lava ku byela van’wana hi ntlhantlho wa xiviri wa Bibele eka swiphiqo leswi vantshwa vo tala va nga na swona namuntlha.—Vona 1 Vakorinto 6:9-11.

[Xifaniso lexi nga eka tluka 8]

Vantshwa va le Norway va amukela ntiyiso