Ndzima 35

Ndzi Nga Swi Tshikisa Ku Yini Swidzidziharisi?

XANA u godzomberiwe hi swidzidziharisi? U nga ha va u swi tiva leswaku ku godzomberiwa ka wena ku onha mianakanyo ni miri wa wena. U nga ha va u ringetile ku swi tshika kambe u tlhela u sungula ku swi tirhisa. Loko swi ri tano, u nga heli matimba. Van’wana va swi kotile ku tshika ku godzomberiwa hi swidzidziharisi kutani na wena u nga swi kota ku tshika! Hi xikombiso, xiya leswi vanhu vanharhu lava humaka eka mindhavuko yo hambana swinene va swi vulaka malunghana ni ndlela leyi va swi tshikeke ha yona.

VITO Marta

NDLELA LEYI NDZI KURISIWEKE HA YONA Manana a a nga tekiwanga loko a ndzi veleka, hikwalaho mina na ndzisana ya mina ya nhwanyana hi kurisiwe hi nga ri na tatana. Ku sukela loko ndzi ri ni malembe ya kwalomu ka 12, ndzi sungule ku ya eka tidisko ni manana un’wana loyi a a rhandza ku cina. A ndzi rhandza ku vulavula na vanhu naswona ku nga ri khale ndzi sungule ku tolovelana ni vanhu lava a va ri ni mikhuva yo biha. Loko ndzi ri ni malembe ya 13 ndzi sungule ku dzaha swidzidziharisi. Ndzi tlhele ndzi sungula ku dzaha khokheyini. Eku sunguleni, a ndzi swi tsakela ku dzaha swidzidziharisi. Kambe endzhaku ka nkarhi ndzi sungule ku va ni mijamujamu naswona ndzi sungule ku chava xin’wana ni xin’wana. Naswona loko swidzidziharisi swi heta ku tirha a ndzi teriwa hi mianakanyo ya ku tidlaya. A ndzi swi lava ku tshika ku dzaha swidzidziharisi kambe a ndzi nga swi koti.

NDLELA LEYI NDZI SWI TSHIKEKE HA YONA Ndzi sungule ku anakanya hi Xikwembu naswona ndzi tlhele ndzi ya ekerekeni ko hlayanyana. Kambe a ndzi titwa ndzi tshikileleke swinene. Loko ndzi ri ni malembe ya 18, ndzi ye ndzi ya tshama ni jaha ra mina ivi hi va ni n’wana wa mufana. Ku va ni n’wana swi endle leswaku ndzi swi lava swinene ku cinca ndlela leyi a ndzi hanya ha yona. Khale ka munghana wa mina u rhurhele endlwini leyi a yi langutane ni laha a ndzi tshama kona. U ndzi endzerile kutani a ndzi vutisa leswaku ndza ha pfukile. Ndzi nambe ndzi n’wi phofulela ta le mbilwini ya mina. U vule leswaku yena se i Mbhoni ya Yehovha naswona u vule leswaku a nga dyondza Bibele na mina. Hiloko ndzi pfumela.

Ndzi dyondze leswaku ndlela leyi a ndzi hanya ha yona a yi nga xi tsakisi Xikwembu nileswaku a ndzi fanele ndzi tshika ku tirhisa swidzidziharisi ni ku dzaha fole. Kambe a swi ndzi tikela ku tshika swidzidziharisi. Hi siku a ndzi kombela Yehovha Xikwembu minkarhi yo hlaya leswaku a ndzi pfuna ndzi tshika mikhuva ya mina yo biha. A ndzi lava ku n’wi tsakisa. (Swivuriso 27:11) Endzhaku ka tin’hweti ta tsevu ndzi dyondzeriwa Bibele ndzi tlhela ndzi tihlanganisa ni Timbhoni ta Yehovha, ndzi swi kotile ku tshika swidzidziharisi. Sweswi vutomi bya mina byi ni xikongomelo. A ndza ha tshami ndzi tshikilelekile. Ndzi hlangane ni wanuna un’wana lonene la nga Mukreste ivi hi tekana. Ndzi kurise n’wana wa mina hi milawu ya le Bibeleni. Ndza n’wi nkhensa swinene Yehovha hileswi a tweke swikhongelo swa mina a tlhela a ndzi pfuna!

VITO Marcio

NDLELA LEYI NDZI KURISIWEKE HA YONA Ndzi kulele endhawini leyi nga ehandle ka doroba ra Santo André, leri nga ni vanhu vo tala swinene exifundzheni xa São Paulo le Brazil. Ndzi sungule ku dzaha fole, swidzidziharisi ndzi tlhela ndzi yiva ndza ha ri ntsongo. Vanghana va mina va nga ri vangani a va yiva timovha va tlhela va xavisa swidzidziharisi. Un’wana wa vona a a nyika vantshwa va laha a hi tshama kona swidzidziharisi. Loko swidzidziharisi se swi va godzomberile, a va fanele va ta eka yena va ta swi xava.

Maphorisa a ma tshama ma ri karhi ma famba-famba endhawini ya ka hina naswona ndzi khomiwile ko hlayanyana hikwalaho ka milandzu leyi nga nyawuriki ndzi tlhela ndzi khomiwa kan’we hileswi a ku soriwa leswaku ndzi xavisa swidzidziharisi. Minkarhi yo hlaya a ndzi hlayisela ntlawa wa swigevenga swilo leswi yiviweke ni swibamu endlwini ya mina.

Vanhu a va ndzi chava. Mahlo ya mina a ma tshwukile. A ndzi nga n’wayiteli. Entiyisweni, xikandza xa mina a xi tshama xi languteka tanihi xa munhu loyi a lavaka ku dlaya munhu wo karhi. Ndzi thyiwe vito ra “Tufão” (Xidzedze) hikuva kun’wana ni kun’wana laha a ndzi ya kona, a ndzi vanga swiphiqo. Nakambe a ndzi ri xindzendzele ndzi tlhela ndzi va ni mahanyelo yo biha. Vanghana va mina vo tala va file kumbe va hetelele va ri ekhotsweni. A ndzi tshikileleke swinene lerova ndzi kale ndzi bohelela ntambhu ensinyeni ndzi ringeta ku tidlaya.

NDLELA LEYI NDZI SWI TSHIKEKE HA YONA SWIDZIDZIHARISI Ndzi kombele Xikwembu leswaku xi ndzi pfuna. Eku heteleleni, ndzi hlangane ni Timbhoni ta Yehovha ivi ndzi sungula ku dyondza Bibele. Ndzi dyondze leswaku Xikwembu xi ni vito, ku nga Yehovha nileswaku xa khathala xi tlhela xi pfuna lava ringetaka hi matimba leswaku va hanya hi milawu ya xona. (Pisalema 83:18; 1 Petro 5:6, 7) A ndzi fanele ndzi cinca swilo swo tala evuton’wini bya mina. Nchumu wun’wana wo tika lowu a ndzi fanele ndzi wu cinca a ku ri ku dyondza ku n’wayitela.

A ndzi tshamela ku kombela Yehovha leswaku a ndzi pfuna naswona a ndzi tirhisa nkongomiso wa le Bibeleni. Hi xikombiso, ndzi tshike ku tihlanganisa ni vanghana va mina va khale ndzi tlhela ndzi papalata tindhawu leti ku xavisiwaka byala eka tona. Ndzi hlawule ku tihlanganisa ni vanhu lava a va hanya hi milawu ya le Bibeleni. A swi tika swinene kambe a ndza ha yivi naswona a ndza ha vangi swiphiqo. Naswona se ndzi ni malembe yo tlula khume ndzi nga tirhisi swidzidziharisi.

VITO Craig

NDLELA LEYI NDZI KURISIWEKE HA YONA Ndzi kuriseriwe epurasini eDzongeni wa Australia. Tatana a a ri xindzendzele naswona yena na Manana va hambane loko ndzi ri ni malembe ya nhungu. Manana u tlhele a tekiwa naswona ndzi tshame na yena kukondza ndzi va ni malembe ya 17. Hi lembe rero ndzi dyondze ku tsemeta voya bya tinyimpfu naswona ndzi sungule ku tshama ni mintlawa ya vatsemeti lava a va ya kun’wana ni kun’wana laha a ku ri ni ntirho. Ndzi sungule ku tirhisa swidzidziharisi swo hambana-hambana ni ku nwa byala ku tlula mpimo. Ndzi tshike misisi ya mina yi leha. Endzhaku ka sweswo ndzi yi tote mafurha yo karhi ivi ndzi yi luka kutani ndzi yi hoxa vuhlalu. Ndzi sungule ku vondzoka vanhu ni ku va khoma hi ndlela yo biha naswona ndzi ve ni ximbilwambilwana. Ndzi pfaleriwe ekhotsweni minkarhi yo tala.

Ndzi rhurhele edorobeni leritsongo eVupela-dyambu bya Australia ndzi fika ndzi tshama na ntombhi leyi a ndzi rhandzana na yona leyi a yi tirha ku xavisa byala ehotela ya le ndhawini leyi a hi tshama eka yona. Havumbirhi bya hina a hi dzaha hi tlhela hi nwa naswona a hi tibyalele mbangi ya hina.

NDLELA LEYI NDZI SWI TSHIKEKE HA YONA SWIDZIDZIHARISI A ha ha ku tshovela mbangi ya hina loko Timbhoni ta Yehovha ti gongondza enyangweni wa yindlu ya hina ya khale leyi se a yi hlakarile. A ndzi amukelanga leswi ti swi vuleke ntsena. Ematshan’weni ya sweswo, hi ku famba ka nkarhi, ndzi tikhorwisile leswaku leswi Bibele yi swi vulaka i ntiyiso. Kutani hakatsongo-tsongo, ndzi lwisane ni swiphiqo swa mina ha xin’we-xin’we.

Ku nga ri khale ndzi swi vonile leswaku ndzi fanele ndzi tshika ku dzaha mbangi. Xana sweswo a swi ta katsa yini? A ndzi tirhe hi matimba leswaku ndzi byala mbangi leyi, kutani eku sunguleni a ndzi ehleketa ku yi nyika van’wana. Kambe ndzi swi vonile leswaku xexo a ku nga ri xiboho lexinene kutani ndzi nambe ndzi yi hisa. Xikhongelo xi ndzi pfune swinene leswaku ndzi hlula xiphiqo xa mina xa ku tirhisa swidzidziharisi ni ku nwa ku tlula mpimo. Ndzi kombele moya wa Xikwembu leswaku wu ndzi pfuna ndzi lwa ni swiphiqo swa mina ndzi tlhela ndzi swi hlula. Ndzi tlhele ndzi tshika ku tihlanganisa ni vanhu lava a va ndzi khutaza leswaku ndzi va ni mikhuva yo biha. Loko ndzi ri karhi ndzi dyondza Bibele ndzi tlhela ndzi tirhisa leswi ndzi swi dyondzaka, ndzi ve ni xivindzi lexi a ndzi xi lava leswaku ndzi tshika mikhuva ya mina yo biha. Ntombhi leyi a ndzi tshama na yona, na yona yi dyondze Bibele yi tlhela yi tshika mikhuva ni mahanyelo ya yona yo biha. Hi tekanile. Se hi ni malembe ya 21 hi tiphina hi rihanyo lerinene naswona sweswi hi tsakela ku kurisa vana vambirhi va vafana. Ndza rhurhumela loko ndzi anakanya leswaku vutomi bya mina a byi ta va byi ri njhani loko Yehovha a a nga ndzi pfunanga leswaku ndzi cinca ndlela a ndzi hanya ha yona.

MATSALWA

“Yehovha i ntamu wa mina ni matimba ya mina.”—Esaya 12:2.

XITSUNDZUXO

Loko swi koteka, papalata vanhu, tindhawu ni swilo leswi fambisanaka ni mukhuva wa wena wa khale wa ku tirhisa swidzidziharisi. Nkambisiso wu kombisa leswaku ku vona ntsena swilo sweswo swi nga endla leswaku u navela swidzidziharisi.

XANA A WU SWI TIVA LESWAKU . . . ?

Ku tirhisa swidzidziharisi hi ndlela yo biha swi nga ha cinca ndlela leyi byongo bya wena byi tirhaka ha yona.

LESWI NDZI TIYIMISELEKE KU SWI ENDLA!

Loko ndzo tlhela ndzi tirhisa swidzidziharisi, ndzi ta ․․․․․

Leswi ndzi lavaka ku vutisa (va-)mutswari wa mina hi mhaka leyi hi leswi ․․․․․

U NGA KU YINI?

● Ha yini munhu a nga ha bohekaka ku endla ku cinca lokukulu swinene evuton’wini bya yena loko a lava ku tshika ku tirhisa swidzidziharisi?

● Ku dyondza ntiyiso malunghana ni Xikwembu swi nga pfuna njhani?

[Marito lama tshahiweke exihlokweni lama nga eka tluka 253]

“Sweswi ndzi ni ntsako naswona vutomi bya mina byi ni xikongomelo hikwalaho ko hanya hi milawu leyi tlakukeke ya le Bibeleni.”—Marta

[Xifaniso lexi nga eka tluka 256]

Ku tshika ku godzomberiwa hi nchumu wo karhi swi fana ni ku baleka endlwini leyi tshwaka—u ta siya swilo swa wena endzhaku kambe u ta ponisa vutomi bya wena