“Avuxeni! Xana Wa Ri Tiva Vito Ra Xikwembu Ke?”

LE HOFISINI ya rhavi ra Timbhoni ta Yehovha eBrazil, ku amukeriwe papila leri a ri huma eka mahahlwa ya malembe ya 12 le mutini wa Fortaleza:

“Hi lembe ra 1990 loko hi ri eka ntangha ntlhanu, xikolo xa hina xi lunghiselele nkombiso wa swa sayense, swa ntivo-vuxongi ni wa swilo swa ndhavuko. Hi hlamusele mudyondzisi wa hina leswaku a a hi lava nkombiso wa hina wu hambana ni lowu vadyondzi lavan’wana a va kunguhate ku wu endla. Tanihi leswi a nga tshama a hi twa hi vulavula hi ta Yehovha na hi Bibele, u ringanyetile: ‘Kutani mi nga tsala hi ta Xikwembu xa n’wina!’

“Hi vone leswaku lowu a wu ri nkarhi lowunene wa ku nyikela vumbhoni ivi hi kunguhata ku veka Tibibele leti kombisaka vito ra Yehovha enkombisweni. Hi endle marito lama kurisiweke ya Pisalema 83:18 ivi hi ma damarheta eka xifaniso xa Bibele leyi pfuriweke. Nakambe, hi veke ku hundzuluxela ko hambana-hambana ka Bibele ehenhla ka tafula, loku nga ni vito ra Yehovha. Ehenhla ka tafula hi tlhele hi kombisa mixaka-xaka ya tibuku ta Tibibele. Emakumu ka tafula, hi veke VCR na TV leswaku hi ta komba vaendzi xikombiso xin’wana laha vito ra Yehovha ri tirhisiweke kona eka bayiskopo leyi dumeke.

“Hi nkarhi wa nkombiso, loko munhu a ta etafuleni ra hina, a hi ku: ‘Avuxeni! Xana wa ri tiva vito ra Xikwembu ke?’ Endzhaku ko nyika muendzi nkarhi wa ku hlamula, hi ye emahlweni hi ku: ‘Vona laha! Ku hundzuluxela ko tala ka Bibele ku kombisa leswaku vito ra xona i Yehovha,’ hi kombetela vito eTibibeleni to hambana-hambana, tanihi ya João Ferreira de Almeida, The Jerusalem Bible, na New World Translation. Endzhaku ka sweswo a hi tlanga xiphemu laha mutlangi-nkulu wa bayisikopo a kombisaka Yehovha tanihi vito ra Xikwembu. Loko vanhu va kombisa ku tsakela, hi va nyike magazini kumbe xiphephana lexi nga ni rungula leri engetelekeke.

“Un’wana wa vantshwa loyi a nga ta etafuleni ra hina u kombele buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. Mudyondzisi wa hina u kambisise buku leyi nge Making Your Family Life Happy ivi a ku: ‘Phela! I buku leyi tsakisaka swinene!’ Emakumu ya nkombiso, a hi fambise tibuku ta 7, swiphephana swa 18 ni timagazini ta 67. Hi nyikiwe xiyimo xa vunharhu enkombisweni. Kambe nchumu lowukulu ku tlula hinkwaswo, a hi tsakile hikwalaho ka lunghelo ra ku twarisa vito ra Xikwembu, ku nga Yehovha.”