Tsakani Hi Misava Leyi Tengeke Leyi Tshineleke!

KUNENE hi nga tsaka swonghasi leswi Yehovha, Xikwembu xo hleleka ni ku tenga a nga ta hetisisa xikongomelo xakwe xo sungula, xo endla misava hinkwayo yi va paradeyisi! (Esaya 11:6-9) Wa tshembisa: “Rito ra mina, le’ri humaka e noṅwini wa mina: Ri nga ka ri nga tlheleri ka mina ri nga si tira ntšhumu, ri nga si endla ku ranḍa ka mina.” ‘A swi endleki leswaku Xikwembu xi hemba,’ hikwalaho lawa a hi marito ya hava.—Esaya 55:11; Vaheveru 6:18.

Hi nga chaveleleka hi leswi Yehovha a nga ta nghenelela emahlweni ko va vanhu va vanga nthyakiso lowukulu lerova ku onhiwa ka vuxaka bya swivumbiwa ni mbangu wa swona ku nga ha siveleki!—Nhlavutelo 11:18.

Yehovha u ta herisa vanhu lava nga hundzukiki, lava sihalalaka va vanga nthyakiso, ni vanhu lava nonon’hwaka va honisa misinya ya yena ya milawu ya nhleleko ni ku basa. A nga kona la nga ta pfumeleriwa ku onha Paradeyisi leyi pfuxetiweke.—Swivuriso 2:20-22.

Loko Mfumo wa Xikwembu se wu fuma, ehansi ka nkongomiso wa Kreste Yesu, vanhu va ta dyondzisiwa ndlela yo herisa xihi ni xihi lexi seleke, lexi vangaka nthyakiso wa nyama. Hi nkarhi wolowo swi ta va swa nkoka leswaku hinkwawo malandza ya Xikwembu ma hisekela ku va ni xandla emilawini ya munhu hi yexe ni ya vanhu hinkwavo, leyi nga ta pfuneta eka mbhasiso wa misava hinkwayo lowu tlulaka hinkwayo leyi tshameke yi endliwa.—Ringanisa Ezekiyele 39:8-16.

Lava nga ta pona makumu ya mafambiselo ya sweswi ya swilo lama hombolokeke, va ta seketela lunghiselelo leri ra mbhasiso wa xiviri hi ku tinyiketela ni ku chivirika loku fanaka ni loku va tirhaka ha kona etsimeni ra mbhasiso wa moya namuntlha.—Pisalema 110:3.

Misava leyi tengeke yi ta ta hakunene, yi rhangeriwe hi tsima lerikulu eka hinkwawo ra mbhasiso lowukulu, lowu endliwaka hi Mfumo wa Xikwembu. Hinkwabyo vuthala bya nthyakiso byi ta susiwa. A ma nge he vi kona makhumbi lama mpfampfarhuteriweke. A ma nge he vi kona mabodlhela, swikotela, mapulasitiki, tincinghamu ni maphepha ya maswiti, maphepha-hungu, ni timagazini leti nga ta hangalaka ni ribuwa kumbe ndhawu leyi nga paradeyisi.

Tsakani hi misava leyi tengeke leyi tshineleke!

[Xifaniso lexi nga eka tluka 7]

Xana u ta hlanganyela embhasisweni wa misava hinkwayo lowu nga ta endliwa ku nga ri khale?