Ku Nga Vi Na Munhu Loyi A Onhaka Mikhuva Ya N’wina Leyinene

“Mi nga pfumeli ku xisiwa: ‘Vanghana lavo biha, va borisa mikhuva leyinene.’”—1 VAKORINTO 15:33.

1, 2. (a) Xana muapostola Pawulo u titwise ku yini hi Vakreste va Vakorinto, naswona ha yini? (b) Xana i ndzayo yihi leyi nga ta kambisisiwa?

MAWAKU matimba yonghasi ya rirhandzu ra vutswari! Ri susumetela vatswari ku tikarhatela vana va vona, va va dyondzisa ni ku va letela. Swi nga endleka leswaku muapostola Pawulo a nga vanga tatana wa xiviri, kambe u tsalele Vakreste va le Korinto a ku: “Hikuva hambi mi nga va ni vadyondzisi va madzana-dzana eka Kriste, a mi na vatatana lavo tala; hikuva, eka Kriste Yesu, ndzi hundzukile tata wa n’wina hi ku mi tivisa Mahungu Lamanene.”—1 Vakorinto 4:15.

² Emahlweni, Pawulo a a famba-fambe le Korinto, laha a chumayela Vayuda ni Vagriki. U va pfune ku vumba vandlha le Korinto. Eka papila rin’wana Pawulo u fanise nkhathalelo wa yena ni wa manana la khathalelaka, kambe a fana ni tatana eka Vakorinto. (1 Vatesalonika 2:7) Hi laha tatana wa xiviri la nga ni rirhandzu a endlaka ha kona, Pawulo u laye vana vakwe va moya. U nga ha pfuneka hi ndzayo leyi yi fanaka ni ya tatana eka Vakreste va le Korinto: “Mi nga pfumeli ku xisiwa: ‘vanghana lavo biha, va borisa mikhuva leyinene.’” (1 Vakorinto 15:33) Ha yini Pawulo a tsalele Vakorinto leswi? Xana hi nga yi tirhisa njhani ndzayo leyi?

Xitsundzuxo Xa Vona Na Hina

3, 4. Xana hi tiva yini hi Korinto ra lembe xidzana ro sungula ni vaaki va rona?

³ Eka lembe xidzana ro sungula, mutivi wa misava wa Mugriki Strabo u tsarile: “Korinto ri vuriwa leri ‘fuweke’ hikwalaho ka mabindzu ya rona, tanihi leswi ri nga tshama eka Xihlala-nkolo naswona ri nga ni mahlaluko mambirhi, lerin’wana ri kongoma le Asia, lerin’wana le Italy; kutani ri kota ku xaviselana nhundzu ni matiko lawa hamambirhi hi ku olova.” Endzhaku ka malembe man’wana ni man’wana mambirhi, Mintlangu ya Vaisthmi leyi a yi tiveka ngopfu a yi tisa mintshungu leyikulu le Korinto.

⁴ A va ri njhani vanhu va le doroba-nkulu leri a ri ri ntsindza wa vulawuri bya hulumendhe ni ntsindza wa vugandzeri bya Afrodite lebyi tsakeriwaka swinene? Profesa T. S. Evans wa hlamusela: “Vaaka-tiko [a va] ri kwalomu ka 400 000. Vanhu [a va ri] va ndhavuko lowunene, kambe a va ri ni mahanyelo yo biha, kahle-kahle a ya borile. . . . Vaaka-tiko va Magriki va le Akaya a va tiviwa hi vutlhari lebyi nga heriki ni ku rhandza ku tiva swilo leswintshwa. . . . Vutianakanyi bya vona a byi va endla va hatla va tiavanyisa hi mintlawa.”

5. Xana vamakwerhu va le Korinto a va langutane ni khombo rihi?

⁵ Hi ku famba ka nkarhi hambi ku ri vandlha ri hambanisiwile hi lava a va ha lawuriwa hi mianakanyo ya ku tikukumuxa. (1 Vakorinto 1:10-31; 3:2-9) Xiphiqo lexikulu a ku ri leswaku van’wana a va ku: “Ku hava ku pfuka ka vafi.” (1 Vakorinto 15:12; 2 Timotiya 2:16-18) Ku nga khathariseki leswaku a va pfumela yini (kumbe va ala yini), Pawulo u boheke ku va lulamisa hi vumbhoni lebyi tiyeke bya leswaku Kreste u “pfuxiwile eku feni.” Xisweswo, Vakreste a va ta tshemba leswaku Xikwembu xi ta va ‘nyika ku hlula hi Hosi ya hina Kreste.’ (1 Vakorinto 15:20, 51-57) Loko a wo va kona kwale, xana a wu ta ngheniwa hi moya wolowo?

6. Xana xitsundzuxo xa Pawulo eka 1 Vakorinto 15:33 a xi tirha ngopfu eka vamani?

⁶ Loko a ri karhi a va nyika vumbhoni lebyi tiyeke bya leswaku lava feke va ta pfuxiwa, Pawulo u va byele leswi: “Mi nga pfumeli ku xisiwa: ‘Vanghana lavo biha, va borisa mikhuva leyinene.’” Ku nyikeriwa ka xitsundzuxo lexi a ku ri mayelana ni lava a va hlanganyela ni vandlha lava a va nga pfumeli eka dyondzo ya ku pfuxiwa ka vafi. Xana a va nga tiyiseki hi mhaka yo karhi leyi a va nga yi twisisi? (Ringanisa Luka 24:38.) Nikatsongo. Pawulo u tsale leswaku “van’wana exikarhi ka n’wina va [ri], ku hava ku pfuka ka vafi,” kutani lava a va kaneta, va kongoma eku xandzukeni. Pawulo a a swi vona kahle leswaku a va ta borisa mikhuva ni mianakanyo leyinene ya van’wana.—Mintirho 20:30; 2 Petro 2:1.

7. Hi yihi ndlela yin’wana leyi hi nga yi tirhisaka ha yona 1 Vakorinto 15:33?

⁷ Xana hi nga xi tirhisa hi ndlela yihi xitsundzuxo xa Pawulo hi vanghana? A a nga vuli leswaku hi fanele hi ala ku pfuna munhu evandlheni loyi a tsandzekaka ku twisisa ndzimana kumbe dyondzo ya Bibele. Hakunene, Yuda 22, 23 yi hi khutaza ku pfuna lava kanakanaka hi ntwela-vusiwana. (Yakobo 5:19, 20) Hambi swi ri tano, xitsundzuxo xa Pawulo xa vutswari, xi fanele xi tirhisiwa loko munhu a hambeta a kaneta leswi hi swi tivaka swi ri ntiyiso wa Bibele kumbe a hambeta a vulavula hi ndlela yo kanakana kumbe ya ku kaneta. Hi fanele hi xalamuka ehenhleni ko endla vunghana ni munhu wa muxaka wolowo. Ina, loko munhu a hundzuka mugwinehi hi laha ku heleleke, varisi va moya va ta fanela ku endla matshalatshala ku sirheleta ntlhambi.—2 Timotiya 2:16-18; Tito 3:10, 11.

8. Hi nga endla njhani hi vutlharhi loko munhu a nga pfumelelani ni dyondzo ya Bibele?

⁸ Hi nga tlhela hi tirhisa marito ya Pawulo ya vutswari lama nga eka 1 Vakorinto 15:33 loko ku tiwa eka lava va nga ehandle ka vandlha lava va dyondzisaka tidyondzo ta mavunwa. Xana hi nga kokeka njhani hi va vanghana va vona? Swi nga ha endleka loko hi tsandzeke ku vona lava va nga pfuniwaka ku dyondza ntiyiso ni lava va ngo pfuxa mhaka leswaku va kota ku ku khutaza dyondzo ya mavunwa. Hi xikombiso, loko hi ri entirhweni wa hina wo vula vumbhoni, hi nga hlangana ni munhu loyi a kanetaka mhaka yo karhi kambe a swi lava leswaku hi ya emahlweni hi bula na yena ha yona. (Mintirho 17:32-34) Sweswo hi swoxe a swi fanelanga swi vanga xiphiqo, hikuva hi ntsako hi hlamusela ntiyiso wa Bibele eka un’wana ni un’wana loyi hakunene a lavaka ku wu tiva, hi tlhela hi tlhelela leswaku hi ta n’wi khorwisa hi vumbhoni. (1 Petro 3:15) Kambe, van’wana va nga ha va va nga swi tsakeli ku kuma ntiyiso wa Bibele.

9. Xana hi fanele hi endla yini loko ripfumelo ra hina ri tlhontlhiwa?

⁹ Vanhu vo tala va nga vulavula tiawara to tala, vhiki na vhiki, kambe ku nga ri hi leswaku va lava ntiyiso. Vo lava ku tsongahata ripfumelo ra wena va ri karhi va tlakusa dyondzo leyi vona va nga tisungulela yona, ku nga ha va hi Xiheveru, Xigriki, kumbe sayense ya ta hundzuluko. Loko Timbhoni tin’wana ti hlangana na vona, ti titwe ti hluriwile naswona ti hetelele ti endle xinakulobye lexikulu na vona xa dyondzo ya vukhongeri ya mavunwa, filosofi, kumbe xihoxo xa sayense. Swa tsakisa ku xiya leswaku Yesu a nga pfumelanga leswaku sweswo swi humelela eka yena, hambi leswi a ta va a hlurile eka ku kanerisana ni varhangeri va vukhongeri lava a va dyondze Xiheveru kumbe Xigriki. Loko a tlhontlhiwa Yesu u hlamule hi ku komisa ivi a yisa nyingiso wakwe eka lava titsongahataka, lava nga tinyimpfu hakunene.—Matewu 22:41-46; 1 Vakorinto 1:23–2:2.

10. Ha yini Vakreste lava nga ni tikhompyuta ni mpfumelelo wo pfumelela fambiselo ra marungula hi tintambhu va fanele va tivonela?

¹⁰ Tikhompyuta ta manguva lawa ti pfule swivandla swin’wana swo hlangana ni vanghana lavo biha. Tifeme tin’wana ta mabindzu ti pfumelele lava endlaka minyikelo ya timali lava tirhisaka tikhompyuta ni riqingho leswaku va rhumela rungula eka fambiselo ra tintambhu ra marungula; kutani munhu a nga rhumela rungula hi fambiselo ra marungula leri ri tirhisiwaka hi hinkwavo lava humesaka minyikelo. Leswi swi vumbe leswi vitaniwaka mbulavurisano hi tikhompyuta hi timhaka ta vukhongeri. Mukreste a nga ha nghenela mimbulavurisano yo tano naswona a nga ha heta tiawara to tala ni munhu la nga ni mianakanyo ya vugwinehi, loyi a nga ha vaka a susiwile evandlheni. Nkongomiso lowu nga eka 2 Yohane 9-11 wu kandziyisa xitsundzuxo xa Pawulo xa vutswari mayelana ni ku papalata vanghana lavo biha.a

Papalata Ku Hambukisiwa

11. Xiyimo xa mabindzu le Korinto a xi nyikela nkarhi wo endla yini?

¹¹ Hi laha swi kombisiweke, Korinto a ri ri xivindzi xa vuxavisi, ku ri ni switolo ni mabindzu yo tala. (1 Vakorinto 10:25) Vo tala lava a va ta eMintlangwini ya Vaisthmi a va tshama ematendeni, kutani hi nkarhi wa xiendlakalo lexi vaxavisi a va xavisa ematendeni kumbe ematshangeni lama nga ni lwangu lama rhwalekaka. (Ringanisa Mintirho 18:1-3.) Leswi swi pfune Pawulo leswaku a tirha a endla matende. Kutani a swi kota ku tirhisa ndhawu yakwe yo tirha leswaku a hangalasa mahungu lamanene. Profesa J. Murphy-O’Connor u tsarile: “Pawulo a a kota ku va fikelela a ri le xitolo lexi nga endhawini ya mabindzu leyi nga bizi swinene lexi languteke pato leri nga tala hi vanhu, a fikelela vatirhi-kulobye ni vaxavi, swin’we ni ntshungu lowu nga le handle. Hi minkarhi leyi a nga khomekangiki ngopfu, a a yima enyangweni a yimisa lava a vonaka onge va nga yingisa . . . Swa hlamarisa leswaku vumunhu ni ku vulavula ka yena loku ka matimba a ku hatlisanga ku n’wi endla a ‘tiviwa’ eka vanhu va kwalaho, naswona leswi a swi ta endla vakhekhelezi, ni lava hakunene va lavaka rungula leri va n’wi yingisa. . . . Vavasati lava tekiweke ni vatirhi va vona, lava va nga n’wi twa, a va ta hi xikongomelo xo ta eku xaveni. Hi nkarhi wa ku nonon’hwa ka swilo, loko nxaniso kumbe ku karhatiwanyana ku humelela, vapfumeri a va ta eka yena tanihi vaxavi. Xitolo lexi xi tlhele xi n’wi hlanganisa ni vatirhela-mfumo.”

12, 13. Xana 1 Vakorinto 15:33 yi nga tirha hi ndlela yihi leyi faneleke entirhweni?

¹² Hambi swi ri tano, Pawulo u fanele a swi xiyile leswi nga ha humelelaka hi “vanghana lavo biha” entirhweni. Na hina hi fanele hi endla tano. Lexi xiyekaka, Pawulo u kombise langutelo leri a ri tele exikarhi ka van’wana: “A hi dyeni hi nwa, hikuva mundzuku ha fa!” (1 Vakorinto 15:32) Endzhaku ka sweswo, ku landzela ndzayo yakwe ya vutswari: “Mi nga pfumeli ku xisiwa: ‘Vanghana lavo biha, va borisa mikhuva leyinene.’” Xana ku lava ku tiphina ni ntirho swi nga vanga khombo leri tumbeleke hi ndlela yihi?

¹³ Vakreste va fanele va va ni xinghana ni vatirhi-kulobye, naswona mintokoto ya lavo tala yi kombisa ndlela leyi swi nga pfulaka ha yona ndlela yo kota ku nyikela vumbhoni. Hambi swi ri tano mutirhi-kuloni a nga ha languta xinghana xa wena tanihi vunghana bya ku tshamisa swin’we mi tihungasela. A nga ha endla xirhambo xo dya swin’we hi nkarhi wo wisa, ku yimanyana endzhaku ka ntirho leswaku mi nwa, kumbe mi tihungasa hi ndlela yo karhi hi mahelo-vhiki. Munhu loyi a nga ha vonakala a ri ni tintswalo naswona a lulamile, naswona xirhambo xi nga ha vonaka xi nga ri na khombo. Kambe Pawulo wa hi tsundzuxa: “Mi nga pfumeli ku xisiwa.”

14. Xana Vakreste van’wana va kanganyisiwe njhani hi vanghana?

¹⁴ Vakreste van’wana va xisiwile. Hakatsongo-tsongo va sungule ku tshunxeka hi xinghana xa vona ni vatirhi-kulobye. Kumbexana swi nga ha sungula hi ku va hinkwenu mi rhandza ntlangu kumbe nchumu wo tihungasa lowu fanaka. Kumbexana munhu la nga riki Mukreste le ntirhweni a nga ha va ni tintswalo ni ku anakanyela van’wana swinene, ivi swi vangela leswaku mi heta nkarhi wo tala swin’we, hambi ku ri ku languta xinghana xa yena xi tlula xa van’wana evandlheni. Kutani xinghana xi nga ha endla leswaku u xwa eka nhlangano wun’we. Xi nga ha ku endla u vuya ni vusiku eka madyambu man’wana ivi u tshika mukhuva wa ku hlanganyela evutirhelini bya nsimu ni mixo. Swi nga ha fika ni laha u langutaka bayisikopo kumbe vhidiyo ya muxaka lowu hi ku ya hi nawu, Mukreste a ta wu papalata. Hi nga ha tibyela leswi, ‘Oho, mina swi nge ndzi humeleli sweswo.’ Kambe vo tala va lava va kanganyisiweke na vona va nga ha va va sungule hi ku vula tano. Hi fanele hi tivutisa, ‘Xana ndzi tiyimisele ku amukela xitsundzuxo xa Pawulo hi ndlela yihi?’

15. I langutelo rihi leri ringaniseriweke leri hi faneleke hi va na rona hi vaakelani?

¹⁵ Leswi ha ha ku swi vulaka mayelana ni le ntirhweni swi tirha ni le ka xinghana xa hina ni vaakelani. Entiyisweni, Vakreste va le Korinto ra khale a va ri na vona vaakelani. Eka tindhawu tin’wana swi tolovelekile leswaku vaakelani va va vanghana lavakulu ni ku pfunana. Ematiko-xikaya vaakelani va nga ha tshembela eka un’wana hikwalaho ka leswi va tshamaka voxe. Vuxaka bya vandyangu byi tiye swinene eka tinxaka tin’wana, lerova byi vanga leswaku va rhambana ngopfu loko va dya swakudya. Swi le rivaleni leswaku ku laveka langutelo leri ringaniseriweke, hi laha Yesu a kombiseke. (Luka 8:20, 21; Yohane 2:12) Xana leswi hi swi endlaka ni vaakelani ni maxaka ya hina, ha ha swi endla hi ndlela leyi a hi tolovele ku swi endla ha yona hi nga si va Vakreste? Ku ri na sweswo, xana sweswi a hi fanelanga ku kambisisa swiendlo sweswo ivi hi vutlharhi hi xiya leswaku hi fanele hi yima kwihi?

16. Xana marito ya Yesu eka Matewu 13:3, 4 ma fanele ma twisisiwa hi ndlela yihi?

¹⁶ Eka nkarhi wun’wana Yesu u tshama a fanisa rito ra Mfumo ni timbewu leti nga “wela endleleni; kutani tinyanyana ti ta, ti ta dya hinkwato.” (Matewu 13:3, 4, 19) Eminkarhini ya kona, misava leyi nga etlhelo ka ndlela a yi tiya hikuva vanhu a va famba-famba kwalaho. Swa fana ni hi vanhu vo tala. Evuton’wini bya vona va taleriwa hi vaakelani, maxaka, ni van’wana lava nghenaka va nga heli, va va endla va tshama va khomekile. Hi ndlela yo fanekisela, va kandziyela misava ya timbilu ta vona, va yi nonon’hwisa leswaku timbewu ta ntiyiso ti nga mili hi ku olova. Ku nonon’hwa koloko ku nga ha humelela ni le ka loyi ana se a nga Mukreste.

17. Xana xinghana ni vaakelani ni van’wana xi nga hi khumba hi ndlela yihi?

¹⁷ Vaakelani ni maxaka man’wana ya misava va nga ha va ni xinghana ni ku hi pfuna, kambe va nga tikombi va tsakela swilo swa moya kumbe ku rhandza leswo lulama. (Marka 10:21, 22; 2 Vakorinto 6:14) Ku va Mukreste a swi vuli leswaku hi tshika ku va ni xinghana, ni ku nga rhandzi vaakelani. Yesu u hi tsundzuxile leswaku hi rhandza van’wana. (Luka 10:29-37) Kambe xitsundzuxo xa Pawulo lexi huhuteriweke i xa nkoka leswaku hi tivonela eka vanghana va hina. Loko hi tirhisa ndzayo leyo sungula, a hi fanelanga hi rivala hi leyi a nga heta ha yona. Loko hi nga hlayisi mimpimanyeto hinkwayo emianakanyweni, mikhuva ya hina yi nga khumbeka. Xana mikhuva ya wena ya fana ni liya ya vaakelani kumbe maxaka ya wena emhakeni ya ku tshembeka kumbe ku yingisa milawu ya Khezari? Hi xikombiso, va nga ha anakanya leswaku hi tlhelo ro hakela xibalo, ku vika vunwa hi mali leyi u yi kumaka kumbe mpindzulo wa bindzu a swi na nandzu, naswona swi nga ku pfuna ku xi balekela. Va nga ha ku byeletela mavonelo ya vona loko mi ri karhi mi nwa kofi swin’we, mi tiwiserile kumbe loko va ku endzerile swa nkarhinyana. Xana sweswo swi nga khumba mikhuva ya wena ya ku anakanya ni ku tshembeka hi ndlela yihi? (Marka 12:17; Varhoma 12:2) “Mi nga pfumeli ku xisiwa: ‘Vanghana lavo biha va borisa mikhuva leyinene.’”

Ni Mikhuva Ya Vantshwa

18. Ha yini 1 Vakorinto 15:33 yi tirha ni le ka vantshwa?

¹⁸ Vantshwa va khumbiwa ngopfu hi leswi va swi vonaka ni ku swi twa. Xana a wu si va vona vana lava swikombisto kumbe mahanyelo ya vona ma fanaka swinene ni lawa ya vatswari kumbe vamakwavo wa vona? Kutani ke, swi nga hi hlamarisi, loko vana va kuceteriwa ngopfu hi vana lava va tlangaka na vona kumbe lava nghenaka na vona xikolo. (Ringanisa Matewu 11:16, 17.) Loko n’wana wa wena wa mufana kumbe wa nhwanyana a ri exikarhi ka vantshwa lava va nga xiximiki vatswari va vona loko va vulavula, ha yini u ehleketa leswaku leswi a swi nge va khumbi vana va wena? Ku vuriwa yini hi loko minkarhi yin’wana va twa vantshwa van’wana va rhuketela? Va ta endla yini loko tintangha ta vona le xikolweni kumbe vaakelani va nyanyuriwa hi tintanghu leta ha ku nghenaka efexenini kumbe hi swin’wetsi-n’wetsi leswi nga efexenini? Xana hi nga anakanya leswaku vantshwa lava va Vakreste a va nge kuceteriwi? Xana eka 1 Vakorinto 15:33 Pawulo u vule leswaku swo khumba lava nga ni malembe yo karhi ntsena?

19. Xana vatswari va fanele va ringeta ku nghenisa vonelo rihi eka vana va vona?

¹⁹ Loko u ri mutswari, xana u yi tekela enhlokweni ndzayo yoleyo loko u anakanyisisa kumbe u endla swiboho leswi khumbaka vana va wena? Kumbexana swi nga ku pfuna ku tiva leswaku leswi a swi vuli leswaku vantshwa hinkwavo lava vana va wena va tshamaka na vona va kwala mutini kumbe le xikolweni a va lulamanga. Van’wana va nga ha va vanene ni ku xiximeka, hi laha vaakelani van’wana, maxaka, ni vatirhi-kuloni van’wana va nga ha kona. Ringeta ku pfuna vana va wena va xiya leswi naswona va tiva leswaku wa ringanisela loko u tirhisa xitsundzuxo xa Pawulo xa vutlharhi ni xa vutswari lexi a xi ya eka Vakorinto. Loko va xiya ndlela leyi u ringaniselaka ha yona loko u endla swilo, swi nga va pfuna ku ku encisa.—Luka 6:40; 2 Timotiya 2:22.

20. Vantshwa, xana mi langutane na ntlhontlho wihi?

²⁰ N’wina lava ma ha riki vatsongo, ringetani ku xiya ndlela leyi mi nga tirhisaka ha yona xitsundzuxo xa Pawulo, mi ri karhi mi tiva leswaku i xa nkoka eka Mukreste un’wana ni un’wana, lonkulu ni lontsongo. Leswi swi nga ha tika, kambe ha yini u nga ringeti ku hlangavetana ni ntlhontlho lowu? Tsundzuka leswaku hi ku va u tive van’wana va vantshwa ku sukela evutsongwanini a swi vuli leswaku a va nge yi khumbi mikhuva ya wena, va nge yi borisi mikhuva leyi u yi akaka tanihi muntshwa wa Mukreste.—Swivuriso 2:1, 10-15.

Tindlela Letinene Ta Ku Sirhelela Mikhuva Ya Hina

21. (a) Xana hi fanele hi tiva yini hi vanghana? (b) Ha yini hi tiyiseka leswaku vanghana van’wana va nga tisa khombo?

²¹ Hinkwerhu ka hina hi lava xinghana. Hambi swi ri tano hi fanele hi xalamuka, hi xiya leswaku vanghana va hina va nga hi khumba, hi swilo leswinene kumbe leswo biha. Sweswo swi tikombile hi Adamu na hi hinkwavo lava landzeleke eka malembe xidzana hinkwawo ku sukela kwalaho. Hi xikombiso, Yoxafati, hosi leyinene ya Yuda, u tiphine hi musa ni hi mikateko ya Yehovha. Kambe endzhaku ka loko a pfumelele n’wana wa yena leswaku a teka nhwana wa Hosi Akabu wa Israyele, Yoxafati u sungule ku endla xinghana na Akabu. Xinghana xexo xo biha xi lave ku dlayisa Yoxafati. (2 Tihosi 8:16-18; 2 Tikronika 18:1-3, 29-31) Loko hi hlawula vanghana va hina hi vuhunguki, swi nga va ni khombo hi ndlela yoleyo.

22. I yini lexi hi fanelaka ku xi tekela enhlokweni, naswona hikwalaho ka yini?

²² Kutani ke, a hi tekeni xitsundzuxo xa rirhandzu lexi Pawulo a hi nyikaka xona eka 1 Vakorinto 15:33. Lawa a hi marito ntsena lawa hi nga ha vaka hi ma twe ko tala, lawa hi nga kotaka ku ma vula hi nhloko. Ma kombisa rirhandzu ra Pawulo ra vutswari leri a a ri na rona eka vamakwavo va le Korinto, naswona ri fika ni le ka hina. Naswona handle ko kanakana ma ni xitsundzuxo xa leswaku Tata wa hina wa le tilweni wa hi wundla hikuva u lava leswaku matshalatshala ya hina ma humelela.—1 Vakorinto 15:58.

[Nhlamuselo ya le hansi]

Xana Wa Tsundzuka?

◻ Xana Pawulo a yi tsalela yini 1 Vakorinto 15:33?

◻ Xana hi nga yi tirhisa njhani ndzayo xa Pawulo entirhweni?

◻ I langutelo rihi leri ringaniseriweke leri hi faneleke hi va na rona hi vaakelani?

◻ Ha yini 1 Vakorinto 15:33 yi ri ndzayo leyi faneleke ngopfu-ngopfu eka vantshwa?

[Xifaniso lexi nga eka tluka 17]

Pawulo u twarise mahungu lamanene a ri entirhweni

[Xifaniso lexi nga eka tluka 18]

Vantshwa van’wana va nga borisa mikhuva ya wena ya Vukreste